Kɛ́wɛɛ 13

Baanabasi ní Pɔli yɛ́ cé o

1Kílisi yɛ́ mɔɔn mínnu tɛ́ɛ Antiyɔsi, céla lu, óni kaamɔɔn lu tɛ́ɛ ólu cɛ́man: Baanabasi o, óni Simeɔn, mín ŋé kíila kó Cɛ́fin, óni Lusiyusi Silɛninnga o, óni Manayɛni mín ní Elɔdi Antipasi é dhyémuuya kɛ kéene, óni Sɔli. 2Ló nɔ la, kɛ i tó Mantii o bhátola, ke ii sún nɔn, Ní Sɛnnɛnyanin ŋó fɔ i yɛ kó: «Áa Baanabasi ní Sɔli bhyáa i laman ne yɛ, ŋwɛ́ɛn i kíi bháala mín ngánman o kósɔn.»

3O kwɔ́, lánanbhaa olu sún nó, kɛ Ala dɛ́li, ii i bhóola Baanabasi ní Pɔli ká kɛ i labhyaa.

Baanabasi ní Sɔli é Shipulu

4O lɔ, Ní Sɛnnɛnyanin ŋó Baanabasi ní Sɔli bhyáashaa, ii táa Selesi, kɛ tó yé kɛ́ táa Shipulu. 5Ii sé Salami mínngɛ, ii Ala yɛ saaninkan ŋo láse Yawudhyaa ólu yɛ́ sɛ́ɛbho ŋólu kɔ́ɔnnɔn. Yaya mín ŋé kíila kó Maki, o tɛ́ɛ ní ile kɛ́ i dhyɛman.

6Ii Shipulu yamaan ó bɛ́ lɔtimin, kɛ́ táa sé fɔ́ Pafɔsi. Ii Jínanmolicɛ lɔ́ sɔ́ɔ yénɔn, a tɛ́ɛ a yɛ́ɛ kɛ́la céla le lé, Yawudhyaa le tɛ́ɛ a le, a tɔɔ kó Bali-Ɛnza. 7O cɛ́ o tɛ́ɛ ní Shipulu yámaantii ó lé le, o yámaantii o tɔ́ɔ kó Sɛgusi Polusi, Sɛgusi Polusi tɛ́ɛ mɔɔn hákiiman né le. Aa Baanabasi ní Sɔli kíi. Kɛ mansɔɔ a tɛ́ɛ fɛ́ kɛ́ Ala Saaninkan ŋó lɔ́myɛn. 8Wáa jinanmolicɛ Elimasi (i tɛɛ a kiila ce ne gɛlɛkikan ŋo lɔ), a tɛ́ɛ Baanabasi ní Sɔli yɛ kóman o mánsɔsɔla, a tɛ́ɛfɛ le kɛ yámaantii o láfii ké o kɛ́nan kɛ lánanbhaa le. 9O lɔ, Sɔli tó ii a kíila ikwɔ kó Pɔli, o wásanin ŋó Ní Sɛnnɛnyanin ŋó la, óo i ɲángbaan Jínanmolicɛ ó lɔ, 10kɛ fɔ kó: «Íle, nánmaan óni yánva óo íle mín nɔn kɛ́ tínmin, Sɔtaannan dhyé ŋó, ílee téeɲan o bɛ́ yúu lé le, ile káa Mantii o yɛ sháa o náansi o lábhyaa sán mínnɛɛn lé lɔ? 11Wáa kwáalenin, i tóomanlɔ: Mantii ó bhóo yáa sé i mán. Í yáa kɛ fyóo né; wáati dɔ́ɔnin ngɔ́ɔnnɔn, í táa tée o máan ŋó yé bhée.» Elimasi ɲán óo i lafin a lá o ywáaninngee ŋó lɔ, Elimasi é tɛɛ a yɛ́ɛla diwi lɔ. Elimasi tɛ́ɛ i múumuu nan i yɛ́ɛ ka, kɛ mɔɔn lɔ ɲíin mín ngaa a myáan a bhóo mán kɛ bhyaa a ɲɛn.

12Kó mínnu kɛ́ yámaantii óo o yé mínngɛ, aa kɛ́ lánanbhaa lé, kɛ mansɔɔ aa kóman mínnu myɛ́n Mantii o yɛ káa ŋó lɔ́, óo a kawakoya gbútuukɛ.

Pɔli ní Baanabasi é Antiyɔsi Pisidi

13O kwɔ́, Pɔli ní a táamanɲɔɔn ŋólu ló kúun ŋó kɔ́ɔnnɔn Pafɔsi, kɛ́ táa Pɛlize, Panfili yamaan ó lɔ. Yaya mín ŋé kíila kó Maki, óo bhɔ i kwɔ́ka, kɛ i kwɔ́sɛɛ kɛ táa Yeluzalɛmu. 14Wáa Pɔli ní Baanabasi é bhɔ́ Pɛlize kɛ́ táa Antiyɔsi, míin Pisidi yamaan ó lɔ́. Lɔnwɛɛnlilo ŋó la, íi ló sɛ́ɛbho ŋó la, kɛ́ i síi. 15Ii wɛɛ Sɛliya ó lɔkan ŋóni céla ólu bhóonɔn o lɔ kalanan, a lɔ mínngɛ, sɛ́ɛbho ŋó kúnndii ólu fɔ́ Pɔli ní Baanabasi yɛ́ kó: «Mádhye ŋólu, ní kóman lɔ kɛ kɛ́ á fɛ́ kɛ yaman ó fáan ló, kóman óo á bhóo.»

16Pɔli é i wíi, kɛ́ i bhóo láwii i yɛ, kɛ́ fɔ́ mɔɔn ólu yɛ kó: «Álee Izalayɛlika ólu, óni álee mínnu sháannan Ala ɲɛn, áa nɔnmyɛn. 17Izalayɛli yɛ Ala ó lée án myɛ́man lu tá, kɛ́ i lábuu, i tɛ́ɛ Ezipu yamaan ó lɔ wáati mínnɔn. O kwɔ́, áa i lábhɔ ó yamaan ó lɔ, ní a yɛ́ sébhaaya ó le. 18Ala é i yóso swáanya i fɛ sá bínaannin ɲɔ́ɔnnzi kɔ́ɔnnɔn, kɛ i tó wúla ó lɔ́. 19O kwɔ́, áa síyaa wóonvyaa hálaki Kannaan yamaan ó kɔ́ɔnnɔn, kɛ́ ó yamaan ólu dí án myɛ́man lú mán cɛ́n le. 20O kó ó myɛ́n fɔ́ kɛ sé sánɲin kɛ́nmɛn náannin ní sánɲin bíloolu ɲɔ́ɔnnzi mán. O kwɔ́, Ala é kítitɛɛbhaa lu lasii Izalayɛli kúnnan, fɔ́ kɛ́ nan sé céla Samuyɛli tá wáati ó mán. 21O kwɔ́, án myɛ́man lúu mansacɛ lɔ kó fɔ́, Ala é Sɔli dí i man, Kisi dhyénjɛ, kɛ bhɔ́ Bɛnnzhamɛn buluyu ó lɔ, o lée i síi i kúnnan sánɲin bínaannin kɔ́ɔnnɔn. 22O kwɔ́, Ala é mansaya ó bwási Sɔli lá, to kɛ Laula di i man kɛ ó kɛ́ mansacɛ le. Ala é o sɛɛya ladi Laula ta fa nvɛ, kɛ́ fɔ́ kó: ‹Ne wɛ́ɛ Laula sɔ́ɔ, Yese dhyénjɛ. Mɔɔn míin a lé aa dí ɲɛ́n, a yáa ne sao bɛ́ kɛ, kɛ́ ɲán.›#13.22 O kóman ó sɛ́wɛnin ŋé Zabulu 89.21.

23Ala wɛ́ɛ Kísibhaa dí Izalayɛli mán kɛ́ bhɔ́ Laula buluyu ó lɔ́, o lée Ɛnza ne. Oo a tɛ́ wɛɛ láheli mín ndá. 24Sánnin Ɛnza ŋán nan, Yaya-Bátizelikɛbhaa tɛ́ wɛɛ a láse Izalayɛlika ólu bɛ́ mán, kó ii í yóo ólu yɛ́ɛman, kɛ í bátize. 25Yaya-Bátizelikɛbhaa yɛ bháala o tɛ́ káa sé a lá ŋó mán wáati mínnɔn, a tɛ́ɛ fɔla kó: ‹Álee ɲánla óo née yɛ́ɛtii le? Áa mɔɔn mín mankɔɔnnan o tɛ né le! Ɔn-ɔn! Wáa o káa nan né kwɔ, né yɛɛ mánngan kɛ a yɛ́ sawaa o yúu o fwée.›#13.25 O kóman ó sɛ́wɛnin ŋé Matiyu 3.11; Maki 1.7; Luka 3.16; Yaya 1.27.

26Mádhye ŋólu, Álee mínnu é Bulaaman buluyu ólu le, óni álee mínnu sháannan Ala ɲɛ́n, o kísili kóman óo nan án née léelu yɛ. 27Kɛ mansɔɔ, Yeluzalɛmuka ólu, óni i yɛ kunndii ólu mán kɛ́ Ɛnza nvɛ. I mán bhɔ́ céla ólu yɛ kóman o ɲan le, o mín ŋé kalanan i yɛ ló ŋóo ló lɔnwɛɛnlilo ŋólu la. Céla ólu mín nvɔ ii o kɛ́, kɛ kíti bé a ka. 28I mán fyɛn sɔ́ɔ a lá míin kɛ á fáa kún ne, wáa o bɛ́ kwɔ́, ii Pilati dɛ́li kó aa a fáa. 29Kóman mínnu tɛ́ wɛɛ sɛ́wɛ a ta sháafɛ ii o mánfa mínngɛ, ii a bhɔ́ yíi o mán, kɛ a láyii, tó kɛ táa a bhyaa kábulu lɔ kɔ́ɔnnɔn. 30Wáa Ala é a lákuun kɛ́ a bhɔ́ saya ó lɔ́. 31Mɔɔn mínnu lá Ɛnza nga kɛ bhɔ Galile kɛ táa Yeluzalɛmu, Ɛnza ŋé í yɛ́ɛ yáa olu la tee shɛ́ɛman ngɔ́ɔnnɔn. O léelu a sɛ́ɛya lé kwáalenin yaman o tɔ́ɔfɛ.

32Tó án nee o Sanmankanmɛɛ o lásela a mán: Láheli míin tá án myɛ́man lu yɛ 33Ala wɛ́ɛ o láheli o mánfa an ɲɛ́n gbútuukɛ, án née mínnu i dhyé ŋólu lé, aa Ɛnza nákuun mínngɛ, óyoo a sɛ́wɛnin ŋé Zabulu ó kitabu o fyáaɲɔn ó lɔ ɲán mín mán:

‹Í lé lée nyénjɛ ó le.

Bí, né wɛɛ kɛ́ i fá lé.›#13.33 O kóman ó sɛ́wɛnin ŋé Zabulu 2.7.

34Ala é Ɛnza nákuun kɛ́ a bhɔ́ saya ó lɔ́, ké a sú o kɛ́nan i kwɔ́sɛɛ kabulu o lɔ bhée kɛ twée, a tɛ́ wɛɛ o fɔ a yɛ kóman o lɔ́, kó:

‹Ne wɛ́ɛ laheli mín ndá Laula yɛ́, ne yáa o dí á man, laheli sɛ́nnɛnyanin ŋó,

O míin tínɲan o lé.›#13.34 O kóman ó sɛ́wɛnin ŋé Ezayi 55.3.

35A sɛ́wɛnin ŋé tínminnaa gbɛ́ɛ lɔ kó:

‹I táa sɔ́n ké i yɛ́ mɔɔn Sɛ́nnɛnyanin ŋó á twée kabulu ó kɔ́ɔnnɔn.›#13.35 O kóman ó sɛ́wɛnin ŋé Zabulu 16.10.

36Laula tá wáati ó lɔ, Laula tɛ́ɛ Ala yɛ́ bháalakɛ dhyé ne lé, áa Ala sao ó kɛ́, aa sayakɛ, ii a sú ló a bhyɛ́manlu tɔ́ɔ fɛ́, áa twée kabulu ó kɔ́ɔnnɔn. 37Wáa Ala é mín nákuun, o sú o mán twée kabulu ó kɔ́ɔnnɔn. 38-39O le kósɔn, mádhye ŋólu, a kákan ne kɛ bhɔ́ kó kée né ɲan lé: Ale lé bháaka lɔ yúumu yafa óo i lásela a mán; mɔɔn óo mɔɔn kɛ la a la, Ala yáa olu yacesii mɔɔn téenin nu lé gbúninngbu kɛ. Án ndɛ́ se kɛ́la mɔɔn téenin ne gbúninngbu kɛ Musa yɛ sɛliya o bháaka lɔ. 40Óo lɔ mínngɛ, áa í yáakii tó á yɛ́ɛ lɔ, céla ólu kóman mínnu fɔ́, olu kɛ́nan a sɔ́ɔ.

41‹Áa mánfɛɛ! Álee mínnuu a yɛ́ɛ lɔ bhwóɲanla, áa kawakoya, áa túun! Kɛ mansɔɔ ní kólu kɛ́la, a tá wáati o lɔ́ kɛ́ a lafa, ní i kɛ o ɲánfɔ a yɛ, a táa lá o la fɛ́sɛ fɛ́sɛ.›#13.41 O kóman ó sɛ́wɛnin ŋé Abakuki 1.5.»

42O kwɔ́, Pɔli ní Baanabasi é bhɔ́ sɛ́ɛbho ŋó kɔ́ɔnnɔn, mɔɔn ólu i dɛ́li kó lɔnwɛɛnlilo mín ŋé nánla nín, áa nán ó kóman kée ŋó fɔ́ i yɛ. 43Yaman ó ɲɛ́nɲɛnnin ŋo kwɔ́, Yawudhyaa ólu shɛ́ɛman, óni lónan mínnu tɛ́ɛ i sɛ́ɛla ni ile to i wɛ́ɛ lo Yawudhyaaya o lɔ, olu i bhyáa Pɔli ní Baanabasi kwɔ́. Pɔli ní Baanabasi é kóman i fɛ́ kɛ́ i yóso lágbɛya, kó ii tó Ala yɛ nɛ́nmɛn o kɔɔ ní kán ngéediiya le.

44 Lɔnwɛɛnlilo ŋó kúnɲɔɔn o, sómɔɔn ólu fánmba é nan Mantii o Sáaninkan ŋó lɔ́myɛn. 45Wáa Yawudhyaa ólu yaman o yé mínngɛ, ɲánngboya óo ló i yóso o lɔ. Ii Pɔli yɛ kóman ó mánsɔsɔ, tó kɛ́ i nɛ́ɛn. 46Pɔli ní Baanabasi é fɔ o le lɔ ni tɛ́ɛnga ne kó: «Ala yɛ kóman o kákan kɛ fɔ álee Yawudhyaa olu yɛ o tún, wáa áa i bá a lɔ́ mínngɛ, óni áa fɔla á yɛ́ɛ mán kó á mánngan kɛ ɲáanmanɲan wɛ́ɛbhɛɛ ó sɔ́ɔ. O lé kósɔn, án ngɛ́ɛ tɛ́ɛ síya gbɛ́ɛ olu fɛ yénɔn le ni, mínnu tɛ́ Yawudhyaa lé. 47Kɛ mansɔɔ Mantii óo fɔ́ án ɲɛ́n, kó:

‹Né lée í kɛ́ síya gbɛ́ɛ olu yɛ́ kɛ́ɛnɲan ó le,

ké íi Kísili kóman ó fɔ́, lúukolo lá ŋó la!›#13.47 O kóman ó sɛ́wɛnin ŋé Ezayi 49.6»

48Síya gbɛ́ɛ olu, ólu ó kóman ó myɛ́n mínngɛ i bɛ́ɛ i nísɔdhyaa gbútuu kɛ́, ii bálika bhɔ́ Mantii ó yɛ, a yɛ́ sáaninkan ŋó kósɔn. Mɔɔn óo mɔɔn lɔ́bhyɛnin ndɛ́ɛ ɲáanmanɲan wɛ́ɛbhɛɛ ó kanman, ólu bɛ́ɛ kɛ́ lánanbhaa le.

49Mantii ó Sáaninkan ŋó tɛ́ɛ fɔla yamaan ó ywáa bɛ́ lɔ. 50Waa Yawudhyaa olu i dhyaa lɔ muso fáanman ŋolu lɔ, mínnuu Ala bhátola so ó kɔ́ɔnnɔn, óni só o ɲɛ́nmɔɔn olu, ii ólu lɔlo. Kɛ́ gbɛ́ya lá Pɔli ní Baanabasi ká, kɛ́ i gbɛ́, kɛ́ i lábhɔ i yɛ yamaan ó lɔ. 51Wáa Pɔli ní Baanabasi bhɔ́tɔ ó, ii í sé ŋó mangbasi kɛ fíi o bhɔ í se man, tó kɛ táa Ikoniyɔmu#13.51 A sénan gbánbga ŋo tó yé nɔ́n: Oo Yawudhyaa olu yɛ́ kókɛse né le; o kɔɔ o tɔ́ɔ lé kó kaamɔɔndhye ŋolu ni o sómɔɔn ólu mán bhyɛ né wé. Ko mín ngɛ́ táa i sɔɔ i gbu lu bhyaa fɔ née wé.. 52Kaamɔɔndhye ŋólu nísɔdhyaanin ndɛ́ɛ gbútuu kɛ, óni i wásanin ndɛ́ɛ Ní Sɛnnɛnyanin ŋó lá.

Currently Selected:

Kɛ́wɛɛ 13: MXX

Highlight

Copy