അപ്പോസുത്തലാര് 3
3
കാല്‌മൊണ്ടി ആയിന്ത പിച്ചെഗാറാന് നല്ലാദ് ആനാന്
1ഒന്റു നാള് പത്ത്‌റോസുമു ഓഗന്നാന്‌മ് പരേസുവ നേര ആഗാട്ടി സാമിബീ്ഡ്‌ക്ക് പോനാര്. അദുക്കുള നേര ഉച്ചി കളിന്ത് മൂറു മണി ആയിന്ത്‌ദ്. 2അയി സാമിബീ്ഡ്‌ല് അളാഗ് ബാസ എന്നുവ പട്ട്‌ല് കാല്‌മൊണ്ട്യായി പ്‌റാന്തിന്ത ഒരുത്താന് ഇന്തിന്താന്. സാമിബീ്ഡ്‌ക്ക് പോന്റവാരോഡ പിച്ചെഡ്‌ക്ക്യ അയാള്‌ന നാള്‌ക്ക്‌മ് അദ്‌ക്ക് എ്ഡ്‌ത്ത് കുക്കാസിന്താര്. 3അയാള് പത്ത്‌റോസുമു ഓഗന്നാന്‌മ് സാമി ബീ്ഡ്‌ക്ക് പോവാദ്‌ന കണ്ട് അവാര്‌ക്ക് കയി കാട്ട്‌നാന്. 4പത്ത്‌റോസുമു ഓഗന്നാന്‌മ് അയാള്‌ന സൊക്കാന നോഡുന പ്‌റ <<എമാന നോഡു>> എന്റ് പത്ത്‌റോസു സൊന്നാന്. 5അദുക്കുള അവാര് എന്താറ്റ കൊഡുക്കുവാര് എന്റ് ആസെപട്ട് അയാള് അവാര്‌ന സൊക്കാന നോഡുനാന്.
6പത്ത്‌റോസു അയാള്‌ക്ക്: <<നിനാക്ക് തര്യ പണാഗൊ പൊന്നൊ ഒന്റുമു എന്ന് കയില് ഇല്ലെ, എനാക്കിര്‌ക്കുവാദ്‌ന നാന് നിനാക്ക് തന്റെ. നസറേത്ത്‌ഗാറാന് ഏസ്സ് ക്‌റ്‌സ്‌ത്ത് പേര്‌ല് ഇ്ളാഗി നഡ എന്റ് നാന് നിനാക്ക് സൊന്റെ>> എന്റ് സൊന്നാന്. 7അദ്‌ക്ക് പ്‌റ പത്ത്‌റോസു അയാള്‌ന ഇ്ളാക്കി നില്ലിസ്യ അയാള് ബല കയിന പ്‌ഡിത്താന്. അന്നാല് താനെ അയാള് പാദകാല്‌ക്ക്‌മ് കണെക്കാക്ക്‌മ് ഒറേപ്പ് കെ്ഡേത്ത്‌ദ്. 8അയാള് ബുഗുറുക്കന ഇ്ളാഗി നിന്റ് സുറ്റുമു നഡാക്ക്യ പ്‌ഡിത്താന്. അദ്‌ക്ക് പ്‌റ അയാള് സാമിത്തെ ദൊഡ്ഡവാന് എന്റ്‌കൊണ്ടുമു, ഗുദിത്ത്‌കൊണ്ടുമു അവാരോഡ സാമിബീ്ഡ്‌ക്ക് പോനാന്. 9അയാള് സാമിത്തെ ദൊഡ്ഡവാന് എന്റ് സൊല്ലുവാദ്‌നാമ്, നഡാക്കുവാദ്‌നാമ് ആള്‌ഗാള് അദ്‌ല് കണ്ടാര്, 10അയാള് അളാഗ് എന്നുവ സാമിബീ്ഡ് ബാസാത്ത്‌ല് കുക്കാന്തിന്ത് പിച്ചെഡ്‌ത്തിന്തവാന്‌ത്തെ എന്റ് അവാര്‌ക്ക് തെരിന്ത്‌ദ്. അയാള്‌ക്ക് ഇത്തെ ആനാദ്‌ന കണ്ട് ആള്‌ഗാളൊട്ടുക്കു അദിസ്യപട്ട് ബെക്കെന്റിന്താര്
പത്ത്‌റോസു സാമിബീ്ഡ്‌ലിന്ത് സേദി സൊന്റാന്
11സാമിബീ്ഡ്‌ല് സലോമോനുത്തു എന്നുവ മണ്ടഗ ഇന്ത്‌ദ്. അദ്‌ല് നോയി തെ്ളിന്തവാന് പത്ത്‌റോസോഡാമ് ഓഗന്നാനോഡാമ് ഒപ്പ എ്ണേന്ത് ഇന്താന്. അദ്‌ന കണ്ട് ആള്‌ഗാള് അദിസ്യപട്ട് അവാര് പട്ട്‌ക്ക് ഓഡി ബന്താര്. 12പത്ത്‌റോസു ആള്‌ഗാള്‌ന കണ്ട് അവാര്‌ക്ക് ഇത്തെ സൊന്നാന്: <<എന്ന് സൊന്ത ഇസ്‌റവേല്‌ഗാറാരെ ഇദ്‌ന കണ്ട് നിമ്മ അദിസ്യപഡുവാദ് എന്ത്‌ക്ക്? നിമ്മ എന്ത്‌ക്ക് എമാന കണ്ണ് ദുറുത്തു നോഡിര്‌ന്റ്‌റ്? എമാക്ക് ദൊഡ്ഡ ബില ഇര്‌ക്കുവാദ്‌നാലെഗൊ സാമി മുന്നുക്കു എമ്മ നല്ലവാര് ആനാദ്‌നാലേഗൊ ഇയാള്‌ക്ക് നഡാക്ക്യ മുഡിന്താദ് എന്റ് നിമ്മ നെനേക്ക ബേ്ഡ. 13പണ്ട് കാലാത്ത്‌ല നമ്മ് അവുറഗാമ്‌ത്ത്‌മ് ഇസഗാക്ക്‌ത്ത്‌മ് ആക്കോവുത്ത്‌മ് സാമിത്തെ നമ്മ് പാട്ടനാമ് സാമി. അയി സാമി താന് സൊല്ലുവാദ്‌നെല്ല അദേപാസെ ഗേവ ഏസ്സ്‌ന ദൊഡ്ഡവാന് മാഡി ഉജാത്ത്‌നാന്. അയി ഏസ്സ്‌ന നിമ്മ എഗുദാര് അദിഗാരിഗാള്‌ക്ക് പ്‌ഡിത്ത് കൊഡുത്തുറു. പീലത്തോസു അയാള്‌ന ബെ്റ്‌ദെ ബ്‌ഡ്‌ഡൊ എന്റ് മുഡിവു എ്ഡ്‌ത്ത് ഗുഡി നിമ്മ അയാള്‌ന എമാക്ക് ബേ്ഡ എന്റ് പീലത്തോസുക്കു സൊന്നുറു. 14സാമിക്ക് ബേ്ണ്ടി തനാന താനെ ഒപ്പിസിന്തവാന്‌മ് സാമി സൊന്ന സട്ടന ഒട്ടുക്കു അദേപാസെ ഗേന്റവാന്‌മ് ആയിന്തവാന്‌ത്തെ ഏസ്സ്. ആന അയി ഏസ്സ്‌ന നിമ്മ എമാക്ക് ബേ്ഡ എന്റ് സൊല്ലി ഒന്റു കൊലെഗാറാന്‌ന ബ്‌ഡ്‌ഡോമെ എന്റ് പീലത്തോസുന കേ്ട്ട്‌റ്. 15ഉജുരു തന്റവാന്‌ന നിമ്മ കൊന്റു തള്ള്‌ന്‌റ്, ആന സാമി അയാള്‌ന സത്തവാര് പട്ട്‌ലിന്ത് ഉജുര്‌ളാക്ക്‌നാന്. എമ്മ അദ്‌ന കണ്ടേമ്. 16ഏസ്സ് പേര്‌ക്ക് ഇര്‌ക്കുവ പവുറുത്തെ ഈ മൊണ്ടിക്ക് നഡാക്കുവാദ്‌ക്കുള്ള മുജുവു കൊഡുത്താദ്. നിമ്മ ഈ കണ്ടാദ്‌മ് കേ്ട്ടാദ്‌മ് നഡാന്താദ് ഏസ്സ്‌ന നമ്പ്‌നാദ്‌നാലെത്തെ. ഏസ്സ്‌ന നമ്പ്‌നാദ്‌നാലെ ഇയാള് സൊക്കന ആനാദ്‌ന നിമാക്ക് കാണ്യ മുഡിമ്.
17അണ്ണനാമെ തമ്പ്യാമെ, നിമാക്ക്‌മ് നിമ്മ് തലെവാര്‌ഗാള്‌ക്ക്‌മ് എന്ത് ഗേഡൊ എന്റ് തെര്യാദെ ഇന്താദ്‌നാലെത്തെ ഏസ്സ്‌ന ഇത്തെല്ല ഗേന്താദെന്റ് എനാക്ക് തെരിമ്. 18ആന തന്ന് ക്‌റ്‌സ്‌ത്ത് കങ്കേഞ്ചിപഡുവാന് എന്റ് സാമി തന്ന് ദാസ്‌ഗാള്‌ക്ക് സൊല്ലിന്താന്. അദ്‌ന അയി സാമിദാസ്‌ഗാള് മുന്തെ കാലാല് താനെ സൊല്ലിര്‌ന്റാര്. അദേപാസെ താനെ അദ് ഇന്നാല് നഡാന്ത്‌ദ്. 19അദ്‌നാലെ നിമ്മ ഗേവ കാര്യഗാള് പാവ എന്റ് തെരിന്ത് അദ്‌ന തള്ളി ഇന്നി ഗേഗാദെ ഇര്‌ക്കുഡൊ, പ്‌റ സാമിസാരി ബരുഡൊ. അന്നാപ്പ് സാമി നിമ്മ് പാവാക്ക് പൊറിമെ തരുവാന്. നിമ്മ അത്തെ ഗേന്തദാന, 20സാമിക്ക് ബേ്ണ്ടി നല്ല സുറുസുറുപ്പോഡ പെ്ളേത്ത് പോവ കാല ആണ്ടവാന് നിമാക്ക് തരുവാന്. അദോഡ നിമാക്ക് ബേ്ണ്ടി ക്‌റ്‌സ്‌ത്ത് ആയി സാമി തെരിന്തെ്ഡ്‌ത്ത ഏസ്സ്‌നാമ് നിമാക്ക് സൊല്ലി ബ്‌ഡുവാന്. 21എല്ലാദ്‌നാമ് നല്ലാദ് മാഡുവ കാല ബരമാട്ട്‌ക്ക് ഏസ്സ് മേലോഗാത്ത്‌ല്‌ത്തെ ഇര്‌ക്കുഡൊ എന്റ് സാമി മുന്തെ കാലാത്ത്‌ല് ഇന്ത തന്ന് ദാസ്‌ഗാള്‌ക്ക് സൊല്ലിന്താന്. അദ്‌ന അവാര് ആള്‌ഗാള്‌ക്ക് സൊല്ലിര്‌ന്റാര്. 22മോസെ ഇത്തെ സൊല്ലിര്‌ക്ക്‌ന്റാന്: <ആണ്ടവാന് ആയിര്‌ക്കുവ നിമ്മ് സാമി എനാന സൊല്ലി ബ്‌ട്ട പാസെ ഒന്റു സാമിദാസ്‌ന നിമാക്ക് സൊല്ലി ബ്‌ഡുവാന്. അയാള് നിമ്മ് സൊന്ത ജാദിക്ക് പട്ട ഒന്റൊരുത്താന്‌ത്തെ ആയിര്‌ക്കുവാന്. അയാള് നിമാന ഗേയ സൊല്ലുവാദ്‌ന ഒട്ടുക്കു നിമ്മ ഗേഡൊ. 23അയി സാമിദാസ് നായന കേ്ള്‌ക്കത്തവാര്‌ന ഒട്ടുക്കു സാമിന കുമ്മുഡുന്റവാര് പട്ട്‌ക്ക് എജേക്കാമ് മാട്ടാന്, അളിത്ത്‌മ് തള്ളുവാന്.>#മറിസി സൊല്ലുവ സട്ട 18:15,18,19
24സമുവേല്‌മ്, അയാള്‌ക്ക് പ്‌റ ബന്ത സാമിദാസ്‌ഗാള്‌മ് ഈ കാലാത്ത്‌ല് നഡാക്കുവാദ്‌ന പറ്റി സൊല്ലിര്‌ക്ക്‌ന്റാര്. 25സാമി നിമാക്ക് തരുവ ബാക്ക്‌വരഗാള്‌ന തന്ന് ദാസ്‌ഗാള് കയിക്ക് കൊഡുത്താന്. സാമിമ് നിമ്മ് പാട്ടനാമ്‌മ് തമ്മ ആങ്കീങ്ക് ബാക്ക് കൊഡുത്തിന്താര്. അദ്‌ക്കെല്ല നിമ്മ സൊന്തഗാറാര്‌ത്തെ. സാമി അവുറഗാമ്‌ക്ക്, <ബൂമില് ഇര്‌ക്കുവ ആള്‌ഗാള്‌ക്ക് ഒട്ടുക്കു നല്ലാദ് കെ്ഡേക്കുവാദ് നിന്ന് കാല്‌കെ്ളെ കയിലിന്ത്‌ത്തെ>#ഉറുപത്തി 22:18; ഉറുപത്തി 26:4 എന്റ് സാമി അവുറഗാമ്‌ക്ക് സൊല്ലിര്‌ക്ക്‌ന്റാനല്ല? 26സാമി തന്ന് ഗിലാസഗാറാര്‌ന തെരിന്തെ്ഡ്‌ത്ത് മുദാല് നിമ്മ് പട്ട്‌ക്ക് സൊല്ലി ബ്‌ട്ടാന്. അദ് നിമ്മ ഒന്റൊന്റാള് ഗേവ കെ്ട്ട കാര്യഗാള്‌ലിന്ത് നിമാന ബ്‌ഡിസി നിമാക്ക് ബര തന്ത് നല്ലാദ് മാഡ്യത്തെ.>>
Currently Selected:
അപ്പോസുത്തലാര് 3: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
