Mateu 5

At Mauseganan fag Taw

1Ay Isus nu nalag sanya fag ngay taw, kanya naulul yay sa sik buksul ay malunggung sanya. Ay at ngay tagadal nangakbang sa anya. 2Ay Isus nafoyung sa anya fagayu te,

3“Mauseganan ngay taw at yud e kwa tagsarig tua Dius,

aroro Dius gfagtainan tua anya.

4Mauseganan ngay taw takabalu,

aroro kanya gbul ban Dius at nafatuyanan.

5Mauseganan ngay takamababaun tua,

aroro kanya gbul ban Dius at nafatuyanan.

6Mauseganan ngay taw nu kaylat tua gfakamulun Dius at fakaylatun,

aroro Dius ggubuk tua ban anya.

7Mauseganan ngay taw takafanyu tua at iba katsi,

aroro e kafanyu yangay ban anya.

8Mauseganan ngay taw at ngay amatanganan nu sa tua gugat at masine,

aroro kanya lumag ban Dius.

9Mauseganan ngay taw nu mafafalukmeanan tua tiba,

aroro kanya ban fagayu kangayan te, Dius at ngay sisian.

10Mauseganan ngay taw nu e gfauri anya dewa masine at fakamulun,

aroro Dius gfagtainan tua anya.

11“Mauseganan tuam gina e gfalingun ayu, ay e gfauri ayu, ay e glong at mauri sabaliwa ayu, siginan nu gafanud am sa angku. 12Useganani ay aylati dewa katanya, aroro ngayu ban Dius at fon ayu sas banwa at maksvn nu masine. Aroro katanya yangay nu e gfauri Dius at ngay taglong at naguna ayu.

Barara ay Fagmayamagun

13“Am wan takata sik barara ste swa daga. Ay barara nu dway mayat ya, tain ro nu gdog kae ayat? We tungkul ya. Nu katanya, gukas wan laman ro ngay taw gsiad wan.

14“Am takata sik salung ste swa daga. Sik furuan daul tagsis tungud buksul wa masuksuk. 15Katanya yangay sik taw nu nafasalung tua sik salung, di nanuklub sik alungkung, nu bunway namasa tuas fagfatungkudan laman dumamlag fagayu taw sanya fag bale. 16Ay ugali katai sik salung nu gdamlag sas fagayu taw, laman ngay taw nu nalag te, masine ay fakamulun, sumeg ay Mama sas banwa.

Isus ay Muisis at Faugali

17“Lag am gamatangan te, ku fagindasugun laman nanfae yud kway e tungkul Muisis at Faugali, ay anggan Dius at ngay taglong at longan. Duan. Ku fagindasugun laman namafasludan kway at Faugali. 18Matuyan nu glong au ayu te, dewa ban banwa ay daga ankamin, nusdi sik afud sirut Muisis at Faugali wa myud e tungkul yakmay ban umfasludan fagayu. 19Nu katanya, nusnga sinu takamabo nusdi sa talay fag suguan sis Muisis at Faugali ay mannga nu gfoyung yay tiba te, ‘Katanyai anggan am,’ e gfangayan waban kafag taw te, tiba daga sis Dius at fagfagtainanan. Ay nusnga sinu tagfaning fia ay gfoyung yangay kanya fag ngay suguan, e gfangayan yangay ban kafag taw te, tagtungud sas Dius at fagfagtainanan. 20Aroro gfoyung kwa ayu te, ay fagmatuyanun nu dyakmay tumungud ngay tagfoyung Muisis at Faugali ay ngay taw Fariseu at fagmatuyanun, wa ban am umful sas Dius at fagfagtainanan.

Isus at Foyungan sabaliwa Takauri

21“Nadungug wam at foyungan ebi sa tam ngay mangaguyang te, ‘Lag gfabul. Aroro nusnga sinu at nafabul taw, umfaurianan.’ 22Ay katsi glong au ayu te, nusnga sinu takauri at faduksay, umfaurianan. Ay nusnga sinu taglong sat faduksay te, ‘Gfansaful o,’ e tumaban ban sa sangay taginsaful. Ay nusnga sinu taglong te, ‘Wo e amatanganan,’ kanya ban nangadasug sas Afuy Daul.

23“Aroro katanya, kaduge o gfon am fanggalangun sas Dius sas fagirugan fanggalangun, ay nu e namatangan yay o am nasalan sam faduksay, 24famatoi yap sanya am fanggalangun ay loi wan ay namasine yap o am malong sam faduksay. Ay nu nsine wan, afolii yap ay foni wa dayvm am fanggalangun sas Dius.

25“Kaduge tagfantabugan gtaban emu sas tagwabilug, fasinei wan am malong sa anya, laman wo sak gatabanan sas tagwabilug, ay tagwabilug wa sak gfadasug emu sas tagulit laman ro wa gubung emu. 26Matuyan nu glong au emu te, wa ban o umkalfas yakmay ban o nabayad am bedan anggan tiba alay fag salapi.

Isus at Foyungan sabaliwa Tagfanugtug

27“Ay nadungug wam at foyungan ebi te, ‘Lag gfanugtug.’ 28Ay katsi glong au ayu te, nusnga sinu fag mangama nu nadama sik mangena ay anke algan mauri sa anya, sat amatanganan gfanugtug wan. 29Ay am siun fag mata nu gfae asalanan way emu, guladi wan ay ukasi. Aroro masine sik afud am bilug dewa nalyam wan, nu bundi ngap ban gukas fagdaul am bilug sas afuy daul. 30Ay am siun fag daluap nu gfae asalanan way emu, gatvngi wan ay ukasi. Aroro amasine sik afud am bilug dewa nalyam wan, dewa ngap ban fagdaul am bilug nu kadasug sas afuy daul.

Isus at Foyungan sabaliwa Tagaubunun at Mangena

Mt 19:9; Mk 10:11; Lk 16:18

31“Ay ebi e foyungan te, ‘Nusnga sinu tagaubunun at mangena, masine kanya nu gfon sik rirukan famatuyan sabaliwa nu gsaruayan.’#5:31 Deuterunumyu 24:1.

32“Ay katsi glong au ayu te, nusnga sinu at naubun at mangena, ay kafag mangena nu doma nanamatugtug, kafag mangama way tagfafanugtug at mangena nu nadog nafangindugan. Ay nusnga sinu at kumdadwa sanya fag mangena kaduge at dan fag mangama gleleg, anggan kanya gfanugtug yangay.

Isus at Foyungan sabaliwa Tagfaksvn at Longan

33“Ay nadungug wam ebi at foyungan sa tam ngay mangaguyang te, ‘Lag gfatuyanan nu dway am mafafasludan, nu bunway fafasludani tua ay ngay nafatuyanan sa tam Fun.’#5:33 Lebitiku 19:12; Tap 30:2; Deuterunumyu 23:21. 34Ay katsi glong au ayu te, nu gfatuyanan am, lag gfaksvn ay longan. Lag sak glong te, ‘In yay banwa,’ aroro banwa Dius wan at faglunggungan. 35Ay lag sak glong te, ‘In yay daga,’ aroro fagdaul daga, kanya wan Dius at fagsiadan. Ay lag sak glong te, ‘In yay furuan Erusalem,’ aroro kanya fag furuan Tiba Tungud fag Fun at furuan. 36Ay lag sak glong te, ‘Tuy yay ku alfuyu,’ aroro wam mafafaubanun ay mafafalayung ay buk nusdi sadi. 37At masine ay famalus nu ‘Kin,’ kin wa fia. Ay ay famalus nu ‘Duan,’ anud duan. Ay longan nu natungud wa sanya, kanya siginan Tagmauri.

Isus at Foyungan sabaliwa Tagfasud at Mauri

38“Ay nadungug yangay am ebi at foyungan te, ‘Mata fasudi sas mata ay bagang fasudi sas bagang.’#5:38 At masuad te, fasudi sa ay iba kaksvn at nafakamulun sa ayu fag fagmauriun. Nu Galin 21:24; Lebitiku 24:20.

39“Ay katsi glong au ayu te, lag gfasud ya dewa e nafauri ayu. Sik taw nu nafalang am siun fag fingi, fasalubangi am wala fag fingi. 40Sik taw nu nataban emu sa sangay funan, ay nu gyabulun wan am lanbung, foni wan anggan am fangumutan. 41Ay sik taw nu nafabulun emu te, ‘Bubai ku famubaun nusnga seyayu ku fakaylatun,’ bubai duak kayayu at fakaylatun. 42Foni sas nusnga sinu taget sa emu, ay faulbusi yangay sat nangulbus sa emu.

Esugi ay Fawayan

43“Ay nadungug yangay am ebi at foyungan te, ‘Esugi am iba,#5:43 Lebitiku 19:18. ay lag kesug am fawayan.’

44“Ay katsi glong au ayu te, esugi tagfawayan ayu ay darangini tagfauri ayu, 45laman umtuyan te, am wan ay Mama tagsis banwa at ngay sisian. Aroro Dius gfasure menit sat mauri fag taw ay sat masine fag taw. Ay gfarak sat matuyan fag taw ay sat yud matuyan fag taw. 46Ay fakesugun nu takesug way lang ayu, wa ban am e fagfanyaun at masine siginans Dius. Aroro anggan ngay tagbul famayad laman sas fun kesug yangay takesug anya. 47Ay fagfakamatoanun nu ay ngay fagadgalangan way lang, wam e fakamulun tagtungud tibak taw. Aroro anggan at yud gtoglag Dius gfakamatoan yangay at ngay fagadgalangan. 48Lag am e malong, kata ay Mama sas banwa nu yud e malong.

Currently Selected:

Mateu 5: OCCT

Highlight

Copy