Yeso‑ka yo‑yose mai tamine 2
2
Deoso‑ka Doni mai‑ya sawiwahe
1Yeso abe nowati‑ya mai amoni 50 kanamaki‑ya mai marina, mai marini‑ke mahi oni Benekosi tohe‑ya, Yeso‑ka mai nafi yorotokawamamoneni.
2Mai yorotokaniya, neme‑ya moni kaki, yama hakikini kita moni‑nima moni nemonane. Yobe nafi‑ya mai nahore, moni kite, moni mai himitemonane.
3Yifo hirini‑nima na‑ya mai awa, mai hiwakatoma, mai‑nima ebekana, yifo nakasiri darikana‑nima ne mai nafi‑ya boyonawahemonane.
4Deoso‑ka Doni mai atibodi‑ya sawiwahe, hibati‑ya mai one ati‑ya mai watora, Deoso‑ka Doni ene mai one ati‑ya mai hiyarawahamoneni.
5Tabora dami‑ya mai wi‑wina Yodeo mai toha, Deoso‑ya mai kahiyara, Yerosare‑ya mai winawahani.
6Yerosare‑ya mai wina, yama hakikini kita moni‑nima moni ne‑ya mai mita, Bedoro mai‑ka yobe‑ya moni kaki, fara‑ya mai nafi toka, mai kobona, mai habi siitona, Bedoro mai ati‑ya mai mita, mai ibi hiyara,
“Ka! Oda ati‑ya mai ati tohawahineni.” Mai one ati nihi,
“Ka! Oda ati‑ya mai ati tohaharineni.” Mai one ati nihi na, fara mai nafi ati namoneni.
7“Ka! Haa‑nima yama na ai awatera, Karireya‑ka mai hinama tohani.
8Ai‑ta ai ati bara dama toha, hini yamata ihi ai dama ai ati yokana‑ya mai ati‑ya ai mitineniti?
9Baratiya‑ka mai ati‑nima ai owa ati nihi, Mediya‑ka mai ati‑nima ai owa ati nihi, Eraho‑ka mai ati‑nima ai owa ati nihi, Mesobotamiya‑ka mai ati‑nima ai owa ati nihi, Yodeya‑ka mai ati‑nima ai owa ati nihi, Kabadosiya‑ka mai ati‑nima ai owa ati nihi, Boto‑ka mai ati‑nima ai owa ati nihi, Asiya‑ka mai ati‑nima ai owa ati nihi,
10Firikiya‑ka mai ati‑nima ai owa ati nihi, Banafiriya‑ka mai ati‑nima ai owa ati nihi, Eyito‑ka mai ati‑nima ai owa ati nihi, Ribiya tabora kote‑ya Sireni tabora toha, Sireni yakari‑ka mai ati‑nima ai owa ati nihi, Homa‑ka mai ati‑nima ai owa ati nihi,
11Kereta‑ka mai ati‑nima ai owa ati nihi, Arabiya‑ka mai ati‑nima ai owa ati nihi nane. Yodeo ai owa tohe, Yodeo mai‑nima Deoso ai nafi nofineni. Hini yamata‑nima mai na, ai ati nafi‑ya mai watowaha? Deoso ene amosabote tamine‑ya mai kamina, mai ati oda mitawahi neni.
12Hini yamata ihi haa‑nima mai nafi ati niti? Haa‑nima yama na, ai awaterani.” Mai ibi hiyara, mai ati namoneni.
13“Kawi ihi mai towe toha awini.” Mai one ati na,
mai‑ya mai hahakana mai nahamoneni.
Mai‑ya Bedoro hiyarawahane
14Yeso‑ka yo‑yose mai nafi naha, Bedoro ati yanane,
“Tabora dami‑ka dai toha, Yodeo dai toha na, Yerosare‑ya dai wina, owati dai mitahi, yama dai watowahaboneni.
15Kawi ihi oda towe toha‑mone dai ati na, mahi kaki dai awahi. Mahi kaki‑ya kawi ihi ai towe tohaterani.
16Deoso‑ka Doni ene dai ati‑ya dai oda hiyarineni. Deoso ati‑ya mi‑mita‑mata i‑di Yoweo Deoso ene haa‑nima ai ene na‑bone tamine‑ya kanahanomatane.
17‘Hidi Webote kobonama‑bona‑ka mahi koboni yanatoneya, Deoso‑ka Doni dai atibodi‑ya sawi, Deoso‑ka Doni ene dai‑ka madehe Deoso ati‑ya mai kaminaboneni. Dai‑ka yetene mai toha, bote mai toha na, wada‑ya owati‑ya mai mitaboneni.
18Owa‑ya mai narifa, maki mai toha, fana mai toha na, Deoso‑ka Doni mai‑ya sawiwahe, owa tamine‑ya mai hiyaraboneni.
19Neme, bofe na‑ya owa ene‑ya mai awaboneni. Ama nafe‑ya mai awa, yama hirini‑ya mai awa, yifo asawi nafe‑ya mai awa naboneni.
20Dai‑ka Hidi koboni awisareya, mahi noko soki toha, abariko noko ama tohe‑nima nihi nebonane. Dai‑ka Hidi koboneya, dai one ya‑yaini nafi, dai one ohini nafi naboneni.
21Owati‑ya mai nofa, owa‑ya mai haana, owa ene mai abateraboneni.’ Deoso ati ne,
Ati‑ya i‑di Yoweo kanahanomatane.” Bedoro ati nemonane.
22Bedoro mai‑ya hiyaramatase,
“Isara·eo‑ka nodi dai toha, owati dai mitahi. Deoso ene Yeso Nasare‑ke ene dai watoneni. Yeso ene kitabote tohe, ene‑ya mai awa,
‘Ka! Haa‑nima ai ene na ai awaterani.’ Mai ati namaroni.
23Deoso ati ene Yeso kaki, dai‑ya winemarine. Yeso dai nanahababone dai‑ya Deoso wato, Bidi‑ya yosemari, dai tabaro‑ya Bidi wine, dai ati kasira ene yara awa‑ya mai baahikane, abemarine.
24Yeso abano‑ya temene barikiterene. Deoso ene kitame, hini temene‑ke abano wadamare, abe komene wadamare, abamaterebonane.
25Hibati‑ya Yeso tamine‑ya i‑di Dafi kanahanomatane.
‘Oka Hidi oka kanika‑ya sawi, owa‑ya kasome, ene owa habo siitoterani.
26Owa habo kita, ya‑yai ohaneni. O·abiya, Deoso ati ene okitamabone owatibodi ati nani.
27O·abiya, owa‑ya Deoso kasomebonane. Hika Ka‑kadika hini temene‑ya abano bataterebonane.
28Deoso tabaro hawine‑ya owa‑ya yofikanemari, tabaro‑ya owiniya, ya‑yai·onaboneni.’ Dafi‑ka yama hani ati nineni.
29Oka soho dai toha, owati dai mitahi. Dafi hibati‑ya abemata, temene ahiyata‑ya ite, temene‑ya abano itasa nane.
30Dafi Deoso ati‑ya mi‑mita‑mata, Deoso ati‑nima yama nabone‑ya Dafi wato,
‘Dafi ti·abiya, owa ene tika nodi Isara·eo mai‑ka hidi tohebonane.’ Deoso ati ne,
ati‑ya Dafi nofematane.
31Dafi‑ka nodi Kirisito tohebona, tamine‑ya kanahano, abeya, abano batatere, kitamebona ati nane.
32Deoso ene Yeso kitame, kitami oda nafi awemari, tamine oda hiyarawahineni.
33Deoso neme‑ya hiwakame, Deoso‑ka kanika‑ya itariwahe, Yeso‑ya Deoso‑ka Doni sawimari, Yeso ati ene oda atibodi‑ya sawiwahe, ene dai ati‑ya oda hiyarawahineni.
34Neme‑ya Dafi abano toki awirene, Yeso abano‑ta tokabisane. Dafi‑ka yama hani dai awahi.
‘Oka Hidi‑ya Deoso hiyare, —Oka kanika‑ya tiwitarihi.
35Oka kanika‑ya tiwitariya, tiwa‑ya mai ka‑kako, owa ene mai mese‑ya tiwa teme kaforiwahaboneni.— Deoso ati nane.’ Dafi‑ka yama hani ati nineni.
36Isara·eo‑ka nodi dai toha, yama dai watohi! Yeso dai baakanemari, Deoso ene ai nafi‑ka Hidi tohe, Kirisito amane. Dai ati kadamowamariyahi.” Bedoro ati nane.
37Bedoro ati‑ya mai mita, mai atibodi komawaha, Bedoro mai‑ya mai hiyara,
“Oda‑ka ayo dai toha, hini yamata‑nima oda nibati?” Mai ati na,
38“Deoso‑ya dai‑ya dai kamina, Yeso Kirisito ati dai nofa, dai oda habanirisiya, Deoso dai‑ya ati somawameya, Deoso‑ka Doni dai‑ya sawiwahebonane.
39Fare oda‑ya sawi‑nima dai‑ya sawi, dai‑ka madehe‑ya sawi, yama yaki‑ya mai wi‑wina mai‑ya sawi nebonane. Ai‑ka Hidi i‑di Deoso dai‑ya haane, dai‑ya haani‑nima mai‑ya haaneya, Deoso‑ka Doni mai‑ya sawibona ati nane.” Bedoro ati nemonane.
40Bedoro mai‑ya hiyari dame,
“Mai dama mai ihi amosara, mai‑nima dai riyahi.” Bedoro ati nemonane.
41Bedoro ati‑ya mai nofa, mahi ohari‑ya 3000 mai kana mai habanisa, Bedoro mai‑ya mai dabawahamoneni.
Yamata‑ya mai ibi ebenawahani
42Mahi‑nima mai yorotokana, mai‑ya Bedoro mai kanawata, Deoso‑ya mai hiyara, mai tafateni.
43Bedoro mai ihi‑ya mai awa,
“Haa‑nima ai ene na ai awaterani.” Mai ati na, mai habi siitoneni.
44Yeso ati‑ya mai nofa, Bedoro mai‑ya mai daba, mai yorotokana, mai tafabone, mai tafe‑ya mai ebekana, mai nafi tafineni.
45Fadara‑ya mai kiha, mai‑ka fadara‑ya mai daana, yinero‑ya mai kanika, yinero‑ya mai ebe, yama bara‑ya mai daana, yinero‑ya mai ebe nineni.
46Mahi‑nima Deoso‑ka yobe‑ya mai yorotokana, Deoso‑ya mai hiyara, tabora‑ya mai tokoma, mai tafe‑ya mai ebena, mai nafi ya‑yainawahani. Yama‑ya mai da‑daa mai ya‑yai, yama‑ya mai kayafa, mai ya‑yai namoneni.
47Deoso‑ya mai kahiyaranade, mai ihi amosa, mai‑ya mai dami nofa, mai‑nima Yeso ati‑ya mai one nofamake, mai‑ya mai dabamakineni.
Currently Selected:
Yeso‑ka yo‑yose mai tamine 2: jaaNT
Highlight
Share
Copy
Want to have your highlights saved across all your devices? Sign up or sign in
