1 यूहन्ना 3
3
1सोचा त सै कि, पिता परमेश्वर ल हम बट्टी भौत प्रेम कैरी, कि हम पिता परमेश्वर की संतान कहलौंदियां, हकीकत मा हम वेकी सन्तान छैं भि छा। ईं दुनिया का लोग यु नि जणदींनि कि हम पिता परमेश्वर की संतान छा, किलैकि दुनिया का लोग पिता परमेश्वर तैं नि जणदींनि। 2हे प्रियों, अब हम पिता परमेश्वर कि संतान छा, अर अब तक उ प्रगट नि हवे, कि भविष्य मा हम क्य कुछ बंणि जौला! इथग जंणदा, कि जब यीशु मसीह प्रगट होलो त हम भि वे जन होला, किलैकि हम वे तैं उन ही दिखला जन उ छै च। 3अर जु कुई मसीह पर यु आस रखदो, उ अपड़ा आप तैं उन ही पवित्र करदो, जन उ पवित्र च।
पाप अर पिता परमेश्वर की संतान
4जु कुई पाप करदो, उ व्यवस्था कु विरोध करदो; पाप कन व्यवस्था को उल्लंघन कन च अर अधर्म कु दगड़ो कन च। 5अर तुम जंणदा छा, की यीशु मसीह इलै ऐ, कि हमारा पापों की सजा तैं हटै द्यों, अर वेमा कुई पाप नि च।#3:5 यूह. 1:29 6जु कुई वेमा बणयुं रौंदो, उ सदनी पाप नि करदु; जु कुई पाप करदो, वेल न त वे तैं समझी कि मसीह को च, अर न वे तैं जंणदु। 7प्रिय नौंनो कैका भरमांण मा नि अयां; जु धार्मिकता को काम करदो, उ ही यीशु का जन धर्मी च। 8जु कुई सदनी पाप करदो, उ शैतान कि तरपां बट्टी च, किलैकि शैतान पैली ही बट्टी पाप करदी ऐ। पिता परमेश्वर को नौंनो इलै ऐ, कि शैतान का कामों तैं नष्ट कैरी द्यो। 9जु कुई पिता परमेश्वर की संतान च उ सदनी पाप मा बणयूँ नि रौंद; किलैकि अफ भि पिता परमेश्वर को स्वभाव वेमा च; अर उ पाप कैरी ही नि सकदो, किलैकि उ पिता परमेश्वर की संतान च। 10यां बट्टी ही पिता परमेश्वर की संतान, अर शैतान की संतान कु पता चल्दो; उ लोग जु धार्मिकता का काम करदींनि उ पिता परमेश्वर बट्टी छिनी, अर उ जु अपड़ा भैय बट्टी प्रेम करदो, उ भि पिता परमेश्वर बट्टी प्रेम करदो।
आपस मा प्रेम से रवा
11जु समाचार तुम ल पैली बट्टी सूंणि, उ यु च, कि हम एक दुसरा बट्टी प्रेम रखा। 12अर आदम की संतान कैन की तरौं नि बणा, जु वे दुष्ट शैतान बट्टी छो, अर जैल अपड़ा भैय की हत्या कैरी। अर वेल कै कारण से अपड़ा भैय की हत्या कैरी? किलैकि वेका काम बुरा छा, अर वेका भैय का काम धार्मिक छा।#3:12 भज. 38: 20 13हे विश्वासी भयों, जु ईं दुनिया का लोग तुम बट्टी बैर करदींनि त ताजुब नि कैरा। 14हम जणदां छा, कि हम विश्वासी मौत अर शैतान की शक्ति का अधीन नि छा, पर अब हम मा पिता परमेश्वर की तरपां बट्टी अनन्त जीवन च; किलैकि हम भयों बट्टी प्रेम करदां; जु प्रेम नि करदो, उ मौत अर शैतान का अधीन मा च। 15जु कुई अपड़ा विश्वासी भैय बट्टी बैर करदो, उ खूनी च; अर तुम जंणदा छा, कि कै भि खूनी मा अनन्त जीवन नि रौंदो। 16हम ल प्रेम यां बट्टी जांणि, कि यीशु मसीह ल हम कु अपड़ो प्राण द्ये दींनि; इलै हम तैं भि विश्वासी भयों का खातिर अपड़ा प्राण दींण चयणु च। 17जु कै मा दुनिया कि सम्पत्ति हो अर उ अपड़ा विश्वासी भैय तैं विपत्ति मा देखि के वे पर तरस नि खौ, त उ नि बोलि सकद की मि मा पिता परमेश्वर को प्रेम च।#3:17 व्य. 15:7,8 18हे मेरा प्रिय नौंनो, हम सचै का द्वारा दूसरों की मदद कैरी के दूसरों तैं अपड़ो प्रेम दिखै सकदां पर न की जीभ ल बोलि के।
पिता परमेश्वर का संमणी हिम्मत
19जब हम दूसरों बट्टी प्रेम करद्यां, कि हम सचै का छा; अर जब भि हमारो मन हम तैं भंगारी ठैरांद तब हम अपड़ा मन तैं चैन दींणै की कोशिश करद्यां। 20किलैकि पिता परमेश्वर हमारा मन बट्टी बड़ो च; अर उ सब कुछ जंणदु च। 21हे प्रियों, जु हमारो मन हम तैं भंगार नि द्यो, त हम तैं परमेश्वर का संमणी साहस हो। 22अर जु कुछ हम पिता परमेश्वर बट्टी मंगदा छा, उ हम तैं पिता परमेश्वर बट्टी मिल्दो; किलैकि हम वेकी आज्ञाओं तैं मणदां, अर जु वे तैं अच्छो लगदो हम उ ही करद्यां। 23अर वेकी आज्ञा या च कि हम वेका नौंना यीशु मसीह का नौं पर विश्वास कैरा अर जन वेल हम तैं आज्ञा दींनि वेका अनुसार आपस मा प्रेम रखा। 24अर जु पिता परमेश्वर की आज्ञाओं तैं मणदो, उ पिता परमेश्वर मा अर परमेश्वर वेमा रौंदो; अर यां बट्टी ही पवित्र आत्मा ल जु वेल हम तैं दियुं च, हम जंणदा छा, कि पिता परमेश्वर हम मा रौंदो।
Currently Selected:
1 यूहन्ना 3: GHMNT
Highlight
Share
Copy
Want to have your highlights saved across all your devices? Sign up or sign in
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
