Kɛ́wɛɛ 11

Yeluzalɛmu Piyɛli é a yɛ́ɛ kwɔkɔɔ dhyɛla

1 Céladhye ŋólu, óni bhádhye mínnu tɛ́ɛ Zude, ólu a myɛ́n kó síya gbɛ́ɛ olu wɛ́ɛ sɔ́n Ala Saaninkan ŋó mán. 2Piyɛli é i kwɔ́sɛɛ Yeluzalɛmu mínngɛ, lánanbhaa bhɔ́nin kɛ́ɛnlɔ ólu sɔ́sɔli kɛ́ ni Piyɛli le. 3Kó: «I wɛ́ɛ ló kɛ́ɛnkɛbhɛɛ ólu fɛ́ é, i wɛ́ɛ lɔ́min kɛ́ ni ile.»

4O lɔ, ko ólu tinmin ɲán mín man Piyɛli é a lámyaan kɛ o bɛ́ lɔ́sɔɔ i yɛ kée ngée, 5«ne tɛ́ɛ nzɛ́ɛla Zope só o kɔ́ɔnnɔn, ní yéli fé nɔ́ yé yíila, o fé ŋó bhɔ́nin ndɛ́ɛ faaniba lé la, a tɛ́ɛ yíila kɛ bhɔ́ sángboo o lɔ, fɔ́ kɛ́nan sé ne mán. A lɔmyaannin ndɛ́ɛ a nɔɔn náannin o la. 6Ní a mánfɛɛ cɛ́ɛne, fé mín ndɛ́ɛ a kɔ́ɔnnɔn, o tɛ́ɛ soo léelu lé, sé náannin man fé ŋólu, óni bínnɔnsoo olu, óni soo mínnu í fónvonan i kɔ́ɔnman lúukolo o ká, óni sámankɔɔn ólu. 7Oo kɛ́ mínngɛ, ní kómankan nɔ́myɛn, óo fɔ ne yɛ kó: ‹Piyɛli, í wíi, kɛ fé míin nɔ́ fáa kɛ́ o lɔ́ɔ.› 8Ní a yawi kó: ‹Mantii ó, ndáa o kɛ́! Fé nɔ́ɔnnin wáman fé ngɔ́sɔnin míin nzí mán ló ne lálɔ bhá.› 9Kómankan míin bhɔ́ sángboo o lɔ óo fɔ́ ne yɛ síɲan fyáaɲɔn o lɔ kó: ‹Ala wɛ́ɛ fé mín nzɛnnɛnya, íle kɛ́nan o yacesii fé ngɔ́sɔnin né.› 10Óo kɛ́ fɔ́ síɲan sawa. O kwɔ́, faaniba óo í kwɔ́sɛɛ, kɛ táa sángboo ó lɔ. 11I kɔ́lɔ téeman, mɔɔn sawa míin bhyáashaa ne mán Sezale, án ndɛ́ɛ ywáa mín nɔ, olu nan i lɔ bhó ŋó ɲán lɔ. 12Ní Sɛ́nnɛnyanin ŋó fɔ ɲɛ́n kó ne kɛ́nan síka kɛ táa ní ile. Mádhyemannjɛ wɔ́ɔlɔ mínnuu nín, olu nan myáashaa, tó án ní ló ngíibhaa o fɛ́ yé. 13Aa mín nvɔ́ án ɲɛ́n kó malɛɛka lɔ é i yɛ́ɛ yáa a lá a yɛ bhó ó la, kɛ fɔ́ a yɛ́ kó aa mɔɔn bhyáashaa Zope, kɛ́ táa cɛ lɔ kíi mín ndɔ́ɔ kó Simɔn, ii a kíila íkwɔ kó Piyɛli. 14A yáa kóman lɔ́lu fɔ́ a yɛ mín ngáa kɛ sɔ́ɔbu le, ale ni a yɛ́ lumanmɔɔn ólu yáa kísi. 15Ni a lámyaan kɛ kóman i yɛ mínngɛ, Ní Sɛnnɛnyanin ŋó yíi i ka óyoo aa yíi án ngá ɲán mín man a lámyaanwaati ó lɔ. 16Oo kɛ́ mínngɛ, ne hákii é yíilikɛ Mantii ó yɛ́ kóman ó la kó: ‹Yaya é bátizeli o kɛ́ jí le lá, wáa álee káa bátize Ní Sɛnnɛnyanin ŋó le lá.› 17O lɔ, án née mínnu lánin ɲé Mantii Ɛnza Ngílisi lá, Ala é mín ndí án née man, ni a wɛɛ o kée ŋó di i lée lú mán, o wáati o lɔ́, née yɛ́ɛtii le, kɛ Ala mánsɔsɔ?»

18Ii o kóman ólu myɛ́n mínngɛ, i yóso ó swáanya. Ii lámyaan kɛ́ Ala tando, tó kɛ fɔ́ kó: «Tínɲan ín né, Ala wɛ́ɛ sháa dí síya gbɛ́ɛ olu mán, ké íi dímisa, kɛ fála i yɛ kóyoo ŋólu la kɛ ɲáanmanɲan.»

Lánanbhaa mínnuu Antiyɔsi

19Mɔɔn mínnu tɛ́ wɛɛ ɲɛ́nnzɛn nilafin ŋo bhóo Etiyɛni nváa o kósɔn, ii tinmin o le lɔ, kɛ táa Fenisi óni Shipulu óni Antiyɔsi. I tɛ tɛ́ kóman o láse mɔɔn sí mán fɔ́ Yawudhyaa olu. 20O wáati kée ŋó lɔ, kaamɔɔndhye nɔ́lu kɛ́ bhɔ́ Shipulu, óni Silɛnin olu táa Antiyɔsi, kɛ́ Mantii Ɛnza ɲɛ́n Sanmankanmɛɛ ó fɔ́ Gɛlɛkikan nvɔ́bhaa ólu yɛ́. 21Ala é a yɛ́ sébhaaya ó dí i man, mɔɔn shɛ́ɛman ŋé la Mantii ó lá kɛ sɔ́n a man.

22Kílisi yɛ mɔɔn mínnu Yeluzalɛmu, ólu ó kóman ó myɛ́n mínngɛ, ii Baanabasi bhyáa kɛ táa Antiyɔsi. 23Aa sé mínngɛ, aa Ala yɛ nɛ́nmɛn o yé, aa i ɲáanli, óni aa i bɛ́ fáan ló kó ii i lɔ́ja, kɛ tó ni Mantii o le lánanya o lɔ. 24Baanabasi tɛ́ɛ mɔɔnbhɛɛ le lé, a wásanin ndɛ́ɛ Ní Sɛnnɛnyanin ŋó la óni lánanya o la. Óni mɔɔn shɛ́ɛman ŋé lá Mantii o la. 25Óni Baanabasi é táa Taasi kɛ Sɔli ywáa ɲíin. 26Baanabasi é Sɔli yé mínngɛ, aa táa ale Antiyɔsi. Ii sán ngée ngɛ́ ɲɔ́ɔn nvɛ́ o ywáa o lɔ ní Kílisi yɛ mɔɔn ólu lé. Egilisi o tɛ́ɛ ɲɔ́ɔn nadhyɛ mínnu kɛ́la, a tɛ́ɛ kɛ́la o lɔ óni aa mɔɔn shɛ́ɛman ngála, kɛ kaamɔɔndhye ŋólu kíi kó kéletiɲɛn, ó síɲan jónan óo í lámyaan Antiyɔsi le.

27O ló ŋó la, céla lɔ́lu tɛ́ wɛ́ɛ bhɔ́ Yeluzalɛmu kɛ́ táa Antiyɔsi. 28I cɛ́man kée ndɔ́ɔ tɛ́ɛ kó Agabusi, óo í wíi kɛ kóman Ní Sɛ́nnɛnyanin ŋó bháaka lɔ kó kɔ́ɔn káa ló dínɲan ywáa bɛ́ lɔ́. Oo kɛ o ɲán ó mán Lomɛn, olu yɛ mansacɛba Kolodi tá tée o lé lɔ. 29O lɔ, kaamɔɔndhye ŋólu hákii dí ɲɔ́ɔnman kɛ í bhóo bhyáa ɲɔ́ɔn ngá mín nzé é kɛ min ne, kɛ o bhyáa ɲɔ́ɔn ngá, kɛ o látaa bhádhye ŋólu man Zude, kɛ i lɔdhyɛman. 30Ii o lé kɛ. Ii i yɛ bhóobhɔ olu di Baanabasi ni Sɔli mán kɛ́ táa ó dí lánanbhaa ólu ɲɛ́nmɔɔn ólu mán Zude.

Currently Selected:

Kɛ́wɛɛ 11: MXX

Highlight

Copy