Filipika olu 4
4
1O le kósɔn, mádhye ŋolu, nyáaɲɛnmɔɔn olu, mínnu yélɔɔ é nán, áa tó ni Mantii o le o ɲán o mán. Nyáaɲɛnmɔɔn olu, ále lée né ta nisɔdhyaa o le óni né ta kunnanwee ŋo le.
Kɛ tó láha óni nisɔdhyaa o lɔ
2Ní a ɲíinnan Evodi fɛ, nó ŋé a ɲíinnan Sɛntishi fɛ, ko ii bhyɛ kéeman cɛ́ɛne Mantii o kósɔn. 3Íle, máalakɛɲɔɔnbhɛɛ o, ní a dyɛn ɲíinnan í fɛ́: ké íi i lɔdhyɛman, kɛ mansɔɔ muso fyáa míin wé, ii sɛɛ ne tɔ́ɔfɛ sanmankanmɛɛ láse o lɔ, óni Keleman óni bháalakɛɲɔɔn tɔ olu, o mínnu tɔ́ɔ sɛ́wɛnin ɲé ɲáanmanɲan sɛ́wɛ o lɔ.
4Áa í ɲáanli wáati bɛ́ Mantii o la! Ní o fɔla íkwɔ, áa í ɲáanli!
5Ké mɔɔn olu bɛ́ bɛ́ á á yɛ́ kɔɔnnɔndhyaa o lɔ. Mantii o ywáa mán nja. 6Á kɛ́nan hánmin fóyi la, wáa á manko kɛ́ kɛ́ fé ŋóo fé nan, áa o kófɔ Ala yɛ sɛ́ɛ óni dɛ́lili o lɔ, ni kóɲwaanlɔ ne. 7O lɔ, Ala yɛ́ láha o, mín ŋé tínminnan miliya o bɛ́ ka, o yáa á yósoguun ŋóni á yɛ́ lɔninya o lámala ní Ɛnza Ngílisi le.
8O bɛ́ kwɔ́, mádhye ŋólu, ké fé ŋóo fé ŋé tínɲan le, bwóɲan é fé ŋóo fé nga, fé ŋóo fé ndéenin ɲé, fé ŋóo fé nzɛ́nnɛnyanin ɲé, fé ŋóo fé ŋe se dhyáala mɔɔn yɛ, fé ŋóo fé ŋe mɔɔn kunnan wéenan, fé ŋóo fé ŋe kóbhɛɛ le, tó mɔɔn é a tando, á míliya a kɛ o fé ŋo léelu ka. 9Áa mín nálee, kɛ a sɔɔ, kɛ a myɛn óni kɛ a ye né la, áa o lé kɛ, óni Ala mín ŋé láha o tíi o le, o yáa kɛ́ á léelu fɛ.
Bálika bhɔ o filipika olu yɛ
10Ŋwɛ́ɛn ɲáanli shɛ́ɛman ne ni Mantii o le, kɛ mansɔɔ á wɛɛ a yáa ko kwáa kɛ, kó ngúu a gbɛ́ɛ á mán. Tínɲan in ne, o míliya o tɛ́ɛ á kɔɔnnɔn, wáa á mán se o yaala. 11Ni gbɛ́ya o lɔ mínngɛ, ndɛ́ o fɔla o kósɔn. Kɛ mansɔɔ ngɛ́ kɛ ɲán óo ɲán man, ŋwɛ́ɛn ɲɛ́ɛ lalɛɛ kɛ ɲáanli o la. 12Ní bhóokooɲan o lɔ, nó ŋán féndiiya o lɔ. Ngɛ́ kɛ ɲán óo ɲán man, ŋwɛ́ɛn ɲɛ́ɛ lalɛɛ o la: Kɛ fa oo, kɛ to kɔ́ɔn la oo, kɛ wasa oo, óni kɛ dɛ́sɛ. 13Ní sé kɛ kó o bɛ́ kɛ, Kílisi mín ŋé fáan o díla né mán, o sɔ́ɔbu la. 14O bɛ́ kwɔ, á lée kóbhɛɛ kɛ, kɛ to ni ne le ndá tɔ́lɔya o lɔ.
15Filipika olu, á légbu lu á a lɔ ŋóo, sanmankanmɛɛ o láse o lámyaan o lɔ á cɛ́man, mɔ́nin ŋo kwɔ Masedwanin yamaan o lɔ, Egilizi lɔ mán kɛ kée né ni né le, kɛ ko bɛ́ lɔtaa ɲɔɔnnjɛ, fɔ́ ále kée. 16Kɛ mansɔɔ, háanin ndɛ́ɛ Tesaloniki só o kɔɔnnɔn mínngɛ, mánko tɛ́ɛ fé mín nan, áa olu lánan mán, síɲan kée ndɛ́. 17Ndɛ́ o fɔla kɛ kóɲwaan ɲíin á fɛ́; waa ní mín ɲiinnan, o lée ko a tɔɔn o á sé á mán.
18Ŋwɛ́ɛn fé ŋó bɛ́ sɔɔ, kɛ wasa! Áa sánmanlwee mín ndí Epafoloditi man o wɛ́ɛ móo lásɔɔ; ŋwɛ́ɛn wasa. O kóɲwaan oo le óyoo latikɔlɔ swáan dhyáanin, óni faanlɛɛ mín ŋán dí Ala yɛ, to a wɛɛ a myaan. 19Á mánko é fé ŋóo fé nan, ɲɛ́n Ala o yáa o di á mán Ɛnza Ngílisi sɔ́ɔbu la, kɛ kéeɲan ni a yɛ nanfootiiya o lé, nɔlɔya o lɔ. 20Ké bwóɲan o á kɛ án nva Ala lé yɛ, wáati o bɛ́ lɔ kúdɛyi! Amiinan!
Twaali labha ŋolu
21Áa mɔɔn sɛ́nnɛnyanin ŋólu bɛ́ twáa Ɛnza Ngílisi tɔ́ɔ o la. Bhádhye mínnuu ni né yánun, olu bɛ́ɛ á twáala. 22Mɔɔn sɛ́nnɛnyanin ŋólu bɛ́ɛ á twáala, mínnuu bháalakɛla Sezali yɛ lú o mán, olu tá oo a bɛ́ ɲɛn.
23Ké Mantii Ɛnza Ngílisi yɛ nɛ́nmɛn o á kɛ́ á fɛ́!
Currently Selected:
Filipika olu 4: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
