Uan 8
8
Sik Mangena Nagamatan Gina Kamatugtug
1Sanya ginan, Isus nalao sas Buksul Ulibu. 2Ay balabag di sbalabag sirut, Isus anfoli sas Dius at bale, ay fagayu taw andasug sa anya. Ay Isus namalunggung ay gfoyung sa sangay taw. 3Ay ngay tagfoyung Muisis at Faugali ay taw Fariseu nataban sik mangena at nagamatan gina kamatugtug, ay nafalindug sis wabilug fagngayuan taw. 4Ay kanya fagayu nalong sas Isus te, “Takamoyung, tuy fag mangena nagamatan gina kamatugtug. 5Sis Faugali, Muisis gfoyung antam te, ‘Takatanya fag taw fanai anya gang yakmay anbul.’ Nu sa emu, setain am fagmalongun sabaliwa anya?” 6At fagnaintoun katanya sas Isus laman namaskud anya, laman e fanlonganan sabaliwa anya.
Ay Isus narungan ay griruk sas daga at sumyu. 7Gina kafag ngay taw gfataglayun ginto sas Isus, Isus namalindug ay glong te, “Nusnga sinu si ayu at yud e asalanan, kanya taguna gfana.”
8Ay Isus gdog yay narungan ay griruk sas daga at sumyu. 9Kafag ngay taw nu nadungug, glao wan gsadsadian, taguna glao at ngay mafagtainan. Ay at sawad, Isus way lang ay kafag mangena. 10Isus anlindug ay ginto sa anya te, “Fagmangena, dada wan kafag ngay taw? O e nafaurianan emu?”
11Kafag mangena gbalus te, “Duan, Fagtainan.”
Ay Isus glong te, “Kwa yangay ro gfaurianan emu. Loi wan ay lag gdog ya gasalanan.”
Isus Fagmayamagun sas Fagayu Taw
12Isus gdog yay glong sa sangay taw Fariseu te, “Au wan fagmayamagun sas fagayu taw. Nusnga sinu tagalo angku di ban glao sasad madulum, nu bunway e fagmayamagun tua tagfon leleg.”
13Ay ngay taw Fariseu glong te, “O way lang tagfoyung sabaliwa am sadili. We tungkul am longan.”
14Isus gbalus te, “Dewa au tagfoyung sabaliwa ku sadili, matuyan tua ku longan. Aroro saful kway nu ndaginan au, ay ku fagnangadasugan ban. Ay dewa katanya, am, wam saful. 15Nu ginsaful am taw longan, kata ways taw nu ginsaful. Ay au kwa ginsaful sas nusnga sinu fag taw te, o matuyan. 16Nu ginsaful au taw at longan, matuyan tua, aroro bundi au sesadi taginsaful, nu bunway anggan tua ku Mama at nasugu angku. 17Si ay faugali, marirukan te, duak taw nu gdiuganan tua at famatuyan, kanya matuyan wan. 18Gfoyung au sabaliwa ku sadili, ay ku Mama at nasugu angku gfoyung yangay sabaliwa angku.”
19Ay kanya fagayu ginto anya te, “Dada am mama?”
Ay Isus gbalus te, “Wam toglag angku ay ku Mama. Nu natoglag di am angku, toglag yangay ro am ku Mama.”
20Isus nafoyung takatanya gina sis Dius at bale, munakbang sis fagsuadan fanggalangun. Dewa katanya, we mananggamat anya aroro ya ndasug at kasakan fag buknga.
Sik Taw wa Madasug sas Isus at Fagnangadasugan
21Isus gdog yay glong sanya fag ngay taw te, “Glo kwan, ay grvbvy ban am angku, ay kabul ban am gina yud nafalyam ay ngay asalanan. Ay wa ban am madasug sa ku fagnangadasugan.”
22Taw Udyu at ngay tagfangguna gkamatoan te, “O kanya ban manga namabul at sadili? O kanya wa manga at fagnalongun te, ‘Wa ban am madasug sa ku fagnangadasugan’?”
23Isus glong sa anya fagayu te, “Am steginan wayam sdaga, ay au siginan ktua ttungud. 24Aroro katanya, aro nalong kwa ayu te, kabul ban am gina yud nafalyam ay ngay asalanan. Matuyan, kabul wam fia gina yud nafalyam ay ngay asalanan nu dway am gafanud te, Au, au wan.”
25Kafag ngay taw ginto te, “Sinu o manga fia?”
Isus gbalus te, “Siginans fakasigadan glong au ayu te, Au, au wan. 26Ngayu yay ku fagyalongunun sabaliwa ayu ay ku fagyafoyungunun at mauri tagsi ayu. Ay baliwan matuyan tua at nasugu angku, ay ku foyungan sas fagayu taw ku nadungug siginan tua anya.”
27Ay kafag ngay taw wa natogdungug te, Isus at foyungan fia sa tua baliwa at Mama. 28Ay Isus glong te, “Nu nafabat waban am Taw at Baguama, sumaful wam te, Au, au wan. Kwe fagmafakamulunun nu ku sadili way lang. Nusnga setaw ku longan gfaning au kata ku Mama at nafoyung angku. 29Ay at nasugu angku gufud tua angku. Kanya di gfabayan angku gsesadian, aroro kabavn gfakamulun au tagfauseganan anya.”
30Ngayu tua tagdungugan at nafanud sa anya.
At Matuyan Tagfalfas Ayu
31Isus glong sa sangay taw Udyu tagafanud sa anya te, “Nu gfataglayun tuam gfaning ku foyungan ayu, am wa fia ku ngay tagadal. 32Sumaful am at matuyan ay at matuyan at namalfas ayu.”
33Ay kafag ngay taw gbalus anya te, “Ami Abrayam ami at kasugfunanan, ay kabavn wami gafagsuguanan sas nusnga sinu fag taw. Nataw am longan at masuad te, ‘E namalfas ban ayu’?”
34Isus gbalus anya te, “Matuyan nu glong au ayu te, fagayu tagasalanan, gafagsuguanan asalanan. 35Sik fagsuguan wa ban gugat katap sit fagyafunan fag talanan. Ay takatap ban kabavn kanya tua fag talanan at baguama. 36Ay Dius at Baguama nu nafalfas tua ayu, matuyan nalfas wam fia. 37Nasaful kwa te, Abrayam am at kasugfunanan. Dewa katanya, kaylat am gyafabulun angku, aroro wam kaylat gfaning ku foyungan. 38Au, gfoyung au ku Mama at nafalag sa angku, ay am, gfakamulun am ay nadungug siginan ay mama.”
39Kafag ngay taw gbalus te, “Abrayam em mama.”
Isus glong anya te, “Nu matuyan tua te, Abrayam tuam at ngay sisian, gfaning tuam nangus at fakamulun. 40Ku fakamulun, gfoyung kway lang ayu at matuyan ku nadungug siginans Dius, ay dewa katanya, kaylat am gyafabulun angku. Abrayam wa katanya at fakamulun. 41Ay fakamulun gfaning am ay mama at fakamulun.”
Ay kanya fagayu glong anya te, “Bundi mi nsalug gina em fagtainan yud madadwaan. Sadi way em mama, Dius way lang.”
42Ay Isus glong anya te, “Nu Dius tua fia ay Mama, kesug tuam nangus angku, aroro siginan aus Dius. Kwa ndasug nu ku sadili way lang algan, nu bunway Dius tua at nasugu angku. 43Ay fagyudun katogdungug ku longan ayu, aroro wam kaylat gdungugan ku foyungan. 44Ay mama ang way Satanas. Ay kaylat am gfakamulun ay mama at fakaylatun. Siginan ngays fakasigadan kanya takamabul way, ay wa kaylat sat matuyan, ay nusdi sik alay we si anya at matuyan. Kanya kamuag gfaning at ugali, aroro kanya takamuag ay sia wan fun fakamuagun. 45Wam gafanud sa angku aroro nafoyung au ayu at matuyan. 46Wam e mafafoyung te, e asalanan au. Nu matuyan tua ku foyungan ayu, wain way ay fagyudun gafanud ku longan? 47Dius at ngay sisian gdungugan tua at longan. Am, bunwa am Dius at ngay sisian, nu katanya wam kaylat gdungugan.”
Isus ay Abrayam
48Ay sanya fag ngay taw Udyu glong sas Isus te, “O wa matuyan em longan te, sik taw o Samarya ay e gfafansaful emu?”
49Isus gbalus te, “Duan, we gfafansaful angku. Gfauseganan au ku Mama, ay dewa katanya gfauri am angku. 50Wa mafanud sa angku ngay taw at famauseganan angku. Ku Mama at fakaylatun nu e gfauseganan angku. Kanya tua tagfatuyan te, matuyan ku longan. 51Matuyan nu glong au ayu te, nusnga sinu tagfaning ku longan, di ban kabul kabavn.”
52Ay kafag ngay taw Udyu glong te, “Katsi natuyan wami te, e gfafansaful emu. Abrayam ay Dius at ngay taglong anbul, ay glong o te, ‘Nusnga sinu tagfaning ku longan di ban kabul kabavn.’ 53O nunda gtungud tuo em mama Abrayam? Kanya katsi anbul wan, ay anggan Dius at ngay taglong anbul wan. Tain ro nu malong o te, gtungud tuo anya fagayu?”
54Ay Isus gbalus te, “Nu au way tagfauseganan ku sadili, we tungkul. Ku Mama tua tagfauseganan angku, ay glong am te, ‘Kanya em Dius.’ 55Ay wam natoglag anya. Ay au gtoglag ktua anya. Nu glong kway ro te, kwa gtoglag anya, sik takamuag kyangay kata ayu. Ay duan, gtoglag ktua anya ay gfaning ktua at longan. 56Ay mama Abrayam nauseganan nu nasaful te, lumag nu kadasug au. Ay kanya nu nalag nafanagsag mandi.”
57Ay kafag ngay taw Udyu glong anya te, “Yo limak safuluk banwa, setain ro nu malong o te, nalag wo Abrayam?”
58Isus gbalus te, “Matuyan nu glong au ayu te, gina Abrayam yud ansalug, Au, au wan.”
59Ay nu katanya, kafag ngay taw nafuyut gang laman namana anya. Ay Isus nasuksuan ay nalo wan siginan Dius at bale.
Currently Selected:
Uan 8: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
