Lukas 11

Isus at Foyungan sabaliwa nu Gdarangin

Mt 6:9-13, 7:7-11

1Sik menit, Isus gdarangin si sik talun, ay nu ntabu wan nu gdarangin, at sadi at tagadal nalong anya te, “Em Fun, foyungi emi tagdarangin kata ebi Uan nu gfoyung sat ngay tagadal.”

2Ay Isus nalong te, “Katatuy nu gdarangin am:

Em Mama,

Ngay taw nangus sumeg tua am ngayan,

ay masine nu gfagtainan tuo ngay taw.

3Foni emi em fakonun kayu menit,

4ay falyami em ngay asalanan, kata nu gfalyam ami em ngay iba at asalanan sa emi.

Ay dirii emi laman dimi gafaskudan sas asalanan.”

5Isus nalong sa anya fagayu te, “Ay am, nu e fagadgalangan am, ay nu ndasug am sat bale swabilug yabi ay get am sa anya te, ‘Sama, foni angku sik fakonun, 6aroro e faduksay au at bagu kadasug, ay kwa e famayafun,’ 7o ay fagadgalangan ro gbalus ayu siginan sad bale te, ‘Lag o gfafulawan ya angku. Nadingding kwan ku sakbawan, ay ku sisian maful si angku si em igyan. Kwa makaabangkad ya laman namon au emu am fagetun.’ O katanya ro at longan? Duan. 8Glong au ayu te, kanya dewa kauri kalindug laman namon ayu, aroro kanya ay fagadgalangan, kanya ro nangalindug fia ay namon ayu ay fagetun, aroro gurungan am get.

9“Nu katanya, glong au sa ayu te, eti, ay gfon ro sa ayu. Rvbvyi, ay lumag am. Atuki, ay gluang ro laman sa ayu. 10Aroro fagayu taget mul ban fia. Ay fagayu tagrvbvy lumag tua ban fia. Ay fagayu takatuk e lumuang waban fia laman sa anya.

11“Am fag ngay mama, ay sisian nu get sik albon, o abat ngate ro am namon sik albon, o namon ro am anya sik ule? Duan, o kin? 12Ay ay sisian nu get sik iklug, o namon ro am anya sik agipan? Duan. 13Ay dewa am sik ngay mauri fag taw, saful tuam gfon at masine sa ay sisian, ay ay Mama sas banwa, gtungud yay nu gsaful gfon at Masine fag Falad sas nusnga sinu taget sa anya.”

Isus ay Satanas

Mt 12:22-30; Mk 3:22-27

14Isus gaiyan siginan sik taw sik mauri fag falad gfayud maringang, ay arodi maringang wan. Ay sanya fag ngay taw andulo. 15Ay tiba nalong te, “At fagmabalyananun gaiyan mauri fag ngay falad siginan way Lango at Fun,#11:15 Lango at Fun: sas Griegu: Beelzebul, Satanas at ngayan at sadi. kanya mauri fag ngay falad at fun.” 16Ay tiba kaylat namaskud Isus, ay get laman gfalag sik mabalyanan fag fakamulun siginans banwa tagfatoglag te, Dius at nasugu anya.

17Isus nasaful kafag ngay taw at amatanganan ay nalong anya te, “Kayu fun at fagfagtainanan fag ngay taw nu gawayan way, abandi kalyam wan kanya fag fagfagtainanan. Ay sik talafuan nu gawayan way gugat, abandi ban sumaruayan way. 18Ay Satanas nu gfawayan way at sadili, wa ban gtaglayun at fagmafunanun. Nalong au katanya aroro glong am te, ku fangaiyan at mauri fag ngay falad siginan ways Lango at Fun at fagmabalyananun. 19Ay ku fagmabalyananun gaiyan at mauri fag ngay falad, nu siginan way Lango at Fun, daginan way ay ngay taw at fagmabalyananun at fangaiyan mauri fag ngay falad? Ay ngay taw at fakamulun gfatuyan te, wa matuyan ay longan. 20Ku fagmabalyananun gaiyan mauri fag ngay falad nu siginan tua Dius at fagmabalyananun, at masuad, Dius at Fagfagtainanan andasug si ayu. 21Sik mabalyanan fag taw nu e famawayan, ay nu naulit at bale, we tagfangkamul kadasug sanya. 22Ay tibak taw tagtungud yay nu mabalyanan nu nafawayan ay nababo anya, namul kafag taw at fagsegun at famawayan ay nangafud at nabul fag ngay ramraman. 23Nusnga sinu at yud gfadiuganan angku, kanya ku fawayan way. Ay nusnga sinu at yud ggubuk angku gfaful ngay taw, gfasaruayan way.

Sik Mauri fag Falad Gdog yay Kafoli sat Bale

Mt 12:43-45

24“Sik mauri fag falad nu naubun at fagbanwanan fag taw, nalo sa sangay talun at yud e mamam, laman nanrvbvy tibak fagbanwanan. Ay nu dway e nalag, kanya gamatangan te, ‘Kafoli kyay siring sa ebi ataw ku bale.’ 25Ay nu ndasug wan, manlag di malanu ay masine. 26Ay kafag mauri fag falad gdog yay nalao ay nataban yay fitu yak mauri fag falad tagtungud yay anya nu mauri. Ay kanya fagayu namanwan sanya fag taw, ay kafag taw nu mauri aksvn yap ebi ataw.”

At Matuyan fag Fagmasineun

27Kaduge Isus garingang, sik mangena gbia nu nalong siginan swa taw te, “Mauseganan kafag mangena at nafasalug emu, ay at nafasusu emu ebi.”

28Ay Isus nalong te, “Kaugat yay nu mauseganan tagdungugan Dius at Longan ay gfaning.”

Tibak Taw Udyu Kaylat Gyalagun sik Mabalyanan fag Fakamulun

Mt 12:39-42; Mk 8:12

29Kaduge sanya fag ngay taw gfasidsikfitan lang Isus, Isus glong te, “Mauri wayam, gyalagun am sik mabalyanan fag fakamulun tagfatoglag te, siginan aus Dius. Ay wa ban e gfalag ya sa ayu takatanya sas day at kinfasludan sas Dius at taglong Unas. 30Ebi Unas at fakamulun sik ke fakatoglagan fag fakamulun sas taw Ninibe, kata yay angku, Taw at Baguama, ku fakamulun, sik ke fakatoglagan fag fakamulun sa ayu. 31Ay anggan talun Seba at fun fag mangena, gdog yangay ban gleleg gasfuan ayu gina ban fanginsafulan asalanan fag menit ay lumong ban te, mauri am, aroro kafag mangena ndasug sas fun Sulumun siginans fungfung daga, laman nandungugan fun Sulumun at mamatanganan fag ngay longan. Ay amatangani, at kindasug ste katsi, gtungud yay fun Sulumun, ay dewa katanya, wam kaylat gdungugan anya.

32“Ay ebi fag ngay taw Ninibe gdog yangay ban gleleg gasfuan ayu gina ban fanginsafulan asalanan fag menit, ay glong ban te, mauri am. Aroro ngay taw Ninibe naubun tua at ngay asalanan gina nadungug Unas at foyungan. Ay amatangani, at kindasug katsi gtungud yays Unas, ay dewa katanya, wam gubun ay ngay asalanan.

Tam Bilug at Salung

Mt 5:15, 6:22-23; Mk 4:21-23; Lk 8:16-18

33“We taw namasalung sik salung ay namasas daga bale ay nanuklub sik alungkung nu bunway namasa tuas fagfatungkudan, laman ngay taw nu nasakbo lumag at damlag. 34Am mata am bilug at salung. Nu malyo tua am mata, fagdaul am bilug mayamag yangay. Ay am mata nu dway malyo, am bilug madulum way. 35Nu katanya, mataganani, laman am amatanganan te, am mayamag, bunwa fagmadulumun. 36Fagdaul am bilug nu mayamag tua, ay nu ddi e afud madulum, kanya masulo tua, kata sik salung at damlag nu gyamag emu.”

Isus Gagras ngay Taw Fariseu ay Tagfoyung Muisis at Faugali

Mt 23:1-36; Mk 12:38-40; Lk 20:45-47

37Kaduge Isus garingang, sik taw Fariseu nagewan Isus laman gfasfuan anya nanfangon. Ay Isus nasakbo ay nafangon. 38Kafag taw Fariseu andulo daul nu nalag te, Isus wa gfaning at mangaguyang at faugali tagfegus at daluap gina nanfangon.

39Ay tam Fun nalong anya te, “Am, ngay taw Fariseu, gfegus am ay faginuman fag taya ay ay laman at guyuy. Ay ay basad taw mapnu fagfangalabianun ay fagmauriun.

40“Wam mamatanganan! O nunda wam nasaful te, at nawat at guyuy, kanya yangay at nawat anggan at basad. 41Foni tua sat yud e kwa laman masine tua fagayu tagsi ayu.

42“Ida, am fag ngay taw Fariseu, aroro dewa am gfon at fasafuluk afud sas Dius siginan ay balanuy ay ay banglad ay fagayu ay famaebebanglu ay fakonun, nalyam wayam gfakamulun at matuyan sa ay iba, ay nu kesug am Dius. Nu ddi am nalyam at mafanud fag ngay suguan, dangay kalyam anggan talay fag ngay suguan.

43“Ida, am fag ngay taw Fariseu, aroro ay fakaylatun at masine fag ngay faglunggungan sa sangay bale fakafulan, ay gina am sis wabilug furuan, kaylat am ngay taw nu gseg ayu.

44“Ida am, aroro kata am sik ngay fagfolian at yud kalag, ay ngay taw taglao sanya wa saful te, e fagfolian.”

45Sik tagfoyung Muisis at Faugali nalong sas Isus te, “Takamoyung, nu nalong o katanya, gagras wo anggan emi.”

46Ay Isus nalong te, “Ida am, tagfoyung Muisis at Faugali, aroro gfafasanan am sas fagayu taw at mabyat fag famubaun at yud kamad, ay wam ggubuk, nusdi am glangbud sumyu. 47Ida am, aroro kawat wayam Dius at ngay taglong at fagfolian. Ay ay ngay mangaguyang yay ebi at nafabul kanya fag ngay taglong. 48Ay anggan am, gfadiuganan wayam ay ngay mangaguyang at fakamulun, aroro kanya at nafabul, ay am wan at nawat at fagfolian. 49Nu katanya, siginans Dius at fagsafulun, nalong te, ‘Sumugu au ku ngay taglong ay ku ngay nasugu sa sangay taw Udyu. Kanya ban gfabul kafag ngay taglong tiba, ay tiba ban gfauri.’ 50Nu katanya, e faurianan ban am aroro fagayu Dius at taglong at kinbul, siginan ngays fakasigadan tam fagdaul daga, 51siginan ebi at faurianan sat nafabul Abel anggan at faurianan sat nafabul Sakaryas. Kanya nbul sis wabilug fagirugan fanggalangun ay Dius at bale. Matuyan, glong au ayu te, e faurianan ban am aroro takatanya fag fakamulun. 52Ida am, tagfoyung Muisis at Faugali, aroro gsuksuk wayam fagsafulun at fanluang. Ay am, wam nasakbo, ay gsalag wayam takaylat gsakbo.”

53Isus nu galoun wan sanya ginan fag bale, kafag ngay tagfoyung Muisis at Faugali ay ngay taw Fariseu maksvn nu kadotama anya, ay kanya fagayu malayun nu ginto fagayu at fakaylatun sa anya, 54aroro grvbvy at balyawvtan laman magamat anya siginan at longan.

Currently Selected:

Lukas 11: OCCT

Highlight

Copy