Jenesis 34

Nuarin tas alupas 34.

1 Et auahas Taina a Sikem. 4 Et ugyi etman im ilpu atamaig iran aien mika eru atidai arau. 12 Era ika a ilpu hal u Jekob et upene, el era leh naperitome ira ra ara. 20 Erau leh updak atimi urau a Hemor im Sikem. 25 Era wat oplec has a nup u Sikem, era atgei ra a ilpu hal u Jekob, 27 um atoraliak itai an maliyum. 30 Et auoh ehcamai Simeon im Livai a Jekob.

1IS apan a Taina inhalav atahig u Jekob im Lia, um ateghe ilpu atahig an pece.

2Is wat ecet yiu a Sikem inhal u Hemor nup u Haivai, natimi alupas an pece, is emda aien um leh yin, um auahas yin.

3Is apol inliinmopoi Sikem irai Taina inhalav atahig u Jekob: is aiyu inliinmopon aien vai natahig iyehki, is tas updak ehelen aien.

4Is tas ehele Hemor etman a Sikem, um ika, Namu ugyi natahig inigki aiek ehgak.

5Is atahaijeg a Jekob, mika is ago nedo has vai Taina inhalav atahig o un aien: eris amen an lelitai a ilpu hal o un, um asgi niji itai eklim edo irai pece o un: is eti tas a Jekob um aitgaig napam ura.

6Is apan ehele Jekob a Hemor etmai Sikem mika yi tas ehelen.

7Eris wat atahaijeg va nedo iyehki a ilpu hal u Jekob, eris ahes an lelitai ara: is ohocred inliinmopora ara, um edemda alupas, va nedo o un, nikavaig, is ago nedo ahnag vai Isreel aien, um auahas inhalav atahig u Jekob; is itap nedo inigki.

8Is tas ehele ra a Hemor, um ika, Et merit alupas vai inhalav atahig unyimia a Sikem inhal unyak: ek ugyi caua ainyak mika aki atcijaig yin aijaua ehgan.

9Intumu asa atmehgan jipe akaija, um atcijaig ilpu halav atahig unyimia imi cama, um lucsei ilpu halav atahig unyima imi caua.

10Akumu amen ehelema aijaua; et eteuc inpece inigki an nuhup unyimia; akumu amen iran aijaua, um ahtai itai, um auarimtai itai, um ohuun niji itai iran.

11Is tas a Sikem ehele etman im lep ilpu atamaig iran, um ika, Etmu upene inliinmopomia aijaua vai nyak, ekpu alupai caua ainyak nitai inig akupu asaig aijaua.

12Akumu asuptecnaig nimtan alupas aijaua im nitai tup ahtai alupas, ekpu alupai caua ainyak et idivaig akupu asaig ehelek aijaua: jam atcijaig imi nyak natahig inigki ehgak.

13Eris asan tas efaifa ehele Sikem im Hemor etman a ilpu hal u Jekob, vaig inig nikavaig, is auahas Taina natahig ira ra aien:

14eris ika ehele rau ara, Et itap vai cama par atcijaig natahig irama imi natimi inig er eti aperitome iran; ecrupu ehcamai aijama va nedo inigki:

15ja et uce ecrupu adai intas unyimia aijama: El eka idivaig cama aijaua, um leh naperitome irai ilpu atamaig asega unyimia;

16el eka ago nedo inigki aijaua, ecrupu atcijaig ilpu halav atahig unyima imi caua aijama, um lep lucsei ilpu halav atahig unyimia ehgama; ecrupu amen ehelemia aijama, intupu tup ethi ache akaija.

17Ja el eka eti atahaijeg intas unyima aijaua, um eti aperitome iramia; ecrupu leh natahig irama aijama, um atga unyima.

18Is upene irai Hemor im Sikem inhal o un intas ura.

19Is auroauro a intakuras iyehki um ago nitai inigki, is aiyu inliinmopon aien vai inhalav atahig u Jekob: is esjilid nedo upene o un irai edo ura asega an nimnim u etman.

20Erus apan a Hemor im Sikem, an neucse nathatahau an maliyum urau, um tas ehele atimi an maliyum urau, um ika,

21Era ago nedo igpa natimi iji igki eheleija; va nitai inigki erumu amen ara an pece, um ahtai itai, um auarimtai itai iran; et idim alupas inpece vai ra; intumu lucsei ilpu halav atahig ura akaija ehgaija, um atcijaig ilpu halav atahig uja ehgara.

22Ja erupu adai intas uja natimi iji igki, um amen eheleija, um tup ethi ache pan iraija, el eh aperitome irai ilpu atamaig asega iraija, et idivaig eris aperitome ira ra.

23Etpu uja inpadiaig ura, im kurimatau ura, im niji itai eklim edo irai pece asega ura; el ta adai intas ura akaija, erupu amen eheleija ara.

24Eris atahaijeg intas o Hemor im Sikem inhal o un ara asega eris apan an neucse nathatahau ara an maliyum o un; eris aperitome irai ilpu atamaig asega eris apan an neucse nathatahau ara an maliyum o un.

25Is wat ti pan itac nadiat is ero wat lahlah iran is ethi, eris wat, oplec has ara, erus leh nauitoga urau a Simeon im Livai ohwat hal u Jekob, ohwat atamaig irai Taina, um auroauro um yetpan an maliyum, um atgei ilpu atamaig asega.

26Eris atgei Hemor arau im Sikem inhal o un an nauitoga, um atipagki Taina natahig ira rau an neom u Sikem, um atga urau.

27Eris apan a ilpu hal u Jekob ehele atimi iji ehki eris atgei ra, um atoraliak niji itai an maliyum ura, va nedo iyehki, nikavaig, eris auahas natahig ira ra ara.

28Eris lucsei siip ura ara, im kurimatau ura, im togke ura, im niji itai ura an maliyum, im niji itai ura an lelitai,

29im inpadiaig asega ura, im ilpu halav asega ura, im ilpu ehnaa ura, eris lucsei ra ara mika eri aheca ura, eris lep atoraliak niji itai asega irai imnim ura.

30Is ika a Jekob ehele Simeon im Livai, Et ohocred inliinmopok ainyak va nedo unyimirau, erupu amcel vai nyak a nup uran pece, nup u Kenan, im nup u Piris: inta eti elpat akaija, erupu asjapicnaig ara um atgei nyak; erupu auahas nyak ara, im lep ilpu hal unyak asega.

31Erus ika arau, Is a uri aien par ago nedo iyehki vai natahig iramrau et idivaig nedo vai intakata has?

Currently Selected:

Jenesis 34: VAO63

Highlight

Copy