Yowaho 16

1“Yama kobonabone tamine okamina, owa hawine‑ya dai yakaniya, dai maakaraboneni.

2Dai‑ya mai ati barinaboneni, Deoso‑ya mai hi‑hiyara‑ke yobe‑ya dai tokiyomamarabonehe. Dai‑ya mai nanahabiya,

‘Oda ene Deoso ya‑yainane.’ Mai atibodi ati naboneni.

3Okobi‑ya mai watora, owa‑ya mai watoharira, oda‑ya mai watora ihi dai‑ya mai kakaboneni.

4Hibati‑ya dai‑ya odaba, mai tamine okamina kanibote oramaroni. Hibayata mai tamine okamina, dai‑ya osawimi awiri‑ya owati dai watinawamaboneni.

Deoso‑ka Doni‑ya Yeso yosebona

5Owa‑ya yose‑mari‑ya okomatasabone ona,

‘Ebeni‑kaya tikiboneti?’ Dai ati ni awirani.

6Okomabone ona, hiniya dai atibodi ohina‑nima nineni.

7Owati amosa dai mitahi. Okomariya, dai‑ya ka‑kasoma‑bona kami awirebonane. Okomiya, dai‑ya ka‑kasoma‑bona oyosemaboneni.

8Koboneya, bofe‑ka mai ihi tamine‑ya kanawatobonane. Mai ihi amosara toha, mai ihi amosawamabone toha, mai ihi‑ya Deoso kadikebona toha ne, tamine‑ya mai‑ya kanawatowahebonane.

9Deoso Bidi ati‑ya mai nofara mai ihi amosara, mai ihi tamine‑ya Deoso‑ka Doni kaminebonane.

10Okobi‑kaya okomiya, owa ene mai awamariya, owa ene‑nima mai ihi nabone tamine‑ya Deoso‑ka Doni kaminebonane.

11Bofe‑ka mai‑ka hidi Deoso hikadiki hawahinihi, hini ene manakone wade tamine‑ya Deoso‑ka Doni mai‑ya kaminebonane.” Yeso ati nemarine.

12Hibayata yama dama tamine okamini awirabone, yama nafi okaminiya, yama dai watomaraboneni.

13Deoso‑ka Doni Deoso ati yokana‑ya ka‑kamina koboneya, Deoso ati nafi‑ya yofikanebonane. Hini ati ene ati yanani awirebona, yama himita‑ya kaminabisebonane. Yama nabone tamine‑ya kaminebonane.

14Ati ene owa ene amosa dai watowahaboneni. Oka yama tamine‑ya kaminebonane.

15Okobi‑ka yama nafi toha oka tohahari neni. Deoso‑ka Doni oka yama tamine‑ya kaminebona ona, fara oda fama oda tamine amani.

Yeso abebona, kitamebona ati ne

16Dai amoni fa‑famaraba namakiya, owa dai awamaraboneni. Dai amoni fa‑famaraba namakitasiya, owa dai awamatasaboneni.” Yeso ati nemarine.

17“Hini yamata‑nima Yeso ati ne, ati amanati? Yama oda watorani.

‘Dai amoni fa‑famaraba namakiya, owa dai awamaraboneni. Dai amoni fa‑famaraba namakitasiya, owa dai awamatasaboneni.’ Ati ne,

Badi‑ya tokebona ati ne, yama oda watorani.

18‘Dai amoni fa‑famaraba namakiya’ Ati ne,

hini yamata‑nima neba ati amanati?” Oda ibi hiyara oda ati namaroni.

19Oda ati‑ya Yeso wato, oda‑ya hiyare,

“Owati dai watora awineni.

‘Dai amoni fa‑famaraba namakiya, owa dai awamaraboneni. Dai amoni fa‑famaraba namakitasiya, owa‑ya dai awamatasaboneni.’ Ona,

fara tamine‑ya dai ibi hiyara awineni.

20Owati amosabote dai mitahi. Dai yawiya, dai ohinaboneni. Dai ohiniya, bofe‑ka mai ya‑yainibisaboneni. Makobote dai ya‑yainawahaboneni.

21Mai fanawi dori wadabone, mai dori kome kitateni. Mai dori wadiya, mai dori kome‑ya mai atibodi watomaterani. Ewe wade ene madi mai ya‑yainibisateni.

22Mai fanawi dori kome kita mai‑nima dai nawahabone, dai yawabone, makobote owa dai awamatasiya, dai ya‑yainawahaboneni. Dai ya‑yaini fawaraboneni.

Deoso‑ya mai hiyarabone

23Koboniya, owa‑ya dai haanami awiraboneni. Owati amosabote dai mitahi. Onofa‑nima dai nofa, Okobi dai haaniya, yama dai haana‑ya Okobi daanebonane.

24Hibati‑ya Deoso dai haanabone, owa oni‑ya dai hiriramaroni. Oka dai toha Deoso‑ya dai haanahi. Yama dai haana‑ya Deoso daanebonane. Dai ya‑yaini nafeboneni.

25Okobi tamine ohiyara, yama bara tamine ohiyarabisa, owati dai wato nafira, yama one‑ya Okobi tamine okamini amosaboneni.

26Onofa‑nima dai nofa, owa oni dai hiriniya, Deoso‑ya dai abano haanaboneni. Okobi‑ya dai hiyarabone, owa‑ya dai yosemaraboneni.

27Owa‑ya dai nofa, Yeso Deoso‑ka amane dai ati na, fara ihi Okobi dai‑ya nofi nafine.

28Hibati‑ya Okobi oda famamaro, dai tabaro‑ya okemaro, Okobi‑ya okomatasaboneni.” Yeso ati nemarine.

Yeso ati mai watowaha

29“Tiwati tikahemomara, tiwati oda watowahani.

30Yama nafi tiwata, oda atibodi ati tiwato, tiwa oda watowahineni. Deoso‑ya tisawemete, tiwa‑ya oda watowahineni.” Oda ati namaroni.

31“Hibayata owati dai nofawahamone dai ati na,

32yama nahorabone, fara hibayata dai kananaboneni. Owa dai dabami awirabone, dai tabaro‑ya dai tokomaboneni. Owa hari awirabone, Okobi oda famaboneni.

33Yama tamine okamina, owati dai nofiya, dai habo siitoraboneni. Bofe‑ka dai‑ya mai bisinaboneni. Dai habo kitahi. Bofe‑ka mai kiti bi‑bidi, owa kiti nafibisineni.” Yeso ati nemarine.

Currently Selected:

Yowaho 16: jaaNT

Highlight

Copy