Uan 9
9
Isus Nafafia sik Taw Yud Glag
1Gina Isus gdalan nalag sik mangama yud glag siginan nu kasalug. 2Ay at ngay tagadal ginto anya te, “Takamoyung, sinu at ke asalanan, in fag mangama at fagyudun glag, o sia wan ay o mannga at ngay fagtainan?”
3Ay Isus gbalus te, “Tuy fag mangama at fagyudun glag, bunwa sia ay at ngay fagtainan at ke asalanan, nu bunway laman Dius at fagmabalyananun umsure siginan nu gfafia anya. 4Kaduge mamenit yay, masine nu gfakamulun tam at nasugu angku at fagyafakamulunun. Aroro nu nyabi wan, we taw ya mafakamulun. 5Kaduge au ste swa daga, au wan fagmayamagun sas fagayu taw.”
6Ay Isus nu nalong wan takatanya, kanya natufe sas daga ay nawat lifak siginan at tufe, ay nafatayuk sa kafag mangama at mata. 7Ay sanya ginan, Isus glong anya te, “Loi wan sas Siluam fag fagigusan ay namegus o am mata.” (Siluam at masuad te, Nasugu.) Ay kafag taw at yud glag nafaning, ay gina kafoli glag wan.
8Nu katanya, at ngay fasabale ay tibak taw at nalag anya ebi gina gfanget, nalong te, “O nunda bunwa in fag mangama taget gugat?”
9Ay tibak taw glong te, “Sabv.”
Ay tibak taw glong way te, “Duan! In takata way at kamatan.”
Ay kafag mangama glong te, “Au wan.”
10Ay kafag ngay taw ginto anya te, “Setain nu namadama o?”
11Ay kanya nabalus te, “Sik mangama at ngayan Isus nawat sik lifak ay nafatayuk sa ku mata, ay nalong sa angku te, ‘Loi sas Siluam ay namegus o am mata.’ Ay nalo au sanya ay nafegus au ku mata, ay glag kwan.”
12Ay kafag ngay taw gdog yay ginto anya te, “Dada wan am nalong fag mangama?”
Ay kanya nabalus te, “Kwa saful.”
Ngay Taw Fariseu Nainsaful sabaliwa nu Kafia
13Sik ngay taw nataban at yud dan glag sa sangay taw Fariseu. 14Isus nu kawat lifak ay nu gfafia at yud glag, gina Famiangalay fag Menit. 15Ay sanya fag ngay taw Fariseu ginto sat yud dan glag te, “Tain nu kafia o?”
At yud dan glag gbalus te, “Isus nafatayuk sa ku mata lifak ay sanya ginan nanamegus au ay glag kwan.”
16Ay tibak taw Fariseu glong te, “Kafag taw wa siginans Dius, aroro dewa sis Famiangalay fag Menit, gfakamulun way.”
Ay tibak taw glong te, “Tain ro kanya nu mafafakamulun at ngay madulo fag fakamulun nu sik tagasalanan way?”
Ay kafag ngay taw at amatanganan wa masadi.
17Nu katanya, kafag ngay taw gdog yay ginto sat yud dan glag te, “Ay nu sa emu, tain am longan sabaliwa anya, dakngani kanya nafafia am mata?”
Kanya gbalus te, “Kanya Dius at taglong.”
18Ay taw Udyu at ngay tagfangguna wa gafanud te, kanya wa ngaro fia yud dan glag, ay kanya nafauro kafag taw at fagtainan, 19ay ginto anya te, “O tuy ay baguama, ay longan te, wa glag siginan nu kasalug? Wain katsi at faglagun wan?”
20At ngay fagtainan gbalus te, “Sabv, kanya em baguama, ay saful ami te, wa glag siginan nu kasalug. 21Dewa katanya, yami saful te, wain katsi at faglagun wan. Yami yangay saful te, sinu at nafafia anya. Intoi wa sa anya, kanya mafagtainan wan. Mafafoyung wa ro sabaliwa at sadili.”
22At fagtainan at fagnalongun katanya, aroro kalimu taw Udyu at ngay tagfangguna, aroro kanya fagayu ansadi te, aiyani wan siginans bale fakafulan nusnga sinu tagfoyung te, Isus, Dius at nafili fag Fun.#9:22 Dius at nafili fag Fun: sas Griegu, Kristu. 23Kanya wan at ngay fagtainan at fagnalongun te, “Kanya mafagtainan wan, sai wa anya nu ginto am.”
24Ay kafag ngay tagfangguna gdog yay gfauro at yud dan glag ay glong anya te, “Sis Dius at daga salubangan foyungi sa emi at matuyan. Nasaful ami te, kanya fag taw sik tagasalanan way.”
25Kanya gbalus, “Kwa saful te, o kanya sik tagasalanan way, ay mannga duan. Ku fagsafulun, dan au yud glag, ay katsi glag kwan.”
26Ay kafag ngay taw ginto anya te, “Setain at nafakamulun sa emu? Setain nu gfafia emu?”
27Kanya gbalus te, “Nafoyung kwa ayu, ay dewa katanya, wam gafanud. Ay wain ay fakaylatun yay gdungug ku famalus? O kaylat am laman at ngay tagadal yangay am?”
28Ay kanya fagayu gfalingun glong te, “O way at tagadal. 29Nasaful ami te, Dius naringang sas Muisis, ay wami saful te, daginan kanya fag taw.”
30Kafag mangama gbalus te, “Kanya wa ngaro at madulo. Wam nasaful te, daginan kanya, dewa nafafia ku mata. 31Nasaful watam te, Dius wa gdungugan ngay tagasalanan, nusnga sinu way lang tagfakamulun at fakaylatun at fagdunguganun. 32Siginan ngay ebi, ya tam e nadungug sik taw at mafafia sik yud glag siginan nu bagu kasalug. 33Kanya fag taw nu dway siginans Dius wa ro mafafakamulun.”
34Kafag ngay tagfangguna gbalus te, “Siginan yay nu bagu o kasalug sik tagasalanan wo, ay katsi kamoyung yay o sa emi.”
Ay kafag ngay taw naiyan wa anya siginans bale fakafulan.
Sas Fanfalad fag Fagyudun Glag
35Isus nadungug te, taw Fariseu naiyan kafag taw at yud dan glag. Ay kanya nalo sa kafag mangama ay ginto te, “O gafanud o sas Taw at Baguama?”
36Ay kafag mangama gbalus te, “Fagtainan, longi angku sinu kanya. Kaylat au gafanud sa anya.”
37Isus glong te, “Nalag wo anya. Katsi tagfakamatoan emu, kanya wan.”
38Kafag mangama gbalus te, “Ku Fun, sabv, gafanud au.” Ay kanya gtudan sas Isus at daga salubangan.
39Ay Isus glong anya te, “Ku fagindasugun ste swa daga laman nanginsaful au fagayu taw te, o e asalanan, laman at ngay yud glag, glag tua ban, ay at ngay taglag wa ban glag.”
40Tibak taw Fariseu at malindug sanya nadungug ay ginto Isus te, “O am longan at masuad te, wami yangay glag?”
41Isus gbalus, “Nu dway am glag, wam nangus e asalanan. Ay aroro glong am te, ‘Glag tuami,’ nu katanya, e asalanan yayam.”
Currently Selected:
Uan 9: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
