1 Tesalonikika olu 2

Pɔli ni Silasi óni Timote yɛ bháala o Tesaloniki

1Mádhye ŋólu, á lée gbúlu á a lɔ ŋóo, án ndáa o á fɛ́ yénɔn, o man kɛ́ gbɛ́ɛgbɛɛ. 2Áa a lɔ ŋóo, mɔɔn olu wɛ́ɛ án dɔ́lɔ, kɛ án myaanko cɛyooɲan Filipi, wáa o bɛ kwɔ, Ala é án ɲóso o lágbɛya ke án ni a yɛ Sanmankanmɛɛ o fɔ á yɛ́, gbɛya shɛ́ɛman njɛ́man. 3Fii tɛ tɛ án ɲɛn kóman o lɔ, nɔ́ɔn tɛ tɛ a lɔ, nanmaan tɛ tɛ a lɔ. 4Wáa Ala wɛɛ a yacesii kó a bhyɛnin ŋé kɛ Sanmankanmɛɛ o kɛ́ɛfa án man. O le kósɔn, án ndɛ́ kómanla, kɛ án ngó dhyáa mɔɔn ólu yɛ, fɔ́ Ala, o lée án ɲósonguun ŋo mánfɛɛla. 5Áa lɔ ŋóo án man nan yɛ́ɛlɔbwoɲan kóman fɔ á yɛ́ fɛ́sɛ fɛ́sɛ. Án man o kóman o kɛ án ndá nánfa kósɔn, Ala lée o sɛ́ɛya le. 6Án man bwóɲan ɲiin mɔɔn sí fɛ, álee fɛ́ wáman mɔɔn gbɛ́ɛlu fɛ́. 7O bɛ kwɔ án nee mínnuu é Kílisi yɛ Céladhye ŋolu le, án ndɛ́ɛ sé kɛ o bwóɲan o ɲiin á fɛ́. Wáa án nee án ɲɛɛ kɛ dhyémuu le á cɛ́man, óyoo dhyémbatii o gbáamyaan la a dhyé ŋólu lá ɲán mín man, kɛ sin ndí i man. 8Á yɛ́ dhyáaɲɔɔnya o bwóɲan o kósɔn án ɲóso lɔ, án ndɛ́ tɛ fɛ kɛ Ala yɛ Sanmankanmɛɛ dɔlɔun ŋó láse á man, wáa án nɔ́bhyɛnin ndɛ́ɛ le yáanin kɛ án ni di á mán, kɛ mansɔɔ á ko tɛɛ dí án ɲɛn gbutuukɛ.

9Mádhye ŋolu, án ɲɛn sɛɛ óni án ɲɛn yángatabhaala olu á kɔ́ɔnnɔn lɛ. Kɛ án ndo Ala yɛ Sanmankanmɛɛ o láse o bháala o la, án ni bháala kɛ sú ni tee kɛ án ɲɛɛ bhalo, ke án ngɛnan kɛ lwée ne mɔɔn sí ka. 10Áa án nzɛ́ɛya le, Ala é án nzɛ́ɛya le, kɛ án ndo álee lánanbhaa olu cɛ́man yé, án ndáamanseɲan o sɛ́nnɛnyanin ndɛ́ɛ, a téenin ndɛ́ɛ, mɔɔn sí mán sɔ ngóo nzɔɔ án nan. 11Áa a lɔ ko án ni á bɛ́ kee ngéenan myaan óyoo fa oo a dhyé ŋolu myáanla ɲán mín man. 12Án ni á ládhye, óni kɛ á yóso o lágbɛya, kɛ a mangbɛya, ke á táamankɛseɲan o á bhyɛ Ala ɲankɔɔ, o mín ŋé á kíila a yɛ Mansaya óni a yɛ nɔ́lɔya o lɔ. 13Án né lo ŋe bálika bhɔ́la Ala yɛ wáati bɛ́, kɛ mansɔɔ án ni Ala yɛ kóman o fɔ á yɛ́ wáati mín nɔn, áa o lɔ́myɛn. Á man yacesii mɔɔn kóman le. Wáa áa a myaan óyoo Ala yɛ kóman. Tínɲan Ala yɛ kóman gbu lée a le. Aa bháalakɛla álee lánanbhaa olu kɔ́ɔnnɔn. 14Mádhye ŋolu, Ala yɛ Egilizi mínnuu Zude yamaan o lɔ, o mínnu e Ɛnza Ngílisi tá le, á wɛ́ɛ kɛ́ olu mánɲaanbhaa le, kɛ mansɔɔ Yawudhyaa olu wɛ́ɛ o lánanbhaa olu tɔ́lɔ ɲán mín man, á gbúlu ta siya óo á tɔ́lɔ o ɲán o le mán. 15O Yawudhyaa olu lée Mantii Ɛnza nváa, kɛ Céla olu fáa, kɛ án ndɔ́lɔ. I ko man ndí Ala yɛ, ii mɔɔn bɛ́ yúu le le. 16Kɛ mansɔɔ, ii i séko o bɛ́ kɛla ké án ngɛ́nan kísili kóman o fɔ síya gbɛ́ɛ olu yɛ, ké olu kɛ́nan kisi. I wɛɛ to lɔbhyaala i yɛ yúumu olu ka wáati bɛ́, fɔ́ɔ a labha ŋo la, Ala wɛɛ mwɛ́nnɛn, kɛ yángata la i ka.

Tesalonikika olu yélɔɔ o

17Mádhye ŋolu, án ngwɛnnin ŋwɛ́ɛn fáa á lá wáati dɔ́ɔnin ngɔɔnnɔn, wáa án man fáa á lá án ɲósokun ŋo lɔ. Á yélɔɔ lee án nan, fɔ́ án ŋwɛ́ɛn án nzéko o bɛ́ kɛ ko án ngɛɛ tɛ́ɛ á fɛ́ yé. 18Án ndɛ́ɛ fɛ kɛ án ngwɔ́sɛɛ á fɛ́ yé, ne Pɔli gbú wɛɛ o látɛɛ síɲan kée dɔlɔun ndɛ́, wáa Sɔtaannan é án ngánnankwɛɛnya. 19Yɛ́ɛtii é án ɲee le, án ɲɛn nisɔdhyaa o le, óni án ngunnanyaa ó le? Oo ále lée lu le án Mantii Ɛnza ɲankɔɔ a nan ló ŋo la a? 20Ɔɔn, ále lée lu án ɲɛn kunnanwee ŋóni án ɲɛn nisɔdhyaa o le.

Currently Selected:

1 Tesalonikika olu 2: MXX

Highlight

Copy