Eksotus 21

Nuarin tas alupas 21.

1 Niji tas alep vai ilpu aheca atamaig. 5 Va naheca inig eh aijin tikgan. 7 Vai ilpu aheca atahig. 12 Va nauud vaig atimi. 16 Vai ilpu atimi ahneg atimi. 17 Vai ilpu atimi asan tas ahlaijig ilpu atmil ura. 18 Vai ilpu atimi asji atimi irai hat. 22 Vai ilpu atimi auahas atimi jam eti uhup um anacanac vaig. 28 Vai kurimatau inig et ahcai atimi. 33 Vai ilpu atimi auahas atimi va naminjinaig has itai ura.

1INTAS alep iji igki namu asaig an nuhup ura aiek.

2El et auanimtan tah naheca irai up u Hibru tah natimi, etmu auanaheca aien irai mesese inyi siks: ja etu wit yetpam inmesese sevend, uhmu atcijai yin mika yi atga o un aien.

3El is ham aien ache, uhmu atcijai yin ache: el is eteuc ehgan, etmu ahced yin a ehgan.

4El is alupai yin ehgan a natimi alupas o un, el is lep apos ilpu halav atamaig, ka ilpu halav atahig imi yin aien; etmu ohuun ehgan im ilpu hal o un a natimi alupas o un, ja etmu atga o un ache aien.

5Ja el et tas emda a naheca iyehki, um ika, Et aiyu inliinmopok ainyak va natimi alupas unyak, im ehgak, im ilpu hal unyak; inki eti atga unyak ainyak:

6etmu imiapan yin ehele ilpu atimi tas alep a natimi alupas o un; etmu lep imiapan yin an neucse neom aien, ka an nauincai aduwi an nahaijin neucse neom; etmu aijin tikgan a natimi alupas o un an nitai ahed; etmu aheca o un aien irai iji mesese.

7El et ahtai inhalav atahig o un tah natimi mika yi aheca atahig aien, etmu jim atga o un aien et idivaig ilpu aheca atamaig.

8El et has aien an nuhup u natimi alupas o un, et aminjinai yin aien mika yi ehgan, etmu lep atcijai yin aien va nimtan: et itap vai yin nahtai yin vaig imi nup urai taka pece, va nedo efaifa o un vai yin.

9Ja el is aminjinai yin aien va inhalav atamaig o un, etmu ago nedo inig vai yin aien er ago vai ilpu halav atahig.

10El et lep leh intakata et eche ehgan aien; etmu jim imiaaij nitai caig vai yin aien, im napelumai o un, im namen o un ehelen.

11El et eti ago nedo eraigki vai yin aien, etmu atga o un aien, jam eti aru irai mune.

12Aien et auud tah natimi aien mika yi mas aien, uhmu idim atgei yin.

13El et eti atpaijinai atimi tah, ja et ati yin an nikman a Atua; ekpu anvai ehelemia ainyak tah inuarin, mika yi ahapan iran aien.

14Ja el et edemda tah natimi, um apan um atgei etwan an nedo efaifa; uhmu atipagki yin an natau unyak, mika yi mas aien.

15Aien et auud etman aien ka risin, uhmu idim atgei yin.

16Aien et ahneg tah natimi aien, um ahtai yin, ka ohuun yin, uhmu idim atgei yin.

17Aien et asan tas ahlaijai eri man aien ka risin, uhmu idim atgei yin.

18El era ehtauo sjipe natimi, el et asji tah ra tah an hat, ka atcei yin an nikman, el et eti mas aien, jam asjeuc ache:

19el et lep atidai aien, um atga an nauincai, uhmu jim aru iran is abli yin aien: ja etmu auanimtan aien va intup amen o un, um ago cehcehe upene yin.

20El et auud naheca atamaig o un tah natimi, ka naheca atahig o un, an nauincai, el et mas aien; uhmu idim aru iran.

21Ja el et umoh aien an nadiat inyi ethi ka inyi ero, uhmu jim aru iran; et idim mune o un aien.

22El era ehtauo natimi, um auahas intakata opoc, el et eti mas aien, jam etjo inhal o un: etmu idim alupai nimtan inig aien etpu asuptecnaig a natamnyu un; etmu lep auanimtan inig aien erupu asaig a ilpu atimi tas alep.

23Ja el et mas aien, uhmu idim aru inmas an mas,

24im nesganimtan an nesganimtan, im neijin an neijin, im nikman an nikman, im neduon an neduon,

25im incap an cap, im inmocop an mocop, im neuhri an neuhri.

26El et atcei nesganimtai naheca atamaig o un tah natimi, ka nesganimtai naheca atahig o un, um auahas; etmu atcijai yin aien va nesganimtan.

27El et auahas neiji naheca atamaig o un aien, ka neiji naheca atahig o un; etmu atcijai yin aien va neijin.

28El et ahcai tah natamaig, ka tah intakata, tah kurimatau, um auahas yin: uhmu idim asji kurimatau iyehki irai hat, jam jim caig nohun; ja eri jim aru irai natimi ohuun kurimatau.

29Ja el is umjijeuc kurimatau iyehki natcei atimi vaig an nipat o un itu acen, el is lep ato a natimi ohuun yin, jam eti aminjinai yin, el et atgei tah natamaig aien, ka tah intakata; uhmu idim asji kurimatau, um lep atgei natimi ohuun yin.

30El eh anvai mune vai yin, etmu auanimtan inig aien er asaig vai yin, um umoh.

31El et ahcai inhalav atamaig o un tah aien, ka inhalav atahig o un tah, uhmu ago iran et idivaig intas alep inigki.

32El et atcei tah naheca atamaig kurimatau, ka tah naheca atahig; etmu alupai natimi alupas ura sikel irai silver et dirte aien; uhmu lep asji kurimatau irai hat.

33El et asalgei intapnes an nehpanitai tah natimi, el et lep ucji nehpanitai tah natimi, jam eti atapnes, el et etjo se iran tah kurimatau, ka tah togke;

34etmu ago neruvaig a natimi ohuun nehpanitai, um alupai natimi ohuun ra mune; ja etmu ohuun nitai eklim, edo irai pece mas aien.

35El et abli kurimatau o un tah kurimatau u intak atimi, um auahas yin; uhmu ahtai kurimatau umoh, um ahaig jipe mune nimtan ira rau; uhmu lep ahaig jipe kurimatau mas.

36Ja el eh ato mika, is umjijeuc kurimatau natcei vaig itu acen, el is eti aminjinai yin a natimi ohuun yin; etmu isjeupigmoig kurimatau irai kurimatau aien; ja etmu ohuun iyehki aien is mas.

Currently Selected:

Eksotus 21: VAO63

Highlight

Copy