Mateu 4

Satanas Nafaskud Isus.

Mk 1:12-13; Lk 4:1-13

1Ay arodi at Masine fag Falad nataban Isus sas talun at yud e taw, laman Satanas namaskud Isus sanya. 2Ay kaduge ufatk safuluk menit ay ufatk safuluk yabi Isus we naon, ay nu ntabu wan, kalunus. 3Ay Tagfaskud andasug wan ay glong sas Isus te, “Nu Dius tuo at Baguama, longi stae fag ngay gang te, Akawati sik fakonun.”

4Ay Isus gbalus te, “Duan. Anriruk wan sas Dius at Longan te,

‘Sik taw nu gleleg, bundi siginan langs fakonun, siginan tua Dius at Longan fagayu.’ ”#4:4 Deuterunumyu 8:3.

5Sanya ginan, Satanas nataban Isus sas Erusalem, at yud e malong fag furuan, ay nafalindug anya sas Dius at bale sat tiba tungud fag afud. 6Ay Satanas glong yangay fia sas Isus te, “Nu Dius tuo at Baguama, tosi, aroro anriruk wan sas Dius at Longan te,

‘Kanya sumugu at ngay tagbarita laman ggubuk emu,

laman at daluap gurug emu,

laman am darafa di katuktuk sas gang.’#4:6 Alubad 91:11,12. ”

7Ay Isus nabalus yangay te, “Duan, anriruk yangay sas Dius at Longan te, ‘Lag gfaskud am Dius am Fun.’ ”#4:7 Deuterunumyu 6:16.

8Ay at fadogan, Satanas nataban Isus sa sik tungud buksul daul ngabat. Ay nafabanawan anya sa sangay fagfagtainanan sas fagdaul daga, ay anggan nusnge wain at ngay fagmaramramanun ay at ngay fagmasineun. 9Ay Satanas nalong yangay fia sas Isus te, “Gfon kban emu fagayu am nalag nu namalub tua ro wo laman gseg angku.”

10Ay Isus gbalus te, “Loi wan, Satanas, lag ste ya, aroro anriruk wan sas Dius at Longan te,

‘Segi ay Fun ay Dius, ay sia yakman lang ay fagfaningan.’#4:10 Deuterunumyu 6:13. ”

11Ay sanya ginan, Satanas naubun Isus. Ay sik ngay tagbarita andasug ay nagubuk anya.

Isus Nalo sas Talun Galilea ay Nafoyung Sanya

12Ay Isus nu nadungug te, Uan Tagfasurung ankubung wan, kanya anfoli wan sas talun Galilea. 13Ay kanya nalo wan siginans furuan Nasaret ay namanwan yangay sas furuan Kapernaum sis tigyangan lino, ebi sis Sebulun ay Naftali fag gaban at talun. 14Katanya nafafasludan Isayas, Dius at taglong at sadi ebi at longan te,

15“Talun Sebulun ay talun Naftali

sanya sis tigyangan Lino Galilea,

tsiuy baliwas Liskung Urdan, sis talun Galilea,

sanya ngayu at yud Udyu fag taw.

16At ngay malunggung sisad madulum nalag sik fagmayamagun daul.

Ay tiba at malunggung sas fakabulun fag talun ay sis fakabulun at lanbung ansure yangay sa anya sik fagmayamagun.”#4:16 Isayas 9:1-2.

17Siginan ginanya fag menit, Isus gfasigad gfoyung te, “Ubuni ay ngay asalanan, aroro munakbang wan Dius sas banwa nu gfagtainan taw.”

Isus Nafili Taguna at ngay Tagadal

Mk 1:16-20; Lk 5:1-11; Uan 1:35-42

18Ay gina Isus glo sis tigyangan Lino Galilea, kanya nalag sik duksay Simun, tiba at ngayan Pedru, ay anggan at arian Andres nu gukas at fanggamat albon sasad lino, aroro kafag duksay tagfangalbon. 19Ay Isus nalong anya te, “Wainyayam, aloi angku. Ay namoyung au ayu nu gfaful ban am taw kata nu gfaful am albon katsi.” 20Ay arodi vtv kanya fag duksay nafamato at fanggamat albon ay nanangalo Isus.

21Gina Isus gtaglayun glao sanya ginan, kanya nalag yangay fia sik duksay, Santiagu ay Uan, Sebedeu at baguama fagdua. Kafag duksay ay anggan at mama Sebedeu sisad sakayan lino gina gsimat at ngay fanggamat albon. Ay Isus nagewan duksay. 22Ay arodi vtv kafag duksay naubun wan at sakayan ay at mama, ay nanangalo Isus.

Isus Nafoyung ay Nafafia

Lk 6:17-19

23Ay Isus nalo sas fagdaul talun Galilea laman namoyung sanya fag ngay bale fakafulan at masine fag barita sabaliwa Dius nu gfagtainan. Ay Isus nafafia fagayu taw, nusnge wain kafag ngay taw at fakasaitun. 24Ay andungug Isus at fakamulun sas fagdaul talun Sirya. Ay sanya fag ngay taw nataban sa anya fagayu at ke fakasaitun, dewa snga setaw fag fakasaitun, ay at ngay taginkidapan sas faganinianun, ay anggan ngay tagfansaful, ay anggan tagfatfat fag ngay taw, ay anggan at yud malao. Ay Isus nafafia tua anya fagayu. 25Ay ngayuk taw nanangalo Isus. Kafag ngay taw siginans Galilea, ay Safuluk Furuan Daul, ay Erusalem, ay talun Udea ay tiba siginans dife Liskung Urdan fag talun.

Currently Selected:

Mateu 4: OCCT

Highlight

Copy