Yeso‑ka yo‑yose mai tamine 3
3
Ka‑kakone‑ya Bedoro mai nakitamineni
1Mahi towitawiti‑ya i‑di Bedoro, i‑di Yowaho mai fama, Deoso‑ka yobe‑ya Deoso‑ya mai hiyarabone, mai towakamineni.
2Deoso‑ka yobe nokobiri amose yakari‑ya maki awa‑ya damakani mai hikame, mahi‑nima yobe nokobiri‑ya mai hina·itaritene. Madi dori‑ya hi‑hiyanemata, yakatere. Deoso‑ka yobe‑ya mai tokiyoma, mai‑ya haatene, yinero‑ya kayafebonaha.
3Mai damahikane, Bedoro, Yowaho mai fama, mai‑ya awe, Deoso‑ka yobe‑ya mai tokiyomabone, mai‑ya haane,
“Oka yinero‑ba dai daanahi.” Ati ne,
4Bedoro mai maakanama, maki‑ya mai kiina,
“Oda tiwakatomahi.” Bedoro ati ne,
5“Yinero‑ya owa‑ya mai daanaba awineni.” Atibodi ati ne,
mai‑ya kakatomane.
6“Barata, oro na, oda kihara, oda haatina, yama oda kihabisa tiwa‑ya daa·onaboneni. Yeso Kirisito Nasare‑ke ene tiwaamisama, yakatinahi.” Bedoro ati nemonane.
7Bedoro yehe damahine, hinawaamise, teme, temeribo ne kitawahe,
8yoranimise, waane, Deoso‑ka yobe‑ya mai tokiyamake, yakane, yorane, ya‑yaine, Deoso‑ya kahiyarane.
9Deoso‑ka yobe‑ya mai yorotokana, yakane‑ya mai awa, Deoso‑ya kahiyare, ati‑ya mai mitineni.
10Deoso‑ka yobe nokobiri‑ya i‑itari kitame‑ya mai awa, mai atibodi yama‑ya kadika,
“Ka! Deoso‑ka yobe nokobiri‑ya i‑itari, yinero‑ya ha‑haa, fare tohakare?” Mai ati na,
Mai atibodi yama‑ya dika, yama‑ya mai watorani.
11Deoso‑ka yobe kote oni Saromaho tohe‑ya mai naha, Bedoro, Yowaho mai fama, kitame mai mani‑ya damaneya, mai awa, mai kanani kamakineni.
Mai‑ya Bedoro hiyare
12Bedoro mai‑ya kakatome mai‑ya hiyare,
“Isara·eo‑ka nodi dai toha, hini yamata ihi
‘Ka!’ Dai ati na?
Oda‑ya dai kakatoma? Oda ene, maki yakanemona dai ati na awineni. Oda ene tohi awirini. Yeso ene amane.
13Deoso‑ya Yeso na‑narifa, yara mai‑ya dai kahabanemarine, mai baahikanebonaha. I‑di Birato seehikanebona, dai ati barihine mai hinahabemari, ai‑ka idi i‑di Abaraho, i‑di Isaki, i‑di Yako mai na, mai‑ka Deoso hinakitamemarine.
14‘Yeso amosabote amane.’ Deoso ati ne,
‘Yeso seetikariyahi, oda nofi awire. Ai‑ya nanahabamari seetikabisahi.’ Dai ati namaroni.
15Yeso ai‑ya wamanemata, dai ati ene mai hinahabe, Deoso hinakitame, kitami oda awemarine.
16Yeso ati oda nofa, Yeso ene ka‑kakone‑mata kitamawahe. Hibati‑ya ka‑kakone dai wato, Yeso ene kitame wai, dai awaho.
17Soho, yama dai watorihi, dai‑ka hidi mai hiwatorihi hina. Yeso Deoso Bidi toharemona dai atibodi ati na, dai nanahabemarine.
18Deoso ati‑ya mai mi‑mita‑mete Deoso ati‑ya mai kanahana,
‘Deoso‑ka Ka‑kadika‑ya mai nakomaboneni.’ Mai ati namete.
Deoso ati‑nima yama nawahani.
19Deoso‑ya dai‑ya dai kaminawaha, Deoso dai‑ya ati somawame, dai ene‑ya kadikamaterebonane.
20Hibayata dai‑ya kasome, makobote Hika Ka‑kadika i‑di Yeso Kirisito hiyosematasebonane.
21Hibayata neme‑ya Yeso wine, hibati‑ya Deoso ati‑ya mai mi‑mita‑mete Deoso ati‑ya mai kanahano,
‘Yama yanakani‑ya yama nafi amosamete‑nima Deoso ene yama namatasaboneni.’ Mai ati na,
Fara‑nima yama yanatonabone, Yeso kamatasebonane. Deoso ati‑nima yama naboneni.
22Hibati‑ya Deoso ati‑ya Mose mitemata, ati yanane,
‘Deoso ati omiti‑nima Deoso ene dai owa ati himitamaki, ati dai mitayaho.
23Deoso ati‑ya mi‑mita ati mai hinofi awireya, mai ababoneni.’ Mose‑ka yama hani ati nineni.
24Mose ati‑nima Samo·eo ati ne, ati‑nima Deoso ati‑ya mai mi‑mita‑mete mai nafi ati toha, hibayata‑ke tamine‑ya mai kanahano nameteni.
25Deoso ati‑ya mai mi‑mita‑mete mai‑ka nodi dai toha, dai tamine‑ya Deoso i‑di Abaraho‑ya hiyare,
‘Abaraho, tabora nafi‑ya mai wi‑wina tika nodi mai‑ya kasomebonane.’ Deoso ati nematane.
26Deoso Bidi‑ya nakitami hawa tohe, dai‑ya hiyosemi dai hihemarine. Dai‑ya kasomebona, dai ene towe tohamarabonehe.” Bedoro ati nemonane.
Currently Selected:
Yeso‑ka yo‑yose mai tamine 3: jaaNT
Highlight
Share
Copy
Want to have your highlights saved across all your devices? Sign up or sign in
