Yowaho 19
19
1Birato ati ene Yeso‑ya sodado mai kosini kitameteni.
2Makobote hidi‑ka sabewa‑nima na‑ya sodado mai kemona mado atona‑ya, Yeso tati‑ya mai nawitare, hidi‑ka bora a‑asabina‑ya Yeso‑ya mai weyenihi nameteni.
3Yeso‑ya mai yasina,
“Yodeo mai‑ka hidi webote amatini.” Mai ati na,
mai ati dama, Yeso‑ya mai batanameteni.
4Yodeo mai‑ya Birato hiyarebona mai‑ya tokomatase,
“Owati ihi Yeso‑ya mai kakamaboneni. Yeso ene towe tohi awirene, Yeso dai aweya, owati dai nofaba awineni.” Birato ati nemarine.
5Yeso‑ya mai kakama, Yeso tati‑ya yama atona wamani itare, bora a‑asabina‑ya weye nemarine.
“Dai awaho.” Birato ati nemarine.
6Yeso‑ya mai awa, Deoso‑ka yama‑bone‑ya mai da‑daa mai‑ka hidi mai toha, mai‑ka sekorasa mai toha, mai na, mai ati kita,
“Awa‑ya baakanaho. Awa‑ya baakanaho.” Mai ati namaroni.
“Dai towakamabisaho. Awa‑ya dai baakanaho. Yeso ene towe tohi awirane.” Birato ati nemarine.
7“Mose‑ka yama hani ati oda tokadabateni. Deoso Bidi‑mona ati ne, keyehe‑ya hirine, fare Mose‑ka yama hani ati‑nima Yeso oda nanahababoneni.” Mai ati namaroni.
8Deoso Bidi‑mona tamine‑ya Birato mite, habo siitone,
9hika yobe‑ya tokiyame, Yeso‑ya hiyare,
“Ebeni‑ya tiwa tabaro toha titi?” Ati ne,
Yeso ati yanarematane.
10“Hini yamata ihi tiwati yanarihi? Okitateni. Tiwa owati seekaniya, tiwa‑ya mai seekana, tiwa owati baakaniya, tiwa‑ya mai baakana naboneni.” Birato ati nemarine.
11“Deoso ati ene tohare‑mana, tiwati kitara neni. Tiwa ene towe bi‑bidi neni. Tiwa‑ya owa‑ya mai daana mai ihi towe nafibisineni.” Yeso ati nemarine.
12Yeso ati‑ya Birato mite, Yeso‑ya seekanebona mai‑ya hiyaramatasemarine. Yodeo mai ati kita,
“Yeso seetikaniya, Sesa‑ka tihamaraboneni. Ai‑ka hidi webote i‑di Yeso‑mona ati ne, ati ene Sesa yawebonane.” Mai ati namaroni.
13Mai ati‑ya Birato mite, ati ene Yeso‑ya mai kakama, hidi‑ka kadera‑ya Birato itarimarine. Fara hidi‑ka kadera kawari‑ka oni ‘yati baki’ toha, Yodeo oda toha oda‑ka oni ‘kabata’ tohamaroni.
14Ka‑kariwa‑ka yama ai hawa tonihebone‑ka mahi, 6 ora tohamini‑ya Birato mai‑ya hiyare,
“Dai‑ka hidi webote dai awaho.” Ati ne,
15“Abaho. Abaho. Tiwati ihi awa‑ya baakanaho.” Mai ati na, mai ati kitamaroni.
“Dai‑ka hidi webote baakanebona dai ati na awineni.” Birato ati nemarine.
“Oda‑ka hidi webote i‑di Sesa tohe, owa wadarane.” Deoso‑ka yama‑bone‑ya mai da‑daa mai‑ka hidi mai ati namaroni.
Yeso‑ya mai baakana
16Mai ati‑ya Birato tokadabe, sodado mai‑ya yosemarine, Yeso‑ya mai baakanabonehe.
17Sodado mai ati ihi Yeso hini ewene‑bona‑ya diwane, adami‑ya tokemarine. Adami oni, ‘ai tati tone wai’ toha, oda ati‑ya adami oni “Kokota” tohani.
18Adami‑ya Yeso kobone, awa‑ya mai baahikanemarine. Awa one‑kaya mai fama mai‑ya mai baakana, Yeso fowari‑kaya mai demekana, mai bai‑ya Yeso kawemarine.
19Birato ati ene yama hani‑ya mai kanahana, Yeso ewene‑ya yama hani‑ya mai kanawaana,
“Yeso Nasare‑ke, Yodeo mai‑ka hidi webote amane.” Yama hani ati namaroni,
20Oda ati‑ka yama hani toha, homano mai ati‑ka yama hani toha, Kereko mai ati‑ka yama hani toha neni. Yerosare yakari‑ya Yeso‑ya mai baakana, Yodeo mai dama yama hani‑ya mai kadikamaroni.
21Deoso‑ka yama‑bone‑ya mai da‑daa mai‑ka hidi, Yodeo mai toha, yama hani‑ya mai kadika, mai yawa, Birato‑ya mai hiyara,
“‘Yodeo mai‑ka hidi webote amane.’ Yama hani ati na,
sobatikanahi.
‘Yodeo mai‑ka hidi webote‑mona ati ne.’ Fara tikanahanomakibisahi.” Mai ati namaroni.
22“Yama hani one okanahanomakiraboneni.” Birato ati nemarine.
23Awa‑ya Yeso‑ya mai nawaani hawa tohiya, Yeso‑ka bora mese‑ka‑ya sodado mai 4 kana bora ibe‑ya mai ebekanamaroni. Sodado mai‑nima mai‑ka bora ibe oharirina‑ya mai kayafamaroni. Yeso‑ka bora one yaba dasikara hasinamaroni.
24“Bora yaba ai sibiriyahi. Hiniya yati bide ai wereniya, ai owa ohari bora‑ya kayafeya, yama ai wataboneni.” Sodado mai ati namaroni.
Deoso‑ka yama hani ati‑nima yama nawahani.
“Oka bora‑ya mai ebekana, yati bide‑ya mai wereneni, oka bora one‑ya mai kayafabonehe.” Deoso‑ka yama hani ati na,
fara ati‑nima sodado mai ihi nawahamaroni.
25Yeso madi toha, madise toha, Kobasi fadi i‑di Mariya toha, Mariya Madarena, mai na, Yeso kawe yakari‑ya oda nahamaroni.
26Yeso‑ka no‑nofa ama·oni. Yeso madi yowi‑ya owaa, oda‑ya awe, madi‑ya hiyare,
“Ami, tika dao amane, hari.” Yeso ati nemarine.
27Owa‑ya hiyare,
“Tika ami amani, haro.” Ati nemarine.
Oka yobe‑ya Yeso madi sawiwahamaroni.
28Yama nafi hawa toha, fara Yeso hiwata, ati yanane,
“Owa bako hokoni.” Ati nemarine, Deoso‑ka yama hani ati‑nima yama nabonehe.
29Fino kofate kahafa‑ya kawita, yama kitara‑ya fino kofate‑ya sorone, isobo ini‑ya dasihinakosa, yorihikamisa, Yeso iridi‑ya hidinemarine.
30Fino‑ya to‑tomine,
“Yama nafi hawa tohini.” Ati ne,
tati winarise, abemarine.
Yeso abo‑ya mai nafoya
31Deoso‑ka feriado amosabote yananabone, feriado‑ka yama hawa tohi‑bone‑ka mahi toha,
“Deoso‑ka feriado‑ya awa‑ya mai aboi waanariyahi.” Oda‑ka hidi mai atibodi ati na, Birato‑ya mai tokamaroni.
“Birato, awa‑ya mai waana tiwati ihi mai isi‑ya mai bakatokanihi, mai mai soba kanibote hinabonehe.” Mai ati namaroni.
32Birato ati ene Yeso fowari‑kaya mai waanikima, mai isi‑ya sodado mai bakatokanihemaroni.
33Yeso abe‑ya mai awa, Yeso iso‑ya mai bakatokanibisaramaroni.
34Yeso abo fowari bodi‑ya sodado idemarine, wabise‑ya, ama faha‑ya fama tokafodamaroni.
35 # 19:35 Yowaho hini tamine‑ya hiyare, yama nafi‑ya Yowaho awe, tamine‑ya kaminene. Hibati‑ya yama hiawamaro tamine‑ya kaminawahe, keyehe‑ya hirini awirene, Yeso ati dai nofawahabonehe.
36Yeso tamine‑ya Deoso hiyarematamonane.
“Tone bakatoterebona.” Deoso‑ka yama hani ati na, ati‑nima nawahane.
37“Maki‑ya mai idi‑ya mai kiihinebonane.” Deoso‑ka Yama hani one ati na,
fare Yeso fowari bodi‑ya mai idawahineni.
38Makobote Yose Arimateya‑ke Birato‑ya tokematane. Yeso ati‑ya nofe, oda‑ka hidi mai‑ya nayofine, hini tamine‑ya kamini awiremarine. Fare Yeso abo‑ya haanemarine, hikamebonaha. Birato ati sibare, Yeso abo‑ya towakamemarine.
39Yose Arimateya‑ke Nikodimo‑ya famemarine. Fare hibati‑ya yama soki‑ya Yeso‑ya hiyaremarine. Mira aroe‑ya daba‑ya kakamemarine, Yeso abo‑ya ketehebonaha. Yama ke‑ketehe dama, 33 kiro tohamaroni.
40Yeso abo bora wefe wamani‑ya mai kinihikane, bora‑ya yama ke‑ketehe sawemeteni. Ai owa abeya, haa‑nima Yodeo oda ene teni.
41Yeso mai baakani yakari‑ya fadara toha, fara‑ya ai temene‑bone‑ka yati hodi mai wamahinamete, hibati‑ya ai abo foyarameteni.
42Deoso‑ka feriado koboni yanatona ihi ahiyata‑ya Yeso abo‑ya mai nafoyameteni.
Currently Selected:
Yowaho 19: jaaNT
Highlight
Share
Copy
Want to have your highlights saved across all your devices? Sign up or sign in
