Kɛ́wɛɛ 12

Yanguba fáa kó o, óni Piyɛli bhyáa o kasola

1O wáati kée ŋó lɔ, mansacɛ Elɔdi é Kílisi yɛ́ mɔɔn lɔ́lu myaan, kɛ́ i tɔ́lɔ. 2Aa Yaya bhádhyemannjɛ Zaki fáa sháanva ŋó la. 3Áa yé mínngɛ kó o wɛ́ɛ dhyáa Yawudhyaa ólu yɛ, aa Piyɛli myáan íkwɔ. Oo kɛ́ Búlufuunmɛɛ fɛ́ti wáati óle lɔ́. 4Áa Piyɛli myáan mínngɛ, áa a bhyáa kasola, aa swáasi tá nin wɔ́ɔlɔ bhyáa, kɛ́ a kunnansii; olu tɛ́ɛ ɲɔ́ɔn yɛ́ɛmanla a kunnansii o mán náannin náannin. Kó ní Hɔ́lɔɲanli ɲánlagbɛ ó kɛ́ wɛɛ, a yáa kíti tɛ́ɛ Piyɛli ká yamaan o ɲánla. 5O lɔ, Piyɛli tɛ́ɛ kaso o la; Kílisi yɛ mɔɔn ólu lɔ́janin ndɛ́ɛ Ala dɛ́li o la a yɛ.

Piyɛli é bhɔ́ ɲán mín mán kaso o la

6 Elɔdi tɛ́ wɛɛ i lɔ́bhyɛ kó a kaa kíti tɛ́ɛ Piyɛli ká yaman o ɲanla. O sú o lɔ, Piyɛli sílinin ndɛ́ɛ nɛɛnyɔlɔkɔ fyáa la, a tɛ́ɛ súnnɔɔn lɔ́ swáasi fyáa cɛ́man, oo kɛ́la ké swáasi lɔ́lu lɔ́nin ŋé lá o la, kɛ kasobho ŋó kunnansii. 7O ywáaninngee ŋó lɔ, Mantii o yɛ Malɛɛka lɔ é ló kasobho ŋó kɔ́ɔnnɔn, kɛ́ɛn é bhɔ́ kɛ gbɛ́. Malɛɛka oo Piyɛli mangbasi a kɔ́ɔkɔɔlaa o lɔ, tó kɛ fɔ kó, «i wíi jónan!» I kɔ́lɔ téeman Nɛɛnyɔlɔkɔ olu tɛ́ɛ, kɛ bhɔ́ a bhóola kɛ́ bé lúuman.

8Malɛɛka óo fɔ́ Piyɛli yɛ́ kó: «I cɛ́sii, kɛ i yɛ sawaa o ló!» Piyɛli é o kɛ. Malɛɛka óo fɔ Piyɛli yɛ kó: «I yɛ deeke o ló, kɛ bhyáa ne kwɔ́.»

9Piyɛli é bhɔ́ kasobho ŋó la, kɛ́ bhyáa Malɛɛka ó kwɔ́. Ko mín ndɛ́ɛ kɛ́la a lánin ndɛ́ tɛ́ o la, óo tínɲan lée wé. A tɛ́ɛ o yéla shoo le lé. 10Ii táa tinmin swási jónan ólu la, ii tinmin fyáaɲɔn ólu ka, nɛ́ɛn bhónaa ó tó a ɲángbaannin ŋé só o kɔ́ɔnnɔnlaa ó lɔ, ii sé ó man mínngɛ, lá óo i láka i yɛ́ɛman i ɲankɔɔ. Ii bhɔ́. Ii táa sé sháakun nɔ lɔ́, Malɛɛka ó túun Piyɛli mán. 11Piyɛli é bhyáa i hákii lɔ́ mínngɛ, áa fɔ́ kó: «Kwáalenin, né wɛ́ɛ a lɔ́ tínɲan in né kó, Mantii ó lée a yɛ Malɛɛka o bhyáashaa kɛ nán ne bwási Elɔdi bhóo, óni Yawudhyaa ólu tɛ́ wɛɛ fé ŋóo fé nɔ́bhyɛ ngánman, Ala wɛ́ɛ nataan o mán.»

12Piyɛli é bhɔ a ɲánle mínngɛ, aa táa Mwɛnyamu bhóo lúman. Yaya mín ŋé kíila kó Maki, o wóobhaa lé tɛ́ɛ wé. Lánanbhaa shɛ́ɛman nádhyɛnin ndɛ́ɛ yé, i tɛ́ɛ Ala dɛ́lila. 13Piyɛli é lá ó mángbasi. Bháalakɛdhyemusoman nɔ́ tɔ́ɔ kó Lode, óo táa lá o láka. 14Áa bhɔ́ Piyɛli kómankan ŋó ɲánle. A kɔɔnnɔndhyaa kóyoo ŋó man a man lá o láka, áa bwée kɛ táa o fɔ́ mɔɔn tɔ́ ólu yɛ kó: «Piyɛli lɔ́nin ŋé lá o la kɛ́ɛnman.» 15Mɔɔn ólu fɔ a yɛ kó: «Fá lée í lɔ á?» Wáa Lode é fɔ́ kɛ́ a mángbɛya kó tínɲan lée wé. I kó ni o lée, «a yɛ́ malɛɛka lée wé!»

16Piyɛli kwɛ́nnin ndɛ́ɛ lá o mángbasi la. Ii lá o láka, tó ii Piyɛli yé. I bɛ́ kɔ́ɔnnɔn é fíi. 17Piyɛli é a bhóo láwii, kɛ fɔ kó ii i lumandhye. Mantii óo a lábhɔ kaso o la ɲán mín man, áa o bɛ́ ɲánfɔ í yɛ́. Aa fɔ́ i yɛ́ ikwɔ kó: «áa o fɔ́ Zaki, óni mádhyeman ŋó olu yɛ.» O kwɔ́, áa bhɔ́ kɛ táa ywáa gbɛ́ɛ lɔ.

18Kɛ́ɛn oo bhɔ́ mínngɛ, swáasi olu hákii o ɲáanmin, Piyɛli wɛ́ɛ kɛ́ díi? 19Elɔdi é mɔɔn lɔ́lu bhyáashaa kɛ́ táa Piyɛli ywáa ɲíin ywáa bɛ́ lɔ, wáa i mán a yé. O lɔ́, Elɔdi é swáasi ólu kíi kɛ́ i manɲaankɛ, o kwɔ, aa fɔ́ ko kɛ́ swáasi ólu myaan kɛ́ i fáa. O kwɔ́, Elɔdi é bhɔ́ Zude, kɛ́ táa Sezale kɛ́ tée laman laman kɛ yé.

Elɔdi sayako o

20O wáati o lɔ, Elɔdi tɛ́ wɛ́ɛ mwɛnnɛn kóyoongɛ Tilika ólu ní Sidɔnnga ólu mán. O lɔ, ii bhyɛ ɲíin ni Elɔdi ládhyebhaa o le mín ndɔ́ɔ ko Bilatusi, kó o á i dhyɛman. O ɲán o man ii bhyɛ kée mán kɛ́ táa mansacɛ o fɛ yé kɛ a dɛ́li, ké aa sɔ́n kɛ kɛɛ o wɛ́ɛ. Kɛ́ mansɔɔ Tilɛninnga ólu óni Sidɔnnga ólu yɛ bhálo ó tɛ́ɛ bhɔ́la Elɔdi yɛ́ yamaan o le kɔ́ɔnnɔn.

21I tɛ́ wɛɛ ló mín nzíi, ó ló ŋóo sé mínngɛ, Elɔdi é a yɛ mansafaanin ŋó ló, kɛ́ i síi a yɛ mansayagbaanin ŋó ka, tó kɛ kóman o tá, kɛ i saa i la. 22Yaman o gbáa kó: «Míin ndɛ́ mɔɔn kómankan ne, Ala lɔ́ lé kómankan ŋé wé!»

23O ywáaninngee ó lɔ, Mantii o yɛ́ Malɛɛka lɔ́ é yangalo bhyáa Elɔdi la, kɛ mansɔɔ a man Ala kunnanwee, Tunmuun é ló a ɲáanman ŋó lɔ, kɛ́ a fáa.

Baanabasi ní Sɔli é i kwɔ́sɛɛla Antiyɔsi

24Wáa, Ala yɛ Saaninkan ŋó kwɛnnin ndɛ́ɛ búubhɛɛ lá kɛ táa ɲɛ́n.

25Baanabasi ní Sɔli é wɛɛ i yɛ cé o la Yeluzalɛmu wáati mínnɔn, ii i kwɔ́sɛɛ Antiyɔsi. Ii táa tɔ́ o, íi táa ní Yaya lé, íi mín ngíila kó Maki.

Currently Selected:

Kɛ́wɛɛ 12: MXX

Highlight

Copy