അപ്പോസുത്തലാര് 4
4
പത്ത്‌റോസുനാമ് ഓഗന്നാന്‌നാമ് എഗുദ കോഡിദില്
1പത്ത്‌റോസുമു ഓഗന്നാന്‌മ് ആള്‌ഗാളോഡ നായ സൊല്ലികൊണ്ട് ഇന്താര്. അദുക്കുള പൂസാരിഗാള്‌മ്, സാമിബീ്ഡ്‌ല കാവഗാറാര് തലെവാന്‌മ്, സദൂക്ക്യാര്‌മ് അവാര് പട്ട്‌ക്ക് എജ്ജ്‌നാര്. 2ഈ റാഡ് അപ്പോസുത്തലാര് ഏസ്സ് സത്ത പ്‌റ ഉജുര്‌ളാഗ്‌നാന് എന്റ്‌മ് അദ് സത്തവാര് ഉജുര്‌ളാഗുവാദ്‌ക്ക് അഡ്യാള എന്റ്‌മ് ആള്‌ഗാള്‌ന പഡിസിന്താര്. അദ്‌നാലെ അവാര് ഈ അപ്പോസുത്തലാരോഡ മൊനേക്ക് തെ്ട്ട്‌നാര്. 3നേര മജാക്കെ ആനാദ്‌നാലെ അവാര് അപ്പോസുത്തലാര്‌ന പ്‌ഡിത്ത് മറ്‌നാള് മാട്ട്‌ക്ക് ജെയില്‌ക്ക് അഡേത്ത് ബെത്തിന്താര്. 4അവാര് സൊന്ന സേദിന കേ്ട്ട് എഞ്ചോ ആള്‌ഗാള് ഏസ്സ്‌ന നമ്പ്‌നാര്. നമ്പ്‌നവാര്‌ല് ഗണ്ടാള്‌ഗാള് താനെ ഒപ്പതപ്പ അഞ്ചായിരാക്ക് ആനാര്.
5മറ്‌നാള് എഗുദ തലെവാര്‌ഗാള്‌മ്, മൂപ്പനാമ്‌ഗാള്‌മ്, ബേദബാത്ത്യനാമ്‌ഗാള്‌മ് എര്‌സലേമ്‌ല് ഒന്റായി കൂഡുനാര്. 6അദ്‌ല് എഗുദാര് ദൊഡ്ഡ പൂസാരി അന്നാസ്‌നാമ്, കയ്യപ്പാവുനാമ്, ഓഗന്നാന്‌നാമ്, അലസാണ്ടാര്‌നാമ്, ദൊഡ്ഡ പൂസാരി കുഡുമ്മഗാറാര്‌നാമ് അവാര് കണ്ടാര്. 7അപ്പോസുത്തലാര്‌ന മുന്നുക്കു നില്ലിസി ഇത്തെ അവാര് കേ്ട്ടാര്: <<നിമ്മ എത്തെ ഇത്തെ ഗേന്ത്‌റ്? നിമാക്ക് ഇത്ത്‌റാക്ക് അദിഗര തന്താദ് ആര്? അല്ല പോന ആര് സൊല്ലി ഇത്തെ ഗേന്ത്‌റ്?>>
8അദുക്കുള സാമിനിഗാല് തുമ്പി ഇന്താദ്‌നാലെ പത്ത്‌റോസു അവാര്‌ക്ക് ഇത്തെ സൊന്നാന്: <<എഗുദാര് തലെവാര്‌ഗാളെ, മൂപ്പനാമ്‌ഗാളെ, 9ഈ മൊണ്ടിക്ക് നല്ലാദ് ഗേന്താദ്‌നാലേമ്, അയാള്‌ക്ക് സുഗ കെ്ഡേത്താദ്‌നാലേമ്‌ത്തെ നിമ്മ എമാന കേ്ള്‌വി കേ്ള്‌ക്ക്‌ന്റ്‌റ? 10അത്ത്യാന നിമ്മാമ്, ഇസ്‌റവേല് ജനഗാളൊട്ടുക്കുമു ഇദ്‌ന തെരിന്ത്‌റ്‌ക്കുഡൊ. നിമ്മ കുരുസുക്കു സേത്തി ആണി അഡിത്ത് കൊന്റ നസറേത്ത്‌ഗാറാന് ഏസ്സ് ക്‌റ്‌സ്‌ത്ത്‌ന സാമി സാവുലിന്ത് ഉജുര്‌ളാക്ക്‌നാന്. അയി ഏസ്സ് പേര്‌ല്‌ത്തെ ഈ മൊണ്ടി നല്ല മുജുവോഡ നിമ്മ് മുന്നുക്കു നിന്റ് ഇര്‌ന്റാന്. 11സാമി ബൊക്കുലു ഏസ്സ്‌ന പറ്റി ഇത്തെ എ്ള്‌ദിര്‌ക്ക്‌ന്റ്:
<നിമ്മ ബീ്ഡ് എ്ഡ്‌ക്കാട്ടി നിമ്മ തെ്റിന്ത് തള്ള്‌ന കല്ല്‌ത്തെ,
എല്ലാ കല്ല്‌ഗാള്‌ന ബ്‌ഡ മുക്ക്യമാന കല്ല്#4:11 മുക്ക്യമാന കല്ല് ബേസ്‌മട്ട മൂലേലെ കല്ല് എന്റൊ കാവാഡിന പാസെ ഇര്‌ക്കുവ ബാസാക്ക് മേല് നഡ്‌ക്കെ ബെക്കുവ കല്ല് എന്റൊ ഇദ്‌ക്ക് അര്‌ത്ത ഇര്‌ക്ക്‌ന്റ്. നമ്മാള്‌ഗാള് ബീ്ഡ് എ്ഡ്‌ക്കാട്ടി പെര്‌ങ്കാന് കമ്പ് ബീ്ഡ്‌ന ഒറേപ്പ്‌ന മാഡി ബെക്കുവ പാസെ എഗുദാര് ബീ്ഡ് എ്ഡ്‌ക്കാട്ടി ഈ കല്ല്‌ത്തെ അവാര് ബീ്ഡ്‌ന ഒറേപ്പ് മാഡി ബെക്കുവാദ്. ആറ്റ്>#സാമി പാട്ട് ബൊക്കു 118:22
അയി കല്ല്‌ത്തെ ഈ ഏസ്സ്. 12ഏസ്സ് താനെത്തെ മന്‌സാന്‌ന കാപാറ്റ്‌ന്റവാന്, നമാന കാപാറ്റ്യ സാമി അയാള്‌ന അല്ലാദെ ബേ്റെ ആര്‌നാമ് ഉലഗാക്ക് സൊല്ലി ബ്‌ഡാലെ.>>
13പത്ത്‌റോസുമു, ഓഗന്നാന്‌മ് അത്ത്‌റ പഡിപ്പ്‌ഗാറാര്‌മ് അല്ല അത്ത്‌റ ദൊഡ്ഡ ആള്‌ഗാള്‌മ് അല്ല എന്റ് തെരിന്താദ്‌നാലേമ്, ഇവാര് ദയിരന കണ്ടാദ്‌നാലേമ് അദ്‌ക്ക് കൂഡിന്ത എഗുദ കോഡിദിഗാറാര് അദിസ്യപട്ടാര്. പത്ത്‌റോസുമു, ഓഗന്നാന്‌മ് ഏസ്സോഡൊപ്പ ഇന്തവാര് എന്റ്‌മ് അദുക്കുള അവാര്‌ക്ക് തെരിന്ത്‌ദ്. 14നോയി തെ്ളിന്തിന്തവാന് പത്ത്‌റോസോഡാമ് ഓഗന്നാനോഡാമ് ഇര്‌ക്കുവാദ്‌ന കണ്ടാദ്‌നാലെ അവാര്‌ക്ക് ഒന്റുമു സൊല്ല്യ മുഡ്യാലെ. 15അപ്പോസുത്തലാര്‌ന ബെ്ളിഗെ പോയി നിന്റ് ഇര്‌ക്ക്യ എഗുദ കോഡിദിഗാറാര് സൊന്നാര്, അദ്‌ക്ക് പ്‌റ അവാര് തമാക്ക് തമാക്ക് ഓസണെ മാഡിന്ത്: 16<<നമ്മ ഇവാര്‌ന എന്ത് ഗേയ? അവാര് എത്ത്‌റാഗോ ദൊഡ്ഡ കാര്യ ഗേന്ത്‌റ്‌ന്റാര് എന്റ് എര്‌സലേമ്‌ഗാറാര്‌ക്ക് ഒട്ടുക്കു തെരിവു. അദ്‌ന ഇല്ലെന്റ് സൊല്ല്യ നമാക്ക് മുഡ്യാമാട്ട. 17ആന ഈ കാര്യ ആള്‌ഗാള് എ്ഡേല് പജാക്കാദെ ഇര്‌ക്ക്യ ഇന്നി എന്നാല്‌ക്ക്‌മ് ആരോഡാമ് ഈ പേര്‌ല് നായനൊഡ്യാദേന് എന്റ് അവാര്‌ന മെ്റ്‌ട്ട്‌ഗാന്>> എന്റ് സൊന്നാര്.
18അദ്‌ക്ക് പ്‌റ അവാര് അപ്പോസുത്തലാര്‌ന പിന്നേമ് ബ്‌ളിത്ത് ഇന്നി ഏസ്സ് പേര്‌ന സൊല്ലി നായനൊഡിവാദൊ പഡുസുവാദൊ ഗേഗാദേന് എന്റ് സൊന്നാര്. 19ആന പത്ത്‌റോസുമു ഓഗന്നാന്‌മ് ഇത്തെ അവാര്‌ക്ക് ബദ്‌ല് സൊന്നാര്, <<സാമി സൊല്ലുവാദ്‌ന കേ്ള്‌ക്കുവാദൊ നിമ്മ സൊല്ലുവാദ്‌ന കേ്ള്‌ക്കുവാദൊ ഏദ് സെരി എന്റ് നിമ്മ താനെ സൊല്ലുനു. 20എമ്മ കണ്ട്‌മ് കേ്ട്ട്‌മ് ഇര്‌ക്കുവ കാര്യഗാള്‌ന പറ്റി എമാക്ക് സൊല്ലാദെ ഇര്‌ക്ക്യ മുഡ്യാമാട്ട.>>
21അപ്പോസുത്തലാര് ഗേന്താദ്‌ന കണ്ട് ആള്‌ഗാളൊട്ടുക്കു സാമിത്തെ ദൊഡ്ഡവാന് എന്റ് സൊല്ലിന്താര്. അദ്‌നാലെ എഗുദ കോഡിദിക്ക് അവാര്‌ന ദെ്ണ്ടിക്ക്യ മുഡ്യാലെ. എഗുദ കോഡിദി പിന്നേമ് അവാര്‌ന ബ്‌ളിത്ത് മുദാല് മെ്റ്‌ട്ട്‌നാദ്‌ന ബ്‌ഡ നല്ല മെ്റ്‌ട്ടി ബ്‌ട്ടാര്. 22നോയി തെ്ളിന്തവാന്‌ക്ക് ബയിസ്സ് നാപ്പദ്‌ക്ക് മേല് ആയിന്ത്‌ദ്.
നല്ല ദയിരാക്ക് ബേ്ണ്ടി ഏസ്സ്‌ഗാറാര് പരേസ്‌ന്റാര്
23പത്ത്‌റോസുമു ഓഗന്നാന്‌മ് ബെ്ളിഗെ ബന്ത് അന്നാല് താനെ തമ്മ് കൂട്ടാത്ത്‌ല ഏസ്സ്‌ഗാറാര് പട്ട്‌ക്ക് തിരിഗി പോനാര്, പ്‌റ എഗുദാര് പൂസാരി തലെവാര്‌ഗാള്‌മ്, മൂപ്പനാമ്‌ഗാള്‌മ് സൊന്നാദ്‌ഗാള്‌ന അവാര്‌ക്ക് സൊന്നാര്. 24ഇദ്‌ന കേ്ട്ട് ഏസ്സ്‌ഗാറാര് ഒട്ടുക്കു ഒന്റായി ഇന്ത് സാമിക്ക് ഇത്തെ പരേസ്‌നാര്: <<ബാന്‌നാമ്, ബൂമിനാമ്, കഡാല്‌നാമ്, അദ്‌ക്ക്‌റാഗ ഇര്‌ക്കുവാദ്‌ന ഒട്ടുക്കു ഉണ്ടാക്ക്‌ന സാമിത്തെ നീ, 25എമ്മ് പാട്ടാന്‌മ് നിന്ന് ഗിലാസഗാറാന്‌മ് ആന ദാവീദ്‌ക്ക് സാമിനിഗാല്‌ന കൊഡുത്തു നീ ഇത്തെ സൊല്ലിസി ഇര്‌ന്റായി:
<എഗുദാരല്ലാത്ത ജാദിഗാള് മൊനേക്ക് തെ്ട്ടുവാദ് എന്ത്‌ക്ക്?
ആള്‌ഗാള് സാമ്യോഡ ജൂദുപ്‌ഡിത്ത് സട്ട കെ്ട്ടുവാദ് എന്ത്‌ക്ക്?
അവാര് എത്തെ നോഡുനാല്‌മ് സാമിന സോലുസ്യ മുഡ്യാമാട്ട.
26ആണ്ടവാനോഡാമ് തന്ന് ക്‌റ്‌സ്‌ത്തോഡാമ് മുട്ട്യ
ബൂമില രാജാവുഗാള് ഒരിങ്കിര്‌ന്റാര്.
അദിഗാരിഗാള് ഒന്റായി എ്ണേന്ത്‌റ്‌ന്റാര്.>#സാമി പാട്ട് ബൊക്കു 2:1,2
27നിനാക്ക് ബേ്ണ്ടി സൊല്ലി ബെത്ത്‌റ്‌ക്കുവ ഏസ്സ്‌ന നീ താനെ ക്‌റ്‌സ്‌ത്ത് മാഡി ബെത്ത്‌റ്‌ക്ക്‌ന്റായി. അയാളോഡ ജൂദുപ്‌ഡിത്ത് എരോദാവുമു, പൊന്തിയോസ് പീലത്തോസുമു എ്ണേന്ത്, എഗുദാരല്ലാത്ത ജാദിഗാളോഡാമ്, ഇസ്‌റവേല്‌ഗാറാരോഡാമ് ഒപ്പ ഈ പട്ടണാത്ത്‌ല് ഒന്റായി കൂഡുനാര്. 28നീ മുദാല് താനെ മുഡിവെ്ഡ്‌ത്ത് ബെത്തിന്ത കാര്യഗാള്‌ന നഡാത്ത്യാത്തെ അവാര് ഇത്തെ കൂഡുനാദ്. നിന്ന് സക്‌തിനാലേമ്, ആസെനാലേമ്‌ത്തെ ഇദ്‌ഗാളെല്ല നഡാന്താദ്. 29അദ്‌നാലെ ആണ്ടവാനെ, അവാര് മെ്റ്‌ട്ടുവാദ്‌ന നീ ഇന്നാല് നോഡുഡോമെ. നിന്ന് സേദി സെരിക്ക്‌മ് ദയിരത്തോഡ സൊല്ല്യ നിന്ന് ഗിലാസഗാറാര് ആയിര്‌ക്കുവ എമാന താങ്കുഡോമെ. 30നീ കയി നീ്ട്ടി നോയിഗാറാര്‌ന തെ്ള്‌സുഡോമെ. നിന്ന് ഗിലാസാക്ക് സൊല്ലി ബെത്ത്‌റ്‌ക്കുവ ഏസ്സ് പേര്‌ല് അദിസ്യഗാള്‌മ്, അഡ്യാളഗാള്‌മ് ഗേന്ത് കാട്ടുഡോമെ.>>
31ഇത്തെ അവാര് പരേസി തീന്താദ്‌മ് അവാര് കൂഡിന്ത എ്ഡെ അദ്‌റ്‌ന്ത്‌ദ്. അവാര്‌ക്ക് ഒട്ടുക്കു സാമിനിഗാല് ഏ്റി അവാര്‌ന മൂഡി തള്ള്‌ട്ട്. സാമി സേദി അവാര് ദയിരത്തോഡ സൊല്ല്യാമ് പ്‌ഡിത്താര്.
ഏസ്സ്‌ഗാറാര് തമാക്ക് ഇര്‌ക്കുവ സൊത്തുഗാള്‌ന ഒന്റേ സമ പങ്ക്‌ന്റാര്
32ഏസ്സ്‌ഗാറാര് ഒട്ടുക്കു ഒന്റേ മനേസ്സോഡാമ്, ഒന്റേ കെ്ട്ടോഡാമ് ഇന്താര്. തമാക്ക് ഇര്‌ക്കുവ ഒന്റുനാമ് തനാക്ക് സൊന്ത എന്റ് ആര്‌മ് സൊല്ലാലെ. അവാര് തമാക്ക് ഇന്താദ്‌ന ഒട്ടുക്കു ആള്‌ക്ക് മായ പങ്ക്‌നാര്. 33ആണ്ടവാന് ഏസ്സ് സത്ത് ഉജുര്‌ളാഗ്‌നാദ്‌ന കണ്ട അപ്പോസുത്തലനാമ് അദ്‌ന നല്ല സക്‌ത്യോഡ ആള്‌ഗാള്‌ക്ക് സൊന്നാര്. 34അവാര്‌ക്ക് ഒട്ടുക്കു സാമി എഞ്ചോ പ്‌ണ്ണ്യഗാള് ഗേന്താന്. അവാര് കൂട്ടാത്ത്‌ലിന്ത ആര്‌ക്ക്‌മ് ബുദ്ദിമുട്ടു ഒന്റുമു ഇര്‌ക്കാലെ. അവാര് തമാക്ക് ഇന്ത ബീ്ഡ്‌ഗാള്‌നാമ് കാഡ്‌ഗാള്‌നാമ് ബിറ്റ് പണമാഡി, 35അയി പണാന അവാര് അപ്പോസുത്തലനാമ്‌ക്ക് കൊഡുത്താര്. അദ്‌ക്ക് പ്‌റസാരി ഒന്റൊന്റാള്‌ക്ക് ഇര്‌ക്കുവ ബുദ്ദിമുട്ടുന നോഡി അയി പണാന പങ്കി കൊഡുത്തിന്താര്.
36ഇസ്‌റവേല്‌ല് ലേവി എന്നുവ കുലാത്ത്‌ല് ഓസേപ് എന്നുവ ഒന്റൊരുത്താന് ഇന്തിന്താന്. അയാള് കുപ്പുറോസു എന്നുവ എ്ഡേല് പ്‌റാന്തവാന്‌ത്തെ. അപ്പോസുത്തലനാമ് അയാള്‌ന ബറ്‌ണവാസ് എന്റ്‌മ് ബ്‌ളിത്തിന്താര്. <<ദയിര സൊല്ലുന്റവാന്>> (എന്റ്‌ത്തെ ഈ പേര്‌ക്ക് അര്‌ത്ത) 37അയാള് തന്ന് ഗദ്ദേന ബിറ്റ് അയി പണാന എ്ഡ്‌ത്ത് ബന്ത് അപ്പോസുത്തലനാമ്‌ക്ക് കൊഡുത്താന്.
Currently Selected:
അപ്പോസുത്തലാര് 4: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
