Matiye 23

Jeju ila tar dɔ njekɔr gəl toronduje gə gə dɔ Parijiyɛ̰je gə

Mrk 12.38-39; Lug 11.3,9-52; 20.45-46

1Be ɓa Jeju pa tar ar bula dəwje gə ngan njenendoje lə-a ɗaa pa na:

2 Njekɔr gəl toronduje gə Parijiyɛ̰je ꞌto dəwje gə ꞌtɔji dəwje torondu lə Moyiji. 3Ne tɔ̰y gə d-a pa kar-si le oje ɗaa ꞌɗaje ne kula ngaa aje rɔ-si dɔ kula ɗa-je gə, mba ꞌpa tar nama ꞌɗa kul-ɛ ang. 4ꞌTɔ nekodoje gə ɔy d-unda dɔ dəwje gə, ngaa ngon ji-je gə njɛ̰ nja baa kara d-ula d-ɔr ne ang. 5ꞌƊa kulaje lə-je tɔ̰y mba tɔji ne rɔ-je kar dəwje d-o neje. To gə be ɓa d-um ngon ku ndaar gə bo ꞌtɔ ɓida noje ose kagə ji-je gə, cibi ꞌɗaje ta njəbə kubuje lə-je d-ar-ɛ tadə. 6ꞌNjigi lo kisi riɓar lo muru bula gə, ngaɓa kəy nendo gə nama lokisi gə kede ja ɓa ꞌnjigi kisi kəne, kar d-unda ji-je go naa ɓa d-uwa ne ji-je ta nada; 7ꞌnjigi mba kar dəwje ꞌɓar-je Njenetɔji tɔ. 8Ngaa sisəy le, ar-je ɓar-si ꞌɓəə-mje ang; mba dəw kara baa ɗəgədə to njenetɔji lə-si, ɗa sisəy tɔ̰y ꞌtoje ngan ko̰ naaje. 9Ngaɓa ꞌɓarəje dəw kara nangə ne bɔ ang, mba dəw kara ɗəgədə baa to Bɔ-sijee, ye gə isi dara. 10Ar-je ɓar-si njekɔr no dəwje ang, mba dəw kara baa ɗəgədə to Njekɔr no-si, ye gə to Kirisi. 11Ye gə to dəw gə bo horo-si gə a to gə njekula lə-si. 12Dəw gə a kunda dɔ-ɛ taar gəgəgə nama, Luba a kuwa dɔ-ɛ kula nangə, ngaa dəw gə ula dɔ-ɛ ngulum ɓa Luba a kun-e kunda-a taar.

13Nekəmandoo to kar-sisəy, njekɔr gəl toronduje gə Parijiyɛ̰je gə to njetar mulaje! Mba uduje ta ɗew ɓeko̰ gə dara dɔ dəwje gə ngaɓa sisəy ja kara andəje kəne ang nəm, cibi ɔgəje nje gə mə-je njigi mba kandə kəne tɔ.

14Nekəmandoo to kar-sisəy, njekɔr gəl toronduje gə Parijiyɛ̰je gə njetar mulaje! Mba o̰je mə kəy lə jene ndubaje ləm-ləm, ɗaa ar-je kəne ja cibi dəji-je Luba ngɔɔgɔ-ngɔɔgɔ ar-je gə kəne əng kuru-si əw ərəje ne kəm dəwje; gəl-e gə nee ɓa, tar gə kədərə a kuwa dɔ-si.#23.14 Bar-ɛ gə nee le godo mə mbede tar lawndaje gə kɛm

15Nekəmandoo to kar-sisəy, njekɔr gəl toronduje gə Parijiyɛ̰je gə njetar mulaje! Mba a̰yje ngɔdə ulaje ngangə babo kadə gə gəl nangə mbugu gə mba kinga dəw kara kar-ɛ to nje ta kagə-si, cibi, lo gə ingaje nj-ɛ nam ɗaa, ꞌtəl ꞌɗa-ɛje gə nje kuba tuji dan pər gə gɔl joo unda sisəy.

16Nekəmandoo to kar-sisəy gə kəm-si tɔ nam ɓa ꞌpaje na a toje njekɔr no dəwje! Sisəy gə ꞌpaje na: To gə ɓo dəw uwa kəy lə Luba ugu ne rɔ-ɛ ɓa ɗa ne ang kara tar godo, ngaa to gə ɓo dəw uwa maa gə kəy lə Luba ɓa ugu ne rɔ-ɛ nama, a ɗa ne gə no ja ɓa. 17Sisəy gə ꞌtoje ɛbɛje ngaɓa nje kəm tɔje! Ne gə ɗa ɓa to ɓəəl ya̰ wa? Maa ose kəy lə Luba gə ꞌsangə maa kəne wa? 18ꞌTəl ꞌpaje na se: To gə ɓo dəw uwa no kɔgə ugu ne rɔ-ɛ ɓa ɗa ne ang kara tar godo dɔ-ɛ gə, ngaa to gə ɓo dəw uwa nenuji gə no kɔgə gə ugu ne rɔ-ɛ nama a ɗa ne gə no ɓa. 19Sisəy nje kəm tɔje, ne gə ɗa ɓa to ɓəəl ya̰ unda mar-ɛ wa? Nenuji ose no kɔgə gə sangə nenuji wa? 20Dəw gə ɓo uwa no kɔgə ɓa ugu ne rɔ-ɛ nama uwa no kɔgə le gə neje tɔ̰y gə to kəne; 21dəw gə uwa kəy lə Luba ugu ne rɔ-ɛ nama uwa kəy gə Luba gə nje kisi kəne naa gə, 22ngaɓa dəw gə uwa dara ugu ne rɔ-ɛ nama uwa gə ngəndəng mbay lə Luba naa gə kara baa gə dəw gə isi kəne tɔ.

23Nekəmandoo to kar-sisəy, njekɔr gəl toronduje gə Parijiyɛ̰je gə njetar mulaje! Mba ɔrəje ne ndu kara dan ne gə dɔg gə kɔr t-ɛ kara mə mbi kam uma gə, gə mbi kamje dang-dang, ɗaa iya̰je ne gə to ɓəəl unda mar-ɛje tɔ̰y mə torondu gə: ne gə gadə-gadə, ɗa məmay, gə to ngon kuji; ye ɓa to ne gə kəm kar-si ꞌɗaje lal kiya̰ kɛs-ɛ gə kɛm. 24Sisəy gə kəm-si tɔ nam ɓa ꞌpaje na ꞌtoje njekɔr no dəwje! ꞌTaje man kay lə-si gə saan hədədə mba kun il kəne, ngaa jambal ɗaa ureje gə guburu-e baa.

25Nekəmandoo to kar-sisəy, njekɔr gəl toronduje gə Parijiyɛ̰je gə njetar mulaje! Mba ꞌtogoje gir ngo kay man gə ngo kusa ne ar-je arə ngadə, ngaa neɓogoje, gə njekəm kə̰yje ɗusu m-e njḭ. 26Parijiyɛ̰ gə nje kəm tɔ! ꞌTogo mə ngo ja kede ar-ɛ arə ngadə ɓa gir-e a karə ngadə ɓi.

27Nekəmandoo to kar-sisəy njekɔr gəl toronduje gə Parijiyɛ̰je gə njetar mulaje! Mba ꞌta-je naa gə dɔbarə gə d-ɔr pɔr kəne gə to pə̰ ɗaga nee baa ngaa kinga nje gə d-uy ɗusu m-e njḭ ngaɓa ne gə ndum mbudugu ja tɔ̰y nəm tɔ. 28To gə be ɓa sisəy kara undaje rɔ-si gadə-gadə kəm dəwje gə ɗaga baa ja ngaa tar mula gə ɗa ne dɔ buguru ja ɗusu mə-si njḭ-njḭ.

29Nekəmandoo to kar-sisəy njekɔr gəl toronduje gə Parijiyɛ̰je gə njetar mulaje! Mba undaje dɔbarə pajambərəje lə Luba cibi ꞌgɔlje dɔbarə dəwje gə gadə-gadə ar-ɛje to pə̰, 30ngaɓa ꞌtəl ꞌpaje na: To gə ɓo ja ga̰ naa gə kara baa gə bɔ-sijee-je dɔ ndɔ gə kede nama, ja kum gə je naa gə mba kum məsə pajambərəje lə Luba nangə ang. 31Be ɓa, kula ɗa sisəy le pa tar naji ila dɔ darɔ-sisəy gə ja to gə ꞌtoje ngan ka dəwje gə tɔl pajambərəje lə Luba. 32A ɓo bənəng nama, ulaje kudu-si gə kede, ꞌtɔlje ne ta kula lə njekuji-sijee gə kede le. 33Sisəy gə ꞌtoje to gə kondɔtɔlje be, a ɗaje ban ɓa a ceje ne ta tar a kuwa dɔ-si no Luba gə, gə a kaw gə si kəm pər gə a to gə no le ang wa? 34Gəl-e gə to gə be ɓa m-ula ne pajambərəje, gə njekəm karəje, gə njekɔr gəl toronduje horo-si gə. Ɗaa a tɔlje nje gə kɛm gə a ɓərəje nje gə kɛm kagə dəsə gə, cibi a kundaje nje gə kɛm gə ndəy abəlay mə kəy nendo gə, cibi ɓa a ndoleje-je gə ɓe-ɓe mba kula kəm-je ndoo. 35Be ɓa tar məsə dəwje gə tar uwa dɔ-je ang gə um nangə uwa ne dɔ-si, un kud-e dɔ məsə Abɛl gə to dəw gə gadə-gadə saar ce ne dɔ məsə Jakari gə, ngon lə Berekiya, gə ꞌtɔl-ɛje horo kəy gə lə Luba gə no kɔgə gə. 36Tɔgərɔ ja m-pa m-ar-si, neje tɔ̰y nee le tar-ɛ a kuwa dɔ gəl kuji gə ɓogəne.

37Dəwje gə Jerujalɛm, dəwje gə Jerujalɛm, sisəy gə ꞌtoje nje tɔl pajambərəje ngaɓa nje gə Luba ula-je kara ꞌcilaje-je gə kɔr ər tɔlje-je, gɔl kandə gə m-njigi dəbə bagə-m dɔ-si gə to gə ko̰ kunja ula ne bəl jam dɔ ngan-ɛ gə be, ngaa ꞌnjigije ang. 38Be ɓa oje: Luba mbadə ne kəy lə-si ar-ɛ uwa ngɔ mɔgɔgɔ. 39Mba m-pa m-ar-si to gə aw gə kede əng le, a ko-mje ang saar kar ndɔ gə a paje na: Luba tɔr ndu dɔ dəw gə ɗe gə ri Mbayɓe!#23.39 1Mb 9.7; Jur 12.7

Currently Selected:

Matiye 23: lap

Highlight

Copy