Lukas 10

Isus Nasugu at Tagadal fag Fituk Safulu e Dua

Mt 9:37,38, 10:9-15; Lk 9:3-5; Uan 4:35

1Nu ntabu wan aro taw at longan, tam Fun nafili at tagadal tiba, fituk safulu e dua. Ay Isus nasugu tagdua, laman nangguna anya sat fagnangadasugan ban fag ngay furuan ayu daul ay fag ngay furuan ayu sirut. 2Ay Isus nalong sa anya fagayu te, “Ngayu at faggutluun, ay gsadsadian way at nanggutlu. Darangini sas faggutluun at Fun, laman kanya gsugu ngay taggutlu sat faggutluan. 3Loi wan, gsugu au ayu kata sik tupa riangan sas wa idu talun. 4Lag am gasulpan, ay lag am gasabian, ay lag am e lapak. Ay lag yangay gfakamatoan ay nablang sa sangaba dalan.

5“Ay nusnga nday fag bale nu gsakbo am, taguna longi te, ‘Fagstumae nangus fag bale fagmabayanun.’ 6Ay sanya fag bale at taw nu kaylat tua fagmanabayanun, kafag taw umke fagmanabayanun siginan nu gdarangin o anya. Dewa katanya, sanya fag bale at taw nu dway kaylat fagmanabayanun, kafag ngay taw wa mke fagmanabayanun. 7Nu inda at nafasakbo ayu fag bale, sanyai yap, lag am gadgalinan. Ay oni ay inumi nusnge wain at nafon sa ayu, aroro tagfakamulun fag taw e bulan fia.

8“Ay nu ndasug am sa sik furuan, ay at ngay taw sanya nu gfasakbo tua ayu, oni nusnge wain at fon sa ayu. 9Fafiai at ke fakasaitun sanya fag furuan, ay foyungi sa kafag ngay taw te, ‘Munakbang wan Dius nu gfagtainan ayu.’ 10Ay nu ndasug am sa sik furuan ay at ngay taw nu dway gfasakbo ayu, loi wa sat ngaba dalan ay longi te, 11‘Gfagfag ami ngay lukbu at kindafut sa em darafa siginan ay furuan, laman sik famasaful sa ayu te, wam gfaning. Ay dewa katanya, amatangani, munakbang wan Dius nu gfagtainan ayu.’ 12Glong au sa ayu te, gina ban fanginsafulan asalanan fag menit, gtungud yay furuan Suduma kafag furuan nu gafaurianan.”

Isus Nafararang sa sik ngay Furuan at Yud Naubun at Asalanan

Mt 11:21-24

13Ay Isus nalong te, “Ida, furuan Kurasin ay furuan Betsaida at ngay taw. Aroro nu sa di ngap furuan Tiru ay Sidun nu gfakamulun au ku nafakamulun sa ayu at madulo, kanya ro fag duak furuan glugo wan nu gubun at ngay asalanan, ay gsulun saku, ay malunggung sis dafug, laman gfalag te, gubun wan at ngay asalanan. 14Gina ban fanginsafulan asalanan fag menit, gafaurianan am gtungud yay furuan Tiru ay Sidun. 15Ay am fag ngay taw tagbanwan sis furuan Kapernaum, o gamatangan am te, e namabat ban ayu sas banwa? Duan! Nustua e nangukas way ban ayu sa sangay kinbul at talun.

16“Nusnga sinu tagdungugan ayu, gdungugan yangay angku. Ay nusnga sinu takauri gdungugan ayu, kauri yangay gdungugan angku. Ay nusnga sinu takauri angku, kauri way anggan at nasugu angku.”

At Nasugu fag Fituk Safulu e Dua Anfoli Wan

17Kafag fituk safulu e dua anfoli wan ay guseganan te, “Em Fun, nu nalong ami am ngayan, at mauri fag ngay falad gfaning emi.”

18Ay Isus nalong sa anya fagayu te, “Nalag au Satanas nu katong siginans banwa kata sik limbad. 19Amatangani, nafon kwan sa ayu fagmabalyananun nansiad ule ay agipan, ay gbabo tam fawayan at fagmabalyananun fagayu. Ay wa ban e mafaidapan ayu. 20Dewa katanya, lag guseganan te, at mauri fag ngay falad gfaning ayu. Useganani way aroro ay ngayan anriruk wan sas banwa.”

Isus at Fagusegananun

Mt 11:25-27, 13:16,17

21Ay ginanya, Isus maksvn nu guseganan aroro siginan at Masine fag Falad, ay glong te, “Mama, o wan banwa ay fagdaul daga at Fun. Fadi fadi nafasuksuk tuo ku foyungan at masuad sa sangay taw at mamatanganan ay anggan sat ke ngay fagsafulun, ay nafasure tuo ku foyungan at masuad sa takata sik ngay sisian fag taw. Anud, Mama, aroro katanya tua am fakaylatun.” 22Ay Isus glong sa sangay taw te, “Ku Mama wan at nafon sa angku fagayu nusnge wain. Au, at Baguama, wa fia e gtoglag angku, ku Mama way lang tagtoglag angku. Ay we taw gtoglag fia ku Mama, nu bunway au way lang, at Baguama. Ay kayu ku fakaylatun gfatoglag ku Mama, anggan kafag taw tumoglag ku Mama.”

23Ay Isus anbiling ay sa way lang at ngay tagadal nu glong te, “Mauseganan sik taw at nalag kafag fakamulun kata ay ngay faglagun katsi. 24Aroro glong au ayu te, ebi fag ngay taglong ay fag ngay fun nayalagun oma ay lagan katsi, ay nayadungugun oma ay nadungug katsi.”

Sik Matuyan fag Taw siginans Talun Samarya

Mt 22:34-40; Mk 12:28-31

25Ay sanya ginan, sik tagfoyung Muisis at Faugali anlindug laman gfaskud Isus. Kanya nalong te, “Takamoyung, setain ku fakamulun, laman magbilug ktua ban leleg at yud e fakatabuan?”

26Ay Isus nabalus anya te, “Nataw at marirukan sis Muisis at Faugali? Foyungi angku.”

27Ay kafag taw nabalus te, “ ‘Esugi am Fun, am Dius, sas fagdaul am amatanganan, ay sas fagdaul am fakaylatun ay sas fagdaul am fagmabitsugun ay sas fagdaul am fagsafulun.’#10:27 Deuterunumyu 6:5. Ay ‘Esugi yangay am iba kaksvn nu kesug o emu.’ ”#10:27 Lebitiku 19:18.

28Isus nalong anya te, “Matuyan am famalus. Faningi kata am longan, ay gleleg tua ban o.”

29Ay kafag taw kaylat at iba nu gamatangan sa anya te, sia sik taw matuyan. Nu katanya, kanya nalong sas Isus te, “Sinu ku iba?”

30Ay Isus nafaydayuanan te, “Sik taw gtagbung siginans Erusalem, laman nangadasug sas Eriku. Ay sik ngay tagfangkamul nabalabag anya. Kafag ngay tagfangkamul nabul at lanbung ay nafalang anya ay naubun arvs gakabulun wan. 31Ginanya, sik tagfon fanggalangun gtagbung sa sangaba dalan, ay kanya nu nalag nasaruyan way ay gtaglayun glao. 32Ay sik taw Lebi, nadalan yangay sanya, ay kanya nu nalag nasaruyan yangay anya. 33Ay sik taw siginans talun Samarya nadalan yangay. Ay kanya nu nalag kafag taw, anfanyu anya. 34Ay kanya ankakbang ay nabusbus langis ay fanlangu sat ngay fakarukan, ay nafutus. Ay kanya nafasakay sat asnu, ay nabuba sa sik fagtaglayunan fag bale, ay nalaga anya. 35Ay balabagdi kafag taw Samarya nafon at ngay salapi sa tagalaga fagtaglayunan fag bale, ay nalong te, ‘Alagai fia anya, ay nu kurang yay ban ku nafon sa emu fag salapi, gfamut kyay ban gina au anfoli.’ ”

36Isus nainto sas tagfoyung Muisis at Faugali te, “Nu gamatangan o, sinu sanya fag tuluk taw, kafag taw at nafangkamulan at iba fia?”

37Tagfoyung Muisis at Faugali nabalus te, “At kinfanyu.”

Ay Isus nalong anya te, “Loi wan ay faningi anya.”

Isus Nanansibo Marta ay Maria

38Isus ay at ngay tagadal nafataglayun glao, ay andasug sa sik furuan, ay sanya sik mangena at ngayan Marta nafasakbo sat bale. 39Ay Marta at faduksay at ngayan Maria. Maria namalunggung sa tam Fun at day darafa ay gdungugan at foyungan. 40Ay Marta gasagsagan, aroro ngayu at fakamulun ay at fagfalgananun. Nu katanya, kanya ankakbang sas Isus ay nalong te, “Ku Fun, o wo e amatanganan te, ku faduksay gsefu angku, laman au way sesadi takamalganan? Longi sa ku faduksay te, gubuki yap angku.”

41Tam Fun nabalus anya te, “Marta, Marta, ngayu am fagafanawaun ay am fagasalaganun. 42Sadi way sik taw at fagayudanun fia. Ay Maria nafili at masine, ay we mafaago siginan anya.”

Currently Selected:

Lukas 10: OCCT

Highlight

Copy