Lukas 17
17
E Gfae Asalanan Ban
Mt 18:6,7,21,22; Mk 9:42
1Isus nalong sat ngay tagadal te, “Anud wan, e gfae asalanan ban, ay afanyuan way ban nusnga sinu tagfae asalanan. 2Amasine yap nu e gsiuk sat liug sik fanligis trigu fag gang ay gukas anya sas fagngabasadan dagat, nu gamut ban kanya nu nafae asalanan way at iba at yud yay maksvn nu gafanud.#17:2 yud yay maksvn nu gafanud: sas Griegu, sik sisian sirut.
3“Amatangani am fakamulun. Am iba nu e asalanan sa emu, salagi anya. Ay kanya nu gubun tua at asalanan sa emu, alyami tua. 4Ay dewa fitu ginan sik menit kanya nu e asalanan sa emu, ay andasug fitu ginan ay nafoyung emu te, ‘Gubun au ku asalanan,’ at masine, falyami wan.”
Fagafanudun
5Tam Fun at ngay nasugu nalong sa anya te, “Faksvni em fagafanudun.”
6Ay tam Fun nabalus te, “Nu e fagafanudun di am kadaul sik rigrig burarad, malong am snay fag kayu te, ‘Aguladi ay alini sasad dagat,’ ay kanya ro gfaning ay longan.
Sik Fagsuguan at Fakamulun
7“Nu e fagsuguan o, ay at fakamulun garadu sim daga, ay mannga galaga am ngay fagbaugun, o nu ndasug ro siginan at fagfakamulunan, o glong o te, ‘Malunggungi ay fangoni wan’? 8Duan! Am longan glong way o te, ‘Seudi yap ku yafun ay fasinei am lanbung ay bubai am sineud sas fagfangonan, laman au taguna takon ay taginum, ay nu ntabu kro, o man at nanfangon.’ 9O guseganan o am fagsuguan aroro kanya nafaning am longan, o duan? 10Katanyai yangay ay fakamulun, nu nafakamulun wam at fafakamulun sa ayu. Longi te, ‘Sik ngay fagsuguan way mi, gfakamulun way mi em fakamulun.’ ”
Isus Nafafia Safuluk Tagabangbang
11Gina Isus glao sas Erusalem, at dalan sas wabilug talun Samarya ay Galilea. 12Ay gina kadasug sa sik furuan sirut, safuluk taw tagabangbang#17:12 bangbang: sik fakasaitun sis balat tagfatoglag te, kafag taw wa masine ya magamut sas fagngayuan. nafablang anya. Kafag ngay taw malindug ngayayu sirut, 13ay maksvn nu guro te, “Isus, em Fun, afanyui emi.”
14Ay Isus nu nalag, nalong te, “Loi wan ay namalag am ay ngay bilug sa sangay tagfon fanggalangun.”
Ay gina kafag ngay tagabangbang glao, anfia wan, ay masine wan. 15Ay at sadi nu nalag te, anfia wan, anfoli sas Isus ay maksvn nu gseg Dius. 16Ay kanya namalub sas Isus at daga salubangan ay gseg anya. Kafag taw siginans talun Samarya.
17Isus nalong te, “O nunda ku nafafia bunwam safulu? Dada wan at siam? 18Wain tiba way nfoli ya laman nanseg Dius? O takafoli ro tuy way lang ro fag sadi tagsiginan way tibak talun?”
19Ay Isus nalong sanya fag sadi te, “Malindugi ay loi wan. Am fagafanudun nafafia emu.”
Dius at Fagfagtainanan nu Kadasug
Mt 24:23-28,37-41
20Ay ngay taw Fariseu nainto te, “Seduge ya ban Dius nu gfasigad gfagtainan?”
Ay Isus nabalus te, “Wa ban e fakasafulan te, gfasigad wan. 21Ay wa ban e malong te, ‘Ste wan,’ ay ‘Sanya wan.’ Duan. Aroro Dius gfasigad gfagtainan ayu katsi.”
22Isus nalong sat ngay tagadal te, “Umdasug ban sik buknga, maksvn ban nu gyalagun am Taw at Baguama dewa way sadik menit, ay ya ban am lumag. 23Ay tibak taw nu nalong ban ayu te, ‘Sna wan,’ ay ‘ste wan,’ lag ban am sanya. Lag ban nangalo anya. 24Aroro kata sik limbad nu gfayamag sas fagdaul banwa siginan sik tigyangan, anggan sat dayu, katanya yangay ban gina au kadasug fag menit, au Taw at Baguama. 25Ay gina ban nangafasludan takatanya, au Taw at Baguama nandalan kban ngayuk fagidapun. Ay katsi fag talad taw kauri ban angku.
26“Au, Taw at Baguama, nu kadasug kban, ngay taw at fakamulun kata ebi gina Nui at buknga. 27Ebi kanya fag ngay taw manabayan way fia gfangon ay gmamaman, ay kadadwa, yakmay Nui nasakbo sas sakayan lino. Ay ginanya lugwak andasug ay nafabul kafag ngay taw.
28“Ay kata yangay gina Lut at buknga. Ginanya fag ngay menit ngay taw manabayan gfangon ay gmamaman, ay namayad ay gfae bayad, ay gtanum, ay gbale. 29Ay Lut nu nalao siginans Suduma, arak afuy ay asupri andasug siginans banwa kata nu karak, ay nafabul tagbanwan sanya fag ngay taw. 30Katanya yangay ban kanya fag menit, au, Taw at Baguama, nu kasure au.
31“Ay ginanya ban fag menit, nusnga sinu tagsis tungud bale, lag kadaga ya laman namul at ramraman sa sad bale. Ay tagsit gamasun, lag guli ya. 32Lag am kalyam at kindasug sas Lut at mangena. 33Aroro nusnga sinu takesug at leleg, umkalyam way ban at leleg. Ay nusnga sinu tagfon tua at leleg aroro gafanud sa angku, kanya ban e leleg tua kabavn.
34“Glong au ayu te, ginanya ban fag yabi e duak taw gtaladan gtiug. E nabul wan at sadi, ay at usama anfamato way. 35Ay e sik duena glubuk, ay e nabul wan at sadi, ay at usena anfamato way. [36Ay nu e duak mangama gfakamulun sis gamasun, e gbul at sadi, ay at sadi kafamato way sanya.]”
37Ay at ngay tagadal ginto te, “Em Fun, nu katanya, dada ban nu kafasludan takatanya?”
Ay Isus gfaydayuanan te, “Nu inda ngay bilug at mabulan, sanya ugak nu nangaful.”
Currently Selected:
Lukas 17: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
