Uan 13

Isus Nafegus at ngay Tagadal at Darafa

1Nu munakbang wan taw Udyu at fagmafulun sabaliwa Tagbarita nu Glangfe, Isus saful wa te, andasug wan at buknga nu gubun ste swa daga laman kafoli wan sat Mama. Kanya maksvn nu kesug at ngay tagadal, ay gfalag sa anya te, kafanud nya nu kesug.

2Ginanya fag yabi, Isus ay at ngay tagadal gasfuan gfangon. Ay Satanas nafae amatanganan wan Udas Iskariute, Simun at baguama, laman namoyung ban Isus sat mauri fag ngay taw. 3Isus nasaful wa te, at Mama nafon wa anya fagdaul at fagmabalyananun, ay nasaful yangay te, kanya siginans Dius ay kafoli sas Dius. 4Ay gina gfangon, Isus namalindug ay nabul at famalanib fag lanbung ay nafasafung sat fagwan sik ramit famatat nu ntabu gigus. 5Ay sanya ginan, kanya gtalin mamam sa sik taya daul ay gfasigad gfegus at ngay tagadal at darafa, ay at famatat at nafasafung sat fagwan fag ramit. 6Ay Isus nu nkakbang sas Simun Pedru, Simun Pedru glong anya te, “Ku Fun, o nunda o tua ro tagfegus ku darafa?”

7Isus gbalus te, “Katsi yo nasaful ku fakamulun, ay abandi ban sumaful yay o.”

8Ay Pedru glong anya te, “Kwa kaylat nu owo tagfegus ku darafa.”

Isus gbalus te, “Nu dway ro au at nafegus am darafa, wo e fagmasadiun sa angku.”

9Nu katanya, Simun Pedru glong anya te, “Ku Fun, dangay ku darafa lang am fagfegusun, anggan tua ku daluap ay ku alfuyu.”

10Isus glong te, “Sik taw nu naigus wan we fagfegusun ya, nu bunway at darafa way lang, fagayu am mafegusan wam, dewa katanya, bunwa fagayu.”

11(Isus at fagnalongun te, “Bunwam fagayu at mafegusan,” aroro saful way at namoyung ban anya sat mauri fag ngay taw.)

12Ay nu ntabu gfegus at ngay tagadal at darafa, kanya nasulun at lanbung ay namalunggung. Ay ginto sat ngay tagadal te, “O nasaful wam ku nafakamulun sa ayu at masuad? 13Nafangayan am angku te, Takamoyung ay ay Fun, anud, matuyan ay nalong. 14Au, ay Fun ay ay Takamoyung nu nafegus ktua ay darafa, anggan am fedfegusani tua ay darafa. 15Nafoyung au sa ayu sik fagfaningan, ay fakatanyai ban ay fakamulun. 16Matuyan nu glong au ayu te, we fagsuguan tagtungud at fun, ay we nasugu tagtungud at nasugu anya. 17Mauseganan tuam, nu natogdungug tuam takatanya fagayu. 18Kwa glong te, fagayu am mauseganan wam. Aroro toglag kway ku ngay nafili. Dewa katanya, laman gfafasludan kata Dius at Longan te,

‘At nafasfuan angku gfangon, kanya ban at namauri angku.’#13:18 Alubad 41:9.

19Ay gina yud anfasludan, gfoyung kwa sa ayu takatanya, laman ban nu nfasludan wan, gafanud am te, au wan Dius at nafili. 20Matuyan nu glong au ayu te, nusnga sinu takaylat ku nasugu, kaylat yangay angku. Ay nusnga sinu takaylat angku, kaylat yangay at nasugu angku.”

Isus Nafoyung sabaliwa at Namoyung ro Anya sat Mauri fag ngay Taw

Mt 26:20-25; Mk 14:17-21; Lk 22:21-23

21Isus nu nafoyung wan takatanya, kabalu sat amatanganan ay glong te, “Matuyan nu glong au ayu te, si ayu ro at sadi namoyung angku sat mauri fag ngay taw.”

22Ay at ngay tagadal gdaddaman ay wa saful te, sinu manga at fagfatungulan fia. 23Isus at fakesugun fag tagadal masarare si anya. 24Ay Simun Pedru gyafe sanya fag tagadal ay glong te, “Agvd, intoi sas Isus te, sinu fia at fagfatungulan.”

25Ay kafag tagadal at masarare sis Isus nainto te, “Em Fun, sinu fia am fagfatungulan?”

26Ay Isus gbalus te, “Nusnga sinu ro ku fagfonan ku nafasurung fag tinapay, kanya wan.”

Ay kanya nu nafasurung sik tinapay, nafon sas Udas, Simun Iskariute at baguama. 27Ay Udas nu nabul wan kafag tinapay, Satanas nasakbo sa anya. Ay Isus glong te, “Fakamuluni wan am fakaylatun.”

28Dewa katanya, nusdi sadi tagfasfuan anya gfangon, we nasaful at masuad Isus at longan. 29Ay tibak tagadal namatangan te, Isus nasugu Udas laman namul at ngay fagayudanun si ban sfagmafulun, ay mannga namon sat yud e kwa, aroro Udas wan tagalaga at salapi. 30Ay Udas nu nafangon wan, nalo wan. Ay ginanya, anyabi wan.

Sik Bagu fag Suguan

31Udas nu nalo wan, Isus glong te, “Siginan ban katsi e namauseganan Taw at Baguama, ay siginan ban angku e namauseganan yangay Dius. 32Ay nu e namauseganan Dius siginan angku, Dius ban namauseganan yangay angku Taw at Baguama, ay namafasludan wan takatanya. 33Ku ngay sisian, wa glugo ya nu magamut au si ayu. Grvbvy ban am angku, dewa katanya, kata ku nalong sa sangay taw Udyu at ngay tagfangguna, glong kyangay sa ayu te, ‘Wa ban am madasug sa ku fagnangadasugan.’ 34Gfoyung au ayu sik bagu fag suguan te, edkesugani. Kata nu kesug au ayu, edkesugani yangay. 35Nu kedkesugan tuam, fagayu taw sumaful te, ku ngay tagadal am.”

Isus Nafaguna Nalong Pedru nu Kamuag sabaliwa Anya

Mt 26:33-35; Mk 14:29-31; Lk 22:33,34

36Simun Pedru ginto te, “Ku Fun, dada ban o?”

Isus gbalus te, “Katsi, yo manangalo angku sa ku fagnangadasugan, ay dewa katanya sa ban tibak menit manangalo tuo angku.”

37Pedru ginto yangay te, “Ku Fun, wain katsi ku fagyudun manangalo emu? Mafalganan au kabul laman sa emu.”

38Ay Isus gbalus te, “O nunda mafalganan o kabul laman sa angku? Ay matuyan nu glong au emu te, tabag gina yud natarakit, tulu ginan ro wo kamuag te, wo toglag angku.”

Currently Selected:

Uan 13: OCCT

Highlight

Copy