Yowaho 20
20
Yeso kitame
1Domiko yama wahi awisari‑ya Mariya Madarena bosana, yati hodi‑ya toka, yati hodi barikara‑ya awameteni.
2Yeso‑ka no‑nofa ama·oni. Simaho Bedoro oda fama, oda‑ya Mariya kanani kama, oda‑ya haana,
“Ai noko beheri‑ya ai‑ka Ayo abo‑ya mai towakamanini.” Mariya Madarena ati namaroni.
3Yati hodi‑ya oda towakamamaroni, oda famaro.
4Oda kanani towakama, owa kanani kitabisa, owa koboni dai tohamaroni.
5Moi·owite, bora wefe wamani oawa, okiyomaramaroni.
6Simaho Bedoro yoto, kobonamaki, yati hodi‑ya tokiyome, bora wefe wamani fore‑ya awe,
7bora one Yeso tati‑ya mai kinihikana‑ya awa nemarine. Yeso tati‑ya bora mai kinihikana, modokani amosa, ahiyata‑ya foremaroni.
8Okiyamake, bora honita owa, Yeso kitame owatomarine.
9Yeso kitamebona tamine Deoso‑ka yama hani‑ya sawi, tamine yokana oda watosa rene.
10I‑di Bedoro oda fama, oda tabaro‑ya oda winitokanamamaroni.
11Yati hodi yowi‑ya Mariya waa, ohina, moinisa, yati hodi‑ya kiina,
12Deoso‑ka yo‑yose mai fama bora sawa‑ya mai weyenikima mai‑ya Mariya awameteni. Yeso abo hibati‑ya fori‑kaya mai demenare, Yeso teme kafori‑kaya owa itari, Yeso tati fori‑kaya owa itari nematane.
13I‑di Mariya‑ya mai haana,
“Sima, hini yamata ihi ohitina?” Deoso‑ka yo‑yose mai ati na,
“Owa noko beheri‑kaya Okoyo abo‑ya mai towakamanini.” Mariya ati nameteni.
14Mariya kiinawama, Yeso kitame‑ya awa,
“Bare amane.” Atibodi ati namaroni.
15“Sima, hini yamata ihi ohitina? Ebeni‑ke sibatiniti?” Yeso ati ne,
“Fadara‑ya na‑namosa amane.” Mariya atibodi ati na,
“Ayo, Okoyo tiwakameya, owa‑ya yofitikanahi, owakamebonane.” Mariya ati nameteni.
16“Mariya.” Yeso ati ne,
ati ene Mariya kiinimisa, Yeso‑ya watowaha,
“Haboni.” Mariya ati nameteni.
Dai ati‑ya,
“Oda‑ya ka‑kanawato amatini.” Ai ati teni.
17“Hibareya owa damatiriyahi. Okobi‑ya okomi awisa orani. Oka soho mai‑ya tikamiya, mai tihiyarahi.
‘Ai‑ka Abi‑ya okomabone, ai‑ka Deoso‑ya okomaboneni. Ati nene.’ Tiyahi.” Yeso ati nematane.
18Yeso‑ya oda da‑daba oda‑ya Mariya Madarena kama,
“Ai‑ka Ayo oawani!” Mariya ati na, makobote Yeso ati‑ya kaminamaroni.
19Oda‑ka hidi mai oda nayofina, Domiko yama soki‑ya yobe doro‑ya Yeso‑ya oda da‑daba oda yorotokana, nokobi oda barikana, Yeso oda teberi‑ya fodoki,
“‘Deoso, dai‑ya kasomayaho.’ Oneni.” Ati nemarine.
20Hiyari hawa tohe, yehe‑ya yofikana, fowari bodi‑ya yofikana nemarine. Oda‑ka Ayo oda awa, oda ya‑yaini nafemaroni.
21“‘Deoso dai‑ya kasomayaho.’ Oneni.
Okobi owa‑ya yosemari‑nima dai‑ya oyosewahineni.” Yeso ati nemarine.
22Makobote oda‑ya foowane,
“Deoso‑ka Doni dai‑ya foyawahebonane.
23Mai amosara mai‑ya dai ati somawamariya, Deoso mai‑ya ati somawamaharirebonane. Mai‑ya dai ati somawamiya, Deoso mai‑ya ati somawamaharibonane.” Yeso ati nemarine.
Tome Yeso‑ya awe
24Oda 12 toha oda‑ka owa i‑di Tome tohe, Yeso kobonameya, oda‑ya sawiremarine. I‑di Tome oni owa, i‑di Didimo tohemarine.
25“Tome, ai‑ka Ayo oda awani.” Oda ati na,
“Yeso yehe‑ka birako ihi oawiya, owa yehe yori·onisa, fowari bodi‑ka ihi oawiya, owa yehe yori·onisa oniya, dai ati onofaboneni.” Tome ati nemarine.
26Mahi 8 kane‑ya i‑di Tome oda‑ya sawi, oda yorotokanamatasa, nokobi oda barikana, Yeso oda teberi‑ya fodomakitase,
“‘Deoso dai‑ya kasomayaho.’ Oneni.” Yeso ati nemarine.
27Tome‑ya Yeso hiyare,
“Owa yehe hodone‑ya tiwa yehe yoritinisa, owa fowari bodi‑ya tiwa yehe yoritinisa tinahi. Okitamaramone tiwatibodi ati namariyahi. Okitama, owa tamine tinofahi.” Yeso ati nemarine.
28“Oka Ayo amatini. Oka Deoso amatini.” I‑di Tome ati nemarine.
29“Okitama, owa abano tiawa, owa tamine tinofawahineni. Owa kitami‑ya mai awara, hiniya owa tamine‑ya mai nofa, mai‑ya Deoso kasomebonane.” Yeso ati nemarine.
Yeso ene kitabote dame
30Yeso ene kitabote damemari, Yeso‑ya oda da‑daba ene oda awe, ene nafi okanahano awirene.
31Yeso ene kote okanahano, Yeso tamine dai nofebonaha. Yeso i‑di Kirisito amane. Deoso Bidi amane. Tamine dai nofeya, Yeso ene dai abaraboneni.
Currently Selected:
Yowaho 20: jaaNT
Highlight
Share
Copy
Want to have your highlights saved across all your devices? Sign up or sign in
