Lukas 14

Isus Nafafia sik Taw at Mabaga at Bilug

1Gina Famiangalay fag Menit, Isus nasakbo sa sik tagfangguna ngay Fariseu at bale, laman gfangon. Ay tagsanya fag ngay taw gdama anya.

2Ay sanya sik mangama mabaga at bilug. 3Ay Isus ginto sa sangay tagfoyung Muisis at Faugali ay sa sangay taw Fariseu te, “O gfaning tam tam faugali nu gfafia tam sis Famiangalay fag Menit, o mannga duan?”

4Ay we nafabalus. Ay Isus nated kafag taw ay nafafia anya ay nalong te, “Loi wan.”

5Ay Isus nalong sanya fagayu te, “O wa ro am namul ya ay munama ay ay baka nu ntong sas lusung gina Famiangalay fag Menit?” 6Ay kanya fagayu wa mafabalus.

Isus Nafoyung sabaliwa nu Kamababaun

7Isus nalag ngay betaw nu ggudgunan nanmalunggung sat masine fag faglunggungan. Ay Isus nafoyung sa kafag ngay taw sik faydayuanan te, 8“Nu e nagewan emu sas fakadadwaan, lag o nanmalunggung sat masine fag faglunggungan, aroro e betaw way manga tagtungud tua emu. 9Nu katanya, at nagewan ro ayu nu ndasug glong emu te, ‘Tsi way o, tuy tua fag taw tagmalunggung sanya.’ Ay nu katanya, kapla ro wo glo sat yud mafasinean fag faglunggungan. 10Nu katanya, nu e nagewan emu, nu nanmalunggung o sa yakman at yud mafasinean fag faglunggungan, laman ro at nagewan emu nu ndasug, glong emu te, ‘Sna tua nu gmalunggung o.’ Ay nu katanya, tibak betaw gsuyu emu. 11Aroro sik taw nu kamatungudun way, abandi ban e gfababa anya, ay nu kamababaun tua, abandi ban e gfabat anya.”

12Isus nalong yangay sat nagewan anya te, “Nu nafalganan o ngay fakonun sim bale, am faggewanun say bale dangay ay ngay fagadgalangan ay am ngay faduksay ay am ngay kalongan ay anggan am ngay fasabale at maramraman. Aroro kanya ban fagayu, ggewan yangay emu sat bale. 13Nu nafalganan o sik ngay fakonun ngayu, gewani sam bale anggan at yud e kwa, ay at yud mafalelegan at take ay at bitis, ay at yud malo, ay anggan at yud glag. 14Ay umdasug ban sa emu at masine. Kanya fag ngay taw wa mafasud emu, dewa katanya, Dius waban tagfasud sa emu gina at matuyan fag ngay taw gdog gleleg.”

Isus at Faydayuanan sabaliwa sik Fangadadwa fag ngay Fakonun

Mt 22:2-14

15At sadi at malunggung sis fagfangonan nu nadungug Isus at longan, nalong sas Isus te, “Mauseganan sik taw nu nanfangon nu sa tuas Dius at fagfagtainanan.”

16Ay Isus nalong anya te, “Ebi sik taw nafatama sik ngay fakonun ngayu, ay nagewan ngayuk taw. 17Ay nu gafangonun wan, kanya nasugu at fagsuguan sat faggewanun laman nanlong te, ‘Adasugi wan. Mafalganan wan fagayu.’ ”

18“Ay fagayu at nafoyung, gsud yay e fanlonganan. At taguna nalong sanya fag fagsuguan te, ‘Bagu kyay gbul sik daga ay at masine nanlag kyay. Foyungi am fun te, Wa kalong ya.’

19“Ay at sadi nalong te, ‘Bagu kyay gbul limak dadwa baka, ay glo kyay laman namaskud au nangali. Foyungi am fun te, Wa kalong ya.’

20“Ay at sadi nalong yangay te, ‘Bagu kway kamubay, ay kwa madasug.’

21“At fagsuguan anfoli ay nafoyung sat fun. At fun kadotama ay nalong sat fagsuguan te, ‘Masakiti sa sangay dalan ayu daul ay sa sangay dalan ayu sirut sa tam furuan, ay fastei ngay taw at yud e kwa, ay at yud mafalelegan at take ay at bitis, ay at yud glag, ay anggan at yud malo.’

22“Ay at fagsuguan nu nfoli wan, nalong te, ‘Fagtainan, nafaning kwan am longan, ay ya mapnu am bale.’

23“Ay at fun nalong sat fagsuguan te, ‘Loi wan sas talun fag ngay dalan, ay fabuluni gewani ngay taw, laman umkapnu ro ku bale.’ 24Gfoyung au ayu te, ebi ku nagewan fag ngay taw, nusdi sadi we nanangon ku tagbia fag yafun.”

Nu Galo Isus

Mt 10:37,38

25Isus gina glao, ngayuk taw galo anya, ay Isus anbiling sa anya fagayu ay nalong te, 26“Sik taw wa ban masine kangayan te, ku tagadal, nu dway kesug angku gtungud yay nu kesug at mama, ay at mina, ay at mangena, ay at ngay sisian, ay at ngay faduksay, ay anggan at sadili. 27Nusnga sinu nu dway nafasanan at fasulungan kayu ay nangalo angku, bunwa ku tagadal.

28“Am at sadi nu kaylat am nangawat sik bale, ay fakamulun taguna, malunggung ay gamatangan te, ‘O mafatabu ktua ban?’ 29Aroro nu nafasigad wam naturuk ay nu dway am mafafatabu, at nalag ban ayu gfalingun ayu te, 30‘Kanya fag taw, dewa nafasigad, wa mangaro mafafatabu at bale.’

31“Ay sik fun nu nalo laman namawayan tibak fun, kanya nanmalunggung yay taguna ay nangamatangan te, ‘O ku tagfawayan fag safuluk libu mababo tua ro ku fawayan fag fun at tagfawayan fag duak safuluk libu?’ 32Ay nu dyay ro mababo, at taguna fag fun sumugu at fagsuguan gina at tibak fun ngayayu yay, laman namalukmeanan at fawayan fag fun.

33“Ay nu katanya, nusnga sinu nu dway naubun at sadili fakaylatun fagayu, kanya wa mtap te, ku tagadal.

Sik Barara at Yud Mayat ya

Mt 5:13; Mk 9:50

34“Masine barara, dewa katanya, nu dway mayat ya, tain ro nu gdog kae ayat? 35Nu katanya, kafag barara we tungkul, dewa famataglu fananumun. Taw gukas wan. Fagayu am tagdungugan, amatangani tua fia.”

Currently Selected:

Lukas 14: OCCT

Highlight

Copy