Lukas 13

Ubuni ay ngay Asalanan

1Kadugenya, tibak taw sanya nafoyung sas Isus sabaliwa tibak taw Galilea, Pilatu ebi at nafabul kaduge kafag ngay taw gfon at fanggalangun sas Dius.

2Ay Isus gbalus te, “O nu gamatangan am kafag ngay taw Galilea at ngay asalanan gtungud yay at ngay iba fag ngay taw Galilea at ngay asalanan, aroro nafaurianan? 3Glong au ayu te, duan. Ay fagayu am, nu dway am naubun ay ngay asalanan, anggan am e fakatabuan yangay ban am kata kafag ngay taw.

4“Ay anggan kafag labi waluk taw at nafakwanan sik bale ngabat sis Siluam fag furuan ay nbul, o gamatangan am te, kafag ngay taw at asalanan gtungud yay at ngay iba fag ngay taw tagbanwan sis Erusalem at ngay asalanan? 5Glong au ayu te, duan. Ay fagayu am nu dway am naubun ay ngay asalanan, anggan am e fakatabuan yangay ban am kata kafag ngay taw.”

Isus at Faydayuanan sabaliwa sik Kayu at Yud e Rawvg

6Isus nafoyung sik faydayuanan te, “Ebi, sik taw e tanum sik kayu igus sit gamasun. Ay kafag taw andasug laman nanlag te, o grawvg tua, ay nalag te, we rawvg. 7Ay kanya nalong sat tagalaga te, ‘Kauri au, tulu wak banwa nu gfoyfolian au gugat stae laman nanlag te, o e rawvg tua, ay kwe nalag. Fuani wan, aroro kanya we tungkul ay kamaut way ku daga.’

8“Ay at tagalaga nalong te, ‘Fagtainan, toyap katsi fag banwa. Nanaksak kyay ban sat ligung fun ay namasanya sik famataglu. 9Bangaran ban manga grawvg tua fadogan fag banwa. Ay nu dway ban e rawvg, gfuan waban ta dayvm.’ ”

Isus Nafafia gina sis Famiangalay fag Menit

10Sik Famiangalay fag Menit, Isus gfoyung sis bale fakafulan. 11Ay sanya e sik mangena labi walu wak banwa nu e fakasaitun. Sik mauri fag falad antayuk ay nafae fakasaitun anya. Ay kanya fag mangena wa malindug ya, grungan way lang. 12Ay Isus nu nalag anya, gfakbang anya ay glong te, “Fagmangena, anfia wan am fakasaitun.” 13Ay Isus nafatayuk at daluap sa anya, ay ginanya kanya malindug wan ay naseg Dius.

14Sanya fag bale fakafulan at tagfangguna kauri aroro Isus nu gfafia gina way Famiangalay fag Menit. Ay kafag tagfangguna nalong sa sangay taw te, “Unum wayk menit nu gfakamulun am, ay ginanya fag ngay menit nu kadasug am stae laman namafia ay ngay fakasaitun, ay lag am namafia gina Famiangalay fag Menit.”

15Ay tam Fun nabalus te, “Am fag ngay takamaningan, fagayu am gluas way am ay baka ay ay kabayu siginans fagfangonan, dewa sis Famiangalay fag Menit, laman nantaban sas fagfainuman, o kin. 16Ay tuy fag mangena, Abrayam yangay at kasugfunanan; Satanas nasalod anya labi waluk banwa, masine kanya nu kalfas wan dewa sis Famiangalay fag Menit.”

17Ay Isus nu nafoyung takatanya, fagayu tagfawayan anya ankapla, ay ngay taw guseganan nu nalag Isus at nafakamulun at maksvn nu madulo.

Isus at Faydayuanan sabaliwa sik Rigrig Burarad

Mt 13:31-32; Mk 4:30-32

18Aroro katanya, Isus nalong te, “Tain nu gfafaskudanan au Dius at fagfagtainanan, ay dada ro nu gfasudan au? 19Kanya kata sik rigrig burarad, sik taw nabuba sat gamasun ay narigrig. Kafag rigrig natugbung ay anbia, ay nu kadaul wa sik kayu, manuk tungud gfugad sit ngay sanga.”

Isus at Faydayuanan sabaliwa sik Famabia Tinapay

Mt 13:33

20Isus gdog yay nalong te, “Tain nu gfasudan au Dius nu gfagtainan? 21Dius nu gfagtainan kata sik famabia tinapay sik mangena at nafasuglat sas fangawat tinapay masuadan sit tagbia fag fagsuadan. Ay arodi fagayu at nafasuglat anbia.”

Talay fag Sakbawan

Mt 7:13,21,22

22Isus nataglayun sat dalan sas Erusalem ay nadalan sa sangay furuan ayu daul ay sa sangay furuan ayu sirut, ay kamoyung sa sangay taw tagbanwan sanya.

23Ay sik taw nainto sas Isus te, “Ku Fun, o wa ban ngayu takalangfe?”

Ay Isus nabalus te, 24“Ugatani sakboi sa talay fag sakbawan. Amatangani, glong au sa ayu te, ngayu oma tagyasakboun sanya fag sakbawan, dewa katanya wa masakbo.

25“Ay kanya fag tagagbilug bale nu nlindug ay nu nadingding wan at sakbawan, am si way am slod bale, ay katuk am sis sakbawan ay guro te, ‘Em Fun, luangi, fasakboi emi.’ Ay kanya gbalus ayu te, ‘Kwa toglag ayu ay kwa saful te, daginan am.’

26“Ay glong ban am te, ‘Ebi nafasfuan ami emu gfangon ay ginum. Ay nafoyung o emi si em ngaba dalan.’

27“Ay at Fun lumong ban ayu te, ‘Kwa toglag ayu ay kwa saful te, daginan am. Loi wan fagayu am, tagfakamulun at mauri.’

28“Nu nalag ban am Dius nu gfagtainan Abrayam ay Isak ay Akub, ay anggan Dius at taglong fagayu, ay am ban naiyanan way am, gwayway ban am gugat ay gfaringgit ay ngay bagang. 29Ay umdasug ban ngay taw siginans fakamenitan ay siginans fakayabian ay siginans fawalan ay fasiunan, laman malunggung sas fagfangonan sis Dius at fagfagtainanan. 30Ay amatangani: nusnga sinu at naguyanan katsi, kanya ban gumuna. Ay nusnga sinu at naguna katsi kanya ban gaguyanan.”

Isus nu Kesug ngay Taw Erusalem

Mt 23:37-39

31Ay ginanya, tibak taw Fariseu andasug ay nalong sas Isus te, “Loi wan, aroro fun Erudes kaylat gfabul emu.”

32Ay Isus nabalus te, “Afolii wan ay nanlong am sanya fag idu talun te, ‘Dungugani, katsi ay anggan ban balabag gaiyan au at mauri fag ngay falad ay gfafia kyay ngay taw at fakasaitun, ay si bans fatuluk menit gfatabu kwan ku fakamulun.’ 33Dewa katanya katsi ay balabag ay anggan at dayu fag menit glo kwan, aroro wa masine sik taglong nu kabul nu dway sis Erusalem.

34“Erusalem, Erusalem, o wan tagfana gang ay tagfabul Dius at nasugu sa emu fag ngay taglong. Ngayu ginan koma namaful fagayu am taw, kata sik fanginan nu gfaful at ngay riangan sat daga fakfak, ay wo kaylat. 35Dungugani! Wa ban e gbanwan ya si emu. Ay glong au emu te, wa ban o lumag angku yakmay ban o lumong te, ‘Segi takadasug sa tam Fun at ngayan.’ ”#13:35 Alubad 118:26.

Currently Selected:

Lukas 13: OCCT

Highlight

Copy