Eksotus 20
20
Nuarin tas alupas 20.
1 Intas alep et ten. 18 Era imtitaig natimi. 20 Et ago eropse ra a Moses. 22 Et atapnes nalaigaheni vai ilpu atmas a Atua. 24 Intas asuptecnaig va nago iran u natau.
1IS asan tas iji igki asega a Atua, um ika,
2Ek Ihova ainyak Atua unyimia, kis iknipagki caua ainyak an pece Ijipt, an nuarin inig akis auaraheca iran aijaua.
3Etmu jim eteuc tah intak atua imi euc an nuhup unyak.
4Namu jim ago tah natmasimai imi euc aiek, ka tah nalmuitai jipagko an nohatag, ka sepamki an nobohtan, ka an jap ithan nobohtan:
5namu jim atpuse an nuhup ura aiek, um aheca ura: ek Ihova ainyak Atua unyum, et idivaig nedemda u natimi oporei nedemda unyak, ekpu aru nedo has u ilpu atmil ura ainyak irai ilpu hal ura, um yetpan irai ilpu mapoi ilpu atimi amcel vai nyak;
6ja ekpu aiheuc va atimi iji ig im ilpu mapora yi itu ira ra ainyak et aiyu inliinmopora ara vai nyak, um imiaiji intas alep unyak.
7Namu jim tup asaig nidai Ihova Atua unyum aiek; etpu aru nedo has ura a Ihova era tup asaig nidan ara.
8Namu imiehva nadiat atumop aiek, um apos upene.
9Namu ago nauritai asega unyum aiek ira adiat et siks:
10ja et adiat u Ihova Atua unyum nadiat sevend: namu jim ago tah nauritai iran aiek, im inhalav atamaig unyum, im inhalav atahig unyum, im naheca atamaig unyum, im naheca atahig unyum, im niji itai eklim edo irai pece unyum, im natimi an taka uarin anliin nokoro unyum:
11is ago nohatag a Ihova, im nobohtan, im injap, im niji itai asega amen iran ira adiat is siks, um atumop an nadiat sevend: va nitai inigki is acis yi alwai nadiat atumop a Ihova, um ika yi itap.
12Namu ago nedo ecen vai etmam im risum aiek: va etpu ahinag nadiat iram an pece inig et alupai euc a Ihova Atua unyum.
13Namu jim atgei atmas aiek.
14Namu jim ago ingeijid aiek.
15Namu jim ehneg itai aiek.
16Namu jim asan tas ahcil aiek va atimi eblaamnem unyum.
17Etmu jim has iram aiek neom u atimi eblaamnem unyum, etmu jim has iram aiek ehgai atimi eblaamnem unyum, ka naheca atamaig o un, ka naheca atahig o un, ka kurimatau o un, ka togke o un, ka tah nitai u natimi eblaamnem unyum.
18Eris ecetai inmunuka, im nauwainapit, im nohran toho, im nadran cap an nedoon natimi asega: eris wat almoi natimi, eris apan ara um aiji itac acen.
19Eris ika ara ehele Moses, Namu tas ehelema aiek, ecrupu atahaijeg aijama: jam jim tas ehelema a Atua, va ecri jim emesmas aijama.
20Is ika a Moses ehele atimi, Akumu jim imtitaig aijaua: et mun ham a Atua par ahilek inliinmopomia, va akupu imtitai yin aijaua, um eti ago nedo has.
21Eris aiji itac acen natimi, ja is apan a Moses ubutpotet pan u napat epig iyehki is amen iran a Atua.
22Is ika a Ihova ehele Moses, Namu tas ehele nup Isreel aiek, um ika, Eka ato aijaua mika, ek mun tas ehelemia ainyak an nohatag.
23Akumu jim ago atmasimai irai silver aijaua an nuhup unyak, um jim ago atmasimai irai colt imi caua.
24Ago natau imi nyak an nobohtan, um ahlap iran irai iji itai ahlap er atnamud, im niji itai ahlap naaurinig, nikavaig, siip unyum, im kurimatau unyum: ekpu lep ham ehelum ainyak, um acis yi alwai euc irai iji uarin asega ekpu asuptecnaig nidak iran ainyak.
25El et ago natau irai hat imi nyak aiek, jim actaig irai hat er ates: el et ates aiek an tah nitai inyi has.
26Um jim aridjai ijinies an natau unyak an nefalaig, va eri jim ecetai intup atga unyum iran.
Currently Selected:
Eksotus 20: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
