marqus 13
13
maylli ra‑ijru i‑tgmmi n‑rbbi
1lliġ‑d‑iffuġ yasuɛ zġ‑tgmmi n‑rbbi, yini‑as yan zġ‑imḥḍarn‑ns: «ẓr ay‑amslmd, matta ġmkad mqqurn iẓran‑ad. matta ġmkad dusn fulkin iġurban‑ad.» 2imma yasuɛ inna‑yas: «is‑a‑ttmnadt ġ‑iġurban‑ad mqqurnin? rad‑kullu‑tyawgarn s‑wakal. ur‑ra‑gisn‑iqama‑uẓru f‑uẓru.»
maylli‑s‑ra‑tggʷru i‑ddunit‑ad
3lliġ iskiws yasuɛ ġ‑uwrir n‑zzitun ġ‑umnid n‑tgmmi n‑rbbi, isqsa‑t bṭrus d‑yaɛqub d‑yuḥanna d‑andraws ntni waḥdutn, 4inin‑as: «managu a‑ra‑yili ġayd‑s‑tnnit? ma‑ra‑ig tamatart n‑is‑d‑yakmur a‑ijru kullu ġayad?» 5isawl yasuɛ yini‑asn: «awiyat‑stt ġ‑ih̬f‑nnun a‑kʷn‑ur‑ijlu yan. 6ašku ggutn ġwilli ra‑d‑yašk asin‑d ism‑inu, kud yan ar‑ittini izd nttan a‑igan lmasiḥ. ntni rad‑jllun mddn ggutnin. 7iġ‑tsfldm f‑imaġn ula lh̬barat n‑imaġn ad‑ur‑tġuwḍm, ašku iqqan‑d a‑yili ġayan, walaynni ur‑ta‑d‑iruḥ isiggʷra. 8ra‑di‑tnkr‑tqbilt s‑tqbilt tnkr‑d‑tgldit s‑tgldit, ilint zznzalat ġ‑kra n‑tmizar yili‑uġni. walaynni ġayad iga ġir azbbar amzwaru n‑tlalit.
tugga f‑lmasiḥ ġ‑lgddam n‑mddn
9«awiyat‑stt ġ‑ih̬f‑nnun. ra‑kʷn‑dḥayn s‑lmḥkamat, ssġuršn‑kʷn ġ‑tgʷmma n‑tẓallit. ra‑tbddadm f‑ssibt‑inu ġ‑lgddam l‑lḥukkam d‑igldan ad‑asn‑takkam tugga flla. 10iqqan‑d a‑truḥ‑tbrraḥt l‑lh̬bar ifulkin kullu timizar n‑ddunit ur‑ta‑d‑ilkim isiggʷra. 11iġ‑kʷn‑umẓn dḥin‑kʷn‑in, ad‑ur‑tasim taġuft f‑ma‑ra‑tinim. iniyat awal nna‑yawn‑imla rbbi ġ‑tasaɛt‑an, ašku urd kunni a‑isawaln walaynni rruḥ lqudus n‑rbbi. 12ra‑yili ma‑ra‑n‑idḥi gʷmas i‑lmut, yili ma‑ra‑n‑idḥi yus, nkrn‑d tarwa f‑ayt‑darsn nġn‑tn. 13ra‑kʷn‑tkrhun kullu mddn f‑ssibt n‑ma‑tgam winu. imma wanna ibiddn izga ar isiggʷra ra‑injm.
rad‑ilin‑uwssan šqanin
14«ra‑tẓrm tajlh̬it lli‑ifnnun tnkr ġ‑illiġ ur‑dars lḥqq a‑gis‑tili. wanna yaqran, illa fllas a‑yissan lmɛna. ġakudan winna llanin ġ‑tmazirt n‑yudaya iqqan‑tn‑d ad‑rwln s‑idrarn. 15wanna illan f‑iggi n‑tgmmi iqqan‑t‑id ad‑ur‑ikšm a‑d‑yasi kra. 16wanna‑n‑illan ġ‑igran iqqan‑t‑id a‑ur‑iwrri tiġurdin a‑d‑yawi timlsit‑ns. 17rad‑bahra‑šqun‑uwssan‑an f‑tilli gisn rbbunin ula tilli gisn ssngaynin. 18ḍalbat i‑rbbi ad‑ur‑ijru ġayan ġ‑tgrst 19ašku ġ‑uwssan‑an ra‑tili‑tnukmut, ur‑jju‑tlli zund nttat zġ‑isizwar ġ‑ih̬lq rbbi ddunit sul s‑ġilad, ula rad‑daġ‑tili zund nttat. 20mrad is‑ur‑issidrus siditun ussan‑an ur‑ra‑injm yan. walaynni f‑ssibt n‑willi iẓli ad‑gn wins, hati issidrus ussan‑an f‑ssibt‑nsn.
21«ġakudan iġ‑awn‑inna kra n‑yan ‹ha‑lmasiḥ illa ġid› nġd ‹hatin illa ġin› a‑t‑ur‑tamnm. 22ašku rad‑d‑nkrn kra n‑mddn, kud yan ar‑ittini f‑ih̬f‑ns izd lmasiḥ a‑iga nġd kra n‑nnabi, walaynni ar‑sskirkisn. rad‑skarn timitar d‑lmɛjizat iġ‑ufan ad‑jllun ula ġwilli ganin win rbbi. 23imma kunni, awiyat‑stt ġ‑ih̬f‑nnun. nniġ‑awn kullu ġayad ur‑ta‑ijri.
ġmkad a‑ra‑d‑iwrri lmasiḥ
24«ġ‑uwssan‑an ġ‑tġurdin n‑tnukmut‑an, ra‑tllas tafukt, ur‑ra‑ifaw‑wayyur. 25rad‑ṭṭarn itran zġ‑ignwan, ar‑tyattaynt tifawin n‑ignwan. 26ġakudan a‑ra‑yyi‑ẓrn, nkki lli‑igan yus n‑bnadm, ftiġ‑d ġ‑imdla s‑lquwwa d‑lmjd iggutn. 27ġakudan rad‑aznġ lmalayka ad‑ssmunn ġwilli ganin winu zġ‑kraygatt tasga, zġ‑ttmi n‑wakal ar ttmi n‑ignwan.
managu a‑ra‑yili mayad?
28«hati tazart a‑zġ‑ra‑tissanm lmɛna. iġ‑lggʷiġnt‑tṣṭṭwin‑ns tssufġ‑d tifrawin‑ns, tissanm is‑d‑yakmur ṣṣif. 29ġmkan a‑ra‑yili. iġ‑tẓram timitar‑ad s‑awn‑nniġ ar‑jrrunt, tissanm is‑d‑yakmur, hatin ġ‑imi. 30lḥqq a‑rad‑awn‑iniġ, ur‑ra‑tzri‑tasut‑ad ard kullu ijru mayad. 31rad‑ittin ignwan d‑wakal walaynni ur‑sar‑ittin iwaliwn‑inu.
ḍufat ar‑ttẓallam
32«walaynni ass‑an ula tasaɛt‑an ur‑tn‑issin yan, la lmalayka n‑ignna ula yus n‑bnadm. ġir baba lli‑illan ġ‑ignna, nttan waḥdut a‑issnn. 33rarat lɛaql‑nnun tḍufm ašku ur‑tssinm managu a‑ra‑d‑iruḥ‑uzmz‑an. 34zund yan‑urgaz imudda ifl tigmmi i‑ih̬ddamn‑ns a‑stt‑gabln, ifk i‑kraygatt yan tawuri‑ns. yuṣṣa angabal n‑imi a‑iḍuf. 35ḍufat ula kunni, ašku ur‑tssinm managu a‑ra‑d‑yašk bu‑tgmmi, izd ġ‑tdggʷat nġd ammas n‑iyḍ nġd awddan amzwaru n‑ufullus nġd tawaġla n‑tafukt. 36ḍufat a‑ur‑d‑yašk ġ‑kra n‑tasaɛt lli‑ur‑tġalm yaf‑kʷn‑d tgnm. 37mayd‑awn‑nniġ, ra‑t‑iniġ i‑kullu mddn: ḍufat.»
Currently Selected:
marqus 13: SHILNT10
Highlight
Share
Copy
Want to have your highlights saved across all your devices? Sign up or sign in
New Testament in Tashelhayt (Latin script) © United Bible Societies, 1998, 2010.
Robert Bernard Dann.
