Mateu 3

Uan Tagfasurung at Foyungan

1Ay abandi Uan Tagfasurung gfasigad at fakamulun sis talun at yud e taw sis Udea, laman namoyung sa sangay taw. Katatuy at foyungan: 2“Ubuni ay ngay asalanan, aroro munakbang wan Dius sas banwa nu gfagtainan taw.”

3Uan Tagfasurung, Dius ebi at taglong Isayas at foyungan te,

“Sik taw guro sis talun at yud e taw te,

Falganani tam Fun at dalan.

Faturunani at fagnanloan.”#3:3 Isayas 40:3.

4Ay Uan at lanbung mawatan siginans kamelyu at sigyu. Ay at ginawang mawatan siginans fagbaugun at balat, ay at fakonun liung ay deut. 5Ay sik ngay taw andasug sas Uan siginans Erusalem ay siginans fagdaul talun Udea ay anggan siginans day Liskung Urdan. 6Ay kafag ngay taw nafoyung at ngay asalanan, ay Uan nafasurung anya fagayu sis Liskung Urdan.

7Ay Uan nu nalag te, ngayuk taw Fariseu ay taw Saduseu takadasug laman namasurung, kanya nalong anya fagayu te, “Am, kata way am tagfandaya fag ngay ule at maganga! Sinu at nafararang ayu te, lagyui siginan takadasug ban fag faurianan? 8Ugalii at masine, laman gfalag am te, naubun wam ay ngay asalanan. 9Ay lag gamatangan te, ‘Ansak wan aroro Abrayam tua em mangaguyang.’ Amatangani, Dius ro mawat way Abrayam at ngay kasugfunanan dewa ste ginan fag ngay gang. 10Gfoyung au sa ayu te, katsi yay wase mafawawan wan sa sangay fun kayu at lalid. Ay kafag ngay fun kayu nu dway masine at rawvg, e gfuan wan ay nangukas sasad afuy. 11Gfasurung au ayu sasad mamam laman fagayu taw sumaful te, naubun wam ay ngay asalanan. Ay tagguyan ban angku fag taw gtungud yay angku nu mabalyanan. Kwa masine nusdi at fagsuguan laman tagbuba at lapak. Ay kanya namasurung ayu sat Masine fag Falad ay sas afuy. 12Kanya glayap laman gfasaman at ngay nagutan siginans trigu, ay gfaful ngay bintuy trigu sat fagfungsuan. Dewa katanya, at ngay upa nangirug sas afuy at yud ban karabung kabavn.”

Uan nu Gfasurung Isus

Mk 1:9-11; Lk 3:21-22; Uan 1:31-34

13Ay abandi vtv Isus andasug sas Liskung Urdan siginans talun Galilea laman Uan namasurung anya. 14Ay Uan nasalag anya te, “At masine, oi tua tagfasurung angku. Wain am fagsaun yay angku?”

15Ay Isus nabalus te, “Dewa, fasurungi wa angku. Aroro nu katanya tua, gfaning wata Dius at fakaylatun fagayu.” Ay Uan nafaning fia at longan.

16Ay Isus nu nsurung wan, ay nu nlakwi siginan sad lino, banwa anluang ay Isus nalag Dius at Masine fag Falad nu kadaga kata sik labikung, ay naafun sa anya. 17Ay e naringang siginans banwa te, “Tuy wan ku fakesugun ku Baguama. Maksvn nu guseganan au anya.”

Currently Selected:

Mateu 3: OCCT

Highlight

Copy