Yeso‑ka yo‑yose mai tamine 1

Deoso‑ka Doni kamebona tamine

1Ti·ofiro, hibati‑ya Yeso tamine tika‑bona okanahano, hika yama anini tamine toha, mai‑ya hi‑hiyara tamine toha ne, okanahanamaroni.

2Neme‑ya Yeso tokome tamine okanahano, neme‑ya toki awisareya, Deoso‑ka Doni ene hika yo‑yose mai hikadikamaro, mai‑ya hiyaremonane.

3Yeso abe, kitame, mai‑ya kamatase, amoni 40 kane mai‑ya hiyaranadi, kitame‑ya mai watowahineni. Deoso ai nafi‑ka hidi‑bona tamine‑ya mai‑ya hiyaremonane.

4Mai‑ya yorotokanihi, mai‑ya hiyare,

“Yerosare‑ya dai nahohi. Yama‑ya okobi i‑di Deoso dai‑ya daanebona, dai nimanahi. Hibati‑ya dai‑ya daahinabone tamine okaminamaroni.

5Faha‑ya Yowaho mai‑ya habanirisemari, hibayata dai amoni fa‑famaraba ne‑ya Deoso‑ka Doni dai atibodi‑ya sawiwahebonane.” Yeso ati nemonane.

Neme‑ya Yeso tokomebonane

6Mai naha, Yeso‑ya mai hiyara,

“Hibati‑ya mai dami‑ka hidi Isara·eo‑ka mai tohamete, hibayata tiwa ene mai‑ka hidi ai tohamatasaba awineni.” Yeso‑ka yo‑yose mai ati na,

7Mai ati‑ya mite,

“Hibayata yama nabone‑ka mahi dai watora, ai‑ka Abi i‑di Deoso yama‑ya watobise, hini ene yama boneni.

8Dai‑ya Deoso‑ka Doni sawiya, dai habo kitawaha, Yerosare‑ya mai wi‑wina, Yodeya‑ya mai wi‑wina, Samariya‑ya mai wi‑wina, tabora dami‑ya mai wi‑wina, mai na, mai‑ya owa tamine dai kaminaboneni.” Yeso ati nemonane.

9Hiyari hawa tohe, neme‑ya tokome mai hiwakatome, neme sabi ihi Yeso‑ya mai awami awiramoneni.

10Neme‑ya Yeso tokomeya, mai kakatoma, Deoso‑ka yo‑yose mai fama mai kobona, bora sawa‑ya mai weyenikima, Bedoro mai‑ya mai daba,

11“Karireya‑ka dai toha, hini yamata ihi neme‑ya dai kakatoma? Neme‑ya Yeso tokome, kamebonane. Tokomi dai awe, kisami mai hiawebonane.” Deoso‑ka yo‑yose mai ati namoneni.

Yeso‑ka yo‑yose owa i‑di Matiya tohebona

12Yeso neme‑ya tokome‑ya Orifera adami‑ya mai naha, Yeso toki hawa toheya, Yerosare‑ya Bedoro mai winitonamamoneni. Yerosare yakari‑ya Orifera adami waineni.

13Yerosare‑ya mai kobonama, mai one‑ka yobe tati mese‑kaya mai‑ka yobe waari‑ya mai tokomisama, i‑di Bedoro, Yowaho, Tiyako, Anidere, Firibi, Tome, Batoromeho, Mateo, Aofio bidi i‑di Tiyako, Simaho Seroti, Tiyako sori i‑di Yoda mai na, mai tokomisamamoneni.

14Yeso‑ka yo‑yose mai toha, Yeso madi i‑di Mariya toha, Yeso sori mai toha, mai fanawi one toha na, mai yorotokana, Deoso‑ya mai hiyaranademoneni.

15Mahi owa‑ya mai dama mai yorotokana, 120 mai toha, mai bai‑ya i‑di Bedoro waamise, mai‑ya hiyare,

16“Soho, owati dai mitahi! Deoso‑ka yama hani ati‑nima yama teni. Hibati‑ya Deoso‑ka Doni ati i‑di Dafi hikanahanomata, ati‑nima yama nawahani. Yara mai‑ya Yeso‑ya i‑di Yoda daanebona tamine‑ya i‑di Dafi kanahanomata, ati‑nima yama nawahani.

17Yoda oda‑ya dabe, oda nafi‑ya Yeso yosemarine.” Bedoro ati nemonane.

18Yeso‑ya Yoda daane, yinero‑ya kayafe, hini ene amosare, manakone‑ya fadara‑ya kanike, fara‑ya abo sone, nabadi wakakane, yoto siratokanemonane.

19Yerosare‑ya mai wi‑wina Yoda tamine‑ya mai mita, ‘fadara ama toha’ oni mai haahina Akedama tohamoneni.

20Dafi‑ka yama hani ati one‑ya Bedoro hiyaratase,

“‘Hika yobe abaho, mai winateri‑bone‑karo. Hika yama anini‑ta ai owa anihinamakibisahi.’ Dafi‑ka yama hani ati nineni, wayoma‑kaya.

21Hibati‑ya Yeso ai dabiya, ai‑ya dai dabamaro, ohari ai kadikaho, Yoda‑ka yama anini‑ya aninebonaha.

22I‑di Yowaho Yeso‑ya habanirisemari‑ya awa, neme‑ya Yeso tokome‑ya awahari ai haanaho, Yeso kitami tamine‑ya hiyarebonaha.” Bedoro ati ne.

23Mai ibi hiyara,

“Hibati‑ya i‑di Yose Basaba Yosito ai‑ya sawi, i‑di Matiya ai‑ya sawi nemari, ebeni‑ke ai‑ya dabamabati?” Mai ati na.

24Deoso‑ya mai hiyara,

“Abi Deoso, ai atibodi tiwata, ebeni‑ke oda‑ya dabamabati? Ebeni‑ke‑ya tiwati koboniti?

25I‑di Yoda oda‑ya dabemari, hini ene oda‑ya dabamaterebona, abe, madi mai tabori‑ya tokawahe, ebeni‑ke oda‑ya dabawahabati? Yeso‑ka yo‑yose tohebonaha.” Mai ati namoneni.

26I‑di Yose, i‑di Matiya mai fama, mai oni‑ya yati bide‑ya mai kanahana, yati bide‑ya mai kisakisa kanana, i‑di Matiya oni yati bide‑ke kaso, Yeso‑ka yo‑yose tohawahemonane.

Currently Selected:

Yeso‑ka yo‑yose mai tamine 1: jaaNT

Highlight

Copy