Matiye 22

Gusutar gə ɔji dɔ ɗa ndam ta naa

Lug 14.16-24

1Jeju təl pa gə je tar gə gusutar to gə ɗangə na:

2Ɓeko̰ gə dara le to ɗəw kara baa gə mbay gə ɗa ndam ta naa mba ngon-e. 3N-ula ngan njekulaje lə-a n-ar-je ꞌɓar dəwje gə ꞌɓar-je lo ta naa gə nee le, ngaa dəwje le ꞌnjigi ɗe ang. 4N-təl n-ula ngan njekulaje gə kɛm ja cibi na: ꞌPaje ar-je dəwje gə ꞌɓar-je le na m-gɔl nekusa lə-m, m-tɔl bɔ mangəje gə daje lə-m gə ər ndub-ndub, neje tɔ̰y to kɛgɛgɛ ngaa ꞌɗeje lo ɗa ndam ta naa gə le. 5Ngaa kəm-je cɛdə kəne ang, d-ɔdə d-aw, dəw gə nee aw ndɔɔ lə-a, dəw gə kən aw lo ɗabə ne ndogo gə lə-a. 6Ngaɓa nje gə kɛm d-uwa ngan njekulaje le ꞌɗaje məyɛr ngaɓa ꞌtɔl-je. 7Mə mbay o̰-ɛ; ɗaa ula njeɗɔje lə-a, ar ꞌrəndə nje tɔl dəwje nee le tɔ̰y ngaɓa ꞌɗo ɓebo lə-je tulug-tulug. 8Be ɓa mbay le təl pa ar ngan njekulaje lə-a na: Nekusa ɗa ndam ta naa le to jəbə, ngaa dəwje gə ꞌɓarje kəne le m-o-je unja-m ang. 9Awje tɔ ɗəwje gə, ɓo dəwje tɔ̰y gə a kingaje-je ja nama ꞌɓarəje-je ar ꞌɗe lo ndam ta naa gə nee le. 10Ngan njekulaje le d-ɔdə d-aw tɔ ɗəwje gə, ꞌmbo̰ dəwje tɔ̰y gə d-inga-je, njeməyɛrje gə njeməmayje, ar njekusa neɗa ndam ta naaje ꞌɗusu lo pur-pur. 11Logə mbay le andə lo ɗa ndam gə mba tən dəwje gə ꞌɓarəje le ko ɗaa, a lo o dəw kara horo-je gə ula kubu kaw lo ndam ta naa gə ang. 12N-pa n-ar-ɛ na: Njekura lə-m, ɗa ban ɓa ꞌi andə lo gə nee gə lal kula kubu gə kar ndam ta naa wa? Dəw nee le isi t-ɛ munduru. 13Be ɓa mbay pa ar ngan njekulaje na: ꞌTɔje gɔl-ɛ gə ji-a, ɗaa ila-je cil ciməri gə ɗaga, lo gə dəwje d-a no kəne gə d-a kusa ngangəje kəne mɔr-mɔr. 14Mba ꞌɓar dəwje bula, ngaa nje gə ꞌmbərə-je njɛɓərɛ baa.

Lar gədə ɓe lə Sejar

Mrk 12.13-17

15Be ɓa Parijiyɛ̰je d-aw d-uwa dɔ naa ꞌsangə ɗəw mba pa tar kuwa ne Jeju gə go tar gə a ce t-ɛ gə ja.

16D-ula ngan njenendoje lə-je gə nje koso gəl Erɔdə gə je ɓə lə Jeju na: Njenetɔji, j-a gərə to gə ꞌto nje pa tar gə tɔgərɔ nəm, ꞌtɔji dəwje ɗəw lə Luba gə tɔgərɔ, ꞌɓəəl ne kəm dəw ang, mba ꞌi o pa kun darɔ lə dəwje gə ɗaga baa ang. 17ꞌPa tar gə mə kəji gə lə-i ɔji dɔ tar gə nee ar-si j-o: Ɗəw to kar dəw uga lar gədə ɓe lə Sejar ose uga ang wa? 18Ngaa Jeju gərə kəji lə-je gə kṵra̰y ɗaa, ila-je kəne na: Njetar mulaje, mba ɗi ɓa ꞌna-mje ne wa? 19ꞌTuji-mje lar gə d-aw d-uga ne lar gədə ɓe le ar-mje m-o. Ɗaa ꞌtɔj-ɛ sulay kara. 20Jeju təl dəji-je na se: Ndaji njil dɔ na, gə ri na ɓa d-uja kəne wa? 21D-ila-a kəne na: To kar Sejar. Be ɓa Jeju pa ar-je na: Ne gə to kar Sejar nama ar-je Sejar, ne gə to kar Luba nama ar-je Luba. 22Tar gə d-o le dum dɔ-je ɗaa d-iya̰ Jeju d-ɔdə d-aw.

Sadusiyɛ̰je gə tar gə ɔji dɔ ndol lə nje gə d-uy

Mrk 12.18-27

23Mə ndɔ-ɛ gə əng ja, Sadusiyɛ̰je gə kɛm ꞌɗe d-inga Jeju. Sadusiyɛ̰je gə ꞌpa na dəw uy nama ndol ang le, ꞌdəji-e tar na: 24Njenetɔji, Moyiji pa na: To gə ɓo dəw uji nganje ang baa ɓa uy nama, ngon ko̰-ɛ a ta jene nduba lə-a mba kunda ne ko ngon ko̰-ɛ gə uy le#22.24 Ttt 25.1-5. 25To gə be ɓa, ngan ko̰ naaje siri d-isi mə ɓe gə lə-si ɗaa, dəw gə dɔngɔr ta jene ɗa uy, lal kuji ne nganje, ɗaa ngon ko̰-ɛ ɗe t-ɛ gə jene nduba. 26Ye gə njekum gə joo le kara to gə bənəng, ngaɓa njekum gə munda nəm, to gə be ja saar ce ne dɔ njekum gə siri gə. 27Go-je gə tɔ̰y ɗaa, jene le kara uy tɔ. 28Ngaa ndɔ gə dəwje gə d-uy d-a ndol le, se na ɓa horo ngan ko̰ naaje gə siri ne le n-a to jene lə-a wa? Mba t-ɛje gə ta ja gə kəm-je gə siri tɔ̰y. 29Jeju ila-je kəne na: ꞌndəəmje, mba ꞌgərəje Mbede lə Luba ang nəm, gə singamongə lə Luba ang nəm tɔ. 30Mba ndɔ gə dəwje gə d-uy d-a ndol le, jingawje gə jeneje d-a ta naa ang, ngaa d-a kaw to gə anjije gə dara be. 31Tar gə ɔji dɔ kuy ɓa ndol le, ꞌturaje tar gə Luba pa mə mbede gə ar-si ang wa? 32ꞌMa m-to Luba lə Abəraham, Luba lə Ijagə, gə Luba lə Jakobo#22.32 Cgɗ 3.6. Abəraham, Ijagə gə Jakobo le d-uy kede ləw baa nam ɓa Luba pa tar nee ar Moyiji.. Luba to Luba lə nje gə d-uy ang, ngaa n-to Luba lə dəwje gə d-isi kəm baa. 33Tar gə Jeju pa le ɗa kula rɔ bula dəwje gə d-o le gə maj-ɛ ja.

Ndu gə bo unda mar-ɛje tɔ̰y

Mrk 12.28-34

34 Parijiyɛ̰je d-o to gə Jeju bɛ̰ ta Sadusiyɛ̰je ɗaa, d-uwa dɔ naa, 35Dəw kara horo njekɔr gəl toronduje gə, ɗe dəji Jeju tar to gə be mba na ne m-e: 36Njenetɔji, ndu gə ɗa ɓa bo unda mar-ɛje tɔ̰y mə torondu gə lə Moyiji wa? 37Jeju ila kəne na: Njigi Mbayɓe, Luba lə-i, gə ngaw ur-i ja tɔ̰y, gə kəm lə-i tɔ̰y, ngaɓa gə kəji lə-i tɔ̰y#22.37 Ttt 6.5. 38To ndu gə dɔngɔr gə bo unda mar-ɛje tɔ̰y. 39Njekum gə joo gə ta sə-a naa ɓa nee: ꞌNjigi njemar-i to gə darɔ-i be#22.39 Nll 19.18. 40Nduje gə joo ne ja to ngira torondu lə Moyiji tɔ̰y gə ne tɔ̰y gə pajambərəje tɔji dəwje.

Kirisi to ngon ka Dabidi

Mrk 12.35-37

41Logə Parijiyɛ̰je d-uwa dɔ naa ɗaa, Jeju dəji-je tar to gə be na: 42Tar gə ban ɓa əjije dɔ Kirisi gə wa? N-to gə gəl kuji gə lə na wa? D-ila kəne na: N-to gə gəl kuji gə lə Dabidi. 43Ɗaa Jeju təl pa ar-je na: Na ban cibi ɓa logə Njil Njerɔsangə ɗusu mə Dabidi ɗaa, ɓar-ɛ Mbayɓe, logə ye pa na:

44 Mbayɓe Luba pa ar Mbayɓe lə-m na:

Isi nangə dɔ ji kɔlə-m gə.

Saar gə mba kar-m m-a kar-i a lagə njeba̰a̰je lə-i gə gɔl-i.

45To gə ɓo Dabidi ɓar-ɛ Mbayɓe nama, n-a təl to ngon-e to gə ban cibi wa? 46Dəwje ꞌɓəəl mba dəji-e tar. Un kud-e dɔ ndɔ-ɛ gə əng le, dəw kara kara asə dəji-e tar ang ngaa.

Currently Selected:

Matiye 22: lap

Highlight

Copy