Lukas 16

Isus at Faydayuanan sabaliwa sik Taw at Yud Matuyan

1Isus nafoyung sik fansulitan sat ngay tagadal te, “Sik maramraman fag taw e fagfatigwanan at ngay ramraman. Ay tiba nafoyung sat maramraman fag taw te, ‘Am fagfatigwanan nafamin wan am ngay ramraman.’

2“Nu katanya, kafag maramraman nagewan at fagfatigwanan ay nainto anya te, ‘Nataw ku dungganan am nafakamulun? Fastei am rirukan ku ramraman at kayuan, aroro bunwa ban o ya ku fagfatigwanan ku ngay ramraman.’

3“Ay at fagfatigwanan namatangan te, ‘Ku fun gaiyanun wa angku, bunwa ban au ya at fagfatigwanan. Tain ro ku fakamulun? Kwa makatu ggamas ay kapla kway gfangetan. 4Saful kwan ku fakamulun. Nangawat au sik balyawvtan laman ban ku fun nu naiyan angku, ngay taw gfasakbo tua angku sat bale.’

5“Ay kafag fagfatigwanan nafagewan sa anya gsadsadian at ke bedan sat fun, ay ginto sa taguna te, ‘Seyu am bedan sa ku fun?’

6“Ay at ke bedan nabalus te, ‘Sadik sandank baldi langis.’

“Kafag fagfatigwanan nalong anya te, ‘Na, am famatuyan am bedan. Malunggung yap o ay riruki te, am bedan lima way langk safuluk baldi langis.’

7“Ay kanya nainto sat sadi te, ‘Ay emu, seyu am bedan?’

“Ay kafag taw nabalus te, ‘Sik sandank alungkung trigu.’

“Kafag fagfatigwanan nalong anya te, ‘Na, am famatuyan am bedan. Riruki te, walu way langk safuluk alungkung trigu am bedan.’

8“At yud matuyan fag fagfatigwanan at fun nalong te, ‘Mamatanganan tua ku fagfatigwanan at nafakamulun.’ At masuad, fagdaul daga at ngay taw nu gfakamulun sat ngay iba, gtungud tua sa sangay taw at kinyamag wan sa baliwas Dius. 9Ay glong au ayu te, ay ramraman, kanya ay famagadgalangan ngay taw, laman ban nu namin wan, e gfasakbo tua ayu sa sik fagbanwanan at yud e fakatabuan. 10Sik taw nu matuyan tua sa talay fag fakamulun, matuyan yangay anggan sa tagbia fag fakamulun. Ay sik taw nu dway matuyan sa talay fag fakamulun, wa yangay matuyan anggan sa tagbia fag fakamulun. 11Ay nu dway matuyan nu gagbilug am ste swa daga fag ramraman, wa ban e gfatigwanan sa ayu at matuyan fag ramraman. 12Ay nu dway matuyan nu galaga am ay iba at ramraman, sinu ban tagfon ayu ay fagnangabilugun ban fag ramraman? 13Sik taw wa mafasfuan gfaning duak fun. Aroro kauri ro at sadi, ay kesug at sadi. Ay gfaning at sadi, ay kamabo sat sadi. Wam mafasfuan mafafaning Dius ay sas ramraman.”

14Ay ngay taw Fariseu nu nadungug Isus at nalong, kanya fagayu nafalingun anya aroro kanya fagayu kesug salapi.

15Ay Isus nalong te, “Dewam gfoyung sa tibak taw te, ‘Matuyan em fakamulun,’ Dius saful ay amatanganan. Aroro ngay taw at natuyan te, mafanud, kanya Dius kauri way.

Dius at Longan

Mt 11:12,13

16“Muisis at Faugali ay Dius at ngay taglong at rirukan e fagmabalyananun yakmay Uan andasug. Ay katsi gfoyung au at Masine fag Barita sabaliwa Dius nu gfagtainan. Ay ngayuk taw tagugatan nangatap. 17Dewa masakit banwa ay daga nu kamin, nusdi sik afud sirut wa myud e masuad.

Sik Mangama nu Naubun at Mangena

Mt 5:31-32; Mk 10:11-12

18“Nusnga sinu fag mangama at naubun at mangena, ay nu nabubay way tibak mangena, kanya gfanugtug way. Ay sik mangama nu ndadwa way sa sik mangena at naubun at mangama, gfanugtug yangay.

Lasaru ay at Maramraman fag Taw

19“Ebi e sik taw maramraman, ay kanya galanbungan tua gugat masine. Ay fagayu menit at fakonun mataba tua gugat. 20Ay sit day sakbawan alad sik taw gtaygilidan, at ngayan Lasaru. Kanya sik yud e kwa ay fagdaul at bilug gabangbang. 21Lasaru katebo nagfatongan siginan kafag taw at maramraman at fagfangonan. Ay idu gsupsup at ngay bangbang.

22“Abandi, kafag taw at yud e kwa anbul, ay Dius at tagbarita nataban anya sas Abrayam at day tigyangan, laman Abrayam gfasun anya. Ay anggan at maramraman fag taw anbul yangay, ay e nanamoli anya. 23Ay kafag taw at maramraman nu si wa sangay kinbul at talun, maksvn nu gidapan. Ay kanya nabanawan sasad ngayayu, ay nalag Abrayam ay anggan Lasaru sit day tigyangan. 24Ay at maramraman fag taw nauro te, ‘Fagtainan Abrayam, afanyui angku ay sugui Lasaru, laman gfasurung at langbud sumyu ay gfabasa ku leplep aroro gidapan au maksvn ste sad afuy.’

25“Abrayam nabalus sat maramraman fag taw te, ‘Sama, amatangani gina am gleleg, o manabayan tuo, ay Lasaru gidapan way. Katsi sia masun tua ay o man tagidapan. 26Ay katatuy yangay, si tam wabilug e sik tangrawan, laman tagste ginan wa masanya, ay tagsanya ginan wa mastae.’

27“Ay at maramraman fag taw nalong te, ‘Fagtainan, nu katanya, maksvn nu get au sa emu te, sugui yap Lasaru sa ku mama at bale, 28aroro e lima kyayk faduksay mangama sanya, laman Lasaru namararang yay sa anya fagayu, laman ban wa kadasug stae fag talun at maksvn nu maidap.’

29“Ay Abrayam nabalus te, ‘Sanya wan Muisis ay Dius at ngay taglong at rirukan, kanya ro nangus fagayu gfaning wan.’

30“Ay at maramraman fag taw nalong te, ‘Duan, fagtainan, malgau ro sik taw at nadog naleleg nu ndasug sa ku ngay faduksay, tiba ginan ro kanya fagayu gubun yay at ngay asalanan.’

31“Abrayam nalong te, ‘Kanya fagayu nu dway gfaning Muisis ay Dius at ngay taglong, waro gafanud at namoyung anya fagayu dewa sik taw at nadog naleleg.’ ”

Currently Selected:

Lukas 16: OCCT

Highlight

Copy