Yowaho 21
21
1Makobote Tiberiyadi wara webote widi‑ya Yeso‑ya oda da‑daba Yeso oda awamatasamaro tamine okaminaboneni.
2Simaho Bedoro toha, Tome Didimo toha, Natanaeo toha, Yeso‑ya oda da‑daba oda one fama, okoyo oda fama, oda na, oda yorotokanamaroni. (Natanaeo tabaro Kana Karireya‑ka amani.)
3“Faha koro·omatiya.” Simaho Bedoro ati ne,
“Ai dabahi.” Oda ati namaroni.
Kanawa‑ya oda foya, yama soki‑ya tahafa oda werenaba, oda honita tohamaroni.
4Yama wahabisari‑ya faha widi‑ya Yeso wai, oda awa,
“Bare amane.” Oda atibodi ati namaroni.
5 # 21:5 Mai hawa toha, madehe mai toharani. Ai‑ka madehe ai nofi nafi‑nima Yeso mai‑ya nofi nafi. “Madehe” Yeso ati ne, mai‑ya nofi nafi tamine amane. Oda‑ya haane,
“Madehe, fai aba mai‑ya?” Yeso ati ne,
“Aba mai awirani.” Oda ati namaroni.
6“Dai ka‑kanika‑ya tahafa dai wereniya, aba mai dai waseboneni.” Yeso ati ne,
ati‑nima oda na, aba mai dama mai ihi tahafa kanaha, oda kakidiramaroni.
7Simaho Bedoro yama‑ya anine, bora neme‑ya weyeremarine. Yeso‑ka no‑nofa ama·oni. I‑di Bedoro ohiyara,
“Ai‑ka Ayo amane.” Ona,
owati‑ya mite, bora neme‑ya weyename, faha‑ya bokemarine, Yeso‑ya tokebonaha.
8Faha widi yakari, metoro 90 toha‑ya oda tohamaroni. Kanawa oda orinibisa, tahafa‑ya aba mai oda horokanamaroni. Yeso wai‑kaya oda towakamaroni.
9Faha widi‑ya oda kobokaniya, yifo toha, aba mai tabasini toha, baho toha na, yama nafi hawa toha oda awamaroni.
10“Aba mai dai nawase mai one dai kakamakihi.” Yeso ati nemarine.
11Kanawa‑ya Simaho Bedoro tokomatase, tahafa kiba oda horoni marosamaroni. Aba webote 153 mai toha, tahafa‑ya mai foya, mai kanaha, tahafa abara, sibitoni awira ihi, “Ka!” Owatibodi ati namaroni.
12“Ai tafahi.” Yeso ati ne,
Yeso oda nayofina,
“Ebeni‑ke amatiniti?” Oda ati ramaroni.
Oda‑ka Ayo oda wato hawa tohemarine.
13Baho‑ya oda‑ya Yeso daane, aba mai‑ya oda‑ya daanamakimarine.
14Yeso kitami hawa tohe, oda awi 3 tohemarine.
Bedoro‑ya Yeso hiyare
15 # 21:15 Yeso‑ka kaneiro bidi i‑di Yeso ati‑ya mai nofa mai tamine amani. Fara mai‑ya Bedoro kanawatobonaha. Oda tafi hawa toha, Simaho Bedoro‑ya hiyare,
“Simaho, Yoaho bidi amatini. Owa tinofi nafero, mai one owa‑ya nofi bi‑bidi na awineni?” Yeso ati nemarine.
“Ayo, tiwa onofa, owa tiwatoneni.” Bedoro ati nemarine.
“Oka kaneiro bidi mai tinatafahi.” Yeso ati nemarine.
16“Simaho, Yoaho bidi amatini. Owa tinofi nafineni?” Yeso ati namatasemarine.
“Ayo, tiwa onofa, tiwatoneni.” Bedoro ati namatasemarine.
“Oka kaneiro mai tikasomahi.” Yeso ati nemarine.
17Bedoro‑ya hiyaramatase,
“Simaho, Yoaho bidi amatini. Owa tinofiraniha?” Ati namatasemarine.
Yeso ati yanani 3 tohe ene Bedoro ati yawe,
“Ayo, yama nafi tiwatoneni. Tiwa onofa, owa tiwatoneni.” Ati nemarine.
“Oka kaneiro mai tinatafahi.
18Owati amosabote dai mitahi. Yetene tihiya, tika bora sakotina, tiwati toki‑kaya tikameteni. Makobote bote tihiya, tiwa yehe daatowitikimabone, bora‑ya tiwa‑ya mai sakonihebone, tiwati toki nofariya tiwa‑ya mai towakamaboneni.” Yeso ati nemarine.
19Bedoro‑ya mai nanahababone mai tamine‑ya Yeso kaminemarine. Bedoro abe ene Deoso‑ya mai kahiyarabone ati ne, ati amane.
“Bedoro owa‑ya tisawihi.” Yeso ati nemarine.
20Mai fama mai towaka, okomake, i‑di Bedoro kiinawame, owa‑ya awemarine. Yeso‑ka no‑nofa ama·oni. Hibati‑ya oda tafi‑ya Yeso bako‑kaya oforiwite, Yeso ohiyara,
“Ayo, ebeni‑ke tiwa‑ya daanabati?” Onamaroni.
21Bedoro owa‑ya awe, Yeso‑ya hiyare,
“Ayo, hini yamata‑nima neba ababonati, hari?” Bedoro ati nemarine.
22“Oka owa tamine‑ya tiwatibodi kadikariyahi. Okomatasiya, owati ihi oka owa abi awisareya, tiyawariyahi. Owa‑ya tisawiyahi.” Yeso ati nemarine.
23Yeso ati tamine‑ya oda one mita,
“Abaterebonane.” Mai ati na,
O·abarabone, Yeso ati ni awire,
“Oka owa tamine‑ya tiwatibodi kadikariyahi. Okomatasiya, owati ihi oka owa abi awisareya, tiyawariyahi.” Yeso ati nibisemarine.
Yowaho‑ka yama hani
24Yeso‑ya oda da‑daba owa ama·oni. Yeso tamine ohiyare, tamine okanahano, owati oda wato, ati yokana tohene.
25Yeso ene damemari, ene dami oda kanahano‑mana, yama hani dama neni. Feye amani.
Currently Selected:
Yowaho 21: jaaNT
Highlight
Share
Copy
Want to have your highlights saved across all your devices? Sign up or sign in
