Uan 12

Sik Mangena Nafatayuk Famaebebanglu sas Isus

Mt 26:6-13; Mk 14:3-9; Lk 7:37-39

1Unum yak menit ay kadasug wan fagmafulun sabaliwa Tagbarita nu Glangfe. Ay Isus andasug sas furuan Betanya, sas Lasaru at furuan. Lasaru, Isus at nafadog nafaleleg. 2Nu katanya, e nafalganan sik yafun laman sas Isus, ay Lasaru gfasfuan gfangon. Ay Marta tagfalganan at ngay fakonun. 3Ay Maria nabul sik baringan sirut famaebebanglu at yud e suglat, mawatan siginan sik tanum nardu, at mabyat nu kabayad. Ay kanya naugwag sas Isus at darafa ay at fangarus at buk wan. Ay sanya fag basad bale maksvn nu mabebanglu. 4Ay Udas Iskariute, Isus at tagadal ay at namoyung ban Isus sat mauri fag ngay taw, nalong te, 5“Fangulan. Wain at fagyudun nafalao kafag famaebebanglu ay gfon at nagbulan sa sangay taw at yud e kwa? At kayuan kanya at famayad kayu sik taw at nagbulan at nafakamulun sik banwa.” 6At fagnalongun katanya, bunwa te, kafanyu at ngay yud e kwa, nu bunway kanya sik tagfangkamul way. Aroro kanya wan tagalaga at salapi, tibaginan gbul wan tiba.

7Ay Isus gbalus te, “Lag gsalag anya. At fagnaugwagun kafag famaebebanglu sa ku bilug, laman sik famamatang sabaliwa nu e namoli ban angku. 8Aroro at ngay yud e kwa ste way gugat. Dewa katanya, nu magamut au si ayu, bunwa kabavn.”

Taw at Algan Gfabul Lasaru

9Ay sik ngay taw Udyu nadungug te, Isus sis furuan Betanya. Nu katanya, kanya fagayu nalao sanya, bundi lang Isus at fagnanlagun nu bunway anggan tua Lasaru, Isus at nafadog nafaleleg. 10Aroro katanya, ngay fun tagfon fanggalangun anke algan yangay namabul anggan Lasaru. 11Aroro ngayuk taw Udyu at kinsaman siginan kafag ngay taw ay at nafanud sas Isus, aroro siginan at kinfasludan sas Lasaru.

Isus Nasakbo sas Erusalem Kata sik Fun

Mt 21:4-9; Mk 11:7-10; Lk 19:35-38

12Balabag di, ngayuk taw at kinful sas fagmafulun, nadungug te, Isus ro sas Erusalem. 13Ay kafag ngay taw nanamul sik ngay don taya maragbuk laman namablang Isus, ay nauro te,

“Fauseganani Dius! ‘Mauseganan takadasug sas Dius at fagmabalyananun.’#12:13 Alubad 118:25-26.

Ay mauseganan taw Israel at Fun.”

14Ay Isus nalag sik riangan asnu ay nasakay, kata Dius at Rirukan te,

15“Ngay taw Erusalem, lag kalimu!

Damai, ay Fun kadasug wan!

Kanya gsakay si sik riangan asnu.”#12:15 Sakaryas 9:9.

16Isus at ngay tagadal ya nyamag sabaliwa kafag rirukan. Gina ya Isus anfoli sas banwa, kanya fagayu nu gsaful te, katanya at marirukan sabaliwa anya ay at kinfasludan sa anya. 17Ngay taw at nalag Isus nu gfadog gfaleleg Lasaru siginans fagfolian, kanya yay fag ngay taw at nabarita sabaliwas Isus. 18Nu katanya, ngayuk taw at namablang Isus, aroro nadungug te, kanya nafakamulun at mabalyanan fag fakamulun. 19Ngay taw Fariseu gkamatoan te, “Amatangani, wa tam masalag ya. Damai, fagayu taw galo wa anya.”

Tibak Taw Griegu Grvbvy Isus

20Ay e sik ngay taw yangay Griegu at nasas fagmafulun sas Erusalem laman nanseg Dius. 21Ay kanya fagayu nanangakbang sas Felipe tagsiginans furuan Betsaida sis talun Galilea, ay glong anya te, “Sama, kaylat ami gyalagun Isus.”

22Felipe nalo sas Andres ay nafasaful kafag ngay taw at fagetun, ay duama nalo sas Isus ay nafasaful yangay takatanya. 23Ay Isus gbalus anya te, “Andasug wan at buknga laman gfasure Taw at Baguama at fagmasineun. 24Matuyan nu glong au ayu te, sik bvtang nu dyay e natanum ay anbul, kanya sik bvtang yay gugat. Ay kanya nu nbul wan, gtugbung ay ngayu ban nu grawvg. 25Ay nusnga sinu takesug way at leleg, umkalyam way ban at leleg. Ay nusnga sinu at yud kesug at leleg ste swa daga, kanya ban e leleg tua kabavn. 26Nusnga sinu takaylat nangafagsuguanan angku, aloi angku. Ay nusnga nday au, anggan kanya sanya yangay. Ay ku Mama gfauseganan nusnga sinu tagfaning angku.

Isus Gfoyung sabaliwa nu Kabul Ban

27“Katsi maksvn nu gafanawa au. O glong au te, ‘Mama falangfei angku siginan ku fagnandalanun ban fag fagidapun’? Duan, ku fagindasugun laman nandalan au takatanya. 28Mama, fasurei am fagmasineun.”

Ay sik aringang andasug siginans banwa ay glong te, “Nafasure kwan ay gdog kyay ban namasure.”

29Ay tagsanya fag ngay taw nadungug ay glong te, “Glingsi!”

Ay tiba glong te, “Sik tagbarita nafakamatoan anya.”

30Ay Isus glong anya te, “Kanya fag aringang at fagindasugun bunwa laman sa angku nu bunway laman sa ayu. 31Katsi Dius ginsaful fagayu taw ste swa daga sabaliwa at nafakamulun. Ay katsi fagdaul daga at fun gaiyanan ban. 32Ay nu e nafabat angku siginans daga, namakbang kban fagayu taw sa angku.” 33At fagnalongun katanya laman gfasaful te, setain ban nu kabul.

34Ngay taw gbalus anya te, “Muisis at Faugali at foyungan emi te, Dius at nafili fag Fun#12:34 Dius at nafili fag Fun: sas Griegu, Kristu. gbanwan ban kabavn. Wain am fagnalongun te, ‘E gfabat ban Taw at Baguama’? Sinu nunda ‘Taw at Baguama’?”

35Isus glong sa anya fagayu te, “Wa ban glugo ya fagmayamagun nu si ayu. Fataglayuni nu glao am kaduge mayamag, laman diam gaduluman. Nusnga sinu taglao sad dulum wa glag at dalan. 36Kaduge ste fagmayamagun, afanudi sas fagmayamagun, laman gbanwan am sas fagmayamagun.” Isus nu nalong wan takatanya, nalo sanya ginan ay nasuksuan.

Ngay Taw Udyu wa Gafanud sas Isus

37Isus nafakamulun at ngay mabalyanan fag fakamulun tagfatoglag te, kanya siginans Dius. Ay dewa kafag ngay taw nalag, wa gafanud sa anya. 38Nu katanya, anfasludan Dius at taglong Isayas at longan te,

“Ku Fun, sinu at nafanud sa em foyungan,

ay dada tam Fun nu gfasure at fagmabalyananun?”#12:38 Isayas 53:1.

39Nu katanya, kanya wa nakatu gafanud aroro Isayas nalong yangay te,

40“Dius nafayud glag kafag ngay taw,

ay nafaogat at ngay amatanganan.

Ay Dius glong te,

Nafakamulun au takatanya,

laman kafag ngay taw ban wa glag ay wa gtogdungug,

ay wa ban kafoli sa angku laman namafia au anya fagayu.”#12:40 Isayas 6:10.

41Isayas at fagnalongun katanya aroro nalag Isus at fagmasineun ay nafoyung sabaliwa anya.

42Dewa katanya, ngayuk taw Udyu at tagfangguna at nafanud sa anya, ay kanya fagayu wa gfasaful sas nusnga sinu aroro kalimu te, ngay taw Fariseu manangaiyan ban anya fagayu siginans bale fakafulan, 43aroro kanya fagayu kaylat taw nu gfauseganan anya abat ngate, Dius tagfauseganan.

44Isus maksvn nu guro te, “Nusnga sinu tagafanud sa angku bundi lang sa angku nu gafanud nu bunway anggan tua sat nasugu angku. 45At nalag angku nalag yangay anggan at nasugu angku. 46Ku fagindasugun laman sik fagmayamagun au ste swa daga, laman ban tagafanud sa angku di gbanwan sis dulum. 47Nusnga sinu at nadungug ku ngay longan ay wa gfaning, kdi gfaurianan anya. Aroro ku fagindasugun kwa nanfaurianan nusnga sinu fag taw ste swa daga, nu bunway laman namalangfe au anya. 48Nusnga sinu takauri angku at yud kaylat gfaning ku longan, e gfauri ban anya. Ku foyungan fag ngay longan tagfauri takatanya fag ngay taw sa taguyan fag menit. 49Aroro ku foyungan bundi siginan ku sadili, nu bunway siginan tua ku Mama at nasugu angku. Kanya wan at nafon angku ku fagnanlongun ay ku fagnamoyungun. 50Ay nasaful au te, ku Mama at ngay suguan gfon leleg at yud e fakatabuan. Nu katanya, gfoyung au nusnga setaw ku Mama at nafoyung sa angku.”

Currently Selected:

Uan 12: OCCT

Highlight

Copy