Lukas 18
18
Isus at Faydayuanan sabaliwa sik Fagbubayun ay sik Tagwabilug
1Isus nafansulitan sat ngay tagadal sabaliwa sik faydayuanan, laman kanya fagayu wa kamomuy ay wa kalufuy gdarangin. 2Isus nalong te, “Ebi e sik tagwabilug sa sik furuan. Ay kanya wa gseg Dius ay wa kafanyu ngay taw. 3Ay sanya fag furuan e sik fagbubayun yangay, ay kanya malayun nu nanget gubuk sa kafag tagwabilug, glong te, ‘Gubuki angku, e fawayan au.’
4“Ebi taguna kafag tagwabilug kauri ggubuk, ay abandi kanya namatangan te, ‘Dewa yud au gseg Dius, ay deyud au kafanyu ngay taw, 5aroro tuy fag fagbubayun gfasalag angku, katsi ggubuk kwa anya, laman ban di gugat stae gfadotama angku.’ ”
6Tam Fun nalong te, “Amatangani at yud matuyan fag tagwabilug at longan. 7Anggan tam Dius ggubuk at filian fag taw nu guro sa anya fagngabak menit ay fagngabak yabi, o kin? O Dius gfadugean nu ggubuk? 8Gfoyung au ayu te, Dius masakit nu ggubuk. Ay au, Taw at Baguama, gina kban kafoli ste swa daga, o e lagan ktua ban tagafanud sa angku?”
Isus at Faydayuanan sabaliwa Duak Taw Tagdarangin
9Isus nafoyung tuy fag faydayuanan sa sangay taw takauri at usama ay tagamatangan te, matuyan at fakamulun. 10“Ebi, duak taw gundaud laman nandarangin sas Dius at bale. At sadi sik taw Fariseu, ay at sadi sik tagbul famayad laman sas fun. 11Ay kafag taw Fariseu namalindug ay gdarangin sat amatanganan te, ‘Fadi fadi ku Dius, aroro kwa gfaning tibak taw tagfangkamul ay at yud matuyan at fakamulun, ay tagfanugtug, ay kdi kata in fag tagbul famayad laman sas fun. 12Kayu linggu duak menit nu yud au gfangon laman gdarangin. Ay gafud ktua fagayu ku nabul, ay gfon ktua sa emu ku fasafuluk afud.’
13“Ay kafag tagbul famayad laman sas fun namalindug ngayayu siginan tibak taw ay wa gtangda, aroro kapla. Kanya grungan ay glong te, ‘Ku Dius, afanyui angku, aroro sik tagasalanan au.’ ”
14Ay Isus glong yay fia te, “Gfoyung au ayu te, kanya fag taw gina guli, Dius natap anya kata sik taw at yud e asalanan, ay duan kafag taw Fariseu. Aroro nusnga sinu nu kamatungudun way, abandi ban e gfababa anya, ay kanya nu kamababaun tua, abandi ban e gfabat anya.”
Isus Nafadante sik ngay Sisian
Mt 19:13-15; Mk 10:13-16
15Tibak taw nabuba at ngay sisian ayu sirut sas Isus, laman Isus namatayuk at ngay daluap sa anya fagayu. Ay at ngay tagadal nu nalag, gsalag anya fagayu. 16Ay Isus nagewan kafag ngay sisian ay nalong sat ngay tagadal te, “Fabayani wan kanya fag ngay sisian nu kakbang sa angku. Lag am gsalag, aroro takata kanya fag ngay sisian katap ban sas Dius at fagfagtainanan. 17Matuyan nu glong au ayu te, nusnga sinu at yud kaylat Dius nu gfagtainan anya kata sik sisian sirut nu kaylat, kanya ban wa manangatap sas Dius at fagfagtainanan.”
Sik Maramraman fag Mangama
Mt 19:16-29; Mk 10:17-30
18Sik tagfangguna ngay taw Udyu ginto sas Isus te, “At matuyan fag Takamoyung, setain manga ku fakamulun laman magbilug ktua leleg at yud e fakatabuan?”
19Ay Isus nabalus anya te, “Wain ro am fagnafangayanun angku te, ‘Matuyan’? We taw matuyan. Dius way lang at matuyan! 20Saful wo Dius at ngay suguan te,
‘Lag gfanugtug, lag gfabul, lag gfangkamul, lag o kamuag nu gfatuyan o am iba at fakamulun, ay suyui am mama ay am mina.’ ”#18:20 Nu Galin 20:12-16, Deuterunumyu 5:16-20.
21Ay kafag mangama nalong te, “Nafaning kwan takatanya fagayu siginan nu mabaguama au.”
22Isus nu nadungug katanya, nalong sa kafag mangama te, “Dewa katanya, sadi ya am kurang. Falaoi am ramraman fagayu ay at nagbulan foni sat yud e kwa, laman e ramraman tua ban o sas banwa. Ay sanya ginan, aloi angku.”
23Ay kafag taw nu nadungug, kabalu, aroro kanya maramraman daul.
24Ay Isus nadama anya ay nalong te, “Maidap mandi at maramraman fag ngay taw nu manangatap sas Dius at fagfagtainanan. 25Amasakit yap sik kamelyu nu nansulun sasad fansimat ramit at sulat, sik maramraman fag taw nu manangatap sas Dius at fagfagtainanan.”
26Ay kanya fag ngay taw nu nadungug Isus at longan, nalong te, “Ay nu katanya, sinu ban at kumlangfe?”
27Ay Isus nabalus te, “Ngay taw at fagyudun mafafakamulun, Dius mafafakamulun tua.”
28Ay Pedru nalong te, “Ami, naubun wami fagayu em ngay ramraman laman nangalo ami emu.”
29Ay Isus nabalus te, “Matuyan nu glong au ayu te, nusnga sinu nu naubun wan at bale ay at bubay ay at faduksay ay at mina ay at mama ay at sisian, aroro Dius gfagtainan anya, 30kanya ban at fagnamulun gtungud tua at ngay naubun, ay e leleg tua ban at yud e fakatabuan.”
Isus at Fatulu Ginan Gfoyung sabaliwa nu Kabul Ban
Mt 20:17-19; Mk 10:32-34
31Isus nataban at nasugu fag labi dua, ay nalong sa anya fagayu te, “Amatangani, katsi sa watams Erusalem, ay umfasludan ban Dius at taglong fagayu at rirukan sabaliwa angku, Taw at Baguama. 32Ay e gfon ban angku sas yud Udyu fag ngay taw, ay kanya ban fagayu gfalingun ay gfauri ay gtufe angku. 33Ay kanya ban fagayu gfalang ay gfabul angku. Ay nu nlangfe ban tuluk menit gdog kyay gleleg.”
34Ay at ngay tagadal wa nyamag Isus at longan, aroro at longan at masuad masuksukan siginan anya fagayu.
Isus Nafafia sik Mangama at Yud Glag
Mt 20:29-34; Mk 10:46-52
35Ay Isus nu munakbang wan sas furuan Eriku, sik taw yud glag malunggung sis tigyangan dalan ay gfanget. 36Ay kanya nadungug sik ngay taw nu gdalan, ay ginto te, “Nataw takafasludan?”
37Ay tiba nafoyung anya te, “Isus fag taw Nasaret gdalan.”
38Ay kafag taw at yud glag nauro te, “Isus, fun Dabid at kasugfunanan, afanyui angku.”
39Ay tagsis fagunan fag ngay taw, gsalag anya laman wa garingang. Ay kanya gtungud yay aro taw nu guro te, “Fun Dabid at kasugfunanan, afanyui angku.”
40Ay Isus anragang ay nasugu te, “Tabani stae at yud glag fag taw.” Ay nu ndasug wan, Isus nainto anya te, 41“Nataw ro am fakaylatun ku fakamulun sa emu?”
Ay at yud glag fag taw nabalus te, “Ku Fun, ku fakaylatun glag ktua nangus.”
42Ay Isus nalong anya te, “Glag wa ro wo. Am fagafanudun nafafia wan emu.”
43Ay arodi vtv kanya glag wan ay nangalo wan Isus ay gseg Dius. Ay fagayu taw nu nalag Isus at fakamulun gseg yangay Dius.
Currently Selected:
Lukas 18: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
