Yowaho 15
15
Ai ene amosa ya‑yana‑ka i‑di Yeso amane
1“Ofa ade amosabote‑nima ona, ofa‑ya na‑nawada‑nima Okobi nane.
2Ofa mate‑ya mohi yanamake, bonora‑ya Deoso tiinakose, ini yaba kote‑ya Deoso tiinakosaharitene, ofa boni damawahabonehe.
3Ofa ini kote‑ya Deoso tiinakose‑nima dai na, owati dai mita, dai ene amosawahineni.
4Owa dai nokotoniyahi. Owa dai nokotoniya, dai okasomaboneni. Ofa ini ade‑ya waanamariya, bonoteraboneni. Dai‑ya okasomariya, dai ene amosa wadateraboneni.
5Ofa ade‑nima ona, ofa ini‑nima dai na, owa dai nokotoniya, ofa ade‑ya ini waana‑nima dai na, dai‑ya okasomaboneni. Dai‑ya okasomara‑mani, dai ene amosa wadara neni.
6Owa‑ya mai nokotonira, ofa ini waanamara‑nima mai teni. Ofa ini wayatoniya, yifo‑ya mai werehiwititeni.
7Owa dai nokotonihi, owati dai tokadaba, dai niya, yama dai haana‑ya Deoso daanebonane.
8Dai ene amosa, dai bona‑nima dai nineni. Dai bono nafiya, dai ene‑ya mai awiya, oka dai toha dai‑ya mai watowahabone, Deoso ene amose‑ya mai awaboneni.
9Okobi owa‑ya nofi‑nima dai‑ya onofineni. Owati dai tokadabahi, dai‑ya owa nofi fawaraboneni.
10Okobi ati okadaba, Okobi owa‑ya nofi fawarebonane. Owati dai tokadabiya, Okobi owa‑ya nofi faware‑nima dai‑ya onofi fawa·oraboneni.
11Tamine okamine, ya‑yai·oni‑nima dai ya‑yainabone, dai ya‑yaini nafeboneni.
Dai ibi nofahi
12Owati dai mitahi. Dai onofi‑nima dai ibi nofiyahi.
13Maki hika no‑nofa mai abarabone ababiseya, hika no‑nofa mai‑ya nofi nafine, mai one mai‑ya mai nofi bi‑bidi nibisineni.
14Owati dai tokadaba, oka no‑nofa dai amani.
15Hidi‑ka yo‑yose mai‑ya hini tamine‑ya kaminaterene. Oka no‑nofa dai amani. Okobi ati nafi‑ya dai‑ya okaminateni. Oka yo‑yose dai tohamaro, oka no‑nofa dai tohawahineni.
16Owa‑ya dai kadikara, dai‑ya okadikabisa, dai‑ya oyosemaroni, dai bonabonehe, dai ene amosa fawarabonehe. Yama onofa‑nima yama na dai nofa, yama dai haana‑ya Okobi daanebonane.
17Dai ibi nofiyahi, onani.
Bofe‑ka ai‑ya mai kakobone
18Bofe‑ka dai‑ya mai kaka, dai atibodi yama‑ya kadikariyahi. Owa‑ya mai kako dai tohamaroni.
19Bofe‑ka dai toha‑mani, dai‑ya mai nofa neni. Hini mai one‑ya mai nofateni. Dai okadikamaro, bofe‑ka dai tohamara, dai‑ya mai kakoteni.
20Owati‑maro‑ya dai ati kadamowamariyahi. Owa‑ya mai bisinamaro dai‑ya mai bisinamakeboneni. Owati‑ya mai tokadaba dai ati‑ya mai tokadabahareboneni.
21Owa‑ya yose‑mari‑ya mai watora, owa‑ya mai nofi awirani. Fara dai‑ya mai bisinaboneni.
22Deoso ati okamini awira‑mani, mai ihi manakone wadara neni. Deoso ati okaminabisamaro ene mai manakone wadineni.
23Owa‑ya mai kako, Okobi‑ya mai kakohari nineni.
24Owa ene kitabote‑ya mai awara‑mani, mai ihi manakone wadara neni. Owa ene kitabote‑ya mai awa, owa‑ya mai kako, Okobi‑ya mai kakohari nineni.
25‘Hiniya owa‑ya mai kakoneni.’ Deoso‑ka yama hani ati na,
ati‑nima mai ihi nineni.
26Deoso‑ka Doni Deoso ati yokana‑ya ka‑kamina amane. Okobi‑ya okomiya, dai‑ya kasomebona oyoseya, dai‑ya koboneya, owa tamine‑ya kaminebonane.
27Owa hiyari yanakani‑ya owa dai dabamaro, owa tamine dai kaminahari, dai nahi.” Yeso ati nemarine.
Currently Selected:
Yowaho 15: jaaNT
Highlight
Share
Copy
Want to have your highlights saved across all your devices? Sign up or sign in
