መልእክተ ጴጥሮስ 2 3

ምዕራፍ 3

በእንተ ዳግም ምጽአቱ ለእግዚእነ ኢየሱስ ክርስቶስ

1 # 1፥13። ወዛቲ ይእቲ አኀውየ ዳግሚትየ ዘጸሐፍኩ ለክሙ መጽሐፈ ከመ አንሥእክሙ በዘክሮ ወትዕቀብዋ በልብክሙ ለጽድቅ። 2ወከመ ትዘከሩ ቃለ ነቢያት ቀደምት ቅዱሳን ዘይቤሉ ወትእዛዘ እግዚእነ ወመድኀኒነ ኢየሱስ ክርስቶስ ዘአዘዘ ለነ ለሐዋርያት። 3#1ጢሞ. 4፥1። ወዘንተኒ ቅድሙ አእምሮ ከመ ሀለዎሙ ይምጽኡ በደኃሪ መዋዕል መስተአብዳን ለአስተአብዶ እለ የሐውሩ በፍትወተ ልቦሙ ወይብሉ አይቴ ውእቱ ቃሉ ዘይቤ ከመ ሀለዎ ይምጻእ። 4#ኢሳ. 5፥19፤ ሕዝ. 12፥22፤ ማቴ. 24፥38። ናሁ እመሰ አበዊነ ቀደምት ሞቱ እስመ ኵሉ ግብር ሀለወ በከመ ሀሎ እምፍጥረተ ዓለም። 5#ዘፍ. 1፥2-6፤ መዝ. 23፥2። ወኢየአምርዎ ለዝንቱ በፈቃዶሙ ከመ ሰማያትኒ ተፈጥራ እምትካት ወምድርኒ እምነ ማይ ወበማይ ጸንዐት በቃለ እግዚአብሔር። 6#2፥5፤ ዘፍ. 7፥21። ወዓለመ ትካትኒ ቦቱ አጥፍአ በማየ አይኅ። 7ወይእዜኒ ሰማይ ወምድር በውእቱ ቃል ዝጉባን ለእሳት ወዕቁባን እሙንቱ እስከ ዕለተ ደይን ወድምሳሴ ኃጥኣን ሰብእ። 8#መዝ. 89፥4። ወዘንተ ባሕቱ ኢትርስዑ አኀዊነ እስመ አሐቲ ዕለት በኀበ እግዚአብሔር ከመ ዐሠርቱ ምእት ዓመት ወዐሠርቱ ምእት ዓመት ከመ አሐቲ ዕለት። 9#ዕን. 2፥3፤ 1ጢሞ. 2፥4። ኢያጐነዲ እግዚአብሔር ቃለ ዘነበበ እስመቦ እለ ይብሉ ከመ ይጐነዲ ወባሕቱ ይትዔገሥ በእንቲኣሆሙ እስመ ኢይፈቅድ መነሂ ያማስን አላ ይነስሑ ለኵሉ ሰብእ ያርሕብ። 10#ማቴ. 21፥29፤ 24፥43፤ ሉቃ. 12፥39፤ 1ተሰ. 5፥2፤ ራእ. 16፥15፤ 20፥11። ወዕለቱሰ ለእግዚአብሔር ግብተ ትመጽእ ከመ ሰራቂ እንተ ባቲ ሰማያትኒ ይትረኀዋ ወይሴስላ ወኵሉ ፍጥረት ዘቀዲሙ በውዕየተ እሳት ይትመሰው ወምድርኒ ወኵሉ ዘላዕሌሃ ግብር ይውዒ። 11ወዝንቱ ኵሉ ተመሲዎ ጐጕኡ ከመ ተሀልዉ በምግባር ቅዱስ ዘጽድቅ። 12እንዘ ትሴፈዉ ዕለተ ምጽአቱ ለእግዚአብሔር እንተ ባቲ ሰማያትኒ ይረስና ወይትመሰዋ ወኵሉ ፍጥረት ይውዒ ወይትመሰው። 13#ኢሳ. 65፥17፤ 66፥22፤ ራእ. 21፥1-7፤ ዕብ. 12፥26-29። ሐዳሳተ ሰማያተ ወሐዳሰ ምድረ ንሴፎ ዘውስቴቶን የኀድር ጽድቅ። 14ወይእዜኒ አኀውየ ዘንተ እንዘ ትሴፈዉ ጐጕኡ ይርከብክሙ ዘእንበለ ርስሐት ወዘእንበለ ጌጋይ እንዘ ትሰናአዉ። 15#ሮሜ 2፥4። ወትዕግሥቱሰ ለእግዚእነ የሀብክሙ መድኀኒተ በከመ እኁነ ጳውሎስ ዘናፈቅር ጸሐፈ ለክሙ በእንተ ዘወሀቦ እግዚአብሔር ጥበበ። 16ዘከመ ሀሎ ውስተ ኵሉ መጻሕፍቲሁ ዘነበበ ውስቴቶን በእንቲኣሁ ለዝንቱ ወዘሰ ነበቡ እሙራን ሰብእ እለ ይሌብውዎ ወእለሰ አልቦሙ ትምህርት እለ ኢለበዉ ይመይጥዎ ለቃለ መጽሐፍ ከመ ሜጥዎን ለብዙኃት መጻሕፍት ለግዕዞሙ ወያማስኑ። 17#ማር. 13፥5፤ 9፥32። ወአንትሙሰ አኀዊነ አቅድሙ አእምሮ ወተዐቀቡ ከመ ኢትስሐቱ በዘኢይበቍዕ ትምህርት ከመ ኢትደቁ እምነ ምጽናዕክሙ። 18ተባዝኁ በእግዚእነ ወበአኰቴቱ ለኢየሱስ ክርስቶስ መድኃኒነ ወእግዚአብሔር አብ ዘሎቱ ስብሐት ይእዜኒ ወዘልፈኒ ወለዓለመ ዓለም አሜን።

መልአት መልእክተ ጴጥሮስ ዳግሚት።

ወስብሐት ለእግዚአብሔር አሜን።

Currently Selected:

መልእክተ ጴጥሮስ 2 3: ሐኪግ

Highlight

Copy