Jenesis 33
33
Nuarin tas alupas 33.
1 Nedo updak jipe u Jekob im Isa an nehtet ira rau. 17 Et yetpan Sukod a Jekob. 18 Et auanimtan nuarin nobohtan Selem aien, um actaig natau, um anvi nidan par ika El-elohe-Isreel.
1IS yaspan a Jekob um ecet Isa napam vaig ehelen, eris ahced yin natimi is for huntret. Is ahaig jipe ilpu hal o un a Jekob ehele Lia, im lep Rejel, im lep ohwat aheca atahig o un.
2Is ikni ohwat aheca atahig im ilpu hal urau aien mika eri uhup ara, im Lia im ilpu hal o un juju, im Rejel im Josef apitac.
3Is apan aien an nuhup ura, um eceseven atpuse, um apan ubutpotet ehele etwan.
4Is atliut a Isa, um aubilid yin, ura ablaijiraig pam yiu, um atpuh pam an nauinwan, um aijumnyi yin: erus taig arau.
5Is yaspan aien um ecet ilpu takata, im ilpu halav, um ika; Di sji igki ehelum? Is ika aien, Era ilpu hal unyak ara sji igki, is aiheuc vai nyak a Atua, um alupai naheca unyum ra.
6Erus lep apan ubutpotet ahwat aheca atahig im ilpu hal urau, um atpuse.
7Eris lep apan ubutpotet a Lia im ilpu hal o un, um atpuse: erus lep apan a Josef im Rejel, ura atpuse.
8Is ika a Isa, Et echamecha nitai eklim edo irai pece iji igki asega ek mun ehtet ira ra ainyak? Is ika aien, Kis ikni ainyak mika yi upene inliinmopoi natimi alupas unyak vai nyak.
9Is ika a Isa, Ak etwak, ek ikni itai ainyak; etmu amen ehelum niji itai unyum.
10Is ika a Jekob, Oʼo, el et upene inliinmopom aiek vai nyak, ek ugyi euc ainyak mika au leh nitai tup ahtai unyak aiek: ek mun ecetai nesganimtam ainyak et idivaig nesganimtai natimarid unyak, na eti lep edemda vai nyak aiek.
11Et upene mika an leh naaurinig unyak aiek er imiapam ehelum; et mun aiheuc vai nyak a Atua, ek lep ikni itai ainyak. Is imiisjis a Jekob, is um leh a Isa.
12Is ika a Isa, Intumu lep ahes igcaki akaija um atga uja, ekpu uhup iram ainyak.
13Is ika ehelen a Jekob, Ak natimi alupas, na ato aiek mika, era auatialidi a ilpu halav, era lep opoc niji itai eklim edo irai pece: el er asgi pan emda ra an nadiat inyi ethi ache, erupu emesmas ara asega.
14Ak natimi alupas unyak, namu uhup aiek, ja etpu apitac a naheca unyum: ekpu eklim atga ainyak, et idivaig nemda u niji itai eklim edo irai pece, era uhup irak ara, im nemda u ilpu halav, ja ekpu uhum pan natimi alupas unyak ainyak au pece Sier.
15Is ika a Isa, Ekpu udei ehelum ainyak nahaiji atimi mi amen ehelek ara. Is ika aien, Er uauo; namu tup aiheuc vai nyak aiek, ak natimi alupas unyak.
16Is adumoij pan a Isa an nadiat iyehki alaig an pece Sier.
17Is apan Sukod a Jekob, um ago neom imi yin, um ago iyum araho imi niji itai eklim edo irai pece o un: va nitai inigki eris anvi nidan nuarin iyehki par ika Sukod, (Niji iyum araho).
18Is wat ahes Petaneram a Jekob, is yetpan an nigpa aien an maliyum Sikem, an pece Kenan; is ago neom atga o un aien ubutpotet pan an maliyum iyehki.
19Is auanimtan nuarin nobohtan aien, irai uari mune is wun huntret, ehele ilpu hal u Hemor, etmai Sikem, an nuarin iyehki is ago neom atga o un iran.
20Is actaig natau eahki aien, um anvi nidan par ika, El-elohe-Isreel, (Atua emda u Isreel).
Currently Selected:
Jenesis 33: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
