അപ്പോസുത്തലാര് 2
2
സാമിനിഗാല് ബന്റ്
1ബെന്ത്‌കോസു നാള്#2:1ബെന്ത്‌കോസു നാള് പെസഗെ നോമ്പി കളിന്ത് അമ്പദ് നാള് ആഗാട്ടി നഡാക്കുവ ഒന്റു നോമ്പിത്തെ ബെന്ത്‌കോസു നോമ്പി. അദ് എഗുദാര് അന്ന അറുക്കുവ നോമ്പി. ആഗാട്ടി ഏസ്സ്‌ഗാറാരൊട്ടുക്കു ഒന്റു എ്ഡേല് ഒന്റായി ഇന്താര്. 2അന്നാല് താനെ ബാന്‌ലിന്ത് ഒന്റു ജദ്ദ ആറ്റ്. അയി ജദ്ദ ദൊഡ്ഡ ഒന്റു കാറ്റഡിക്കുവ പാസെത്തെ ആനാദ്. ഈ ജദ്ദ അവാര് ഇന്ത ബീ്ഡ്‌കുളാക്ക് ഒട്ടുക്കു കേ്ട്ട്‌ദ്. 3അയി ഗളിഗെ തീനാവാള്‌ഗാള് അവാര്‌ക്ക് കാട്ട്‌റ്റ്. അദ് അദ്‌ലിന്തവാര്‌ക്ക് ഒട്ടുക്കു പജാന്ത്‌ദ് 4അവാര്‌ക്ക് ഒട്ടുക്കു സാമിനിഗാല് ഏ്റി അവാര്‌ന മൂഡി തള്ള്‌ട്ട്. സാമിനിഗാല് അവാര്‌ക്ക് നായനൊഡ്യ ബില കൊഡുത്താദ്‌നാലെ അവാര് ബേ്റെബേ്റെ നായഗാള്‌ല് നായനൊഡ്യ പ്‌ഡിത്താര്.
5അയി സമ്യ ഉലഗാത്ത്‌ല് ഇര്‌ക്കുവ ബേ്റെബേ്റെ നാഡ്‌ഗാള്‌ലിന്ത് സാമിന കുമ്മുഡുവ എഗുദാര് എര്‌സലേമ്‌ക്ക് ബന്ത് പെ്ളേത്തിന്താര്. 6ഈ ജദ്ദന കേ്ട്ട് ഒന്റു മൊത്തന ആള്‌കൂട്ട അദ്‌ക്ക് ബന്താര്. അദുക്കുള ഏസ്സ്‌ഗാറാരൊട്ടുക്കു അദ്‌ക്ക് കൂഡുന ആള്‌ഗാള് നായാത്ത്‌ല് നായനൊഡിവാദ്‌ന കേ്ട്ട് അയി ബന്ത് കൂഡിന്തവാര് ബെക്കെന്റിന്താര്. 7അവാര് അദിസ്യത്തോഡ ഇത്തെ സൊന്നാര്: <<ഈ നായനൊഡിവാദെല്ല ഗലീലഗാറാര്‌ത്തേഗൊ? 8നമ്മ ഒന്റൊന്റാള് സൊല്ലുവ നായാത്ത്‌ല്‌ത്തെ ഇവാര് നായനൊഡിന്റാരൊ? ഇദ് എത്തെ അവാര്‌ക്ക് സൊല്ല്യ മുഡിന്റ്? 9നമ്മ ലേസ ആള്‌ഗാള് പാറ്‌ത്ത്യ, മേദ്യ, ഏലാമ്യ എന്നുവ നാഡ്‌ഗാള്‌ലിന്ത് ബന്തവാര്‌ത്തെ. നമ്മൊപ്പ മെസെപൊത്തേമ്, എഗുദ്യ, കപ്പദോക്ക്യ, പൊന്തോസു, ആസ്യ എന്നുവ നാഡ്‌ഗാള്‌ലിന്ത് ബന്തവാര്‌മ് ഇര്‌ക്ക്‌ന്റാര്. 10ബേ്റെ ലേസ ആള്‌ഗാള് പുറുഗ്യ, പമ്പുല്ല്യ, മിസ്‌റേമ് എന്നുവ നാഡ്‌ഗാള്‌ലിന്ത്‌മ് പിന്നെ കൊറേന നാഡ്‌ക്ക് അര്‌ഗെ ഇര്‌ക്കുവ ലിവ്യ എന്നുവ ദേസാത്ത്‌ല പല പല എ്ഡെഗാള്‌ലിന്ത്‌മ് ബന്തവാര്‌ത്തെ. നമ്മോഡ ഇര്‌ക്ക്‌ന്റവാര്‌ല് പഗ്‌ദി ആള്‌ഗാള് റോമ നാഡ്‌ഗാറാര്‌മ്‌ത്തെ. 11നമ്മോഡ ഇര്‌ക്കുവ ലേസ ആള്‌ഗാള് എഗുദാര്‌മ് എഗുദ മദാക്ക് എ്ണേന്ത എഗുദാര് അല്ലാത്ത ആള്‌ഗാള്‌മ്‌ത്തെ. പിന്നെ ലേസ ആള്‌ഗാള് ക്‌റേത്ത്യാര്‌മ്, അറാവി നാഡ്‌ഗാറാര്‌മ്‌ത്തെ. ആന ഇവാര് സാമി ഗേന്ത ദൊഡ്ഡുദൊഡ്ഡ കാര്യഗാള്‌ന നമ്മ് നായാത്ത്‌ല് സൊല്ലുവാദ്‌ന നമ്മ കേ്ള്‌ക്ക്‌ന്റാമ്!>> 12ഇദ്‌ല് നഡാക്കുവാദ് എന്ത് എന്റ് തെര്യാദെ എല്ലാവാര്‌മ് അദിസ്യപട്ടാര്, <<ഇദ്‌ക്ക് എന്ത് അര്‌ത്ത?>> എന്റ് ആള്‌ഗാള് ഒട്ടുക്കു തമാക്ക് തമാക്ക് സൊല്ലി അങ്കലാപ്‌പട്ടാര്.
13ആന <<അവാര് കുഡിത്ത് ബോദേ്റിര്‌ന്റാര്>> എന്റ് സൊല്ലി ലേസ ആള്‌ഗാള് ഏസ്സ്‌ഗാറാര്‌ന നാണഗെ്ഡ്‌സ്‌നാര്.
പത്ത്‌റോസു നായ സൊന്റാന്
14അദുക്കുള പത്ത്‌റോസു പദ്‌നൊണ്ണു അപ്പോസുത്തലാരോഡ ഇ്ളാഗി നിന്റ് ആള്‌ഗാള്‌ക്ക് ദൊഡ്ഡുദൊഡ്ഡാദ്‌ക്ക് ഇത്തെ നായ സൊല്ല്യ പ്‌ഡിത്താന്: <<എഗുദാരേ, എര്‌സലേമ്‌ല് ഇര്‌ക്ക്‌ന്റവാരെ, എന്ന് നായന കേ്ള്‌ന്, ഇദ് എന്തെന്റ് നിമാക്ക് നാന് സൊല്ലി തന്റെ. 15നിമ്മ നെനേക്കുവ പാസെ ഇവാര് കുഡിത്ത് ബോദേ്റ്‌നവാര് അല്ല. റാവെ താനെ നേര ഒമ്പദ്‌മണിത്തെ ആയിര്‌ന്റ്. 16ഇദ്‌ന പറ്റി ഓവേല് സാമിദാസ് ഇത്തെ എ്ള്‌ദി ബെത്ത്‌റ്‌ന്റാന്:
17<സാമി സൊല്ലുന്റാന്, കഡേസി കാലാത്ത്‌ല്
നാന് ആള്‌ഗാള്‌ക്ക് ഒട്ടുക്കു എന്ന് നിഗാല്‌ന മൊത്തനാക്ക് കൊഡുക്കുവെ.
നാന് നിമ്മ് മഗാനാര്‌നാമ് മഗളാര്‌നാമ് എന്ന് സേദിന പറ്റി സൊല്ല്യ ബെക്കുവെ.
നിമ്മ് ബീ്ണാര്‌ക്ക് തോറ്റഗാള് കെ്ഡേക്കുവു.
നിമ്മ് അച്ചനാമ്‌ഗാള് കനേസ്‌ല്‌ഗാള് കാണുവാര്.
18അയി ഗളിഗെ നാന് എന്ന് ഗിലാസഗാറാര്‌ക്ക്‌മ് ഗിലാസഗാറിസ്യാര്‌ക്ക്‌മ്
എന്ന് നിഗാല്‌ന മൊത്തനാക്ക് കൊഡുക്കുവെ.
അവാര്‌നാമ് നാന് എന്ന് സേദിന പറ്റി സൊല്ല്യ ബെക്കുവെ.
19നാന് ബാന്‌ല്‌മ് ബൂമില്‌മ്
അദിസ്യഗാള്‌മ് കാട്ടുവെ. സോരേമ്,
തീയിമ് കറ്‌ത്ത പൊഗേമ് ബരുവു.
20ആണ്ടവാന് മദ്‌പ്പോഡ ബരുവ അയി ദൊഡ്ഡ നാള്‌ക്ക് മുദാല്
നേര ഇ്റ്‌ണ്ട് തള്ളുവു,
നിലാവു സോരെസോര്യ ആമ്.
21ആണ്ടവാനെ, എമാന കാപാറ്റുഡോമെ എന്റ്
ബ്‌ളിക്ക്‌ന്റവാര്‌നെല്ല ആണ്ടവാന് കാപാറ്റുവാന്.>#ജോവേല് 2:28–32
22എന്ന് സൊന്ത ഇസ്‌റവേല്‌ഗാറാരെ, എന്ന് നായന കേ്ള്‌ന്! നസറേത്ത്‌ഗാറാന് ഏസ്സ്‌ക്ക് ഇന്ത സാമി അദിഗരാന സാമി നലമായി നിമാക്ക് കാട്ടി തന്താന്. അദ് അയാള് ഗേന്ത അദിസ്യഗാള്‌ല്‌മ് അഡ്യാളഗാള്‌ല്‌മ്‌ത്തെ സാമി കാട്ടി തന്താദ്. നിമ്മ് എ്ഡേല് നഡാന്ത ഈ കാര്യഗാളെല്ല നിമാക്ക് നലമായി തെരിവു. 23സാമി ഏസ്സ്‌ന എന്ത് ഗേഡൊ എന്റ് മുദാല് താനെ മുഡിവെ്ഡ്‌ത്ത് ഒറേപ്പ് മാഡി ബെത്തിന്ത പാസെ അയാള്‌ന നിമ്മ് കയിക്ക് ഒപ്പുസുനാന്. നിമ്മ അയാള്‌ന കേ്ഡ്‌ഗെ്ട്ടവാര് കയിക്ക് കൊഡുത്തുറു. അവാര് ഏസ്സ്‌ന കുരുസുക്കു ആണി അഡിത്ത് കൊന്റു തള്ള്‌നാര്. 24ആന ഏസ്സ്‌ക്ക് ബന്ത സാവുലിന്ത് സാമി ഏസ്സ്‌ന ഉജുര്‌ളാക്ക്‌നാന്. സാവുക്കു ഇര്‌ക്കുവ അദിഗരാത്ത്‌ലിന്ത്‌മ് സാമി അയാള്‌ന ബ്‌ഡ്‌സ്‌നാന്. എന്ത്‌ക്കെന്റ് സൊന്ന സാവു അയാള്‌ന അഡിമെ മാഡി ബെക്ക്യ നോഡുറ്റു, ആന മുഡ്യാലെ. 25ഏസ്സ്‌ന പറ്റി ദാവീദ് പാട്ടാന് ഇത്തെ സൊല്ലിര്‌ന്റാന്:
<നാന് ആണ്ടവാന്‌ന എന്നാല്‌ക്ക്‌മ് എന്ന് മുന്നുക്കു കണ്ടിന്തെ.
സാമി എന്നാല്‌ക്ക്‌മ് എന്ന് അര്‌ഗെ ഇര്‌ക്ക്‌ന്റാന്,
നാന് അല്‌ങ്കമാട്ടെ.
26അദ്‌നാലെ എനാക്ക് പിര്യാമ് ആറ്റ്,
നാന് പിര്യപിര്യാത്ത് ആലാത്ത് ക്‌ളാമ്പ്‌നെ.
നാന് മന്‌സാന് ആനാല്‌മ് നെഞ്ചഡെബെത്ത് കാത്ത്‌റ്‌ക്കുവെ.
27എന്ത്‌ക്കെന്റ് സൊന്ന നീ എനാന നരഗ ലോഗാക്ക് ബ്‌ഡമാട്ടായി.
സൊല്ലി ബ്‌ട്ട ഗിലാസാന നമ്പിക്കോഡ ഗേവ
നിന്ന് ഗിലാസഗാറാന്‌ന നീ സാവു മഡെകുളാക്ക് നാറ്യ ബ്‌ഡമാട്ടായി.
28ഉജുരു എത്തെ കെ്ഡേക്കുവു എന്റ് നീ എനാക്ക് കാട്ടി തന്ത്‌റ്‌ന്റായി.
നീ എന്ന് ഒപ്പ ഇന്ത് എനാന എത്ത്‌റാഗോ പിര്യപഡ്‌സ്‌നായി.>#സാമി പാട്ട് ബൊക്കു 16:8–11
29അണ്ണനാമെ തമ്പ്യാമെ, നമ്മ് പേര്‌കേ്ട്ട പാട്ടാന് ദാവീദ് രാജാവുന പറ്റി നാന് ഒന്റു സൊക്കാന സൊല്ലുന്റെ. അയാള് സത്ത് അഡാക്ക ആനാന്, അയാള് സുഡാലെ ഇന്നാല്‌മ് നമ്മ പട്ട്‌ല് ഇര്‌ക്ക്‌ന്റ്. 30ദാവീദ് ഒന്റു സാമിദാസായിന്താന്. അദ്‌നാലെ തന്ന് കാല്‌ല് ഇന്ത് ഒന്റാള്‌ന തനാന പാസെ രാജാവു മാഡുവെ എന്റ് സാമി തനാക്ക് ഒറേപ്പ് കൊഡുത്തു ഇന്താന് എന്റ് ദാവീദ്‌ക്ക് തെരിന്തിന്ത്‌ദ്. 31സാമി ഇന്നി എന്ത് ഗേയ പോന്റാന് എന്റ് ദാവീദ്‌ക്ക് മുന്നുക്കു താനെ തെരിന്തിന്ത്‌ദ്. അദ്‌നാലെ ക്‌റ്‌സ്‌ത്ത് ഉജുര്‌ളാഗുവാദ്‌ന പറ്റി ദാവീദ് ഇത്തെ സൊല്ലിന്താന്:
<അയാള്‌ന നരഗ ലോഗാക്ക് ബ്‌ഡമാട്ടായി,
അയാള് സാവുന മഡെകുളാക്ക് നാറ്യ ബ്‌ഡമാട്ടായി.>
32ഈ ഏസ്സ്‌ന സാമി സാവുലിന്ത് ഉജുര്‌ളാക്ക്‌നാന്. ഏസ്സ് ഉജുരു ഇ്ളാഗ്‌നാദ്‌ന കണ്ട എമാക്ക് അദ്‌ന നിമാക്ക് സൊല്ലി തര്യ മുഡിവു. 33ഏസ്സ്‌ന തന്ന് അപ്പാന് സാമി മേലോഗാക്ക് എ്ഡ്‌ത്ത് പോയി തന്ന് ബല സാരി കുക്കാസ്‌നാന്. സാമി തന്റെ എന്റ് സൊല്ലിന്ത സാമിനിഗാല്‌ന ഏസ്സ് തന്ന് അപ്പാനോഡിന്ത് ബാങ്ക്‌നാന്. അയി നിഗാല്‌ന ഏസ്സ് ഇന്നാല് എമാക്ക് തന്താന്. ആത്തെ നിമ്മ ഇന്നാല് കാണുവാദ്‌മ് കേ്ള്‌ക്കുവാദ്‌മ്. 34ദാവീദ് പാട്ടാന് മേലോഗാക്ക് പോഗാലെ. ആന ദാവീദ് ഇത്തെ സൊല്ലിര്‌ന്റാന്.
<സാമി എന്ന് ആണ്ടവാന്‌ക്ക് സൊന്നാന്:
35നാന് നിന്ന് പോട്ടിഗാറാര്‌ന
നിന്ന് കാല്‌ക്കഡി മാഡ മാട്ട്‌ക്ക്
നീ എന്ന് ബല സാരി ഇന്ത് ആളുഡൊ.>#സാമി പാട്ട് ബൊക്കു 110:1
36ഇസ്‌റവേല്‌ഗാറാരെ, നിമ്മ ഒട്ടുക്കുമു കണ്ടിപ്പായി ഇദ്‌ന തെരിന്ത്‌റ്‌ക്കുഡൊ: നിമ്മ കുരുസുക്കു സേത്തി ആണി അഡിത്ത് കൊന്റ ഈ ഏസ്സ്‌നത്തെ സാമി ആണ്ടവാന്‌മ് ക്‌റ്‌സ്‌ത്ത്‌മ് മാഡി ബെത്ത്‌റ്‌ന്റാന്.!>>
37പത്ത്‌റോസു സൊന്നാദ്‌ന കേ്ള്‌ക്കാട്ടി അദ് ആള്‌ഗാള് മനേസ്സ്‌ക്ക് അഡിപട്ട്‌ദ്. <<അണ്ണനാമെ തമ്പ്യാമെ, ഇത്തെ ആന എമ്മ ഇന്നി എന്ത് ഗേയ>> എന്റ് ആള്‌ഗാള് പത്ത്‌റോസുനാമ് അപ്പോസുത്തലാര്‌നാമ് കേ്ട്ടാര്.
38പത്ത്‌റോസു അവാര്‌ക്ക് ഇത്തെ സൊന്നാന്: <<നിമ്മ ഒന്റൊന്റാള് അവനവാന് ഗേവ പാവാന തള്ളുഡൊ. പ്‌റ നിമ്മ ഏസ്സ് ക്‌റ്‌സ്‌ത്ത്‌ന നമ്പ്‌ന്റവാര് ആനാദ്‌നാലെ നീര്‌ക്ക് മുളുഗുഡൊ. അന്നാപ്പ് നിമ്മ് തപ്പ്‌ക്ക് പൊറിമെ കെ്ഡേക്കു. അദോഡൊപ്പ നിമാക്ക് സാമിനിഗാല്‌മ് ദറ്‌മ്മ ആയി സാമ്യോഡിന്ത് കെ്ഡേക്കു. 39സാമി തന്റെ എന്റ് സൊന്ന ഈ ദറ്‌മ്മ നിമാക്ക്‌മ് നിമ്മ് മക്കാള്‌മറിക്ക്‌മ് കെ്ഡേക്കു. ദൂര ദൂര ഇര്‌ക്ക്‌ന്റവാര്‌നാമ് നമ്മ് സാമി ആണ്ടവാന് തന്ന് പട്ട്‌ക്ക് ബ്‌ളിത്ത് ബരുസ്സുവാന്. അവാര്‌ക്ക്‌മ് ഈ ദറ്‌മ്മ കെ്ഡേക്കുവു.>>
40പത്ത്‌റോസു അവാര്‌ക്ക് എഞ്ചോ നായഗാള്‌ന സൊല്ലി നലമായി പഡ്‌സ്‌നാന്: <<കേ്ഡ്‌ഗെ്ട്ട് നഡാക്കുവ ഈ കാലാത്ത്‌ല ആള്‌ഗാള്‌ക്ക് ബരുവ ദെ്ണ്ടണേലിന്ത് നിമ്മ നിമാന താനെ കാപാറ്റുഡൊ>> എന്റ് പത്ത്‌റോസു അവാര്‌ക്ക് സൊന്നാന്. 41പത്ത്‌റോസു സൊന്ന സേദിന നമ്പ്‌നവാര് ഒട്ടുക്കു നീര്‌ക്ക് മുളുഗുനാര്. അയി നാള് താനെ ഒപ്പതപ്പ മൂണായിര ആള്‌ഗാള് അവാരൊപ്പ എ്ണേന്താര്. 42അപ്പോസുത്തലാര് പഡുസുവാദ്‌ന കേ്ള്‌ക്ക്യാമ്, ഒന്റായി കൂട്ട കൂഡ്യാമ്, അഡേന ആങ്കീങ്ക് പങ്കിപജ്‌ന്ത് തിന്ന്യാമ്, പരേസ്യാമ് അവാര് നാള്‌ക്ക്‌മ് കൂഡി ബന്തിന്താര്.
ഏസ്സ്‌ഗാറാര് പെ്ളേപ്പ്
43അപ്പോസുത്തലാര് എഞ്ചോ അഡ്യാളഗാള്‌മ് അദിസ്യഗാള്‌മ് ഗേന്താര്. അദ്‌ന കണ്ട് ആള്‌ഗാള് അഞ്ചി തള്ള്‌നാര്. 44ഏസ്സ്‌ഗാറാര് ഒട്ടുക്കു ഒന്റേ കെ്ട്ടായി ഇന്ത് അവാര്‌ക്ക് ഇര്‌ക്കുവാദ്‌ന ഒട്ടുക്കു പങ്കിപജ്‌ന്ത് എ്ഡ്‌ത്താര്. 45അവാര്‌ക്ക് ഇന്ത സൊത്തുഗാള്‌നെല്ല ബിറ്റ് അയി പണാന ഒന്റൊന്റാള്‌ക്ക് ഇര്‌ക്കുവ ബുദ്ദിമുട്ടുന നോഡി പങ്കി കൊഡുത്താര്. 46അവാര് നാള്‌ക്ക്‌മ് സാമിബീ്ഡ്‌ക്ക് ബന്ത് ഒന്റായി എജേവാര്. അവാര് തമ്മ ഒന്റൊന്റാള് ബീ്ഡ്‌ക്ക്‌റാഗ പോയി ഒന്റായി തീനി തിന്റിന്താര്, അവാര് ഒന്റൊന്റാള് നല്ല പിര്യത്തോഡത്തെ തിന്ന്യ തീനി കൊഡുത്തിന്താദ്. 47അവാര് സാമിത്തെ ദൊഡ്ഡവാന് എന്റ് ബാര്‌ദിക്കിന്താര്. ആള്‌ഗാള് ഒട്ടുക്കു ഈ ഏസ്സ്‌ഗാറാര്‌ന പിര്യപിര്യാത്ത് മദിസിന്താര്. താന് കാപാറ്റ്‌ന്റവാര്‌നെല്ല ആണ്ടവാന് ഏസ്സ്‌ഗാറാര് കൂട്ടാക്ക് നാള്‌ക്ക്‌മ് സേത്തി കൊണ്ടിന്താന്.
Currently Selected:
അപ്പോസുത്തലാര് 2: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
