Lukas 9

Isus Nasugu at Tagadal fag Labi Dua

Mt 10:5-15; Mk 6:7-13; Lk 10:4-12

1Isus nafaful at nasugu fag labi dua ay nafae fagmabalyananun anya fagayu laman mafaiyan at mauri fag ngay falad, ay laman mafafia fagayu at ke fakasaitun. 2Ay Isus nasugu at labi dua laman namoyung sabaliwas Dius nu gfagtainan, ay nu gfafia at ke ngay fakasaitun. 3Ay Isus nalong sa anya fagayu te, “Lag am e buba, nu glo am. Lag e tulag, ay e sabi, ay lag gbuba fakonun ay salapi, ay lag gfadua ay lanbung. 4Ay nusnga nday fag bale nu gsakbo am, banwani yap sanya yakmay am nalo sanya ginan fag furuan. 5Ay nusnga nday fag talun at ngay taw nu dway kaylat ayu, nu glo am sanya ginan fag furuan, fagfagi tagsi ay darafa fag lukbu, laman famasaful te, kafag ngay taw wa gfaning.” 6Ay at ngay tagadal nalo ay nadalan sa sangay furuan ay nafoyung at Masine fag Barita, ay nafafia ngay taw at fakasaitun, sas fagayu at fakadasugan.

Fun Erudes Gfainbalian at Amatanganan

Mt 14:1,2; Mk 6:14-29

7Fun Erudes nadungug sabaliwas Isus at fakamulun, ay kanya gfainbalian at amatanganan, aroro tibak taw nalong te, “Kanya wa fia Uan, nadog yay gleleg.”

8Tibak taw nalong te, “Kanya yay fia Elyas, nadog yay ansure.”

Ay tibak taw nalong te, “Kanya yay ebi fag taglong at sadi nadog yay naleleg.”

9Ay Erudes nalong te, “Ebi nasugu kwa te, lifungi wan Uan at liug, sinu ya manga kafag mangama? Nadungug au at fakamulun.” Ay Erudes maksvn nu gyalagun Isus. Ay Erudes gugatan gyalagun Isus.

Isus Nafayafun Limak Libuk Mangama

Mt 14:13-21; Mk 6:30-44; Uan 6:3-13

10Isus at ngay nasugu nu nfoli wan, nafoyung sas Isus at ngay nafakamulun. Isus nataban anya fagayu ay nalo sa sik furuan at ngayan Betsaida. Isus we nataban sas day at ngay nasugu.

11Aro fag ngay taw at nanangalo Isus, nu nasaful at fakamulun, naguyan anya. Ay Isus kaylat gkamatoan anya fagayu. Ay kanya nafoyung sanya fag ngay taw sabaliwa Dius nu gfagtainan ay nafafia at ngay ke fakasaitun. 12Nu kayabi wan, Isus at labi duak nasugu nanangakbang sa anya ay nalong te, “Falaoi wan kafag ngay taw, ma ro nanrvbvy at fakonun ay at bale tagsit ligung fag ngay furuan ayu sirut ay sat ngay talun aroro we bale ste fag talun.”

13Ay Isus nabalus te, “Am wa ro tagfayafun anya fagayu.”

At labi duak nasugu nalong te, “Lima way em ba tinapay ay dua way em ba albon, nu dway ro mi nalao laman nanamayad fakonun laman famafangon in fag ngay taw.”

14Malgau limak libuk mangama at maful sanya.

Isus nalong sat ngay tagadal te, “Falunggungi ay afudi ngay taw ay galay sik afud limak safulu.”

15Ay at ngay tagadal nafaning at longan ay nafalunggung kafag ngay taw. 16Ay Isus nabul kafag limak tinapay ay kafag duak albon ay natangda ay naseg Dius. Kanya nalungud at ba tinapay ay nafon sat ngay tagadal laman gfon sa sangay taw. 17Ay fagayu taw naon ay napsug. Ay at ngay tagadal nafaful at nagsawadan, ay nu fagayu wan, labi dua yak sabi mapnu.

Pedru Gfoyung te, Isus wan, Dius at Nafili fag Fun

Mt 16:13-20; Mk 8:27-30

18Kaduge Isus gdarangin sesadi, sanya yangay at ngay tagadal, ay Isus nainto anya fagayu te, “Sinu au, ngay taw at longan?”

19Ay at ngay tagadal nabalus te, “Tibak taw glong te, o wan Uan Tagfasurung, ay tiba glong te, o wan Dius at taglong Elyas, ay tiba glong te, o wan at sadi Dius at taglong at nadog yay naleleg.”

20Ay Isus nainto yangay fia sat ngay tagadal te, “Ay am, nu gamatangan am, sinu au?”

Ay Pedru nabalus te, “O wan Dius at nafili fag Fun.”#9:20 Dius at nafili fag Fun: sas Griegu, Kristu.

21Ay Isus maksvn nu glong sa anya fagayu te, “Lag glong sas nusnga sinu fag taw.”

Isus Nafoyung sabaliwa nu Kabul Ban

Mt 16:21-28; Mk 8:31–9:1

22Isus nalong yangay te, “Au, Taw at Baguama, ngayu ban ku fagnandalanun faurianan siginan sangay fagtainan ay ngay fun tagfon fanggalangun ay anggan ngay tagfoyung Muisis at Faugali. Ay e gfabul ban angku, ay gdog kyay ban gleleg sis fatuluk menit.”

23Ay arodi Isus nafoyung sas fagayu at ngay tagadal te, “Nusnga sinu takaylat nangalo angku, lag gfaning at sadili fakaylatun nu bunway kayu menit fasanani at fasulungan kayu ay aloi angku. 24Aroro nusnga sinu takesug at leleg, umkalyam way ban at leleg. Ay nusnga sinu tagfon tua at leleg aroro gafanud sa angku, kanya ban e leleg tua kabavn. 25O e tungkul sa sik taw at nagbilug nusnge wain ste swa daga ay at leleg ban sa ways faurianan? 26Aroro nusnga sinu fag taw takapla gfoyung angku ay ku longan, anggan au, Taw at Baguama, kapla kyangay ban anya gina kban andasug ke fagmabalyananun, ay e fagmabalyananun kyangay siginan ku Mama ay anggan at masine fag ngay tagbarita. 27Anud nu glong au ayu te, am tiba at malindug ste katsi ya ban am kabul yakmay ban am nalag Dius nu gfagtainan.”

Isus at Kawalungan Anbali

Mt 17:1-8; Mk 9:2-8

28Nu nlangfe waluk menit, Isus nataban Pedru ay Uan ay anggan Santiagu, ay naundaud sa sik buksul laman nandarangin. 29Ay gina gdarangin, Isus at kamatan anbali, ay at lanbung malaksi ay masulo. 30-31Ay sik duama nsure, kanya Muisis ay Elyas, ay gfakamatoan Isus. Kanya fag duama at lanbung masulo yangay, ay gkamatoan sabaliwas Isus nu kabul ban sas Erusalem.

32Pedru ay anggan at ufud ngabasad nu gtiug. Ay gina kafag tulu anfulo, nalag Isus nu masulo ay nalag anggan at ufud fagdua nu malindug magamut Isus.

33Ay at dua nu galoun wan, Pedru nalong sas Isus te, “Em Fun, fadi iste tuami. Nangawat ro mi tuluk balean, at sadi sa emu, ay at sadi sas Muisis, ay at sadi sas Elyas.” (At matuyan, Pedru wa nasaful at longan at masuad.)

34Ay gina Pedru garingang, sik linyabu nafarum anya fagayu, ay kafag ngay tagadal kalimu. 35Ay sanya ginan sad linyabu e naringang te, “Tuy ku Baguama, ku nafili. Dungugani anya.” 36Ay nu ntabu wan at longan, kafag ngay tagadal at lagan Isus way lang. Ay ginanya fag ngay menit kanya fag ngay tagadal wa nafoyung at nalag nusdi sa sadik taw.

Isus Nafafia sik Baguama ke Mauri fag Falad

Mt 17:14-18; Mk 9:14-27

37Balabag di Isus ay at ufud fag tulu natagbung siginans tungud buksul, ay sik ngay taw ngayu nafablang anya.

38Ay siginan swa taw sik mangama nauro te, “Takamoyung, maksvn nu get au sa emu te, damai ku baguama, aroro ku sisian sadi way. 39Sik mauri fag falad nangatayuk gugat sa anya ay arodi vtv kanya guro ay kafag falad gfatong anya ay at bibig gbura. Ay dewa ku sisian gfadfarangan ayu daul, fag falad arvs wa gubun ya anya. 40Ay naet koma sam ngay tagadal laman gaiyan at mauri fag falad, ay wa mafaiyan.”

41Ay Isus nabalus te, “Sik ngay taw wayam at yud gafanud ay at yud mamatanganan. Seduge ya ban nu gbanwan au si ayu ay nu gagwantan au galo ayu? Agvd, kin, tabani stie am baguama.” 42Ay gina at baguama kadasug, mauri fag falad nafatong anya sas daga ay maksvn nu gfafatfat anya. Ay Isus gagras kafag mauri fag falad ay nafafia kafag baguama ay nafafoli anya sat mama.

43Ay fagayu taw andulo te, “At kabalyanan Dius.”

Isus Gdog yay Nafoyung sabaliwa nu Kabul Ban

Mt 17:22,23; Mk 9:30-32

Gina fagayu taw gamatangan daul Isus at nafakamulun, Isus nalong sat ngay tagadal te, 44“Dungugani fia masine, aroro e namoyung ban angku, Taw at Baguama, sat mauri fag ngay taw.”

45Ay at ngay tagadal ya nasaful at longan, aroro wa nafafayamagun at longan at masuad, laman at ngay tagadal wa gtogdungug. Ay kanya fagayu kalimu nanginto Isus at longan at masuad.

Tiba Tungud ban sis Dius at Fagfagtainanan

Mt 18:1-5; Mk 9:33-37

46Isus at ngay tagadal gfasigad gbadbaboan sabaliwa nu sinu ban si anya fagayu tiba tungud.

47Ay Isus nu nasaful at ngay amatanganan takatanya, nataban sik sisian sirut ay gfalindug sit day tigyangan. 48Ay Isus glong sat ngay tagadal te, “Nusnga sinu tua takaylat tuy fag sisian sirut aroro kesug angku, kaylat yangay angku, ay nusnga sinu takaylat angku, kaylat anggan at nasugu angku, aroro nusnga sinu si ayu tiba daga katsi, kanya tua ban tiba tungud.”

Nusnga Sinu at Yud Gfawayan Ayu, Gfadiuganan Tua Ayu

Mk 9:38-40

49Uan glong sas Isus te, “Em Fun, nalag ami sik mangama naiyan at mauri fag ngay falad siginan am fagmabalyananun ay nasalag ami anya, aroro wa galo antam.”

50Ay Isus gbalus te, “Lag gsalag anya, aroro nusnga sinu at yud gfawayan ayu, gfadiuganan tua ayu.”

Sadik Furuan sis Samarya wa Kaylat Gfasakbo Isus

51Nu munakbang wan fag menit Isus nu kafoli sas banwa, anke algan glao sas Erusalem. 52Ay Isus nafaguna sik ngay taw sa sik furuan tagsis Samarya laman namasine at fagtaglayunan fag bale.

53Ay tagsanya fag ngay taw wa kaylat gfasakbo Isus, aroro Isus at fagyadasugun fia sa tuas Erusalem. 54Ay at ngay tagadal, Santiagu ay Uan, nu nasaful kafag ngay taw at fakamulun, nalong sas Isus te, “Em Fun, o kaylat wo nu get ami sik afuy siginans banwa, laman girug anya fagayu?”

55Ay Isus anbiling ay gagras anya. 56Ay kanya fagayu nalo sa tibak furuan.

Tuluk Taw Ganangaloun Isus

Mt 8:19-22

57Kaduge Isus glao si sangaba dalan, sik taw glong anya te, “Nangalo kwa emu nusnga nday nu glo wo.”

58Ay Isus nabalus anya te, “Amatangani, sik idu talun e fagnansarirungan tua. Ay manuk tungud e fugad tua. Ay au, Taw at Baguama, kwe fagtiugan.”

59Ay Isus nalong sat sadi tagsanya te, “Aloi angku.”

Kanya fag taw glong te, “Ku Fun, guli kyay laman namoli ku mama.”

60Ay Isus nabalus anya te, “Fabayani wa at ngay kinbul at namoli at ngay mabulan. At masine nu glo wo ay namoyung o sabaliwas Dius nu gfagtainan.”

61Ay sadik taw nalong yangay te, “Ku Fun kaylat kyangay nangalo emu, dewa katanya guli kyay laman namararang au sa ku ngay kalongan ku fakamulun ban.”

62Ay Isus glong anya te, “Sik taw gina garadu nu nadama way sat guyan, wa ban katap sas Dius at fagfagtainanan.”

Currently Selected:

Lukas 9: OCCT

Highlight

Copy