Eksotus 22

Nuarin tas alupas 22.

1 Intas alep vai nehnegitai. 5 Vai nauahas itai. 7 Vai naminjinaig has itai. 14 Vai inleh itai par lep imiadumoij pan. 16 Vai nedo has. 18 Vai naraces atimi. 19 Vai nedo maumau esjilid. 20 Vai nedo apat. 21 Vai ilpu atimi irai taka pece, im ilpu takata eris emesmas a ilpu atamnyura, im ilpu umnij. 25 Vai nehtipidai ilpu ihki atimi. 26 Vai niji itai asjaaicnaig. 28 Vai nedo ecen vai ilpu atimi alupas. 29 Vai inhupnai itai.

1EL et ahneg kurimatau, ka siip tah natimi, um atgei, ka ahtai; etmu asjeupigmoig kurimatau et faiv aien irai kurimatau et ethi, im siip et for irai siip et ethi.

2El eh ecet natimi ehnegitai nauahas vaig neom, el eh auud yin mika yi mas, uhmu jim atgei tah vai yin.

3Ja el et adiat, uhmu aru inmas o un an mas; eris idim ika yi ago neruvaig upene aien; ja el et ilikin natimi a natimi ehnegitai, uhmu ahtai yin va nehnegitai o un.

4El eh ecetai ehelen nitai is ahneg aien, kit kurimatau, ka togke, ka siip; etmu ecero asjeupigmoig aien.

5El et auahas tah nahapol, ka nokoro vaine, tah natimi, um ati nitai eklim edo irai pece o un iran, mika yi acaig anliin nokoro u intak atimi; etmu ago neruvaig aien, irai iji itai esjilid an nahapol o un, im niji itai esjilid anliin nokoro vaine o un.

6El eh atni incap, el et yetpan an nefelelicai, um atnamud niji irai korn, ka korn umumoh, ka hal itai an nahapol; etmu ago neruvaig aien is atni incap aien.

7El et ikni mune, ka inpadiaig, ehele etwan tah natimi, mika yi aminjinaig aien, el eh ahneg anliin neom u natimi iyehki; el eh ecet natimi ehnegitai, etmu ecero asjapigmoig aien.

8El eh eti ecet natimi ehnegitai, uhmu imiapan natimi ohuun neom an nuhup u ilpu atimi tas alep, par ato, kit is leh inpadiaig u etwan aien, ka oʼo?

9Uhmu asuptecnaig nedo has asega u atimi an nuhup u ilpu atimi tas alep, kit nedo vai kurimatau, ka togke, ka siip, ka napelumai, ka tah nitai is etjo, et ika tah et o un; etmu ecero asjapigmoig imi etwan a natimi inig, erupu tas alep vai yin a ilpu atimi tas alep.

10El et ati ehele etwan togke o un tah natimi, ka kurimatau, ka siip, ka tah nitai eklim edo irai pece, mika yi aminjinaig aien; el et mas aien, ka el eh auahas, ka el eh ahlo, jam eti ecetai tah natimi:

11etmu asan tas aktit ehelen aien an nuhup u Ihova, mika is eti leh tah nitai u etwan aien; etmu adai intas o un a natimi ohuun, etmu jim ago neruvaig aien.

12Ja el er ahneg ehelen, etmu ago neruvaig imi natimi ohuun aien.

13El eh aces, etmu imiapan aien va uhpu ato, etmu jim aru inig aien eris aces.

14El et ugyi tah nitai u etwan tah natimi mika yi lep alupai yin, el eh auahas, ka el et mas, et wat eti amen ehelen a natimi ohuun, etmu idim ago neruvaig aien.

15Ja el et amen ehelen a natimi ohuun, etmu jim ago neruvaig aien: el is alupai nimtan vaig aien, is leh aien va nimtan.

16El et oop tah natahig eti lai tah natimi, um amen ehelen; etmu alupai nimtan vai yin aien, um leh yin ehgan.

17Ja el et esjum a etman natcijai yin vaig, etmu aru aien irai mune et idivaig nimtan va ilpu halav atahig.

18Akumu jim ika aijaua yi umoh tah natimi araces.

19Uhmu idim atgei yin et asjeuc ehelen tah nitai eklim edo irai pece aien.

20Aien et ahlap vai tah natmas aien uhmu idim auahas yin; eri ahlap vai Ihova ache.

21Akumu jim ehcerucai tah natimi an taka uarin aijaua, um jim ago nedo has vai yin: akis atimi an taka uarin aijaua an pece Ijipt.

22Akumu jim auoh ohocred aijaua tah intakata is mas a na-tamnyu un, ka tah numnij.

23El eka auoh ohocred ra aijaua, eru wit ahlaig vai nyak ara, ekpu atahaijeg nahlaig ura ainyak;

24etpu lep esjilid acen intavaitap unyak, ekpu auahas caua an nedoa ainyak; erupu tup echim amen a ilpu ehnaa unyimia, erupu lep umnij a ilpu hal unyimia.

25El et ahtai mune aiek imin tah natimi unyak et ihkin natimi aien um amen ubutpotet ehelum, mika uhpu lep alupai euc, namu jim idivai natimi lucsei nimtan aiek, um jim asaig nimtan ehelen.

26El et atipagki nap umjeg u etwam aiek nimtan, uhmu lep alupai yin, ja etpu ete nagesega:

27nitai adahpoi yin nigki ache, im nitai aso nohun iran: etpu umjeg an he aien? etu wit ahlaig vai nyak aien, ekpu atahaijeg in-tas o un ainyak; ek aiheuc va atimi ainyak.

28Akumu jim amcel vai ilpu atimi alupas aijaua, um jim asan tas ahlaijaig natimarid an pece unyimia.

29Akumu auroauro aijaua um ahlap irai hupnai ohwai itai unyimia, im nide vaine uhup unyimia: um lep ikni imi nyak inmeto irai ilpu halav asega unyimia.

30Akumu lep ago nedo inigki vai kurimatau unyimia aijaua, im siip unyimia: etmu amen aien ehele risin ira adiat inyi seven; ja etu wit yetpam nadiat eetd, akumu alupai nyak aijaua.

31Akumu ilpu atimi itap unyak aijaua: um jim caig nohun nitai inig era auahas niji itai eklim edo irai pece aleg; akumu ethaig pan ehele kuri aijaua.

Currently Selected:

Eksotus 22: VAO63

Highlight

Copy