Matiye 20

Gusutar gə ɔji dɔ njekulaje

1Be ɓa, ɓeko̰ gə dara le to asə naa gə dəw gə njekəy gə ce gə ndɔɔ-sḭ baa mba kodo njekulaje kar d-aw mə ndɔ bḭyə̰ gə lə-a. 2N-gɔl gə njekulaje mba kuga-je gə lar sagə kara kəm ndɔ kara ngaɓa n-ula-je mə ndɔ bḭyə̰ gə le ɓi. 3Logə n-ce ɗaga gə kar gə asə ji nay kara be gə ndɔɔ-sḭ ɗaa n-o njekulaje gə kɛm gə d-ar nada baa, lal kula 4be ɓa n-təl pa n-ar-je na: Sisəy kara awje ndɔ bḭyə̰ gə lə-m aw ɗaje kula nama, m-a kuga dɔ ji-si gə dɔ gɔl-ɛ ja. 5D-ɔdə d-aw ɗaa Njekəy le təl ce to gə ɗangə gə kar gə ar dana, ngaɓa gə kar gə ila mbɔr-ɛ, ɗaa n-ɗa to gə mar-ɛ le ja cibi. 6Logə kar um ji-a dɔ baa gə ɗaa njekəy le təl ce ɗaa, inga dəwje gə d-ar nada baa ja cibi, ɗaa dəji-je na: Mba ɗi ja ar-je lo gə nee gə gə ndɔɔ baa ja lal ɗa kula wa? 7D-ila-a kəne na: Mba dəw un si kula gə ang. N-pa n-ar-je na: Ɓo be ɗaa ɔdəje awje ndɔ bḭyə̰ gə lə-m tɔ. 8Logə kar andə sɔlɔgə ɗaa, njendɔ bḭyə̰ le pa ar njengom neje lə-a na: ꞌƁar njekulaje le ɓo uga dɔ ji-je, un kud-e dɔ nje gə dɔ gugu gə ɓa ce ne dɔ nje gə dɔngɔr gə. 9Dəwje gə ꞌɗe gə kar gə um ji-a dɔ baa gə le, dəw kara ɗaa inga lar kula gə kəm ndɔ kara. 10Nje gə ꞌɗa kula dɔngɔr le, d-unda mə-je to gə d-a kinga lar dɔ mar-ɛ gə, ngaa ꞌjeje ja kara d-inga lar kula gə kəm ndɔ kara baa ja tɔ. 11Logə ꞌtaje lar lə-je ɗaa ꞌyṵrṵje tar dɔ njendɔ gə le 12na: Nje gə ɗe dɔ gugu gə kuru-je kara əw asə kar kara baa ja kara, uga-je asə naa gə sijee gə j-ula rɔ-si ndubu dan kara saar ɓisine wa? 13Njendɔ le ila ye gə kara kəne na: Njekura! M-ɗa-i kṵra̰y ang baa, ndu-si asə naa dɔ lar gə ang wa? 14ꞌTa lar lə-i ɓo aw lo lə-i. ꞌMa m-njigi kar dəw gə dɔ gugu to gə m-ar-i be ja tɔ. 15Lar lə-m le ɗəw to mba kar-m m-ɗa ne ne gə mə-m njigi ang wa? Mba ɗi ɓa ꞌɗa mə mba məmay gə m-ɗa wa? 16Be ɓa dəwje gə dɔ gugu d-a təl to dəwje gə dɔngɔr ngaɓa nje gə dɔngɔr d-a təl to dəwje gə dɔ gugu.

Jeju ila mbərə kuy lə-a gə ce mə buwa yo gə

Mrk 10.32-34; Lug 18.31-34

17Logə Jeju a kaw kun ɗəw mba kaw gə Jerujalɛm ɗaa, ɓar ngan njenendoje lə-a gə dɔg gə gir-je gə joo ar gə je nganga̰ pa tar ɗəw boo ar-je na: 18Oje: J-awje gə Jerujalɛm, ɗaa d-a kila ꞌma gə Ngon lə dəw mə ji buba njekapoloje gə ji njekɔr gəl toronduje gə. D-a gangə tar yo dɔ-m gə, 19ngaɓa d-a kila-m mə ji dəwje gə ꞌgərə Luba ang gə, kar d-a kogo-m, d-a labə-m gə ndəy abəlay ngaɓa d-a ɓərə-m kagə dəsə gə; ndɔ gə njekum gə munda ɗaa m-a ndol.

Ne dəji lə ko̰ Jagə je gə Ja̰ je

Mrk 10.35-45; Lug 22.24-47

20Be ɓa ko̰ ngan lə Jebede ɗe gə ngan-ɛ inga ne Jeju, unda ꞌburamba no-ɛ gə mba dəji-e ne. 21Jeju dəji-e na: Ɗi ɓa ꞌi njigi wa? Jene le təl ila-a kəne na: M-njigi kar un ndu-i to gə ngan-m gə joo nee le, ar dəw gə kara isi dɔ ji kɔl-i gə ngaɓa dəw gə kara isi dɔ ji gəl-i gə mə ɓeko̰ gə lə-i. 22Jeju təl ila kəne na: Ne gə ꞌdəjije le ꞌgərəje ang. Ne kay ꞌməsərə gə m-a kay le a kasə kayje ja tɔ wa? D-ila-a kəne na: J-a kasə ja. 23Jeju ila-je kəne na: A kayje sə-m to gə tɔgərɔ ja, ngaa tar gə ɔji dɔ kisi dɔ ji kɔl-m gə ose dɔ ji gəl-m gə le to tar lə-m ꞌma ang baa, to mba nje gə Bɔy gɔl ɔji dɔ-je. 24Ngan njenendoje gə dɔg gə d-o tar gə nee le, mə-je o̰je dɔ ngan ko̰ naaje gə joo le. 25Jeju ɓar-je ngaɓa pa ar-je na: ꞌGərəje gə maj-ɛ to gə mbayje le d-o̰ dɔ dəw mə ɓeje gə singa, ngaɓa dəwje gə bo-bo d-ula kəm-je ndoo. 26A to to gə be horo-sisəy gə ang. Ngaa, dəw gə njigi to ɓəəl horo-si gə nama may kar to ngon njekula lə-si ɓa, 27ngaɓa dəw gə njigi kar no-si gə kede nama, a to ngon njekula lə-si ɓa. 28Be ɓa ꞌma gə Ngon lə dəw m-ɗe mba kar ꞌɗa kula d-ar-m ang, ngaa mba to ngon njekula, gə kun təbə lə-m gə nekuga dɔ dəwje bula.

Jeju aji nje kəm tɔje joo gə mə ɓe gə Jeriko

Mrk 10.46-52; Lug 18.35-43

29Jeju je ngan njenendoje d-ɔsə lo ꞌce mə ɓe gə Jeriko ɗaa, dəwje bula d-uwa go-je. 30Oje, nje kəm tɔje joo d-isi mbɔr ɗəw boo, logə d-o to gə Jeju aw nday ɗaa d-uru ꞌkuwi na: Mbayɓe, Ngon ka Dabidi, o kəmtondoo lə-si. 31Bula dəwje d-ḭ gə je mba kar d-əw rɔ-je ngaa d-uru ꞌkuwi le gə singa-je ja cibi na: Mbayɓe, Ngon ka Dabidi, o kəmtondoo lə-si. 32Jeju təl ar nangə, ɓar-je, dəji-je na: Ɗi ɓa ꞌnjigije kar-m m-ɗa m-ar-si wa? 33ꞌTəl d-ila-a kəne na: Mbayɓe, ar kəm-si o lo. 34Jeju o kəmtondoo lə-je ɗaa ula ji-a ɔr ne kəm-je; gə lo-e gə əng ja d-o lo ɗaa, d-ɔdə d-uwa go-e.

Currently Selected:

Matiye 20: lap

Highlight

Copy