Jenesis 35

Nuarin tas alupas 35.

1 Et abrai Jekob a Atua mika yi apan Bedel. 2 Et iknipagki atmasimai asega an nimnim o un aien. 6. Et actaig natau Bedel aien. 8 Et mas a Tebora Alon-Bakud. 9 Et asan tas acis yi alwai Jekob a Atua Bedel. 16 Et apos Benjamin a Rejel, um mas an nefalaig ubutpotet pan Itar. 22 Et ago nedo has ehele Bilha a Ruben. 23 Ilpu hal u Jekob. 27 Et yetpan Aisak a Jekob Hibron. 28 Numoh vaig, im inmas vaig u Aisak, er atelmoi yin.

1IS tas ehele Jekob a Atua, um ika, Atidai aiek, um apan Bedel, um amen eahki; um ago natau eahki vai Atua is ehcohos ehelum aien, an nopan iyehki as aha aiek vai Isa etwam.

2Is ika a Jekob ehele ilpu hal o un, im lep ehele ra asega eris amen ehelen ara, Akumu atcijaig niji atmasimai ui tak atimi aijaua et amen ehelemia, um yiri caua, um aso caua ira apelumai et eche:

3intumu atidai akaija, um apan Bedel; ekpu ago natau eahki ainyak vai Atua, is atahaijeg intas alaigaheni unyak aien an nopan iyehki is ohocred inliinmopok ainyak, um amen ehelek an nefalaig iyehki kis atga iran ainyak.

4Eris alupai Jekob niji atmasimai ui tak atimi asega ara is amen ehele ra, im inteijeg asega is amen irai tikgara; is atelmoi a Jekob ithan cai alupas ubutpotet pan Sikem.

5Eris atga ura ara: eris imtitaig alupas Atua a nup urai iji maliyum asega marehed mihtag, eris eti apitac ilpu hal u Jekob ara.

6Is yetpan Lus a Jekob, tak idan Bedel, an pece Kenan, im natimi asega ehelen.

7Is actaig natau eahki aien, um aketo um anvi nidan nuarin iyehki par ika, Bedel, (Neom u Atua): is idim ehcohos pan ehelen a Atua eahki, an nopan iyehki is aha vai etwan aien.

8Ja is mas a Tebora intakata aminjinaig Ribeka, eris atelmoi yin ubutpotet pan Bedel itlian cai alupas is ethi: eris anvi nidan par ika Alon-Bakud, (Incai taigtaig).

9Is lep ehcohos pan ehele Jekob a Atua, is wat ahes Petaneram aien, um acis ye alwai yin.

10Is tas ehelen a Atua, um ika, Et idam Jekob: uhmu jim lep anvi nidam par ika Jekob, ja uhmu anvi nidam par ika Isreel: is anvi nidan aien par ika Isreel.

11Is ika ehelen a Atua, Ek Atua emda acen ainyak: namu asvalav aiek eri ahinag ara; erupu ahes ehelum a nup uran nelcau inyi ethi, im lep nup urai elcau inyi ahinag, erupu lep ahes ehelum a ilpu atimarid;

12ekpu lep alupai euc inpece inigki ainyak, kis alupai Ebraham im Aisak ainyak, ekpu lep alupai ilpu mopom ainyak.

13Is udei yin a Atua um aridjai an nohatag an nuarin iyehki is tas ehelen aien.

14Is aduwi inhat a Jekob mika yi itai asjaaicnaig an nuarin iyehki is tas ehelen a Atua: is atladwi nitai ahlap umnyi iran aien, is lep atladwi narakei iran aien,

15Is lep anvi nidan nuarin iyehki a Jekob is tas ehelen a Atua iran par ika Bedel.

16Eris ahes Bedel ara, um eti elvatga, ja par apan Efrad: is ahgei inhal o un a Rejel, ja is ehka napos yin vaig.

17Is wat ehka napos yin vaig, is ika ehelen a intakata aminjinaig yin, Namu jim imtitaig aiek; napu lep apos inhalav atamaig inigki aiek.

18Is anvi nidan aien par ika Benonai, (Inhal u nohocred unyak), ja is par auatiatiidi aien, (is idim mas aien:) ja is anvi nidan a etman par ika Benjamin, (Inhal an matak).

19Is mas a Rejel, eris lep atelmoi yin an nefalaig yetpan Efrad, tak idan Bedlehem.

20Is aduwi inhat asjaaicnaig an nehpanitai o un a Jekob: et amen inhat asjaaicnaig iyehki an nehpanitai u Rejel um uhum pam an nopan inig.

21Is atga o un a Isreel, um athai neom o un an nahaijin neom ijinies Itaiitac.

22Is wat amen an pece iyehki a Isreel, is apan a Ruben um amen ehele Bilha ehgai etman: is atahaijeg va nedo o un a Isreel, um edemda alupas vaig. Eris twelv a ilpu hal u Jekob:

23ilpu hal u Lia ji igki; nan, Ruben lumeto u Jekob; im Simeon, im Livai, im Juta, im Issakar, im Sebulun:

24ohwat hal u Rejel raigki; nan, Josef, im Benjamin:

25ohwat hal u Bilha naheca atahig u Rejel raigki; nan, Tan im Naftalai;

26ohwat hal u Silpa naheca atahig u Lia raigki; nan, Cat, im Eser: eris ilpu hal u Jekob ara sji igki, eris apos ra imi yin Petaneram.

27Is yetpan Mamri, tak idan Hibron, a Jekob ehele Aisak etman, an maliyum Arba, erus amen iran a Ebraham im Aisak.

28Is eteuc inmesese is wun huntret im eete (180) irai Aisak.

29Is auatialidi a Aisak, um mas; eris ati yin ehele ilpu atimi ehpan iran: is efatimi aien, um ahinag inmesese iran: erus atelmoi yin a Isa im Jekob ohwat hal o un.

Currently Selected:

Jenesis 35: VAO63

Highlight

Copy