Lukas 15

Isus at Faydayuanan sabaliwa sik Tupa at Nalyam

Mt 18:12-14

1Sik menit ngay tagbul famayad laman sas fun ay anggan ngay tagasalanan ankakbang sas Isus laman gdungugan. 2Ay ngay taw Fariseu anggan ngay tagfoyung Muisis at Faugali gibugan te, “Kafag taw gfakamatoan way tagasalanan ay gfasfuan anya gfangon.”

3Ay Isus nafoyung sik faydayuanan te, 4“Nu sik sandan ay tupa, ay nu nalyam at sadi, gubun yayam at siamk safulu e siam sis talun laman nanrvbvy am at nalyam. 5Ay nu nalag wam, guseganan am gfasanan, 6ay nu ndasug wam sa ay bale, namaful am ay ngay fagadgalangan ay anggan ay ngay fasabale ay glong am te, ‘Useganani fasfuani angku, aroro nalag ktua ku tupa at nalyam.’ 7Glong au ayu te, katanya yangay sik tagasalanan nu naubun at ngay asalanan, e guseganan ban sas banwa gtungud yay nu guseganan sa sik masine fag ngay taw at yud e fagubunun at asalanan.

Isus at Faydayuanan sabaliwa sik Salapi at Nalyam

8“Sik mangena nu e safuluk salapi, ay at sadi nu nalyam, kanya namasalung sik salung ay nanlanu at bale ay gugatan grvbvy yakmay nalag. 9Ay nu nalag wan, kanya namaful at ngay fagadgalangan ay at ngay fasabale ay glong te, ‘Useganani fasfuani angku, aroro nalag ktua ku salapi at nalyam.’ 10Glong au ayu te, katanya yangay Dius at ngay tagbarita nu guseganan, sik tagasalanan nu naubun tua at ngay asalanan.”

Isus at Faydayuanan sabaliwa sik Baguama at Nalyam

11Isus nafoyung te, “Sik mangama at baguama dua. 12Ay at fuyu nalong sat mama te, ‘Mama, foni wa angku ku ekwan am ramraman.’ Ay at mama nafud fagayu at ramraman sat baguama fagdua.

13“Ay nu nlangfe nu seyuk menit, at fuyu nafaebayad fagayu, ay nafaful at salapi ay nalo wan sa sik talun tangayayu. Ay kafag baguama nu ndasug wan sanya fag talun, kanya nafamin at salapi sat fagalabianun. 14Ay kafag baguama at salapi nu namin wan, sik fanlunus daul andasug sanya fag talun ay kanya gidapan wan. 15Nu katanya, kanya nanantungul sa sik taw sanya fag talun. Ay kanya fag taw nasugu anya sas fagbaugan, laman ban tagbaug at ngay bumbu. 16Ay at kaksvnan kafag baguama nu kalunus, kaylat wa kon bumbu at fakonun aroro we gfon sa anya fakonun, nusdi alay sirut.

17“Kafag baguama namatangan te, ‘Ku mama at fagsuguan dewa ngayu kasakan tua at fakonun, sarokta e sawad yay, ay au umbul au ste sas lunus. 18Kafoli au sa ku mama, ay nanlong kban anya te, “Mama, anke asalanan au sas Dius ay sa emu. 19Wo masine ya gngayan angku te, Baguama. Tapi wa angku te, am ngay fagsuguan at sadi.” ’ 20Nu katanya, kafag baguama anfoli sat mama.

“Gina ngayayu yay, at mama nabanawan ay anfanyu anya. Ay at mama masakit nanangakbang anya ay naugwan ay nayuk at fingi. 21Ay at baguama nalong anya te, ‘Mama, anke asalanan au sas Dius ay sa emu. Wo masine ya gngayan angku te, Baguama.’

22“Ay at mama nasugu at ngay fagsuguan te, ‘Masakiti, bubai stae at masine fia fag lanbung, laman fantubus at lanbung. Fasuluni sik fanumyu sat sumyu ay fae lapaki anya. 23Fastiei tam nafataglu fag baka riangan, ay filasi laman tam fakonun gina tam guseganan. 24Aroro nu glong au tuy ku baguama anbul wan, ay katsi anfoli tua gleleg. Kanya ebi nalyam wan, ay katsi nalag kyay.’ Nu katanya, kanya fagayu gfasigad guseganan.

25“Ay ginanya, at kaka fag baguama si yays gamasun. Ay kanya gina guli, nu kakbang wan at bale, nadungug nu e gfawang ngay fagfawangun ay nu gfalelegan at ngay bilug. 26Ay kanya nagewan sik fagsuguan ay nainto te, ‘Nataw ku dungganan si tam bale?’ 27Ay kafag fagsuguan nabalus anya te, ‘Am arian andasug. Ay am mama nasugu sa emi te, filasi at nafataglu fag baka riangan, aroro am arian anfoli yay ay di e fakasaitun.’

28“Ay at kaka fag baguama kadotama ay wa kaylat gsakbo. Nu katanya, at mama naduksun ay nafalukmeanan te, ‘Baguama, sakboi wan.’

29“Ay kafag baguama nabalus te, ‘Amatangani, ngayu wak banwa nu gfaning au emu kata sik fagsuguan, ay kwe nafamabo am longan. Dewa katanya, wo e nafon angku nusdi sadik riangan kambing laman guseganan au gasfuan ku ngay fagadgalangan. 30Ay tuy, am baguama, ebi at nafamin am ramraman sat fagfanugtugun, nu ndasug, gfilas tuo fia tam nafataglu fag baka riangan.’

31“Ay at mama nabalus anya te, ‘Munama, kabavn magamut way ta gugat, ay fagayu ku ramraman am ramraman yangay. 32At masine nu guseganan tam ay nu kaylat tam, aroro am arian kata wa nu nbul, ay katsi anfoli tua gleleg. Kanya ebi nalyam wan ay katsi anlag yay.’ ”

Currently Selected:

Lukas 15: OCCT

Highlight

Copy