അപ്പോസുത്തലാര് 5
5
അനനാസ്‌മ് സവീറാമ്
1അനനാസ് എന്റ് സൊല്ലുവ ഒന്റൊരുത്താന് ഇന്ത്‌റ്‌ന്റാന്. അയാള്‌മ് തന്ന് പെ്ണ്ടച്ചി സവീറാമ് തമാക്കിന്ത ലേസ ബൂമിന ബിറ്റാര്. 2ഈ ബൂമി ബിറ്റ് കെ്ഡേത്ത പണാത്ത്‌ല് ലേസ പണാന അയാള് എ്ഡ്‌ത്ത് തമാക്ക് ബേ്ണ്ടി ബെത്താന്. അദ് അയാള് പെ്ണ്ടച്ചിക്ക്‌മ് തെരിന്തിന്ത്‌ദ്. മിച്ചന എ്ഡ്‌ത്ത് പോയി അപ്പോസുത്തലനാമ്‌ക്ക് കൊഡുത്താന്. 3അദുക്കുള പത്ത്‌റോസു അയാള്‌ക്ക് ഇത്തെ സൊന്നാന്: <<അനനാസെ, നീ സെയിത്താന് സൊല്ലുക്കു ആളായി സാമിനിഗാലോഡ ജൂദുപ്‌ഡിത്ത് ഉറുട്ടു സൊന്നാദ്‌മ് ബൂമി ബിറ്റ് കെ്ഡേത്ത പണാത്ത്‌ലിന്ത് ലേസ എ്ഡ്‌ത്ത് ബെത്താദ്‌മ് എന്ത്‌ക്ക്? 4ബൂമി ബിക്കാത്താദ്‌ക്ക് മുദാല് നിനാത്ത്‌ത്തെ ആയിന്ത്‌ദല്ല? ബിറ്റ പ്‌റാമ് അയി പണ നിന്ന് കയില് താനെത്തെ ഇന്ത്‌ദല്ല? പിന്നെ നീ ഇത്തെ ഗേയ നെനേത്താദ് എന്ത്‌ക്ക്? നീ മന്‌സാന്‌ക്കല്ല സാമിക്ക്‌ത്തെ പൊയി സൊല്ലിര്‌ന്റായി!>>
5ഇദ്‌ന കേ്ട്ടാദ്‌മ് അനനാസ് അദ്‌ക്ക് താനെ ബ്‌ന്ത് സത്താന്. ഇദ്‌ന പറ്റി കേ്ട്ടവാര് ഒട്ടുക്കു അഞ്ചിക്കെപട്ടാര്. 6അദ്‌ലിന്ത ബാലിവെഗാറാര് ബന്ത് സാവുക്കു സീലെ ഇക്കി ബെ്ളിഗെ എ്ഡ്‌ത്ത് പോയി പാത്ത്‌നാര്.
7ഇദ് ഒന്റുമു തെര്യാദെ അനനാസ് പെ്ണ്ട് ഒന്റു മൂറു മണിക്കൂറു കളിന്ത പ്‌റ അദ്‌ക്ക് ബന്താള്. 8പത്ത്‌റോസു അവാള്‌ന: <<ഈ ബെലേക്ക്‌ത്തെ നീയിമ് നിന്ന് ആളാന്‌മ് ബൂമിന ബിറ്റാദ? എനാക്ക് സൊല്ലു>> എന്റ് കേ്ട്ടാന്.
അദുക്കുള അവാള്: <<ഇ്, അയി ബെലേക്ക്‌ത്തെ>> എന്റ് സൊന്നാള്.
9അദുക്കുള പത്ത്‌റോസു: <<സാമിനിഗാല്‌ന സോദണെ ഗേയ നീയിമ് നിന്ന് ആളാന്‌മ് മുഡിവു എ്ഡ്‌ത്താദ് എന്ത്‌ക്ക്? ഈങ്ക് നോഡു നിന്ന് ആളാന്‌ന പാത്ത്‌നവാര് ബാസാക്ക് അര്‌ഗെ ഇന്നാല് എജ്ജിര്‌ന്റാര്, അദേപാസെ അവാര് നിനാന ഗുഡി ബെ്ളിഗെ എ്ഡ്‌ത്ത് പോവാര്!>> എന്റ് സൊന്നാന്. 10അന്നാല് താനെ സവീറാമ് പത്ത്‌റോസു കാല്‌കഡി ബ്‌ന്ത് സത്താള്. അയി ബാലിവെഗാറാര് ഉളാക്ക് ബന്ത് അവാള് സത്തിന്താദ്‌ന കണ്ടാര്, അദ്‌നാലെ അവാര് അവാള്‌നാമ് ബെ്ളിഗെ എ്ഡ്‌ത്ത് പോയി ആളാന്‌ക്ക് അര്‌ഗെ പാത്ത്‌നാര്. 11ഏസ്സ്‌ഗാറാര് കൂട്ടാക്ക് ഒട്ടുക്കുമു, ഈ നഡാന്താദ്‌ന പറ്റി കേ്ട്ട ബേ്റെ ജനഗാള്‌ക്ക് ഒട്ടുക്കുമു സെരിക്ക്‌മ് അഞ്ചിക്കെ പ്‌ഡിത്ത്‌ദ്
അദിസ്യഗാള്‌മ് അഡ്യാളഗാള്‌മ് ഗേന്റാര്
12അപ്പോസുത്തലാര്‌നാലെ ആള്‌ഗാള് പട്ട്‌ല് എഞ്ചോ അദിസ്യഗാള്‌മ് അഡ്യാളഗാള്‌മ് നഡാന്ത്‌ദ്. ഏസ്സ്‌ഗാറാര് ഒട്ടുക്കു ഒന്റേ മനേസ്സോഡ സലോമോനുത്തു എന്നുവ മണ്ടഗാത്ത്‌ല് ഒന്റായി കൂഡിന്താര്. 13ആള്‌ഗാള് അവാര്‌ന പറ്റി നല്ല പെരിമെപട്ടിന്താര്, ആന ഏസ്സ്‌ഗാറാര് അല്ലാത്തവാര് ആര്‌മ് അവാര്‌ക്ക് എ്ണേയ ദയിരപഡാലെ. 14എന്റാല്‌മ് ആണ്ടവാന്‌ന നമ്പ്‌ന ഗണ്ടാള്‌മ് പെ്ണ്ണ്‌മക്കാള്‌മ് ഇര്‌ക്കുവ ഒന്റു കൂട്ട അവാര് കൂട്ടാക്ക് എ്ണേന്ത് കൊണ്ടിന്താര്. 15പത്ത്‌റോസു ബന്ത് പോഗാട്ടി അയാള് നിഗാല് എന്റാല് നോയിഗാറാര്‌ക്ക് തട്ട്യ ബേ്ണ്ടി ആള്‌ഗാള് അവാര്‌ന എ്ഡ്‌ത്ത് ബന്ത് ബട്ടെ ഓരാത്ത്‌ല് പായോഡാമ് ബിരിസ്സിന്ത സീലോഡാമ് കെ്ഡെ ബീ്ക്കിന്താര്. 16എര്‌സലേമ്‌ക്ക് സുറ്റീല് ഇര്‌ക്കുവ പട്ടണഗാള്‌ലിന്ത് ഒന്റു കൂട്ട ആള്‌ഗാള് നോയിഗാറാര്‌നാമ് കെ്ട്ടജാദി തട്ടിര്‌ക്ക്‌ന്റവാര്‌നാമ് എ്ഡ്‌ത്ത് ബന്താര്. അവാരൊട്ടുക്കു തെ്ളിന്താര്.
അപ്പോസുത്തലാര്‌ന കൊഡിമെപഡ്‌സ്‌ന്റാര്
17എഗുദാര് ദൊഡ്ഡ പൂസാരിക്ക്‌മ് അയാള്‌ക്ക് തൊണെ ഇര്‌ക്കുവ സദൂക്ക്യാര് കൂട്ടാക്ക് ഒട്ടുക്കുമു അപ്പോസുത്തലാരോഡ കണ്ണ്‌കഡി ആറ്റ്. അദ്‌നാലെ അപ്പോസുത്തലാര്‌ന എന്താറ്റ ഗേഡൊ എന്റ് അവാര് മുഡിവു എ്ഡ്‌ത്താര്. 18അവാര് അപ്പോസുത്തലാര്‌ന പ്‌ഡിത്ത് ജെയില്‌ക്ക് അഡേത്താര്. 19ആന അയി ജാമാത്ത്‌ല് ഒന്റു ആണ്ടവാന് ദൂദാന് ബന്ത് ജെയില് ബാസന ത്‌റാന്താന്. പ്‌റ അയി ദൂദാന് അപ്പോസുത്തലനാമ്‌ന ബെ്ളിഗെ കഡാത്തി എ്ഡ്‌ത്ത് ബന്ത് അവാര്‌ക്ക്: 20<<നിമ്മ സാമിബീ്ഡ്‌ക്ക് പോയി നിന്റ് ഏസ്സ് തരുവ ഈ പുദ്യ ഉജുരുന പറ്റി ആള്‌ഗാള്‌ക്ക് സൊല്ലുനു>> എന്റ് സൊന്നാന്. 21അദ്‌ന കേ്ട്ട് അപ്പോസുത്തലാര് റാവെതാനെ സാമിബീ്ഡ്‌ക്ക് പോയി പഡിസ്യ പ്‌ഡിത്താര്.
എഗുദാര് ദൊഡ്ഡ പൂസാരിമ് അയാള് തൊണെഗാറാര്‌മ് എ്ണേന്ത് ഇസ്‌റവേല്‌ഗാറാര് മൂപ്പനാമ്‌ഗാളെല്ല ഇര്‌ക്കുവ എഗുദ കോഡിദിന കൂട്ടുനാര്, പ്‌റസാരി അപ്പോസുത്തലാര്‌ന അവാര് പട്ട്‌ക്ക് കൂട്ടി ബര്യ ജെയില്‌ക്ക് ആള്‌ബ്‌ട്ടാര്. 22ആന സാമിബീ്ഡ്‌ല ജോലിഗാറാര് ജെയില്‌ക്ക് പോഗാട്ടി അപ്പോസുത്തലാര്‌ന കാണാലെ. അവാര് തിരിഗി ബന്ത് ഈ കാര്യന എഗുദ കോഡിദിഗാറാര്‌ക്ക്: 23<<ജെയില് അഡേത്ത് പൂട്ടിന്ത്‌ദ്, ബാസാത്ത്‌ല് കാവഗാറാര്‌മ് ഇന്താര്. ആന എമ്മ ബാസ ത്‌റാന്ത് നോഡുഗാട്ടി ആര്‌നാമ് കാണാലെ>> എന്റ് സൊന്നാര്. 24എഗുദാര് പൂസാരി തലെവാര്‌ഗാള്‌മ്, സാമിബീ്ഡ് കാവഗാറാര് തലെവാന്‌മ് ഇദ്‌ന കേ്ള്‌ക്കാട്ടി, അപ്പോസുത്തലാര്‌ക്ക് എന്ത് ആറ്റ് എന്റ് നെനേത്ത് അദിസ്യപട്ടാര്. 25അയി സമ്യ ഒന്റാള് ഉളാക്ക് ബന്ത് അവാര്‌ക്ക്: <<നിമ്മ ജെയില്‌ക്ക് അഡേത്തവാര് അദാഗെ, സാമിബീ്ഡ്‌ല് നിന്റ് ആള്‌ഗാള്‌ന പഡ്‌സ്‌ന്റാര്>> എന്റ് സൊന്നാന്. 26അദുക്കുള കാവഗാറാര് തലെവാന്‌മ് അയാള് സൊല്ലുപഡിക്ക് നഡാക്കുവ കാവഗാറാര്‌മ് പോയി അപ്പോസുത്തലാര്‌ന തിരിക്കി കൂട്ടി ബന്താര്. ജനഗാള് തമാക്ക് കല്ലെ്റിവാര്‌ഗാളൊ എന്റ് അഞ്ചിന്താദ്‌നാലെ അവാര് അപ്പോസുത്തലാര്‌ന ഒന്റുമു ഗേഗാലെ.
27അത്തെ അവാര് അപ്പോസുത്തലാര്‌ന കൂട്ടി ബന്ത് എഗുദ കോഡിദിക്ക് മുന്നുക്കു നില്ല്‌സ്‌നാര്. എഗുദാര് ദൊഡ്ഡ പൂസാരി അവാര്‌ന കേ്ള്‌വി കേ്ട്ട് കൊണ്ടു: 28<<ഏസ്സ് പേര്‌ല് ആള്‌ഗാള്‌ന പഡ്‌സാദേന് എന്റ് എമ്മ നിമാക്ക് കണ്ടിപ്പായി സൊല്ലിന്തേമല്ല? ആന നിമ്മ ഇന്നാല് എന്ത് ഗേന്ത്‌റ്‌ന്റ്‌റ് എന്റ് നോഡുനു. നിമ്മ എര്‌സലേമ് പൂര നിമ്മ് നായന പജാത്തിര്‌ന്റ്‌റ്, അയി മന്‌സാന് സത്താദ്‌ക്ക് എമാനത്തെ കുറ്റഗാറാര് മാഡ്യ നിമ്മ നോഡുന്റുറു!>> എന്റ് സൊന്നാര്.
29പത്ത്‌റോസുമു ബാക്ക്യുള്ള അപ്പോസുത്തലാര്‌മ് ഇത്തെ ബദ്‌ല് സൊന്നാര്, <<മന്‌സാര് സൊല്ലുവാദ്‌ന ബ്‌ഡ സാമി നായനാത്തെ എമ്മ കേ്ള്‌ക്കുഡൊ. 30നിമ്മ കുരുസുക്കു സേത്തി ആണി അഡിത്ത് കൊന്റ ഏസ്സ്‌ന നമ്മ് പാട്ടനാമ് സാമി സാവുലിന്ത് ഉജുര്‌ളാക്ക്‌നാന്. 31തന്ന് ബല സാരി കുക്കാന്ത് തന്നൊപ്പ ആള്യ ഏസ്സ്‌ന സാമി തലെവാന്‌മ് കാപാറ്റ്‌ന്റവാന്‌മ് മാഡി ഉജാത്തിര്‌ന്റാന്. അദ് ഇസ്‌റവേല്‌ഗാറാര് ഗേവ കാര്യഗാള് പാവ എന്റ് തെരിന്ത് അയി പാവഗാള്‌ന തെ്റിന്ത് തളളി സാമിസാരി ബര്യാമ് അവാര് പാവഗാള്‌ക്ക് പൊറിമെ കെ്ഡേക്ക്യാമ്‌ത്തെ. 32ഈ കാര്യഗാള്‌ന കണ്ട എമാക്ക്‌മ് തന്ന് നായ കേ്ള്‌ക്ക്‌ന്റവാര്‌ക്ക് സാമി കൊഡുക്കുവ തന്ന് നിഗാല്‌ക്ക്‌മ് അദ് നേര് എന്റ് സൊല്ല്യ മുഡിമ്.>>
33ഇദ്‌ന കേ്ള്‌ക്കാട്ടി എഗുദ കോഡിദില ആള്‌ഗാള്‌ക്ക് സെര്യാന മൊനെ ബന്ത്‌ദ്. അവാര് അപ്പോസുത്തലാര്‌ന കൊല്ലുഡൊ എന്റ് മുഡിവെ്ഡ്‌ത്താര്. 34ആന എഗുദ കോഡിദിലവാര് കൂട്ടാത്ത്‌ല് ഗമേലിയേല് എന്റ് സൊല്ലുവ ഒന്റു പരിസാന് ഇന്തിന്താന്. അയാള് ഒന്റു എഗുദ ബേദബാത്ത്യാന്‌മ് ആള്‌ഗാള് മദ്‌സ്‌ന്റവാന്‌മ് ആയിന്താന്. അയാള് ഇ്ളാഗി നിന്റ് ഇത്തെ സൊന്നാന്, <<അപ്പോസുത്തലാര്‌ന ലേസ ഗളിഗെ ബെ്ളിഗെ നില്ല്‌സ്‌ന്.>> 35അദ്‌ക്ക് പ്‌റ അയാള് കോഡിദിഗാറാര്‌ക്ക് ഇത്തെ സൊന്നാന്, <<ഇസ്‌റവേല്‌ഗാറാരെ, ഇവാര്‌ന എന്താറ്റ ഗേവദാന സെറ്റെ സൂസാരിത്ത് ഗേഡൊ. 36ലേസ നാള് മുന്നുക്കു ദൂദാസ് എന്നുവ ഒന്റൊരുത്താന് താന് ദൊഡ്ഡവാന് എന്റ് നെനേത്ത് കൊണ്ടു ബന്താനല്ല. ഒപ്പതപ്പ നാനൂറു ആള്‌ഗാള് അയാള് സാരി എ്ണേന്താര്. ആന അയാള്‌ന കൊന്റാര്. അയാളോഡ എ്ണേന്തവാര് ജില്ലമ്പുല്ലാത്തായി ഒന്റുമല്ലദായി തള്ള്‌നാര്. 37അദ്‌ക്ക് പ്‌റ ആള് കണാക്ക് എ്ഡ്‌ക്കുവ കാലാത്ത്‌ല് ജൂദാന് എന്നുവ ഒന്റൊരുത്താന് ഗലീലാല് ഇന്ത് ബന്താന്. അയാള്‌മ് ലേസ ആള്‌ഗാള്‌ന തന്ന് സാരി സേത്തിന്താന്, അയാള്‌നാമ് കൊന്റാര്, അയാളോഡ ഇന്തവാര്‌മ് ജില്ലമ്പുല്ലാത്ത് ആനാര്. 38അദ്‌നാലെ ഈ കാര്യാത്ത്‌ല് നാന് സൊല്ലുവാദ് എന്തെന്റ് സൊന്ന, അവാര്‌ന ഒന്റുമു ഗേഗാദെ ബെ്റ്‌ദെ ബ്‌ഡ്‌ഡൊ. ഇദ് മന്‌സാന് നെനേവുമു ഗിലാസാമ് ആന അദ് കെ്ട്ട് തള്ളുവു. 39ആന ഇവാര്‌ത്ത് നെനേവുമു ഗേവ ഗിലാസാമ് സാമിത്ത് ആയിന്തദാന നിമാക്ക് ഇവാര്‌ന കൊല്ല്യ മുഡ്യാമാട്ട. നിമ്മ സാമ്യോഡ ജൂദുപ്‌ഡിത്ത് മല്ല്‌പ്‌ഡിക്ക്‌ന്റവാര് ആഗ ബേ്ഡ.>>
ഗമേലിയേല് സൊന്നാദ്‌ന എഗുദ കോഡിദിഗാറാര് സെരി എന്റാര്. 40അവാര് അപ്പോസുത്തലാര്‌ന ബരിസ്സി അഡിത്ത്, ഇന്നി മേല് ഏസ്സ് പേര്‌ല് ഒന്റുമു പഡ്‌സാദേന് എന്റ് മെ്റ്‌ട്ട്‌ന പ്‌റ അവാര്‌ന സൊല്ലി ബ്‌ട്ടാര്.
41ഏസ്സ്‌ക്ക് ബേ്ണ്ടി മാനഗെ്ഡ്യ എ്ഡെ കെ്ഡേത്താദ്‌നാലെ അപ്പോസുത്തലാര് പിര്യപിര്യാത്ത് എഗുദ കോഡിദിലിന്ത് പോനാര്. 42അവാര് എന്നാല്‌മ് ഏസ്സ്‌ത്തെ ക്‌റ്‌സ്‌ത്ത് എന്നുവ ഈ നല്ല സേദിന സാമിബീ്ഡ്‌ല്‌മ് ബീ്ഡ് ബീ്ഡാമ് പഡിസികൊണ്ടുമു, സൊല്ലികൊണ്ടുമു നഡാന്തിന്താര്.
Currently Selected:
അപ്പോസുത്തലാര് 5: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
