Matiye 21

Jeju andə mə ɓebo gə Jerujalɛm

Mrk 11.1-10; Lug 19.28-44; Ja̰ 12.12-19

1Ngaɓa logə Jeju je gə ngan njenendoje lə-a d-aw ce dəb gə ɓebo gə Jerujalɛm, ngaɓa ꞌɗe ꞌce dəb mə ɓe gə Ɓɛdəpaje gə to mbɔr dɔ ər gə kagə Olibiyeje d-ar kəne ɗaa, Jeju ula ngan njenendoje joo 2na: Awje mə ɓe gə to no-si gə kən; ɗaa a kingaje ko̰ kororo gə tɔ-ɛ nangə, gə ngon-e mbɔr-ɛ gə ɗaa ꞌtudu-jeje gə tɔg-ɛ ꞌɗeje gə je ar-mje. 3To gə ɓo dəw dəji si tar kəne nama, ilaje kəne na: Mbayɓe ɓa aw ndooje. Ɗaa d-a kiya̰-je kar-si ꞌɗeje gə je.

4Ne nee le to to gə be gə mba kar tar lə pajambərə aw ne lo-e gə:

5 Paje ar-je dəw mə ɓeje gə Siyo̰:

A o Mbay lə-i ɗe gə rɔ-i gə,

To dəw gə aw yururu ngaɓa al ko̰ kororo

Dɔ ngon da gə ko̰-je to da nee kodo. # 21.5 Eja 62.11; Jak 9.9

6Ngan njenendoje d-ɔdə d-aw ɗaa ꞌɗa ne gə go ndu gə Jeju un ar-je le ja. 7ꞌƊeje gə ko̰ kororo je gə ngon-e le, ngaɓa d-umje kubuje lə-je dɔ-je gə d-ar-ɛ n-isi dɔ-ɛ gə ɓi. 8Dəwje bula horo bula dəwje gə ꞌlabə kubuje lə-je nangə ɗəw boo, ngaɓa nje gə kɛm ꞌci kam kagəje gə ꞌcɛdə bar kəm-ɛje ɓa ꞌlabə nangə tɔ. 9Bula dəwje d-ɔr no-ɛ gə nje gə nja go-e gə ꞌnjil ta-je gə, ꞌta ji naa gə miya̰ pa̰y-pa̰y na: Ojana, to dɔ Ngon ka Dabidi gə! Ndu tɔr to dɔ dəw gə ɗe gə ri Mbayɓe!#21.9 Paj 118.25,26 Ojana gə sam dara gə.

10Logə Jeju andə mə ɓe gə Jerujalɛm ɗaa, dəw mə ɓeje tɔ̰y d-aw gə yo gə nee ar-je ꞌpa na: Dəw gə nee to na ja wa? 11Bula dəwje d-ila kəne na: To gə Jeju pajambərə gə mə ɓe Najarɛd, dɔ nangə gə Galile.

Jeju tɔbə nje ɗabə neje mə kəy gə lə Luba

Mrk 11.15-19; Lug 19.45-48

12Jeju andə mə kəy gə lə Luba. N-tɔbə nje ɗabə neje gə nje ndogo neje lo-e gə nee, n-kunda bəgərə lə njembəl larje gə dɔ nekisi nje ɗabə dərje n-tila. 13Ngaɓa n-təl n-pa n-ar-je na: ꞌƊa mə mbede gə na: Kəy lə-m le d-a ɓar-ɛ kəy dəji Luba. Ngaa sisəy ꞌɗaje gə buja lə nje ɓogoje#21.13 Eja 6.7; Jur 7.11.

14Nje kəm tɔje gə njeməndəje ꞌɗe d-inga-a mə ndogo gə, kəy gə lə Luba ɗaa n-aji-je.

15Logə buba njekapoloje gə njekɔr gəl toronduje, d-o neje gə Jeju ɗa ar kar-je uwaje kəne pa̰y gə nganje gə d-uru ꞌkuwi mə kəy gə lə Luba gə na: Ojana, pidi gə kɔsə gaji to kar ngon ka Dabidi ɗaa mə-je o̰-je. 16ꞌTəl ꞌpa d-ar Jeju na: Tar gə nganje pa le o ja wa? Jeju ila-je kəne na: Oyo. Se ꞌturaje tarje gə nee mə mbede gə lə Luba ang wa? Inga pidi lə-i gə go ɗəw gə ta nganje gə na gə gə nje gə ta mba gə.

17N-uba-je n-iya̰-je n-ce mə ɓebo gə ɗaga ər gə ɓebo gə Ɓetani be ngaɓa n-to kəne.

Jeju ugu ne ar kagə tungu

Mrk 11.12-14,19-26; Lug 13.6-9

18Lo kar-ɛ gə ndɔɔ-sḭ, logə Jeju aw təl gə mə ɓe gə ɗaa ɓo ɔr-ɛ. 19N-o kagə tungu kara mbɔr ɗəw boo, n-gangə n-aw gəl-e gə ɗaa n-inga kam-ɛ ja baa to pɔ-pɔ ɗaa n-pa na: A kandə ang gə dɔbo̰ ja! Logə n-pa t-ɛ gə be ja tungu le tudu wɔ. 20Logə ngan njenendoje lə-a d-o be ɗaa lo tar igi-je sɛl ar pa na: Tungu le tudu wɔ gə tɔg-ɛ baa ja to gə ban a ne? 21Jeju ila-je kəne na: Tar gə tɔgərɔ ja, m-pa m-ar-si, to gə ɓo ꞌtaje kagə Luba to gə tɔgərɔ ngaɓa ɓo ꞌɗəgəje tar mə-si ang nama, ne gə ce dɔ kagə tungu gə nee baa ɓa a ɗaje ang, ngaa logə a paje karəje dɔ ər gə nee na: Ɔdə lo gə nee gə aw oso mə babo gə nama, a ɗa to gə be ja tɔ. 22Ne tɔ̰y gə a dəjije Luba gə takagə le, a kingaje ja.

Singamongə lə Jeju

Mrk 11.27-33

23Jeju aw mə kəy gə lə Luba ɗaa, logə n-aw n-tɔji dəwje ne be ɗaa, buba njekapoloje gə buba ɓeje ꞌɗe d-inga-a ꞌdəji-e na: Inga ndu nee ta na gə ɓa aw ɗa ne ne gə nee le wa? Ose na ɓa ar-i ndu mba kar-i ꞌɗa ne wa? 24Jeju ila-je kəne na: ꞌMa kara m-a dəji si tar kara baa ja, to gə ɓo ila-mje kəne nama, m-a pa gəl singamongə lə-m kar-si. 25Batɛm lə Ja̰ le, ḭ ɗa wa? Ḭ rɔ Luba gə, ose ḭ rɔ dəwje gə wa? Be ɓa ꞌwɛdə tar horo naa gə na: To gə ɓo j-ila kəne na: Ḭ rɔ Luba gə nama n-a pa na: Mba ɗi ɓa sisəy ꞌtaje kag-ɛ ang wa? 26To gə ɓo j-ila kəne na: Ḭ rɔ dəwje gə nama, j-a kinga tar ta bula dəwje gə, mba dəwje tɔ̰y ja ꞌgərə to gə Ja̰ to pajambərə. 27Be ɓa d-ila Jeju kəne na: J-a gərə ang. Ɗaa n-təl n-pa n-ar-je na: ꞌMa ja kara dəw gə ar-m ndu ɓa m-ɗa ne ne gə kən le m-a pa kar-si ang tɔ.

Gusutar lə nganje gə joo

28Əjije kəne ban wa? Jingaw kara ngan-ɛ gə jingaw d-ḭ joo; N-un tar n-pa n-ar ye gə dɔngɔr na se: Ngon-m, aw ɗa kula ɓogəne mə ndɔ bḭyə̰ gə nəm. 29N-ila kəne na: M-njigi ang ngaa go-e gə ɗaa n-təl n-turu kəji lə-a, n-ɔdə n-aw ndɔɔ le. 30Jingaw le təl pa ar ngon-e gə njekum gə joo kar-ɛ aw ndɔɔ le tɔ. Ɗaa ye ila kəne na: Oyo bɔy, m-a kaw ja, ngaa təl mbadə kaw ndɔɔ le. 31Horo nganje gə joo nee le, na ɓa ɗa mə njigi lə bɔ-ɛje wa? D-ila-je kəne na: Ye gə dɔngɔr. Ɗaa Jeju təl pa ar-je na: Tɔgərɔ, m-pa m-ar-si, njembo̰ lar gədə ɓeje gə jene kayaje d-a ce mə ɓeko̰ gə dara no-si gə kede. 32Mba Ja̰ ɗe rɔ-si gə gə ɗəw gə gadə-gadə, ngaa ꞌtaje kag-ɛ ang. Ɗaa njembo̰ lar gədə ɓeje gə jene kayaje ɓa ꞌta kag-ɛ, ngaɓa oje neje nee le gə kəm-si ja ngaa ꞌmbadəje mba turu kəji lə-si gə mba ta kag-ɛ.

Gusutar gə ɔji dɔ nje ɗa kula bḭyə̰ gə to njeməngo̰yje

Mrk 12.1-12; Lug 20.9-19

33Oje gusutar gə ɗangə ɓi: Jingaw njekəy kara maa kagə gə ri-a na bḭyə̰. N-ula kinga n-ay ne ngang-ɛje mbugu, n-uru buwa kar ndəy man bḭyə̰ cibi n-ɗa kəy lo t-ɛ gə; ngaɓa n-iya̰ ji njeɗa kula bḭyə̰je gə ɗaa n-ɔdə n-aw mbaa gə. 34Logə dɔ kar kunja kand-e asə ɗaa n-ula ngan njekulaje lə-a ɓə lə njeɗa kula bḭyə̰je le, mba kar ꞌta kandə bḭyə̰ k-ɛ le ꞌɗe ne d-ar-ɛ. 35Ngaa njeɗa kula bḭyə̰je le d-uwa ngon njekula gə kara ꞌkunda mbugu-mbugu, d-uwa ye gə kara ꞌtɔl-ɛ ngaɓa ꞌcila njekum gə munda gə kɔr ər ꞌtɔl-ɛ. 36N-təl n-ula ngan njekulaje gə ɗangə gə ꞌbula d-unda nje gə kede ja cibi, ngaa njeɗa kula bḭyə̰je le ꞌɗa to gə mar-ɛ le ɓi. 37Ɗud-e ɗaa, n-təl n-ula ngon-e ja ngaa ɓə lə-je, mba n-əji na: Ɓo to ngon-m nama d-a ɓəəl-e. 38Ngaa logə njeɗa kula bḭyə̰je d-o ngon njigi le ɗaa, ꞌpa tar horo naa gə na: Nje kuwa nenduba le ja aw ɗe a aw, ꞌɗeje ar-si j-uwaje j-a tɔl-ɛje ɗaa nenduba lə-a le a to kar-si. 39Be ɓa d-uwa-a, ꞌndɔr-ɛ mə ndɔ bḭyə̰ d-aw sə-a gir kinga gə ɗaga ɗaa ꞌtɔl-ɛ d-ila-a kɔrɔ. 40Jeju dəji na: Logə njendɔ le a ɗe le ɗi ɓa a ɗa gə njeɗa kula bḭyə̰je nee le wa? 41D-ila-je kəne na: N-a busu njeməngo̰yje nee le ɗaa n-a kun ndɔ bḭyə̰ le kula ji nje ndɔ-ɛje gə ɗangə mba kar dɔ kar kunja-a nama d-a kar-ɛ kand-e. 42Jeju təl pa ar-je na: ꞌTuraje mə mbede gə lə Luba ang ja tɔgərɔ wa? Tar gə na:

Ər gə njekunda kəyje ꞌmbadə le

Təl to gə ngaw dan-ɛ, ye ja to kil kəy gə

To kula ɗa lə Mbayɓe Luba,

Ɗaa to ne gə karə kar dəw uwa ne pa̰y ta kəm-je gə ja! # 21.42 Paj 118.22

43Gəl-e gə nee ɓa, m-pa m-ar-si, Luba a kɔr ɓeko̰ lə-a ji-si gə mba kar gəl kuji dəwje gə ꞌɗa kul-ɛ mba kar kand-e to. 44Dəw gə a ce koso dɔ ər gə nama a guru rɔ-ɛ kəne, ngaɓa dəw gə ər nee a ce koso dɔ-ɛ nama a rund-e pulug-pulug.

45Logə buba njekapoloje gə Parijiyɛ̰je d-o gusutar nee le ɗaa ꞌgərə to gə Jeju pa ɔji dɔ-je; 46be ɓa d-aw sangə ɗəw gə mba kuwa-a, ngaa ꞌɓəəl bula dəwje gə ꞌgərə Jeju gə pajambərə.

Currently Selected:

Matiye 21: lap

Highlight

Copy