Yowaho 18
18
Yeso‑ya mai wata
1Hiyari hawa tohe, oda toka, Sedero faha‑ya oda berenawaha, Sedero kowani‑kaya awa bono bodi‑ya Yeso oda tokamaroni.
2Oda toki‑bone‑kaya i‑di Yoda Isikari·oti watomarine. Hibati‑ya Yeso oda daba oda yobinamaroni.
3Yoda sodado mai eyehe kamakimarine. Fariseo mai‑ka yo‑yose mai toha, Deoso‑ka yama‑bone‑ya mai da‑daa mai‑ka hidi‑ka sekorasa mai toha, mai na, mai sawinamaroni. Nabarina‑ya mai one aka, farao‑ya mai one aka, awa‑ya mai one aka, yima‑ya mai one aka namaroni.
4Yeso mai ihi‑bone‑ya wato, mai‑ya hiyare,
“Ebeni‑ke dai watibati?” Ati nemarine.
5“I‑di Yeso Nasare‑ke oda wataboneni.” Mai ati na,
“Fara ama·oni.” Yeso ati nemarine.
Yoda mai‑ya dabemarine, Yeso‑ya kahabaneri.
6“Fara ama·oni.” Yeso ati ne,
ati ene mai bari‑kaya mai sonamaroni.
7“Ebeni‑ke dai watibati?” Yeso ati namatase,
“I‑di Yeso Nasare‑ke oda wataboneni.” Mai ati namaroni.
8“Fara ama·oni ona, owa dai watiya, oka mai dai arabanahi.” Yeso ati nemarine.
9Mai hasinabone ati yanane, hibati‑ya ati‑nima yama nabone ihi ati yanane,
“Oka mai‑bone owa‑ya mai daatinamaro, mai hasineni.” Yeso ati nemarine.
10Simaho Bedoro yima‑ya nawaane, yima‑ya sobanaki, Deoso‑ka yama‑bone‑ya mai da‑daa mai‑ka hidi webote‑ya na‑narifa narabo kanika‑ya tarinabasemarine. Hidi‑ka yo‑yose oni Maoko tohemarine.
11“Bedoro, tika yima foyamahi, hini bori‑ya. Owa‑ya yama kobonabone Okobi ati nemari, ati‑nima onaboneni.” Yeso ati nemarine.
12Sodado mai toha, mai‑ka hidi mai toha, oda‑ka hidi mai‑ka sekorasa mai toha, mai na, Yeso‑ya mai waratona, Yeso mano‑ya mai sokikasamaroni.
13Kaifo‑ka koma i‑di Anasi tohe‑ka yobe‑ya Yeso‑ya mai towakamamaroni. Deoso‑ka yama‑bone‑ya mai da‑daa mai‑ka hidi webote i‑di Kaifo tohemarine.
14Hibati‑ya i‑di Kaifo oda‑ka hidi mai‑ya hiyare,
“Ai‑ka mai one dama hidi mai tohara, fara mai nafi abarabone mai‑ka owa ohari abeya, yama sibaraboneni.” Kaifo ati nemarine.
15I‑di Simaho Bedoro oda fama Yeso nowati‑ya oda towakamakemaroni. Deoso‑ka yama‑bone‑ya mai da‑daa mai‑ka hidi webote‑ka yobe fowari barikani nafi doro‑ya oda kobokana, Yeso‑kaya okomake, i‑di Bedoro nokobi‑kaya waabisemarine. Deoso‑ka yama‑bone‑ya mai da‑daa mai‑ka hidi webote owatomarine.
16Bedoro nokobi‑ya waamaki, nokobi‑ya okomatasa, atona nokobi‑ya se‑seekana ohiyara, owati ihi nokobi‑ya seekana, Bedoro kamakimarine.
17Bedoro‑ya atona hiyara,
“Maki‑ya mai da‑daba mai‑ka owa amatiraniha?” Atona nokobi‑ya se‑seekana ati na,
“Ofamaterene.” Bedoro ati nemarine.
18Yama sire ihi yifo widi‑ya mai nahobasamaroni. Hidi‑ka yobe‑ya mai na‑nawada mai toha, oda‑ka hidi‑ka sekorasa mai toha, mai na, mai eyehe Bedoro wai, yifo‑ya hiwanemarine.
19Yeso‑ya mai da‑daba mai tamine toha, hini ati tamine toha ne, tamine‑ya mai‑ka hidi webote mitebona, Yeso‑ya hiyaremarine.
20“Owati‑ya mai nafi mitani. Deoso‑ya mai hi‑hiyara‑ke yobe‑ya mai okanawata, Deoso‑ka yobe‑ya mai okanawata, mai yorotokana mai okanawatoteni. Mai noki beheri‑ya owati yanaterani.
21Owa haatiriyahi. Owati‑ya mai mita, mai dai haanibisahi, owati‑ya mai kaminabonehe.” Yeso ati nemarine.
22Yeso ati‑ya mai‑ka sekorasa owa mite, Yeso noko‑ya batanari,
“Deoso‑ka yama‑bone‑ya mai da‑daa mai‑ka hidi webote ai hiyara, haa‑nima ai hiyariterani.” Ati nemarine.
23“Owati kasiramone tina, owa tamine tikaminahi. Keyehe‑ya hiri·oni awirini, owa‑ya batatiriyahi.” Yeso ati nemarine.
24Yeso yehe sokikasanasa neya, Anasi ati ene Kaifo‑kaya mai hiwakamemarine. Deoso‑ka yama‑bone‑ya mai da‑daa mai‑ka hidi webote i‑di Kaifo tohemarine.
Bedoro ati towe
25Simaho Bedoro yifo‑ya hiwane wai‑ya owa ati yanane,
“Yeso‑ya mai da‑daba mai‑ka owa amatini.” Ati ne,
“Yeso‑ya ofamaterani.” Bedoro ati nemarine.
26Makobote Deoso‑ka yama‑bone‑ya mai da‑daa mai‑ka hidi webote‑ka sekorasa narabo Bedoro tarihibase‑ka naki ati yanane,
“Awa bono bodi‑ya maki‑ya tisawe, tiwa oawani.” Hidi‑ka yo‑yose ati nemarine.
27“Owa tohi awirani.” Bedoro ati ne,
ati fawaneya, arakawa haanemarine.
Homano mai‑ka hidi‑ya Yeso‑ya mai towakama
28Homano mai‑ka hidi tabaro‑ya Yeso‑ya mai towakama, yama wahabisari‑ya mai kobonamaroni. Ka‑kariwa‑ka mai‑ka marina‑ka semana hawa tohara, mai marinamatasabone,
“Yara mai‑ka yobe‑ya ai tokiyomariyahi. Ai tokiyomiya, ai towe tohariyahi.” Mai atibodi ati na,
Homano mai‑ka yobe‑ya oda‑ka hidi mai tokiyomaramaroni. Yeso‑ya sekorasa mai towakiyomabisamaroni.
29Birato‑ka nokobi‑kaya mai naha, mai‑ya Birato tokomaki,
“Hini yamata‑nima maki ene nati?” Birato ati ne,
30“Maki ati kasiro awire‑mana, tiwa‑ya oda kakamare nane.” Mai ati namaroni.
31“Dai‑ka yama hani ati‑nima dai bisinaho. Owa‑ya dai haariyahi.” Birato ati nemarine.
“Oda ati hinahababise, oda kitara, oda ati ene ai owa‑ya mai nanahabaterani.” Mai ati namaroni.
32 #
Mateo 20:19; 26:2; Maroko 10:33; Roka 18:32; Yowaho 3:14; 8:28; 12:32 Hibati‑ya Yeso hini tamine‑ya kamine, mai baahikanebona ati ne, fare hini ati‑nima yama yananamaroni.
33Birato hika yobe doro‑ya tokiyamatase, ati ene Yeso‑ya mai kakama, ati yanane,
“Yodeo mai‑ka hidi webote amatiraniha?” Birato ati nemarine.
34“Ebeni‑ka mai ati tohiti? Mai one ati toha, hini tiwati toha na awineni?” Yeso ati nemarine.
35“Yodeo ohara, hini tika mai one, Deoso‑ka yama‑bone‑ya mai da‑daa mai‑ka hidi tiwa‑ya owa‑ya mai daaneni. Hini yamata‑nima tina, tiwa‑ya mai daaniti?” Birato ati nemarine.
36“Neme‑ka hidi webote ama·obisani. Bofe‑ka hidi oha‑mani, oka yo‑yose mai one‑ya mai bisina neni, owa‑ya mai watarabonehe. Bofe‑ka hidi webote oharani.” Yeso ati nemarine.
37“Hidi webote amatiraniha?” Birato ati ne,
“Hehe, hidi webote ama·oni. Deoso ati yokana okaminabone, bofe‑kaya okemaro, owada onamaroni. Deoso ati yokana‑ya mai no‑nofa owati‑ya mai tokadabateni.” Yeso ati nemarine.
38“Deoso ati yokana owatoterani.” Birato ati ne,
tokome, Yodeo mai‑ya hiyare,
“Yeso ene towe tohi awirene.
39Dai‑ka owa barikane Ka‑kariwa‑ya dai ati ene ohari see·okatene. Yodeo dai‑ka hidi webote‑ya dai ati kobona awineni.” Birato ati nemarine.
40“Fare‑ya oda ati koboni awirini. Barabasi‑ya oda ati koboneni.” Mai ati namaroni.
Hibati‑ya mai‑ka yama‑ya Barabasi bo‑boti tohematane.
Currently Selected:
Yowaho 18: jaaNT
Highlight
Share
Copy
Want to have your highlights saved across all your devices? Sign up or sign in
