Uan 10

At Matuyan fag Tagalaga

1“Matuyan nu glong au ayu te, tagsakbo sa sangay tupa at ubung nu dway fia sas sakbawan nu gdalan, ay nu sa way sik yud masine fag fagsakboan, kanya sik tagfangkamul way ay takamabul. 2Ay nusnga sinu tagsakbo nu sa tua fias sakbawan, kanya wan tagalaga at ngay tupa. 3At tagulit sakbawan gfasakbo tua anya, ay at ngay tupa gdungugan tua at aringang. Ay kanya guro at ngay tupa at ngayan ay gguna at ngay tupa gina gduksun siginan sad ubung. 4Ay nu nafaduksun wan, kanya gguna at ngay tupa ay at ngay tupa galo anya, aroro gtogdungug tua at aringang. 5Kanya fagayu di nangalo at fagyudun toglag fag taw, sarokta glagyu way, aroro wa gtogdungug at aringang.”

6Isus nafoyung tuy fag faydayuanan ay kafag ngay taw wa natogdungug at foyungan at masuad.

Isus wan at Matuyan fag Tagalaga

7Isus gdog yay glong te, “Matuyan nu glong au ayu te, au wan ngay tupa at sakbawan. 8At ngay naguna angku, sik ngay tagfangkamul way ay takamabul ay kafag ngay tupa wa gdungugan anya. 9Au wan sakbawan. Nusnga sinu tagsakbo nu sa tua angku nu gdalan, kanya umlangfe. Kanya fagayu gsakbo ay gduksun ay lumag at fagnanfangonan. 10Sik tagfangkamul at fakadasugun at algan nanfangkamul way, nanfamabul ay namamin. Ay ku fagindasugun laman ngay taw umke leleg at matuyan ay kasakan.

11“Au wan at matuyan fag tagalaga. At matuyan fag tagalaga gfon at leleg laman at ngay tupa e leleg tua. 12Sik taw nu mabayadan way, ay nu dway fia tagagbilug tupa, nu glag te, idu talun kadasug, kanya glagyu wan ay gubun wan kafag ngay tupa. Nu katanya, idu talun namafalo ngay tupa ay kanya fagayu sumaruayan. 13Kanya fag taw glagyu wan aroro mabayadan way, ay wa kafanyu kafag ngay tupa. 14Au wan at matuyan fag tagalaga. Gtoglag au ku ngay tupa, ay kanya fagayu gtoglag yangay angku, 15kata ku Mama nu gtoglag angku ay nu gtoglag au anya. Gfon au ku leleg laman ku ngay tupa e leleg tua. 16E tiba kyay ktupa, at yud yay sisad ubung. Masine nu namaful kyangay anya fagayu, laman kanya fagayu gdungugan yangay ku aringang, ay laman ban kafag ngay tupa gadgaloan ay sadi tua tagalaga.

17“Ku Mama kesug angku aroro namon au ku leleg sa anya fagayu laman kanya fagayu e leleg tua, ay sanya ginan gdog kyay ban gleleg. 18We mafabul siginan angku ku leleg, nu bunway gfon kwa fia. Ay e fagmabalyananun au gfon ay gbul. Katanya ku Mama at suguan sa angku.”

19Aroro siginan Isus at nalong takatanya, ngay taw Udyu at amatanganan wa masadi. 20Ay ngayuk taw glong te, “E gfafansaful anya, ay nalyam at amatanganan. Wain tam fagdunguganun anya?”

21Ay tibak taw glong te, “Sik taw nu e mauri way fag falad, wa mafafoyung takatanya. O nunda sik mauri fag falad mafafia sik taw yud glag?”

Ngay Taw Udyu Naiyan Isus

22Andasug fagmafulun sabaliwa nu gfalganan Dius at bale sis Erusalem. Ginanya fag buknga marios, 23ay Isus glao sis Dius at bale, sis Sulumun at tangbi aba. 24Ngay taw Udyu tagsanya gligung anya ay glong te, “Seduge ya ban nu yud o gfoyung sa emi te, ‘Au wan Dius at nafili fag Fun.’#10:24 Dius at nafili fag Fun: sas Griegu, Kristu. Foyungi wa fia emi.”

25Isus gbalus te, “Nafoyung kwa ayu ay wam gafanud. Ku fakamulun fag ngay madulo sa ku Mama at fagmabalyananun tagfatuyan sabaliwa angku. 26Dewa katanya, wam gafanud sa angku aroro bunwam ku ngay tupa. 27Ku ngay tupa gdungugan tua angku, ay toglag au anya fagayu ay kanya fagayu galo angku. 28Gfon au anya leleg at yud e fakatabuan, ay kanya ban kabavn di gafaurianan, ay nusnga sinu we maago anya siginan ku daluap. 29Ku Mama at nafon angku ku ngay tupa. Ay ku Mama amabalyanan yap tua fagayu, ay nusnga sinu we maago kafag ngay tupa siginan ku Mama at daluap. 30Au ay ku Mama, sadi waymi.”

31Ay kafag ngay taw Udyu gdog yay gfuyut gang laman namana anya. 32Ay Isus glong anya te, “Ngayu ku nafalag ayu at masine fag fakamulun siginan ku Mama. Nataw fag fakamulun ku nafakamulun ay fagnamanaun way angku gang?”

33Ay kafag ngay taw gbalus anya te, “Em fagnamanaun emu bunwa siginan am ngay fakamulun at masine, nu bunway aroro nalong o mauri sabaliwas Dius. Aroro kamaningan o te, Dius yangay o, dewa o sik taw way.”

34Isus gbalus anya te, “O nunda wa marirukan si ay Faugali te,

‘Glong au te, am wan sik ngay dius’?#10:34 Alubad 82:6.

35We taw mafafamayud Dius at Longan. Ay kanya fag ngay taw Dius at fagfonan at longan, nafangayan te, sik ngay dius. 36Ay wain katsi ay faglongun te, nalong au mauri sabaliwas Dius siginan ku nalong te, Au wan Dius at Baguama? Dius nafili ay nasugu angku ste swa daga. 37Nu dakway nafakamulun ku Mama at fafakamulun angku, lag am gafanud sa angku. 38Ay nu gfakamulun ktua katanya, afanudi tua siginan ku ngay nafakamulun, deyud am kaylat gafanud sa angku. Nu katanya tua, sumaful am te, ku Mama si wa angku, ay au si kyangay anya.” 39Ay kafag ngay taw gdog yay nangugatan nanggamat Isus, ay Isus nasaruyan way.

40Isus gdog yay nadife Liskung Urdan ay nalo sas Uan at fagfasurungan ngay taw, ay gbanwan sanya. 41Ay ngayuk taw nanangakbang sa anya. Kafag ngay taw glong te, “Uan, deyud e nafakamulun at madulo, matuyan at longan sabaliwa tuy fag taw.” 42Ay sanya ngayuk taw at nafanud sas Isus.

Currently Selected:

Uan 10: OCCT

Highlight

Copy