Filipika olu 3

Téeɲan mín ŋé bhɔ́la Kílisi lɔ

1Hun kwáalenin, mádhye ŋolu, áa í ɲáanli Mantii o la! Ŋwɛ́ɛn fé mín nzɛ́wɛ, kɛ o sɛ́wɛ íkwɔ, o tɛ́ né tɔ́lɔla, o le káa álee tó sútaa lɔ.

2Áa i yáakiito á yɛ́ɛ lɔ wúumɔɔn olu mán; ii bháalayoo ŋo kɛla; ii fasisoo o cáannan#3.2 ii fasisoo o cáannan Yánun, kaamɔɔn kóo mínnuu fɔ́la kó mɔɔn tɛ́ sé kɛ́la lánanbhaa le fɔ́ ii í yɛ́ kɛ́ɛn o kɛ́ le, Musa ta tɔ ŋo ta bhóo o man, Pɔli é fɔ́la o léelu man ko fasisoo o cáanbhaa olu. (Áa sé kɛ sɔɔla mín mánfɛɛ: Filipika olu 3.3 «Án née léelu wɛ́ɛ bhɔ kɛ́ɛnlɔ gbútuukɛ.» Áa manfɛɛ Galatika olu 5.2-12; óni Kɛ́wɛɛ 15.1 ikwɔ.) . 3Tínɲan in ne, án née léelu wɛ́ɛ bhɔ kɛ́ɛnlɔ gbútuukɛ, án née mínnuu Ala bhátola a yɛ Ní Sɛ́nnɛnyanin ŋo bháaka lɔ, án nee mínnuu wásola Ɛnza Ngílisi la, án née tá lánanya ó lánin ndɛ́ án ne gbúlu ka. 4Ní o tɛ, né tɛ́ɛ se móomanla né gbú mán.

Ní mɔɔn le kɛ fɔ, kó njó é lɔ kɛ lá ɲɛ́ɛn la, né jó é o fɔ́ o lɔ kɛ tinmin bɛ́ ka. 5Ii né bhɔ kɛ́ɛnlɔ, tée sɛ́ɲinɲɔn ŋwoonin ŋó kwɔ, née Izalayɛli dhyé ne le, Bɛnnzhamɛn yɛ bhónanbhaa lée ne, ní Yawudhyaa gbútuu le le, nó ndɛ́ɛ Nvá Musa yɛ tɔ ŋo bwóɲanla le óyoo Falizɛn ŋolu. 6Né tá ɲánngboya o tɔ́ ŋo kósɔn, o lée né kɛ́ Egilizi o tɔ́lɔbhaa lé. Téenin sháa o fɛ́ tɔ́ ŋó tá bhóo o mán, mɔɔn sí tɛ tɛ́ sé kɛ fyɛn sɔ́ɔ né la. 7Waa né tɛ́ɛ fé ŋóo fé ɲéla fé nánfaman né, kwáalenin ní o yéla bɔɔn lé le Kílisi kósɔn. 8Tínɲan in ne, ní ko o bɛ́ yacesiila bɔɔn lé le, kɛ mansɔɔ Ɛnza Ngílisi lɔ́ ŋó lée o bɛ́ ɲɛn, ɲɛ́n Mantii o. Ŋwɛ́ɛn sɔ́n kɛ bɔɔn o ko o bɛ́ lɔ a le kósɔn, óni kɛ o ko olu bɛ́ yé ɲanman le, kɛ kɛ́ ni Kílisi le; o le nánfa é a la. 9Ní mín nvɛ, o lée ké ii ɲé ni a le. Ndáa né gbú tá téeɲan sɔɔ tɔ́ ŋo bwóɲan o lɔ, wáa ngáa téeɲan o sɔ́ɔ lánanya o lɔ Kílisi la, téeɲan mín ŋé bhɔ́la Ala lɔ, téeɲan mín nzíinin ŋé lánanya o ka. 10Mín nguu á gbɛ́ɛ, o lée kɛ Kílisi lɔ́, óni a kúun ŋó sébhaaya o, óni kɛ kɛ́ kée ne ni ale a yɛ tɔ́lɔya olu lɔ, kɛ kɛ́ óyoo a légbu, a yɛ saya o lɔ, 11ké ko óo ko kɛ né sɔ́ɔ, Ala á né lákuun sú olu cɛ́man.

Bwée o kɛ táa a kun ŋó mán

12Tínɲan in ne, né mán sé a kun ŋó mán bhá, wáman mán kɛ mɔɔn láfanin ne bhá! Waa né lɔ́janin ŋé gbútuukɛ, ké ní o sáa o sɔ́ɔ, kɛ mansɔɔ Ɛnza Ngílisi wɛɛ né sɔ́ɔ a ta sáa le. 13-14Mádhye ŋolu, né tɛ́ mílila óyoo né gbú o wɛ́ɛ wɛɛ a kun ŋó sɔɔla, wáa ko kée nguu á gbɛ́ɛ: Né lɔ́janin ŋé, kɛ a kun ŋo sɔ́ɔ, Ala é án ngíila sá ŋó lɔ kun mín ngósɔn ní Ɛnza Ngílisi le, kɛ ɲan ko kɔɔ olu kwɔ, óni kɛ ngbíiya ɲɛ́nnzhaafɛ kó olu ka.

15Án née mínnu láfanin ŋe lánanya o lɔ, án née kákan kɛ án míli cé ne. Ní á kɛ́ kɛ í mílila ko lɔ́lu lɔ ɲán gbɛ́ɛ man, Ala gbu yáa o ko olu lágbɛ á yɛ. 16A kɛ kɛ ɲán óo ɲán mán, án ŋwɛɛn sé ywáa mín nɔn nin, án ndáa ɲɛn o ɲán kée ŋo mán!

17Mádhye ŋólu, áa kɛ́ né mánɲaanbhaa le. Óni mínnu táamankɛla óyoo áa a ye án neelu la tɛnmɛn, áa olu lasaa. 18Ŋwɛ́ɛn o fɔ á yɛ swáa swáa kɔ́ɔ, wáa no ɲáan o fɔ á yɛ íkwɔ ni kasi le: Mɔɔn shɛ́ɛman ŋe yénɔn binin, olu yɛ dínɲanlɔtɛɛ kɛ́ɲan o wɛ́ɛ kɛ́ Kílisi yɛ saya o yíi ó mán o yúu le. 19Olu labha ŋo káa hálaki le. Olu kɔ́ɔnnɔnlaa o lée i yɛ ala olu le. I kákan kɛ maloyako mínnu lɔ, ii i yɛ́ɛ lɔ bwóɲanla o le yɛ́ɛ lɔ. I tɛ́ hánminnan fé ngbɛ́ɛ la, fɔ́ dinɲan fé ŋolu. 20Waa án neelu sámanbhaa le le, án née kɔlɔtɔnin ŋé kísibhaa o mankɔɔnnan kɛ bhɔ́ sá ŋo lɔ, o mín ŋe Mantii Ɛnza Ngílisi le. 21Ale le káa án nvásisoo fwɛɛnyanin ŋó yɛ́ɛman, kɛ o kɛ a légbu fásisoo nɔ́lɔman ŋo síyaa le, kɛ mansɔɔ sé óo a yɛ́, kɛ fé ŋó bɛ́ mányii a yɛ sébhaaya o kɔɔ.

Currently Selected:

Filipika olu 3: MXX

Highlight

Copy