1 यूहन्ना 2
2
यीशु हमारो मददगार
1मेरा प्रिय नौंनो, मि यूहन्ना यूं बातों तैं तुम कु इलै लिखणु छौं, कि तुम पाप नि कैरा; पर जु कुई पाप कैरो त पिता परमेश्वर मा हमारो एक मददगार यीशु मसीह च, जु धर्मी च अर हमारा पापों कि माफी कु पिता परमेश्वर बट्टी प्रार्थना करदो। 2अर भस हमारा ही न बल्कि सैरी दुनिया का पापों तैं दूर कनु कु, मसीह एक प्रायश्चित बलिदान बण गै।
पिता परमेश्वर कि आज्ञा
3जु हम पिता परमेश्वर की आज्ञाओं तैं मांणा, त वे बट्टी हम तैं पता लगलो कि हम वे तैं जंणदां छा। 4जु कुई यु बुल्दो, “मि पिता परमेश्वर तैं जांणि ग्यूं” पर वेकी आज्ञाओं तैं नि मणदो, त उ झूठो च; किलैकि उ पिता परमेश्वर का सचै का अनुसार नि ज्यून्दो। 5पर जु कुई पिता परमेश्वर की आज्ञाओं को पालन करदो, वेमा सच मा पिता परमेश्वर को प्रेम पूरो हुयुं च, यु बट्टी ही हम तैं मालुम हून्दो, कि पिता परमेश्वर का दगड़ी हमारो सम्बन्ध च। 6जु कुई यु बुल्दो, कि पिता परमेश्वर का दगड़ी हमारो सम्बन्ध च, उ खुद भि वे बट्टा पर चल्दो जै पर यीशु चल्दु छो।
सभियूं बट्टी प्रेम कैरा
7हे प्रिय विश्वासी भयों, मि तुम कु कुई नई आज्ञा नि लिखणु छौं, पर वीं पुरणी आज्ञा ज्वा तुम तैं शुरुवात बट्टी ही मिलीं छै; जु वचन तुम ल सूंणि, जब तुम ल प्रभु यीशु मसीह पर विश्वास कैरी। 8फिर भि जु आज्ञा मि तुम कु लिखणु छौं व नई आज्ञा च किलैकि; जन यीशु ल ईं आज्ञा की सचै तैं जी, अर तुम भि यु तैं जींणा छा किलैकि अंधेरो मिटदी जांणु च अर सचो उज्यला अभि चमकण लगि गै। 9जु कुई इन बुल्दो, कि मि उज्यला मा जींणु छो, पर अपड़ा विश्वासी भैय बट्टी बैर रखदो, उ अभि तक भि अंधेरा मि ही जींणु च। 10जु कुई अपड़ा विश्वासी भैय बट्टी प्रेम करदो, उ उज्यला मा रौन्दु, अर इलै वेमा इन कुछ भि नि च, जु कै और कु पाप को कारण बणो। 11पर जु कुई अपड़ा विश्वासी भैय बट्टी बैर रखदो, उ अन्धेरा मा जींणु च अर अन्धेरा मा चल्दो; अर नि जंणदु, कि कख जांणु च, किलैकि अन्धेरा ल वेका आंखा अंधा कैरेनी।
चिठ्ठी लिखणु कु कारण
12हे नौंनो, मि तुम कु इलै लिखणु छौं, कि यीशु मसीह का नौं बट्टी तुमारा पाप माफ हवेनि। 13हे पुरणों, मि तुम कु इलै लिखणु छौं, की यीशु मसीह पैली बट्टी च, तुम वे तैं जंणदा छा, हे जवानों, तुम कु इलै लिखणु छौं, कि तुम ल वे दुष्ट शैतान पर जै पै; हे नौंनो, मि तुम कु इलै लिखणु छौं, कि तुम पिता परमेश्वर तैं जांणि ग्यां। 14हे पुरणों, मिल तुम कु इलै लिखणु छौं, कि यीशु मसीह जु पैली बट्टी च, तुम वे तैं जांणि ग्यां। हे जवानों, मिल तुम कु इलै लिखणु छौं, किलैकि तुम ताकतवर छयां, अर पिता परमेश्वर को वचन तुम मा बण्युं रौन्दु, अर तुम ल वे दुष्ट शैतान पर जै पै।
दुनिया का बारा मा चितांण
15तुम न त दुनिया बट्टी अर न दुनिया की चिज्युं बट्टी प्रेम रखा, जु कुई दुनिया बट्टी प्रेम रखदो, त वेमा पिता परमेश्वर को प्रेम नि च। 16किलैकि जु कुछ भि दुनिया मा च, मतलब देह की वासना, अर आंखों की अभिलाषा, अर रुप्यों कु घमण्ड, उ पिता परमेश्वर की तरपां बट्टी नि च, पर दुनिया की ही तरपां बट्टी च। 17दुनिया अर वेकी सभि अभिलाषा, मिटै जंदींनि, पर जु पिता परमेश्वर की इच्छा का अनुसार चल्दो, उ सदनी बणयुं रालो।
आखरी बगत कु धोखा
18हे नौंनो, मसीह कु वापिस औंणु कु बगत नजदीक च, अर जन तुमारो सुणयूं च, कि मसीह को बैरी औंण वलो च, वेका हिसाब बट्टी अभि भि भौत सा मसीह का बैरी पैली बट्टी ही ऐ गैनी; ज्यां बट्टी हम जंणदा छा, यु आखरी बगत च। 19उ लोग जु अब मसीह को विरोध करदींनि, उ निकली त हम ही बट्टी छिनी, पर हमारा दगड़िया नि छिनी, किलैकि जु उ हमारा दगड़िया हुंदा, त हम दगड़ी रौंदा, पर ऊंल हम तैं छोड़ दींनि किलैकि उ हमारा झुंड का हिस्सा नि छा। 20पर तुम तैं त मसीह का द्वारा पवित्र आत्मा दियुं च, अर तुम सब सच जंणदा छयां। 21मिल तुम कु इलै नि लिखीं, कि तुम सचै तैं नि जणद्यां, पर इलै, कि तुम मसीह तैं जणद्यां छा, अर इलै कि कुई झूठ, सचै की तरपां बट्टी नि च। 22झूठो को च? उ जु यीशु तैं मसीह हूंणु बट्टी इन्कार करदो, अर मसीह कु बैरी ऊई च, जु पिता परमेश्वर को अर नौंना प्रभु यीशु कु इन्कार करद। 23जु कुई नौंना प्रभु यीशु मसीह कु इन्कार करदो च वेमा पिता परमेश्वर भि नि च, जु नौंना प्रभु यीशु मसीह तैं मणदो च, वेमा पिता परमेश्वर भि च। 24उ सच्चो संदेश जु तुम ल पैली बट्टी सूंणि छो, जब तुम ल मसीह पर विश्वास कैरी छो ऊई तुम मा बणयुं रौ, जु उ तुम मा बणयुं च, त तुम भि नौंना प्रभु यीशु मसीह मा, अर पिता परमेश्वर मा बंणया रैल्या।
अनन्त जीवन की प्रतिज्ञा
25अर ज्यांको पिता परमेश्वर ल हम बट्टी वादा करयुं च की उ हम तैं अनन्त जीवन दयालो। 26मि तुम तैं ऊं लुखुं का बारा मा चितांणु छो, जु झूठी शिक्षा का द्वारा तुम तैं धोखा दींणै की कोशिश कना छिनी। 27अर तुम कु, उ पवित्र आत्मा, जै तैं तुम ल मसीह बट्टी पयुं च, अर तुमारा भितर रांदो, अर इलै कै तैं भि तुम तैं सचै का बारा मा सिखौंण की जरुरत नि च, उ तुम तैं ऊं सभि बातों का बारा मा सैरी सचै तैं जनण मा मदद करदो किलैकि वेको अभिषेक तुम तैं उ सब कुछ सिखांदु ज्यां कि तुम तैं जरूरत च। जु भि पवित्र आत्मा तुम तैं सिखांदु च उ सच च अर झूठ नि अर इलै मसीह का दगड़ा मा एकता मा बणयां रावा जन कि पवित्र आत्मा ल तुम तैं कनु कु बुल्युं च।
पिता परमेश्वर की संतान
28इलै हे नौंनो, मसीह का दगड़ी एकता मा हमेशा बणयां रावा, कि जब उ फिर से प्रगट होलो, त हम तैं हिम्मत हो, अर हम वेका आंण पर वेका संमणी लज्जित नि हो। 29किलैकि तुम जंणदा छा, कि मसीह धर्मी च, त यु भि जांणि ल्या, कि जु कुई धार्मिकता को काम करदो, उ पिता परमेश्वर कि सन्तान च अर वे बट्टी पैदा हुयुं च।
Currently Selected:
1 यूहन्ना 2: GHMNT
Highlight
Share
Copy
Want to have your highlights saved across all your devices? Sign up or sign in
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
